1. Jesusca ¿ima ali ejemplotata saquirca?

JESÚS cai Alpapi cashpaca shujcunata ayudangapaj, Taita Diospa munaita pundapi churangapami paipa munaicunataca huashaman saquirca (Juan 5:30). Ashtahuangarin, shuj jatun racu caspipi huañungacaman Taita Diosta cazushpami Jesusca paipa munaita huashaman saquingapaj munashcata ricuchirca (Filip. 2:8).

2. a) Taita Diospa munaita pundapi churangapaca ¿imatata rurana capanchi? b) ¿Imamandata Taita Diospa munaita pundapi churana capanchi?

² Jesusta catijcuna caimandami Jesuspa ejemplota catishpa Taita Diospa munaita pundapi churana canchi. Ashtahuangarin, Taita Diospa munaita pundapi churashpami shuj gentecunata ayudangapaca ñucanchi munaicunatapash huashaman churana canchi (Mat. 16:​24, Filip. 2:​3, 4). Jesusca yachachircami, Taita Diosta aliguta adorangapaj munashpaca cangunapa munaicunata huashaman saquinami canguichi nishpa. Shinapash ¿imamandata shina nirca? Paita ali catijcuna juyarichunmi shina nirca. Jesusta ali catijcunaca juyaimandami shujcunapa munaicunata pundapi churanchi (Juan 13:​34, 35). Mundo enteropi ashtaca huauquipanicunami shuj gentecunata ayudanamandaca paicunapa munaicunata huashaman saquin. ¿Nachu chashna huauquipanicunata mundo enteropi charimandaca ashtaca bendiciongunata charishcanchi?

3. Taita Diospa munaita pundapi churangapaj munashpapash ¿imamandata cuidarina capanchi?

 ³ Shinapash, ñucanchi shungu ucupica mitsa munaicunatami charinchi. Adanda Evata yaripashunchi. Evaca Taita Dios cuenda cangapaj munashpami Taita Diostaca na cazurca. Adanbash huarmita na saquingapaj munashpa, Evahuan igual cangapaj munashpami paita ruraj Taita Diostaca na cazurca (Gén. 3:​5, 6). Imashinami Adanba Evapa shungupica mitsa munaicunata churarca, shinallatami mitsa munaicunata ñucanchi shungupi churangapaj munan. Diabloca Jesustapashmi pandachingapaj munarca (Mat. 4:​2-9). Cunan punllacunapipash ashtaca gentecunaca Diablo pandachijpimi paicunapa munashcatalla ruranata yaria causan. Mundo enteropi chashna gentecuna causajpimi chashna gentecunapa samai ñucanchiman ama chimbachun cuidarina canchi (Efes. 2:2).

4. a) ¿Mitsa yuyaicunata ñucanchi shungumanda llujchita ushanchichu? b) ¿Ima tapuicunatata yachajugripanchi?

⁴ ¿Ricupashcanchichu shuj jirruta tamia japijpi o Indi japijpi chai jirru asha asha jirrumbrashpa rijta? Jirrumbrajujta ricushpapash yangata saquijpica chai jirruca huaglishpa imapapash na valinllu. Mitsa yuyaicunaca jirrumbrajuj jirru cuendami can. Na imatapash rurajpica chai mitsa yuyaicunaca ñucanchitapashmi huaglichita ushan. Juchayucuna nacirimanda mitsa yuyaicunata charishpapash chai nali munaicuna ñucanchita mishachunga na saquinachu canchi (1 Cor. 9:​26, 27). Shinaca mitsa yuyaicuna ñucanchi shungupi tiai callarishcataca ¿imashinata yachashun? ¿Imashinata Taita Diospa munaita pundapi churashpa catishun?

5. a) ¿Imamandata Bibliaca espejoshna can? (Callari dibujota ricupangui.) b) Bibliata liijushpaca ¿imatata na rurana capanchi?

⁵ Bibliaca espejoshna cashpami ñucanchicuna imashina cajta, imapi pandarijujta ricuchijun (Santiago 1:​22-25, liingui). Shinapash ¿nachu espejopi ñapash ricurishpaca ñavi mapa cajtaca nali ricunchiman? Shinallata ¿nachu shuj ladomanda espejopi ricurijushpaca shuj gentecunatara ricunajunchiman? Shinaca Biblia ayudachun munashpaca ¿imatata rurana canchi? Biblia ayudachun munashpaca na jahua jahualla liinachu canchi. Shinallata na shujcuna imapi pandarijujta ricungapallachu Bibliataca liina canchi. Ashtahuangarin, ñucanchi shungupi mitsa yuyaicuna tiajta o na tiajta yachangapami Bibliataca liina canchi.

6. ¿Imashinata Taita Diospa Shimipi yachajushcataca na cungashpa pactachishun?

⁶ Bibliata cada punlla liijushpapash Taita Diospa munaita huashaman saquijushcataca huaquinbica na cuenta japinchichu. Shinapash ¿imamandata na cuenta japinchi? Espejomanda parlashpaca discípulo Santiagoca nircami, runaca espejopi ricurinmi nishpa. Griego shimipi “ricurin” nishpaca tucuitami ali ricurin nijunmi. Shinaca espejopi aliguta ricurijushpaca ¿imatata chai runaca nali rurajun? Discípulo Santiago nishca shinaca, chai runaca ‘paipa ñavi imashna cajta ricushpapash rinllami. Imashna cashcatapash cunganllami’. Imapi arreglarina cashcata ricushpapash yangata rinllami. Cutin chaishuj runaca ‘Diospa na pandashpa mandashca shimipi uyashcata shungupi alicachishpami’, ashtahuan yachajushpa paipa causaipi pactachin. Jesuspash nircami: ‘Ñuca yachachishca shimicunata cazushpa catishpaca, ñucapa yachajujcunami canguichi’ nishpa (Juan 8:31).

7. ¿Imashinata Bibliaca ñucanchi munaicunata huashaman saquichun ayudan?

⁷ Shinaca ama ñucanchi munaicunatara pundapi churangapaca Bibliatami aliguta liina canchi. Aliguta liishpami imapi cambiana cashcata cuenta japishun. Bibliata liishca jipacarin ali intindingapami cashna tapurina  canchi: “Ñuca chaipi cashpaca ¿imatashi ruraiman carcani? ¿Alita rurai ushaimanllu carcani? nishpa. Aliguta pensarishpa intindishca jipaca imata yachajushcataca pactachinami canchi (Mat. 7:​24, 25). Cunanga rey Saulpa, apóstol Pedropa ejemplocunata ricupashunchi. Paicunapa causaipi ima pasashcata ricushpami Taita Diospa munaita pundapi churai ushashun.

8. Rey Saúl chairalla rey tucushpaca ¿imashinata carca?

⁸ Rey Saulpa ejemplota ricushpami yachajunchi, Taita Diospa munaita huashaman saquinaca nali cashcata. Chairalla rey tucushpaca Saulca ali alimi carca, na jariyashcachu carca (1 Sam. 9:21). Saúl rey tucujpica huaquin israelitacunaca Saulca na rey canachu can nishpami huashalla rimanajurca. Rey caimanda israelitacunata castiganalla cashpapash Saulca na imatapash rurashpami saquirca (1 Sam. 10:27). Ammonitacunahuan macanajungapaj rijushpapash Taita Diospa espíritu santo ayudachunmi saquirca. Ammonitacunata mishashca jipapash nircami, Taita Dios ayudajpillami mishai usharcanchi nishpa (1 Sam. 11:​6, 11-13).

9. Rey Saulca ¿imamandata paipa munaicunatara pundapi churai callarirca?

⁹ Jipa punllacunamanga rey Saulca paipa munaicunatara pundapi churashpami jariyashca tucurca. Imashinami shuj jirruta tamia, Indi japishpaca jirruta jirrumbrachishpa huaglichinlla, shinallatami nali munaicunaca Saulpa shunguta huaglichi callarirca. Amalequitacunata mishashca jipaca paipa munaita pundapi churashpami rey Saulca Taita Diostaca na cazurca. Jehová Dios mandashcashna amalequitacunapa cosascunata tucuchinapa randina paimi japirca. Jipamangarin ninanda jariyashpami shuj monumentota paipa rurachirca (1 Sam. 15:​3, 9, 12). Nalitami rurashcangui nishpa profeta Samuel consejai callarijpicarin, ñucaca Mandaj Diosta cazurcanimi shujcunami na cazurca nishpami shujcunatara juchachirca (1 Sam. 15:​16-21). Ashtahuangarin, shungupi jariyashca caimandami Jehová Diospa ñaupajpi ali ricurinapa randica gentecunapa ñaupajpi ashtahuan ali ricurinata mascarca (1 Sam. 15:30). Shinaca ¿imashinata rey Saulpa nali ejemploca ñucanchipa munaicunata huashaman saquichun ayudan?

10, 11. a) Rey Saulpa nali ejemplomandaca ¿imatata yachajupanchi? b) Rey Saulshna ama pandaringapaca ¿imatata rurana capanchi?

¹⁰ Imashinami rey Saulpa ejemplopi ricushcanchi, na ñucanchicunapi yapata confianachu canchi. Callaripi Taita Diospa munaita pundapi churashca cashpapash chashna catijushallami nishpaca na yanachu canchi (1 Tim. 4:10). Rey Saulpash callaripica alimi carca. Chaimandami Taita Diospash alicachishpa rey Saultaca bendiciarca. Shinapash jipamanga paipa munaicunatami rey Saulca pundapi churai callarirca. Chai nali munaicunata na huashaman saquishpa na cazujpimi Taita Diosca Saúl rey cachunga ñana munarca.

¹¹ Espejomanda cutin parlapashunchi. Mushuj ropata churajushpa espejopi ricurinajushpaca ¿nachu mushuj ropatalla ricushpa ñucanchi ñavi mapa cashcataca na cuenta japinchiman? Shinaca alita rurashcacunatalla yaria causanapa randica imapi cambiana minishtirijujtapash ricunami canchi. Na rey Saulshna jariyashca cashpapash na paipa chaquita catinachu canchi. Pipash consejota cujpica na yajunachu canchi, yangamandami shina nihuajun, shujcunami culpata charin nishpa. Ashtahuangarin pipash consejota cujpica aligutami consejotaca chasquina canchi (Salmo 141:5).

12. Taita Diospa munaita pundapi churanaca ¿imashinata jatun juchapi urmajpipash ayudan?

¹² Jatun juchapi urmashca cashpaca ¿imatata rurana canchi? Rey Saulca shuj gentecuna alicachishpa ricuchun munashpami Taita  Diostaca huashaman saquirca. Rey Saulpa nali ejemplotaca ama catipashunchichu. Jatun juchata rurashca cashpaca Taita Diospa munaitara pundapi churashpami pingaitapash ladoman saquishpa ayudata mascana canchi (Prov. 28:13; Sant. 5:​14-16). Shuj huauquica 12 huatacunata charishpallatami lluchullacuna pinganaita ruranajujta ricui callarirca. Chunga huatacuna jipapash pacalla ricujunrami carca. Chai huauquica ninmi: “Ñuca huarmiman, ancianocunaman villanaca shinllipachami carca. Shinapash paicunaman villashpami ali sintirircani. Siervo ministerial canata saquijpica huaquin amigocunapash ñucata nalicachishpami llaquirirca. Shinapash cunanbimi Jehová Diosca ñucata cushijushpa ricuhuan. Jehová Diospa ñaupajpi ali ricurinami ñucapaca ashtahuan importante can” nishpa.

13, 14. a) Apóstol Pedropaca Taita Diospa munaita pundapi churanaca ¿facilchu carca? b) ¿Imamandata shina ninchi?

¹³ Jesús yachachijuj punllacunapica apóstol Pedroca Taita Diospa munaitami pundapi churan carca (Luc. 5:​3-11). Shinapash paipa munaita huashaman saquinataca yachajushpa catinarami carca. Shuj punllaca apóstol Santiago, apóstol Juanmi Jesustaca nirca, Diospa Reinopi cajpica ñucanchimi shujca ali ladoman chaishujca lluqui ladoman tiaringapaj munanchi nishpa. Shinapash Jesusca Pedrotami nishca carca, canmi ashtaca cosascunata rurangui nishpa. Chaimandami Juanda, Santiagota uyashpaca Pedroca ñucami Jesuspa ladopi tiarina cani yashpa ricujushcanga (Mat. 16:​18, 19). Shinapash Jesusca Santiagota, Juanda, Pedrota chaishuj apostolcunataca nircami, na jariyajunachu canguichi, cangunapa munaita huashaman saquinami canguichi nishpa (Mar. 10:​35- 45).

¹⁴ Consejajpipash apóstol Pedroca cutinmi pandarirca. Shuj punllaca Jesusca paipa apostolcunataca nircami, cangunaca ñucata asha tiempota saquihuanguichimi nishpa. Shinapash Pedroca paipa cumbacunata na valichishpami nirca, paicuna canda saquijpipash ñucaca nunca na saquishachu nishpa (Mat. 26:​31-33). Paipi yapata confiaimandami apóstol Pedroca chai tutallata paipa munaitara pundapi churashpa ninanda pandarirca. Gentecuna  paita ama imatapash rurachunmi Pedroca quimsa viajecaman Jesustaca na rijsinichu nirca (Mat. 26:​69-75).

15. ¿Imashinata apóstol Pedropa ejemploca ayudan?

¹⁵ Cutin cutin pandarishpapash apóstol Pedroca shinllita esforzarishpa, espíritu santopa ayudahuanmi paipa munaicunata huashaman saquita usharca. Ashtahuangarin jarcarishpa juyashpa causajushcatami ricuchirca (Gál. 5:​22, 23). Jipamanga ashtahuan jatun llaquicunatami aguantarca. Shuj punllaca apóstol Pabloca gentecunapa ñaupajpimi apóstol Pedrotaca rimarca. Shinapash gentecunapa ñaupajpi pingaichihuanmi yashpa culirajunapa randica na jariyashpami apóstol Pedroca Pablopa consejota uyarca (Gál. 2:​11-14). Ashtahuangarin, Pablotaca ñuca juyashca huauqui nishpami causarca (2 Ped. 3:15). Imashinami ricupanchi, apóstol Pedropa ejemplomi ñucanchi munaicunata huashaman saquichun ayudaita ushan.

16. ¿Imashinata llaquicunapi cashpapash ñucanchi munaicunata huashaman saquishun?

¹⁶ Llaquicunapi cashpaca ¿imatata ruranchi? Apóstol Pedropash chaishuj apostolcunapash villachijushcamanda carcelpi cashpa, macai tucushpaca ‘Jesuspa shutimanda llaquita apachun Dios saquishcamandami ninanda cushijurca’ (Hech. 5:41). Shinaca villachimanda shujcuna llaquichijpica apóstol Pedropa ejemplotami catina canchi. Shinallata Jesusta catijushcata ricuchishpami ñucanchi munaicunataca huashaman saquina canchi (1 Pedro 2:​20, 21, liingui). Ashtahuangarin ñucanchi munaicunata huashaman saquinata yachajushpami ancianocuna consejota cujpica consejota chasquishun. Shinallata apóstol Pedropa ejemplota yarishpami na culirajuna canchi (Ecl. 7:9).

17, 18. a) Jehová Diosta ashtahuan sirvingapaj munashpaca ¿imatata tapurina capanchi? b)  Ñucanchi shungupi jariyana munaicuna tiai callarijujpica ¿imatata rurana capanchi?

¹⁷ Apóstol Pedropa ejemploca ñucanchi munaita huashaman saquishpa Jehová Diosta ashtahuan sirvingapaj munachunmi ayudan. Tapuripashunchi: “¿Imamandata Jehovata ashtahuan sirvingapaj munani? Apóstol Santiago, apóstol Juan munashca shinaca ¿shujcuna ricuchunlla, shujcunata mandangapaj munaimandallachu Jehovata ashtahuan sirvingapaj munani?” nishpa.

¹⁸ Ñucanchi shungupi jariyana munai tiai callarijujpica, chai munaicunata saquichun ayudahuai nishpami Jehovata mañana canchi. Ñucanchicuna shuj gentecunapa ñaupajpi ali ricurinata mascanapa randica Jehovata alicachishunchi (Sal. 86:11). Shujcuna ñucanchicunata ama yapata alicachinajuchunga Diospa espíritu santo munashca shina ali cualidadcunata charingapaj esforzarishunchi. Congregacionbi ali yachachingapaj aliguta prepararishpapash Tandanajui Huasita fichanataca na cungashpami Romanos 12:3​pi consejota catina canchi (cai textota liingui).

19. Paita Diospa Shimita ricushpa ama desanimaringapaca ¿imatata rurana canchi?

¹⁹ Diospa Shimita aliguta liishca jipa imapipash cambiana cashcata cuenta japishpaca na desanimarinachu canchi. Desanimarishpaca espejopi ali ricurij runata yarishunchi. Discípulo Santiagoca mashna tiempo jipa problemacunata chai runa tucuchishcata o gulpi problemacunata tucuchishcataca na villanllu. Shinapash discípulo Santiago nishca shinaca, chai runaca ‘Diospa Shimipi uyashcataca shungupimi alicachirca’ (Sant. 1:25). Chai runaca espejopi ricurishcata yarishpami cambiangapaj esforzarirca. Shinaca ¿imatata yachajushcanchi? Juchayu cashcata yarishpami na tucuita ali rurai ushashcata yarina canchi (Eclesiastés 7:​20, liingui). Shinallata Taita Diospa Shimita aliguta intindishpa, Taita Diospa munaita pundapi churangapaj esforzarishunchi. Imashinami ashtaca huauquipanicunata juchayucuna cajpipash paicunata ayudashpa bendiciarca, shinallatami Jehová Diosca ñucanchitapash ayudangapaj munan.