Jesusca nircami, canguna nara mañajpipash Taita Diosca tucuitami yachan nishpa (Mateo 6:⁠8). Punda tiempocunapi rey Davidpash nircami: ‘Mandaj Dioslla canga ñuca nara rimajpillatami tucuita yachangui’ nishpa (Salmo 139:⁠4). Taita Dios ña tucuita yachajpica ¿imamandata mañana canchi? Bibliahuan ricupashun. *

Bibliapica ninmi, Jehová * Diosca tucui tucuitami yachan nishpa (Salmo 139:6; Romanos 11:​33, NM). Shinapash paica na shuj computadora cuendachu can. Computadoracunaca ashtaca informaciondallami tandachin. Cutin Taita Diosca ñucanchimanda ashtacata yachashpapash paiman quimirichunmi munan (Salmo 139:​23, 24; Santiago 4:⁠8). Chaimandami Jesusca nirca, Taita Dios tucuita yachajpipash mañanami canguichi nishpa (Mateo 6:​6-8). Tucuita Taita Diosman villashpaca ashtahuanmi paiman quimirishun.

Huaquinbica oracionda rurajushpapash imata mañataca na yachanchichu. Imashina sintirishcatapash na villai ushanchichu. Shinapash Taita Diosca ñucanchi imata ciertopacha minishtijujtaca alimi yachan (Romanos 8:​26, 27; Efesios 3:20). Taita Dios uyajujta cuenta japishpaca ashtahuanmi Jehová Diosman quimirinchi.

Bibliaca ninmi, mañaichi Taita Diosca uyanmi nishpa. Shinapash ¿imamandata huaquinbica na uyan? Punda tiempo israelitacuna nali tucunajujpica Taita Diosca nircami: ‘Cangunapa maquica huañuchishcamandami yahuarsapa. Ninanda mañanajujpipash ña uyashachu’ nishpa (Isaías 1:15). Imashinami ricupanchi, na cazushpa, nali munaicunahuan mañajpica Taita Diosca na uyanllu (Proverbios 28:9; Santiago 4:⁠3).

Bibliaca ninbashmi, ‘pai munashcashna mañajpica Diosca uyanllami’ nishpa (1 Juan 5:14). Shinaca ¿paita sirvijcunapa tucui oraciongunatachu uyan? Apóstol Pablopa ejemplota ricupashun. Paica ‘aguijón jirruhuan tujsijpishna’ ñavita nanachishpami, Taita Diostaca cai nanaita anchuchihuai nishpa quimsa viajecaman mañarca (2 Corintios 12:​7, 8). Paica ashtaca  gentecunatami jambin carca. Huañushcatapash causachircami. Shinapash paillata jambiritaca na usharcachu (Hechos 19:​11, 12; 20:​9, 10). Quimsa viajecaman mañashpapash na ali tucushpaca Taita Diospa munai cachun nishpami agradicirca (2 Corintios 12:​9, 10).

Huaquin gentecuna mañajpica milagrota rurashpami Taita Diosca contestan carca (2 Reyes 20:​1-7). Shinapash huaquinbillami milagrota rurashpa contestarca. Huaquingunaca Taita Diosca na uyanllu nishpami llaquirin carca. Rey Davidpash llaquirishpami Taita Diostaca nirca: ‘¿Ima horacamanda jichushpa saquigrihuangui? ¿Causaita causaicamanllu cungagrihuangui?’ nishpa (Salmo 13:⁠1). Shina llaquirijushpapash Jehová Dios uyajujta cuenta japishpami nirca: ‘Ñucaca can llaquinatallami yariajuni’ nishpa (Salmo 13:⁠5). Cunanbipash Taita Diosta sirvijcunaca cutin cutin mañashpami Taita Dios paicunata uyashcata cuenta japin (Romanos 12:12).

Imata ciertopacha minishtijujta ricushpami cun.

Taitacunaca paicunapa huahuata ninanda juyashpapash na huahuacuna mañajhuanllu paicuna imata mañashcata cun. Huaquinbica Taita Diospash na ñucanchi mañashcandichu ñucanchi mañashcataca cun. Taita Diosca ñucanchi taita cuenda caimandami pai agllashca tiempopi, ñucanchipa ali canata ricushpa ñucanchi minishtijushcataca cun (Lucas 11:​11-13).

Na cuenta japijtami Taita Diosca contestan.

Huaquinbica imapash problemata charishpami Taita Dios milagrota rurachun munanchi. Milagrota na ricushpaca ¿na uyajunllu yanachu canchi? Milagrota na rurashpapash Taita Diosca uyajunmi. Shinapash Taita Dios uyajujtaca cuenta japinami canchi. Huaquinbica shuj rijsitami Taita Diosca ñucanchi minishtijuj horaspi ayudachun animan (Proverbios 17:17). Cutin huaquinbica Bibliata liishpami imata ruranata cuenta japinchi (2 Timoteo 3:​16, 17). Imashinami ricunchi problemacunata charijpica Bibliapi consejocunahuanmi Taita Diosca ayudan.

Problemacunata na anchuchishpapash problemacunata aguantachun ayudashpami Taita Diosca ñucanchi oraciongunata contestajun (2 Corintios 4:⁠7). Shuj punllaca jatun llaquipi cashpami Jesusca Taita Diosta mañarca. Shina mañajpimi Taita Diosca shuj angelta cacharca ali shimicunata nishpa Jesusta animachun (Lucas 22:​42, 43). Ñucanchicunapash llaquipi cajpica Taita Diosca ñucanchi ali amigocunatami ali shimicunata nishpa animachun cachamun (Proverbios 12:25). Shinaca Taita Dios ñucanchi oraciongunata imashina contestajujtaca cuenta japinami canchi.

Huaquinbica Jehová Dios agllashca tiempotami shuyana canchi.

Bibliaca ninmi, Taita Diosca ali shungu gentecuna mañajpica pai agllashca tiempopimi contestan nishpa (1 Pedro 5:⁠6). Shinapash, Taita Dios na ucha contestajpica na yanachu canchi, Taita Diosca na uyanllu nishpa. Cielopi cashcamandaca tucuitami ali ricujun, tucuitami ali yachan. Imamanda mañajujtaca alimi yachan.

Pensaripai, quiquinba uchila huahuagu shuj bicicletata carahuai nijpica ¿chai rato randishpa cunguimanllu? Uchilarami can, urmangami yashpaca ¿nachu jipamanra bicicletataca caranguiman? Ali munaicunahuan na  shaijushpa mañajpica Taita Diosca quiquin mañashcataca pai agllashca tiempopimi contestanga (Salmo 37:⁠4).

Bibliaca ninmi, Taita Dios uyajujta crinami canguichi nishpa. Shinapash huaquingunaca ninmi, crinaca shinllimi can nishpa. Huaquinbica pipash unaita llaquichijujpi o imapash problemahuan unaita causajushpami Taita Dios uyajujtaca na crin. Shinapash Jesusca na shaijushpami mañana canguichi nircami.

Mañashpa catichunmi Jesusca shuj viuda huarmigumanda parlarca. Chai viuda huarmiguca shuj juezpaman rishpami ayudahuai nirca (Lucas 18:​1-3). Na nijpimi chai huarmiguca cutin cutin juezpaman rishpa ayudahuai nijurca. Cutin cutin ayudahuai nijujpimi juezca ‘ñucata fiñachingapaj shamujunllami’ nishpa ayudarca (Lucas 18:​4, 5) Chai juezca nali cashpapash ama culirachijuchun nishpami viuda huarmigutaca ayudarca. Shinaca pensaripai ñucanchicuna ‘tutandi punllandi caparishpa mañanajujpica’ ¿nachu Taita Diosca ayudanga? Jesusca nircami: ‘Taita Diosca uchami’ ayudanga nishpa (Lucas 18:​6-8).

Taita Diosta ayudahuai nishpa cutin cutin mañajushpapash na shaijunachu canchi. Na shaijushpa mañashpami, Taita Dios uyachun munajushcata ricuchinchi. Shinallata na shaijushpa mañashpami pai imashina contestajta cuenta japinchi, Taita Diosmanbash ashtahuan quimirinchi. Shinaca Taita Dios tiajta crishpa, pai munashcashna mañajpica Taita Diosca ñucanchi oraciongunata uyangami (Lucas 11:⁠9).