Bibliapica ninmi, poderta charij huaquin gentecunaca débil gentecunamanda aprovecharinmi nishpa. Shuj ejemplota ricupashun. Rey Acabca Nabotpa, Nabotpa churicunapa uvas pambacunata munashpami purijurca. Chaita yachashpami rey Acabpa huarmi reina Jezabelca yangata juchachishpa Nabotta huañuchirca. Chaita yachashpapash Acabca na imatapash rurarcachu (1 Reyes 21:​1-16; 2 Reyes 9:26). Shinaca ¿imamandata Taita Diosca chashna cosascuna pasachun saquirca? Ricupashun.

Pundapica Taita Diosca na llullanllu (Tito 1:⁠2). Taita Diosca callarimandallatami Adanda Evataca nirca, na cazushpaca huañunguichimi nishpa. Shinapash paicunaca na cazurcachu. Paicunapa culpamandami tucui gentecuna huañunchi. Cainbash pai charishca poderta aprovechashpami paipa huauqui Abeltaca huañuchirca (Génesis 2:​16, 17; 4:⁠8).

Bibliaca ninmi: ‘Runaca paipa llaquipallatami caishuj runata llaquichijun’ nishpa (Eclesiastés 8:⁠9). Israelitacunataca Jehová Diosca nircami, ñucata na cazushpaca nali reycuna cangunata mandajpimi ñucata ayudahuai nishpa mañanguichi nishpa (1 Samuel 8:​11-18). Rey Salomonbash poderta charishpaca impuestocunata yapata cobrashpami gentecunata llaquichirca (1 Reyes 11:43; 12:​3, 4). Rey Acabcarin ninandami gentecunataca llaquichirca. Shinaca nali reycunamanda gentecunata cuidajushpaca ¿nachu paipa shimicunata na pactachishpa Taita Diosca llullajunman carca?

Diablopash nircami, gentecunaca Taita Dios cuidajpillami paitaca sirvin nishpa (Job 1:​9, 10; 2:⁠4). Taita Dios tucuipi cuidajpilla Taita Diosta sirvishpaca Diablopa shimicunaca ciertomi canman. Ashtahuangarin, Diablopa llullacunata crishpami gentecunaca yanman, Taita Dios mandachunga na minishtinchichu nishpa. Shinapash Bibliaca ninmi, gentecunaca na shujcunata aliguta mandai ushanllu nishpa (Jeremías 10:23). Ñucanchicunaca Diospa Reino shamushpa tucui nali ruraicunata tucuchichunmi minishtinchi.

Shinapash Taita Diosca na maqui cruzashcachu ricujun. Taita Diosca reina Jezabel imashina Nabotta juchachishpa huañuchishcataca tucuitami Bibliapi villajun. Bibliaca ninpashmi Diablomi gentecunataca nalicunata rurachijun nishpa (Juan 14:30; 2 Corintios 11:14). Shinami Taita Diosca gentecuna nali ruraicunamanda caruyachun, shamuj punllacunapi ali causachunbash ayudajun.

Taita Diosca ninbashmi, shujcunata llaquichijcunataca tucuchishami nishpa. Imashinami rey Acabta, reina Jezabelta, shuj nali gentecunatapash castigarca, shinallatami cunanbi nali gentecunatapash castiganga (Salmo 52:​1-5). Ashtahuangarin, paita yarishpa causaj gentecunataca Taita Diosca ninmi, ñallami ali gentecunahuanlla causanguichi nishpa. * Nabotpash paipa huahuacunapashmi shuj juyailla Alpagupi causanga. Nali genteca shujllapash na tiangachu (Salmo 37:34).