SHINAPASH ashtaca religionmanda gentecunaca ninmi, religiongunaca gentecuna tandanajuchun ayudanmi nishpa. Eboo Patelca religionguna tandanajuchun munashpami Interfaith Youth Core nishca organizacionda callarichirca. Paica nircami: “Tucui religiongunami gentecunata llaquinata, mingachinata, cai Alpata cuidanata yachachin” nishpa.

Budista, católico, protestante, hindú, musulmán nishca religiongunaca pobrecuna ama tiachun, bombacunata ama churachun, gentecuna cai Alpata ama huaglichichunmi campañacunata ruran. Ashtaca religionguna tandanajushpa intindirichun, parlarichunmi conferenciacunatapash cun. Ashtaca religionguna tandanajushpacarin jatun fiestacunatami ruran, espermacunata cindin, musicacunata tocan, oraciongunatapash ruran.

Shinapash ¿religionguna tandanajujpichu problemacunaca tucuringa? Ali causai tiachunga ¿religionguna tandanajuchunllu Taita Diosca munan?

Ashtaca religiongunata tandachishca organizacionga, 76 llactacunamanda 200 yali religiongunatami tandachishcanchi nishpami ninanda jariyanajun. Chai organizacionga religionguna para siempre ayudarishpa causachunmi munan. Shinapash na ushashcachu. Chai organizacionda callarichijcunaca paicunapa organizacionbi religiongunata, runa gentecunata ama nali sintichingapami leycunata ruranajushpaca tucuicuna parlarishpa Taita Diosmandaca na imatapash escribirca.

Shinaca Taita Diosmanda na parlai ushana cashpaca ¿imapata religiongunaca tian? Gentecunata ayudaj organizacionhuan ricujpica religiongunata tandachishca organizacionga igualmi can. Chaimandami chai organizacionga nin, Diosmanda parlaj organizacionga na canchichu, gentecuna ali causachun ayudaj organizacionmi canchi nishpa.

Dalai Lamaca ninmi: “Tucui religiongunami shujcunata cada punlla juyashpa, llaquishpa, perdonashpa causachun yachachin” nishpa.

Juyana, llaquina, perdonanaca minishtirishcami can. Jesusca nircami: ‘Shuj gentecuna imatapash aliguta rurachun munashpaca, cangunapashmi shujcunaman aliguta rurana canguichi’  nishpa (Mateo 7:12). Shinapash ali religionga ¿alita ruranatallachu yachachina can?

Apóstol Pabloca nircami, Taita Diospa munaita ‘pactachingapaj munanajushpapash imashina pactachinataca na yachanllu’ nishpa. Chai tiempopi gentecunaca Taita Diosta sirvingapaj munashpapash Taita Diosmandaca na cabalta yacharcachu. ‘[Alita] rurashcatashna Taita Dios chasquijujta na yachashpami, paicunapa munaitalla rurangapaj munanajurca’ (Romanos 10:​2, 3). Taita Dios imata mandajujta na cabal intindimandami paicunapa feca yanga carca (Mateo 7:​21-23).

Jesusca nircami: “Fiñanajushpa causajcunata alichijcunaca, ninandami cushijun” nishpa (Mateo 5:9). Jesusca tranquilo causanatami mascarca. Ashtahuangarin tranquilomi causana canguichi nishpami shuj religionda charijcunamanbash yachachirca (Mateo 26:52). Jesusta uyajcunaca tucuicuna tandanajushpa, juyarishpa causanatami yachajurca (Colosenses 3:14). Shinapash ¿tandanajushpa ali causanatallachu Jesusca yachachirca? Jesusca ¿shuj religionda catijcunahuan tandanajurcachu?

Fariseocuna, saduceocunaca ninanda culirashpami Jesustaca huañuchingapaj munanajurca. Shinapash Jesusca paipa catijcunataca nircami: ‘Saquichilla. Paicunaca ñausacunashnami’ can nishpa (Mateo 15:14). Imashinami ricupanchi, Jesusca fariseo, saduceo religionda catij gentecunahuanga na tandanajungapaj munarcachu.

Jipa huatacunamanga Jesusta catij congregacionmi Corinto llactapi tiai callarirca. Corinto llactapica shuj shuj llactamanda gentecuna, shuj shuj religionda catij gentecunami causarca. Jesusta catijcuna chashna gentecunapurapi causajujpimi apóstol Pabloca nirca: ‘Na crijcunahuanga na tandanajunachu canguichi. ¿Cristopash Belial nishca Diablohuanga cumba tucushpa purinmanllu? ¿Crijpash na crijhuanga imata japinatata charin? Paicunapa chaupimanda llujshishpa anchurichi’ nishpa (2 Corintios 6:​14, 15, 17).

Imashinami ricupanchi, Bibliaca religionguna tandanajuchunga na munanllu. Shinaca tucui gentecuna tandanajushca cangapaca ¿imatata rurana capanchi?

Huasicunata rurashpa trabajaj empresacunaca ashtaca trabajadorcunatami charin. Paicunaca planocunata ricushpami huasicunata ruran. ¿Planocunata na catishpa, nali parlarishpaca huasicunata rurai ushanmanllu?

Cunan punllacunapi religiongunapash ayudarina, respetarinami canchi nishpami parlarinajun. Shinapash gentecuna imashina causanamanda, gentecuna imata crinamanda parlashpaca na intindirinllu.

Bibliaca gentecuna aliguta causachunmi Diospa mandashcacunata charin. Bibliapi mandashcacunami huasita rurangapaj shuj planoshna can. Bibliapi mandashcacunami shinlli feta charichun, ali causachun ayudan. Bibliapi mandashcacunata catijcunaca shuj shuj llactacunamanda cashpapash tucuicuna tandanajushpa cachunmi ayudan. Taita Diosca nircami: ‘Ima mapatapash na rimaj’ shimitami yachachisha. ‘Ñuca shutipi mañanajuchun, tucuicuna shujllashna ñucatalla sirvinajuchunmi chashna rurasha’ nishpa. Gentecunaca Taita Diospa mandashcata pactachishpami tucuicuna tandanajushca caita ushanga (Sofonías 3:9; Isaías 2:​2-4).

Chaimandami testigo de Jehovacunaca tucui gentecunata invitanajunchi Tandanajui Huasicunaman rishpa tucuicuna tranquilo tandanajushpa causanajujta ricuchun (Salmo 133:⁠1).