1. Taita Diosman rijchata rurashcamandaca ¿imacunatallata rurai ushanchi?

HUAHUACUNA taitashna ricujujpi o taitashna imatapash rurajpimi huahuacunataca “taitalla taitallami” can nin. Jehová Diosmi ñucanchiman causaita curca. Chaimandami paica ñucanchi Taita can (Sal. 36:9). Ashtahuangarin paiman rijchata rurajpimi gentecunaca pensarinchi, imata ruranatapash agllai ushanchi, ali amigocunatapash chari ushanchi (Gén. 1:26).

2. ¿Imamandata Jehovapa ali amigo tucuita ushanchi?

² ¿Imamandata Jehovapa ali amigo tucuita ushanchi? Jehová Dios juyajpi, shinallata Jehová Diospi, Jesuspi feta churaimandami ñucanchicunaca Paipa ali amigo tucuita ushanchi. Jesusca nircami: ‘Taita Diosca, cai pachapi causajcunata ninanda juyashpami paipa shujlla Churita caramurca. Pipash paita crishpaca na chingaita chingagringachu causaitami causagringa’ nishpa (Juan 3:16). Ashtaca gentecunami Jehová Diospa amigo caita ushashca. Shinaca, Jehová Diospa ishcai ali amigocunapa ejemplota ricupashunchi.

3, 4. Abrahanda israelitacunahuan chimbapurashpa ricujpica ¿imashinata Abrahanga carca?

³ Israelitacunapa taita Abrahandaca Jehová Diosca nircami, paica ‘ñucapa ali cumba [“amigomi”, NM]’ can nishpa (Is. 41:8).  Abrahanga shinlli feta charimandami paipa tucui causaipi Taita Diospa ali amigo caita usharca (Gén. 15:6; Santiago 2:​21-23, liingui).

⁴ Cutin israelitacunaca callaripillami Taita Diospa ali amigocuna carca. Paicunaca callaripillami Taitata cuenda chasquirca. Shinapash jipamanga Jehovapa nishcacunapi ñana crishpami Jehovapa amigo canata saquirca.

5, 6. a) Jehovapa ali amigo cangapaca ¿imatata rurapashcangui? b) ¿Ima tapuicunapita pensarina capanchi?

⁵ Jehová Diosmanda ashtahuan yachajushpaca ashtahuan shinlli fetami charingui, Jehová Diostapash ashtahuanmi juyangui. Yaripashun. Ñaupa huatacunapica Jehová Dios cierto tiajtaca na yacharcanchichu. Shinapash Jehová Dios cierto tiajta, paipa amigo tucunalla cashcatami yachajushcanchi. Shinallata Adanba culpamanda ñucanchicunapash juchayucuna cashcata, Taita Diosmanda carupi cashpapash paiman quimirinalla cashcatami yachajushcanchi (Col. 1:21). Ashtahuangarin ñucanchicunata juyashpa, paipa Churita cachamushcata crishpa, Jesuspi feta churashpami Jehová Diospa ali amigo tucui callarircanchi.

⁶ Shinaca tapuripashunchi: “Jehovapa ashtahuan ali Amigo cangapaca ¿imatata rurajuni? ¿Tucui shunguhuanllu Jehová Diospi confiani? ¿Cada punllachu Jehová Diostaca ashtahuan juyani?” nishpa. Cunanga Gedeonba ejemplota ricushpa paipa ali ejemplota catipashunchi. Paipash Jehovapa ali amigomi carca.

7-9. a) Gedeonga ¿ima llaquipita carca? b) Shinapash ¿imata tucurca? (Callari dibujota ricupangui.) c) ¿Imashinata Jehovahuan ashtahuan ali amigo tucuita ushapanchi?

⁷ Israelitacuna Canaán alpacunaman yaicushca jipaca madianitacunami paicunata llaquichingapaj shamunajurca. Chai llaqui punllacunapimi Gedeonga juez carca. Jueces capítulo 6​pi nishca shinaca, Gedeonga Ofrá nishca llactapimi uvasta capina pushtupi trigota huajtashpa shayajurca. Shina shayajujpimi shuj ángel ricurishpa Gedeondaca nirca: ‘Ninan shinlli, imatapash na manllaj runami’ cangui nishpa. Shina nijpimi Gedeonga manllarishpa nirca, Egiptomanda israelitacunata salvashca Diosca ciertopachachu ñucanchitapash ayudagrin nishpa. Gedeón shina nijpimi, angelca nirca, Jehová Diosca ayudangami nishpa. Angelhuan parlashpaca Jehová Dios cierto tiashcata crishpami Gedeonga parlajurca.

⁸ Jehová Dios ayudangami nijpica Gedeonga yarcami ¿imashinashi ‘israelcunataca madianitacunapa maquimanda llujchinga’? nishpa. Shina yajujpimi Jehová Diosca nirca: ‘Na llullashpami nini, ñucami canhuan casha. Madianitacunataca shujlla runatashnami mishangui’ nishpa (Juec. 6:​11-16). Shina nijpipash imashinashi ayudanga yashpami Gedeonga shuj señalta ricuchihuai nirca.

⁹ Shina nishpallami Gedeonga micunaguta yanushpa Taita Diospa angelman cararca. Shina rurajpica angelca paipa vara caspihuan micunata tacarishpami micunataca ninahuan rupachishpa tucuchirca. Chaita ricushcandimi Gedeonga chai angelca Jehová Diospa randi parlajushcata crishpa nirca: ‘Mandaj Jatun Dioslla, Mandaj Diospa angeltamari ñavi ñavi ricushcani’ nishpa (Juec. 6:​17-22). Angelhuan parlashpami Gedeonga Jehová Diosta ashtahuan ali rijsishpa, Jehovapi feta churashpa tranquilo sintirirca. Ashtahuangarin chai pushtupica shuj altarta rurashpami chai altartaca ‘Mandaj Diosca casilla ali causaigutami caran’ nishpa shutichirca (Jueces 6:​23, 24, liingui). Shinaca, ñucanchicunapash cada punlla Jehová Dios imata carashcapi  pensaripashunchi. Shinami Jehová Dios ñucanchipa ashtahuan ali Amigo cashcata cuenta japishun. Jehovata ashtahuan ashtahuan mañashpacarin, ashtahuan tranquilo sintirishpami paipa ashtahuan ali amigo tucushun.

10. Salmo 15:​3, 5​pi nishca shinaca, Jehová Diospa amigo cangapaca ¿imatata rurana capanchi?

¹⁰ Jehová Diospa ‘jatun carpapi’ o Jehová Diospa ali amigo cangapaca Salmo capítulo 15​pi shimicunatami cazuna canchi (Sal. 15:1). Shinapash cunanga na juchachishpa parlanamanda, honrado canamanda yachajushun. Rey Davidca nircami, ‘ali shungu runata na llaquichijcuna, imatapash pacalla cujujpi na japijcunami’ Jehová Diospa jatun carpagupica causanga nishpa (Sal. 15:​3, 5).

11. ¿Imamandata shujcunata juchachishpa parlanamanda jarcarina capanchi?

¹¹ Salmo 34:13​pipash Davidca nircami: ‘Canba jalluhuan nalita rimanataca’ cuidarishpami causana cangui nishpa (Sal. 34:13). Cai consejota na cazushpa shujcunata juchachishpa parlajushpaca Taita Diospa amigo caitaca na ushashunllu. Shujcunata juchachishpaca Taita Diospa contra Diablopa chaquitami catinajunchiman. Diablotami griego shimipica llullashpa juchachin nin. Shinaca, Jehová Diospa amigo cangapaj munashpaca na shujcunata juchachishpa parlanachu canchi, shinallata na pitapash juchachishpa shujcunaman parlajunachu canchi. Ashtahuanbachaca congregacionbi ñaupajman pushaj huauquicunata juchachishpa parlanamandami cuidarina canchi (Hebreos 13:17; 1 Tesalonicenses 5:​12, liingui)

12, 13. a) ¿Imamandata tucuipi honrado cana capanchi? b) Ñucanchicuna honrado cajta ricushpaca ¿imatata shuj gentecunapash ruranga?

¹² Jehovata sirvijcunaca tucuicunahuan tucuipimi honrado canchi. Apóstol Pabloca nircami: ‘Ñucanchimandapash Diosta mañapanguichi. Ñucanchipash ali yuyaihuan, tucuita aliguta rurangapaj [“honrado cangapaj”, NM] munashpami, chaita ruranata yaria causanajunchi’ nishpa (Heb. 13:18). Tucuipi honrado cangapaj munaimandami, Testigo trabajadorcunata charishpaca na paicunamanda aprovecharina canchi, mashnata pagasha nishcatami pagana canchi. Shinallata ñucanchita trabajachidorcuna Testigocuna cajpica ñucanchipash na aprovecharinachu canchi, na nijunachu canchi Testigo huauqui caimandami ñucataca ashtahuan ali tratana can nishpa.

¹³ Jehovata na sirvij gentecunapash Testigocunataca alicachishpami ricun. Shuj jatun empresamanda directorca nircami: “Cangunaca siempremi imata nishcata pactachinguichi” nishpa (Sal. 15:4). Aliguta portarishpami Jehová Diospa amigo cashpa catita ushashun, shujcunapash Jehovata alicachichun ayudashun.

14, 15. Shuj gentecunapash Taita Diospa amigo tucuchunga ¿imashinata ayudashun?

¹⁴ Imashinami villachingapaj llujchishpa ricushcanchi, ashtaca gentecunaca Taita Dios tiajta crishpapash Taita Dios paicunapa amigo tucunalla cajtaca na ninllu. Shinaca ¿imashinata chai gentecunataca ayudashun? Jesús imata rurashcata yaripashunchi. Paipa 70 yachajujcunata ishcai ishcai villachun cachajushpaca nircami: ‘Maijan huasiman chayashpapash: “Cangunaman Taita Dios ali causaita carachun” ninami canguichi. Maijanbash aliguta chasquij tiashpaca casilla aligutami causanga. Chai shimita na chasquijpica cangunamanllatami tigranga’ nishpa (Luc. 10:​5, 6). Cushilla parlajpica gentecunaca  uyangapaj munangami, ñucanchita na ricunayachijcunapash shuj punllaca tal vez ñana culirangachu. Ashtahuangarin shuj punllaca cushilla chasquingapashchari.

¹⁵ Panda religionda o nali costumbrecunata na saquingapaj munaj gentecunahuan parlashpapash na culiranchichu cushillami parlanchi. Cutin, cai nali mundopi causajuimanda nali sintirinajuj gentecunatapash ñucanchi tandanajuicunapica cushijushpami chasquinchi. Shuj ejemplocunatapash ricungapaj munashpaca “La Biblia les cambió la vida” temata La Atalaya revistapi ricupangui.

16. ¿Imashinata Jehová Diospa amigocuna, ‘ayudajcuna’ cai ushanchi?

¹⁶ Trabajopi cumbacunahuan igual trabajashpaca ali amigocunami tucunchi. Shinallata, Jehovata sirvijcunapash tucuicunami Jehovaman mingarishcanchi. Tucuicunatami Jehová Diosca paipa amigocunata, paipa ‘ayudajcunata’ cuenda ricun (1 Corintios 3:​9, liingui). Gentecunaman villachishpa, yachachishpami ñucanchi Taita Jehová Diosta ashtahuan rijsinchi, paipa espíritu santohuan ayudajujtapash sintinchi.

17. Jehová Diosca ¿imashinata jatun tandanajuicunahuan ricuchishca ñucanchi Amigo cashcata?

¹⁷ Ashtahuan villachishpaca ashtahuanmi Jehová Diosman quimirinchi. Contracuna ñucanchita ama llaquichichun Jehová Dios cuidajujtapash sintinchimi. Cai último huatacunapicarin ali alimi Jehová Diosca yachachijushca. Jatun tandanajuicunahuanmi Jehová Diosca ñucanchicunata juyashcata ñucanchi minishtishcacunata cujushca. Quimsa Punlla Jatun Tandanajuiman rishca jipaca shuj familiaca cashna nishpami escribirca: “Cai jatun tandanajuipica shunguman chayajtami yachachirca. Jehová Diosca tucuillatami juyan cashca, ñucanchicuna ali causachun munashpami imatapash nin” nishpa. Alemania llactamanda cusahuarmica Irlanda llactapi shuj jatun tandanajuiman rijpi huauquipanicuna ali chasquijpimi ninanda cushijurca. Paicunaca nircami: “Ashtahuanbachaca Jehová Diosta, Jesustami agradicinchi tucuicunahuan tandanajuchun invitashcamanda. Dublín llactapi jatun tandanajuiman shamushpa, tucuicunahuan Jehová Diosta adoranaca shuj jatun bendicionmi cashca. Ima horapash na cungashunllu” nishpa.

18. ¿Ima tapuicunapita pensarina capanchi?

¹⁸ Aliguta parlashpaca ashtahuan ali amigocunami tucunchi. Cunan punllacunapica  mundo enteropi ashtaca gentecunami Internetpi o celularcunapi ashtaca mensajecunata cachan. Shinapash tapuripashunchi: “Ñucapaca ¿imata ashtahuan importante can? ¿ Jehová Dioshuan parlanataca yariachu causajuni? nishpa. Jehová Diosca ñucanchi oraciongunata uyanmi (Sal. 65:2). Shinaca ¿paihuan parlangapaj tiempota llujchijunichu? nishpa tapuripashunchi.

19. Ñucanchi shungupi imata charishcata Jehová Diosman na villai ushashpaca ¿imatata rurana capanchi?

¹⁹ Huaquingunaca Jehovata mañajushpapash imata shungupi charishcata, imata pensajushcata na ni ushanllu. Shinapash Jehová Diosca shungu ucumanda paihuan parlachunmi munan (Sal. 119:145; Lam. 3:41). Imata ninata na yachajpica Taita Diosca ayudanmi. Apóstol Pabloca Roma llactamanda huauquipanicunataca nircami: ‘Diosta imata mañanatapash na ushashcami canchi. Shina cajpipash paipa espiritullatami na rimai ushanalla shimicunahuan ñucanchimandaca Diosta mañariajun. Ashtahuangarin paipa espíritu imata yarichijujtapash yachanmi. Diospa espirituca Taita Dios munashcashnami paipalla causajcunamanda mañariajun’ nishpa (Rom. 8:​26, 27). Ñucanchi shungupi imata charishcacunata Jehová Diosman villashpa mañangapaca Job, Salmos, Proverbios librocunapi escribishcacunatami liina canchi.

20, 21. Filipenses 4:​6, 7​pi shimicunaca ¿imashinata animan?

²⁰ Llaquipi cashpaca Filipos llactapi huauquipanicunaman apóstol Pablo escribishca consejotami catina canchi. Paica nircami: ‘Ima illajpipash na chaitalla yariashpa llaquilla causanachu canguichi. Ashtahuangarin Taita Diosmanmi imatapash villashpa ninanda mañana canguichi. Tucui imamandapash pagui nishpa mañaichilla. Casilla ali causaitaca Taita Diosmi caramunga. Chashna aliguta causanataca pipash na yachajui ushanalla cajpimi cangunapa shungutapash, yuyaicunatapash Cristo Jesushuan shujlla tucushcamanda’ cuidajunga nishpa (Filip. 4:​6, 7). Jehová Dioshuan parlashpaca ashtahuan shinlliyashpami cushilla sintirinchi. Shinaca, ‘casilla ali causaita Taita Dios caramushpa ñucanchi yuyaita, shunguta cuidajushcamandaca ashtacatami Jehová Diosta agradicina canchi.

²¹ ‘Taita Diosta mañanata na saquishpami’ paiman ashtahuan quimirishpa paipa ali amigo tucushun (1 Tes. 5:17). Taita Diosman ashtahuan quimirishpa paipa mandashcacunata pactachichun cai tema ayudashpaca alimi capanman. Shinallata Jehová Dios ñucanchi Taita, ñucanchi Dios, ñucanchi Amigo cashcataca yaria causapashunchi.