Problemacuna ricurijpica chaipillata cutin cutin pensarinajushpami shaijushca sintirishpa imacunatapash yai callarinchi. Rey Davidpash ashtaca llaquicunatami charirca. Shinapash llaquicuna japijpica ¿imatata rurarca? Rey Davidca Taita Diosta ayudahuai nishpami cashna mañarca: ‘Ñucata llaquichunmi Mandaj Diostaca caparishpa mañajusha. Ñuca llaquitaca paimanmi ricuchisha, paimanmi villasha. Ñuca espíritu ñucapillata ninanda llaquirijujpica canmi ricuhuarcangui’ nishpa (Sal. 142:​1-3).

Shuj Salmopipash Davidca nircami: ‘Shuj mañaigutallami Mandaj Diostaca mañarcani. Tucui ñuca causaipi Mandaj Diospa huasipi cashpa, Mandaj Dios juyaillagu cajtami ricungapaj mañarcani’ nishpa (Sal. 27:4). Davidpa punllacunapi gentecunaca tabernáculo carpa huasipimi Taita Diostaca adoran carian. Rey Davidca na levita caimandami canlla patiomandalla tabernáculo carpa huasitaca ricushpa shayajurca. Shinapash Taita Diosta ninanda agradicishpami Davidca paipa tucui causaipi ‘Diospa huasipi cashpa, Mandaj Dios juyaillagu cajta ricungapaj’ munarca.

Hebreo shimipi juyaillagu nishpaca, ali ali cashcata, cushilla cashcatami shina nin. Gentecuna paita adorachun Jehová Dios ali arreglocunata rurashcataca Rey Davidca ninandami alicachirca. Ñucanchicunapash rey David cuendachu ¿Taita Diospa arreglocunataca alicachinchi?

Cunanbica Jehová Diosta adorangapaca tabernáculo carpa huasitaca ñana minishtinchichu. Ñucanchicuna paita ali adorachunga Jehová Diosllatami huaquin arreglocunata rurashca. * Jehová Diospa arreglocunata alicachishpaca rey Davidshnami ‘Mandaj Dios juyaillagu cashcata’ ricushun.

Tabernáculo carpa huasi yaicunapica Taita Diosman animalcunata rupachishpa cungapami shuj altar tian carin. Chai altarca gentecunamanda Jesuspa causaita Jehová Dios chasquinatami ricuchijurca (Éx. 38:​1, 2; 40:​6; Heb. 10:​5-​10). Chaita yachajunaca ¿imashinata ñucanchitaca ayudan? Apóstol Pabloca escribircami: “Diosta fiñajcuna cashpapash, paipaj Churi Cristo huañujpimi, Taita Dioshuan ali tucurcanchi” nishpa (Rom. 5:10). Jesús ñucanchimanda huañushcata crishpaca, Diospa ñaupajpi ali ricurishpami paiman ashtahuan quimirishpa paipa ali amigocuna tucunchi (Sal. 25:14).

Taita Dios ñucanchi juchacunata perdonajpimi ‘samashpa causana huatacunata Jatun Diosca caramun’ (Hech. 3:19). Chaita aliguta intindingapaca pensaripashunchi, shuj nali runa preso yaicushca jipa tucui shunguhuan arripintirishpa cambiai callarijpica huañuna sentenciatapash juezca perdonanmi. Ñucanchicunaca chai preso runa cuendami carcanchi. Shinapash Jehová Diosca ñucanchicuna tucui shunguhuan arripintirishpa cambiajpimi perdonan.

Rey Davidca Jehová Diospa tabernáculo carpa huasiman rishpami gentecuna imashina tandanajujta, Taita Diospa Leyta imashina liijta, imashina yachachijta ricun carian. Shinallata inciensota imashina rupachijta, chai punllacunapi sacerdotecuna, levitacuna imata ruranajujtapashmi ricun carian (Éx. 30:​34-​38; Núm. 3:​5-8; Deut. 31:​9-​12). Cunan punllacunapica ¿imatata ricui ushanchi?

 Bibliapica ninmi: ‘Huauquipura juyarishpa tandanajushpa causanaca alipacha juyaillagumi’ can nishpa (Sal. 133:1). Huauquipanicunaca cunanbipash shamuj punllacunapipash cushijushpami tandanajun. Mundo enteropica ashtaca huauquipanicunami miranajun (1 Ped. 2:17). Shinallata tandanajuicunapimi Bibliata liishpa, aliguta intindichin. Ashtahuangarin Jehová Diosca paipa organizacionhuanmi ñucanchicunataca Bibliata aliguta intindichin. Ñucanchilla cashpa o ñucanchi familiahuan Bibliata aliguta yachajuchunga ashtaca publicaciongunatami cun. Cuerpo Gobernantemanda shuj huauquica nircami: “Diospa Shimipi aliguta pensarishpa ashtahuan intindinata, yachajunata mascashpaca charij charij cuenda sintirishpami ninanda cushijuni” nishpa. Imashinami ricupanchi Taita Diospa ali yachaicuna shunguman chayajpimi cushijushpa causanchi (Prov. 2:10.)

Punda tiempocunapishnami cunanbi Jehová Diosta sirvijcunaca mishquilla ashnajuj inciensota rupachijuj cuenda Jehová Diostaca mañanajunchi (Sal. 141:2). Ñucanchi oraciongunata Jehová Dios alicachishpa uyajujta yachashpaca alimi sintirinchi.

Moisesca Jehová Diostaca mañarcami: “Ñucanchita Mandaj Taita Dioslla can juyaillagu cajta ricuchihuayari. Ñucanchi maquihuan rurashcacunataca [...] shinllita shayachipayari” nishpa (Sal. 90:​17, NM). Shinaca tucui shunguhuan villachijpica Jehová Dios bendicianmi (Prov. 10:22). Huaquingunaca gentecunata ayudashcanchimi Jehovata sirvichun o na uyangapaj munajpipash, rimajpipash ungushca cashpapash llaquilla cashpapashmi villachishcanchi (1 Tes. 2:2). Shinapash Jehová Dios juyaillagu cajta, ñucanchi rurashcacunata cushijushpa chasquijtami ricushcanchi.

Rey Davidca nircami: ‘Mandaj Diosca, ñucaman carashca alpashna, ñuca copashnami [can]. Ñuca causaitaca canmi charipangui. Ñucaman alpata midijpica, alipacha pushtupimi urmarcani’ nishpa (Sal. 16:​5, 6). Rey Davidca Jehovapa ñaupajpi ali ricurishpa paita sirvi ushashpami nirca, Mandaj Diosca ñucaman carashca alpashnami can nishpa. Rey Davidshna ashtaca llaquicunata charishpapash ashtaca bendiciongunatami charishcanchi. Shinaca Jehová Diosta adoranata alicachishpa pai munashca shina ali adorashunchi.