1, 2. Ashtaca tiendacunapi almacengunapi camaracunaca ¿imapata tianajun? Jehová Diosca ¿imamandata ricuriajun?

ASHTACA llactacunapica tiendacunapi, almacengunapimi pipash ama shuachun nishpa camaracunata churan. Pipash shuajpica chai camaracunapi grabashcata ricushpami shuataca japin.

² Chai camaracunaca ¿ Jehová Diospa ñavishnachu can? Bibliapica ninmi, Taita Diosca ‘maipipash ricujunmi’ nishpa (Prov. 15:⁠3). Shinaca ¿tucui ñucanchi imata rurashcatachu Jehová Diosca ricuriajun? ¿Ñucanchicunata cazuchingapaj, imatapash nali rurashcandi castigangapachu ricujun? (Jer. 16:17; Heb. 4:13.) Bibliapica na chaitachu yachachin. Jehová Diosca ñucanchita juyaimanda, ñucanchicuna ali causachun munashpami ricuriajun (1 Ped. 3:12).

3. ¿Ima picha yuyaicunatata yachajupashun?

³ Jehová Dios ñucanchita juyaimanda ricuriajujta cringapaca cai picha yuyaicunatami yachajupashun: 1) Nara nalita rurajpillatami Jehová Diosca advirtijun, 2) pandarijpica ali ñanman tigrachunmi consejan, 3) Bibliapi consejocunahuanmi imata ruranata  yachachin, 4) llaquicunata aguantachunmi ayudan, 5) alita rurajpica bendicianmi.

4. Jehová Diosca ¿imamandata Caindaca nara juchata rurajpillata advirtirca?

⁴ Jehová Diosca ¿imashinata nalita nara rurajpillata advirtijun? (1 Crón. 28:⁠9.) Chaipaca Cainba ejemplota ricupashun. Jehová Dios nalicachijpica Cainga ‘ninandami fiñarirca’ (Génesis 4:​3-7, liingui). Chaita ricushpami Jehová Diosca nirca: ‘Alita rurashpaca ¿nachu jatunyachi tucunguiman? Juchataca mishanami cangui’ nishpa. Jehová Diosca Caín alita rurashpa, paipa ñaupajpi ali ricurichun munashpami shina nijurca. Jehová Diosta cazushpaca Cainga Jehová Diospa amigomi cashpa catinman carca.

5. Ñucanchicuna ali ñanmanda caruyajujta ricushpaca ¿imashinata Jehová Diosca ayudan?

⁵ Cunan punllacunapipash Jehová Diosca ñucanchita juyaimanda, ñucanchicuna ali causachun munashpami ñucanchi shungupi imashina cajta, imata pensajujtapash tucuita yachan. Chaimandami ñucanchicuna ali ñanmanda caruyajujta ricushpaca Bibliahuan Jehová Diosca advirtin. Bibliata cada punlla liishpa, tandanajuicunaman rishpa, publicaciongunata liishpami Jehová Dios imata advirtijujta cuenta japinchi. Pensaripashunchi, huaquin problemacunataca Jehová Diosllami yachan. ¿Nachu chai horascuna imapash informacionda liishcanchi, uyashcanchi? Chai informaciondaca Jehová Diosmi ñucanchi minishtijuj horaspipacha cushca.

6, 7. a) ¿Imamandata ninchi, Jehová Diosca cada unotami juyan nishpa? b) Jehová cada unota advirtijujta cuenta japingapaca ¿imatata rurana capanchi?

⁶ Jehová Diosca ñucanchita juyaimanda, ñucanchicuna ali causachun munaimandami ricuriajun. Huaquinbica yanchipashchari, Bibliaca punda tiempo gentecunapami carca, publicaciongunataca mundo enteropi gentecunapami escribin o tandanajuicunapi yachachishcacunaca tucuilla congregacionbami can nishpa. Shinapash Jehová Diosca cada unota juyaimanda, cada unopi preocuparijuimandami Bibliata, publicaciongunata, tandanajuicunataca churashca. Chaimandami chaicunapi yachachijujtaca cada uno uyashpa, pactachina canchi.

⁷ Jehová Dios cada unota advirtijujta cuenta japingapaca ¿imatata rurana canchi? Pundapica Jehová Dios ñucanchita juyajtami crina canchi. Chai jipaca Bibliapi mandashcatami cazuna canchi. Ashtahuangarin, nali munaicuna umaman shamujpica Jehová Diosca nalicachingachu nishpami chaicunataca saquina canchi (Isaías 55:​6, 7, liingui). Jehová Diosta cazushpaca ashtaca llaquicunamandami caruyashun. Shinapash ña juchapi urmashca cajpica ¿imashinata Jehová Diosca ayudan?

8, 9. Huauquicunapa consejocunaca ¿imashinata Jehová Dios ñucanchimanda preocuparijushcata ricuchin? Shuj ejemplota nipai.

⁸ Pandarijpi ali ñanman tigrachun consejajpimi, Jehová Dios ñucanchita juyajta cuenta japinchi (Hebreos 12:​5, 6, liingui). Tucuicunallatami pipash consejajpica na uyanayachishcanchi (Heb. 12:11). Shinapash pensaripashunchi ¿imamandashi consejahuarca? nishpa. Consejota cushpaca na ñucanchita culirachingapaj o ñucanchita nali sintichingapachu consejan. Ashtahuangarin, ñucanchicuna Jehová Diosmanda ama caruyachun munashpa, ñucanchipi preocuparishpami consejajcunapash aliguta  pensarishpa Bibliahuan consejan. Jehová Dios consejajujta intindishpami pipash consejajpica cushijushpa chasquina canchi.

⁹ Shuj ejemplota ricupashun. Shuj huauquica nara Testigo cashpami lluchullacuna pinganai cosascunata ruranajujta ricun carian. Shinapash Bibliata yachajushpami chaicunata ricunataca saquirca. Shuj punllaca shuj mushuj celularta randishpami Internetpi lluchullacunata cutin ricui callarirca. Paipa mapa munaicunataca nara shungumanda llujchishcarcachu (Sant. 1:​14, 15). Shuj punllaca shuj ancianoman celularta mañachijpimi, celular pantallapica lluchullacuna pinganai cosascunata ricuna direcciongunara ricurirca. Chaimandami chai huauquitaca ali ñanman tigrachun ancianoca consejarca. Chai huauquipash ancianopa consejota cazushpami lluchullacunata ricunataca cungarca. Nali cosascunata pacalla rurajujta ricushpami Jehová Diosca nara jatun juchapi urmajpillata consejajun. Jehová Dios chashna consejajushcamandaca ¿nachu agradicina capanchi?

10, 11. a) ¿Imashinata Jehová Diosta mascashcata ricuchinchi? b) ¿Imashinata shuj familiaca Bibliapi consejocunata pactachina ali cashcata intindirca?

¹⁰ Salmo librota escribij runaguca Taita Diostaca nircami: ‘Ali yuyaita can cushcashnallatami pushahuashcangui’ nishpa (Sal. 73:24). ‘Imata ruragrijushpapash Diosta yarishpa’ causangapaca, Bibliapi consejocunatami mascana canchi. Shinami Jehová Dios imata pensajujta intindishun, ñaupaman pushachunbash saquishun, Paipa ñaupajpipash ali ricurishpa catishun. Bibliapi consejocunami familiata aliguta mantinichun ayudan (Prov. 3:⁠6).

¹¹ Shuj ejemplota ricupashun. Shuj huauquica paipa taucalla familiandimi Masbate (Filipinas) nishca llactapi tarpushpa trabajan carca. Chai huauquiguca paipa huarmindimi precursorcuna carca. Shuj punllaca cungashcapimi alpa dueñoca shuj gentecunapa llullacunata crishpa nirca, cangunaca nalimi cashcanguichi, caimanda ringuichi nishpa. Yangata juchachijpipash paicunaca na culirarcachu. Alpa dueñotaca respetohuanmi parlashpa catirca. Chai huauquica maiman rinataca na charircachu. Shinapash paica nircami: “Jehová Diosca siempremi  cuidajushca, ima horapash na saquingachu” nishpa. Chai huauquigu nishca shinaca, huaquin punllacuna jipaca yangata juchachijpipash na culirashpa, respetohuan parlashpa catijpimi, alpa dueñoca caipi quedaichilla nirca. Ashtahuangarin shuj alpacunatapash trabajapai nircami (1 Pedro 2:​12, liingui). Imashinami ricupanchi, Bibliapi consejocunahuanmi Jehová Diosca llaquicunata aguantachun ayudan.

12, 13. Huaquinbica ¿imamandata yanchi Jehová Diosca na ricujunllu nishpa?

¹² Huaquinbica Jehová Diosta na sirvichun munashpa familiacuna rimajpi, ungüimanda o imapash llaquicunamandami unaita llaquilla cashcanchi. Huaquinbicarin ¿nachu congregacionbipash shuj huauquihuan o shuj panihuan na intindirishcanchi?

¹³ Shuj huauqui imatapash nishpa nali sintichijpica ¿nachu yashcanchi: “Imamandata Jehovapa congregacionbipash shina cana cashca?” nishpa. Chai jahua chai huauqui congregacionbi ashtahuan responsabilidadcunata chasquijpi, huauquicunapash paita ashtahuan alicachishpa ricujpica ¿nachu yashcanchi: “Jehová Diosca nachu ricujun? ¿Imamandata ashtahuan responsabilidadcunata charichun saquin?” nishpa (Sal. 13:​1, 2; Hab. 1:​2, 3).

14. Jehová Diosca ¿imamandata shuj huauquicuna ñucanchita consejachun saquin?

¹⁴ Jehová Diosca na ñucanchi ñavi ricushcatallachu ricujun. Paica ñucanchi imapi cambiana cashcatami ricujun. Huaquinbica pipash consejajpica culiranchillami. Shinapash ñucanchi pandarijujtaca na cuenta japinchichu. Karl Klein huauquipa ejemplota ricushun. Paica miembro del Cuerpo Gobernantemi carca. Paica ninmi: “Shuj punllaca huauqui Rutherfordca shinllitami consejahuarca. Shinapash huaquin punllacuna jipa cushilla saludajpica ñucaca jahua jahuallami saludarcani. Chaita ricushpami huauqui Rutherfordca nihuarca: ‘Pactara, shinalla purijushpaca Diablopa trampapi urmanguiman’ nishpa. Consejota cuna derechohuan consejajpipash consejota na uyashpa, consejota cuj huauquita na ricunayachishpaca Diablopa trampapimi urmaita ushanchi” nin. *

15. ¿Imamandata llaquicunapi cashpapash na shaijuna capanchi?

¹⁵ Llaquicuna ricurijpi aguantanaca shinllimi can. Shinapash llaquicunata aguantachunga ¿imata ayudanga? Pensaripashunchi. Shuj carrota manejashpa rijujpi panapica ashtaca carrocuna trancarishca shayanajushcanman. Carrocuna na uchalla cuyurinllu nishpa shuj na rijsishca ñanda japishpa rishpaca ¿nachu chinganguiman? ¿Nachu ashtahuan paranguiman? ¿Nachu shuyashparapash ali canman carca? Shinallata, llaquicunapi cashpapash Bibliapi consejocunata na shaijushpa pactachijpimi Jehová Diosca llaquicunata aguantachun ayudanga.

16. Jehová Diosca ¿imamandata llaquicuna tiachun saquin?

¹⁶ Jehová Diosca ñucanchicunata yachachingapaj, ashtahuan ali Testigocuna cachunmi huaquinbica llaquicuna tiachun saquishca (1 Pedro 5:​6-10, liingui). Shinapash Jehová Diosmi llaquicunataca cachamun nishpa na yanachu canchi (Sant. 1:13). Ashtaca llaquicunaca Diablopa culpamandami tian. Llaquicunapi cajpica Jehová Diosmi ñucanchitaca llaquishpa ricujun. Chaimandami llaquicunataca ‘ashacamanlla’ tiachun saquinga. Shinaca llaqui punllacunapi  Jehová Dios llaquishpa ricuriajushcamandaca ¿nachu agradicinchi? ¿Llaquicuna japijpi Jehová Dios ayudanata confianchichu? (2 Cor. 4:​7-9.)

17. Jehová Diosca ¿picunatata mascan? ¿Imapata mascan?

¹⁷ Jehová Diosca paita tucui shunguhuan juyajcunata bendiciangapaj munashpami ricuriajun. Hananí shuti profetaca rey Asataca nircami: ‘Mandaj Diosca [“tucui shunguhuan”, NM ] paita cazujcunaman, paipa tucui ushaita ricuchingapami cai pachata ricuriajun’ nishpa (2 Crón. 16:⁠9). Rey Asá Jehová Diosta na tucui shunguhuan cazujpipash ñucanchicunaca alita rurangapaj esforzarinami canchi. Chaimi Jehová Diospash paipa tucui ushaita ricuchishpa ñucanchitaca cuidashpa bendicianga.

18. Pipash na ricujunllu yashpa llaquirijushpaca ¿imatata yarina capanchi? (Callari dibujota ricupangui.)

¹⁸ Jehová Diosca ñucanchicunaman paipa ushaita ricuchingapami munan. Chaimandami Jehová Dios bendiciachun munashpaca ‘alita ruranata mascajcuna, alita ruranata juyajcuna, [alita rurajcuna]’ cana canchi (Amós 5:​14, 15; 1 Ped. 3:​11, 12). Pipash na ricujunllu yajpipash Jehová Diosca alita rurajcunata bendiciangapami ricuriajun (Sal. 34:15). Sifrapa, Fuapa (Puapa) ejemplota ricupashun. Paicunaca israelitacuna Egipto llactapi esclavocuna cajpimi parteracuna carca. Chai punllacunapi faraonga mandarcami, israelita huarmicuna jari huahuacunata ungujpica huañuchinami canguichi nishpa. Shinapash chai israelita parteracunaca Taita Diosta cazushpami jari huahuagucunataca na huañuchirca. Chaita ricushpami Jehová Diospash chai parteracunataca huahuacunata charichun bendiciarca (Éx. 1:​15-17, 20, 21). Huaquinbica pipash na ricujunllu yashpami llaquilla sintirinchi. Shinapash ama cungapashunchichu Jehová Diosca tucuitami ricujun. Alita rurajujta ricushpaca bendiciangapachami (Mat. 6:​4, 6; 1 Tim. 5:25; Heb. 6:10).

19. Jehová Diosca ¿imashinata Austria llactapi causaj panigutaca bendiciarca?

¹⁹ Austria llactapi causajuj paniguca Jehová Dios alita rurajcunata bendiciajtami cuenta japirca. Chai paniguca Hungría llactamandami carca. Hungría llactamanda shuj huarmigu Bibliata yachajungapaj munajpimi panigutaca chai huarmiguta visitai nishpa mingarca. Chai panigu rishpaca na tuparcachu. Chaimandami cutin cutin rishpa publicaciongunata, cartacunata, teléfono numerotapash saquirca. Huaquinbica pipash huasipi canshnalla cashpapash pipash na ricurinllu carca. Shinapash shuj huata chaupita visitashca jipami Bibliata yachajungapaj munaj huarmiguhuanga tuparirca. Chai huarmiguca nircami: “Tucuilla publicaciongunatami liircani, quiquindapash shuyajurcanimi” nishpa. Chai huarmiguca cáncer ungüita charimandami quimioterapia nishca tratamientota rurashpa na llujshi ushashcarca. Shinapash cunanbica Bibliata estudiai callarircami. Imashinami ricupanchi, na shaijushpa alita rurajcunataca Jehová Diosca bendicianmi.

20. Jehová Dios tucuipi ricuriajujta yachashpaca ¿imashinata sintirinchi?

²⁰ Ñucanchicuna imata rurajujpipash Jehová Diosca ricuriajunmi. Shinapash imashinami ricupashcanchi, paipa ñavica almacengunapi, tiendacunapi camaracunashnaca na canllu. Paica ñucanchita juyaimanda, alita rurajpi bendiciangapaj munashpami ricuriajun. Alipa ricuriajujta yachashpaca ¿nachu Taita Diosman ashtahuan quimiringapaj munanchi?