1, 2. a) 40 huatacunata charishpaca ¿imatata Moisesca rurarca? (Callari dibujota ricupangui.) b) Moisesca ¿imamandata israelitacunahuan llaquichi tucunata agllarca?

MOISESCA faraonba familiami carca. Egipciocunapa jatun, ali huasicunatapash rijsinmi carca. Ashtahuangarin egipciocunapa ‘causaimanda aliguta yachajushca’ cashpami jatun huasicunata ruranataca ali yacharca. Estrellacunamandapash estudiashcami carca. Chai punllapi gentecunamandapash escribinmi carca (Hech. 7:22). Moisesca charij charijmi carian. Egiptopi mandaita ushanmanmi carca.

² Shinapash 40 huatacunata charishpaca Egiptopi causaita saquishpami esclavo israelitacunahuan llaquichi tucunata agllarca. Chaita ricushpaca faraonbash paita viñachishca familiapash nalicachishcangachu. (Hebreos 11:​24-26, liingui). Shinapash ¿imamandata Moisesca Egiptopi causaita saquirca? Moisesca ‘pipa ñavipipash na ricurishca’ Taita Diospi feta churashpa, Taita Diospa tucui shimicuna pactarinata crishpami shina rurarca (Heb. 11:27).

3. Cai temapica ¿ima quimsa tapuicunatata yachajugripanchi?

³ Ñucanchicunapash na ñucanchi ñavi ricushcatallachu ricuna canchi. Ñucanchicunaca ‘Diosta aligutapacha crijcunami’ canchi (Heb. 10:​38, 39). Shinapash ali cringapaj o shinlli feta charingapaca  ¿imatata rurana canchi? Shinlli feta charingapaca Hebreos 11:​24-26 textocunata ricushpami Moisespa ejemplota catina canchi. Moisesmanda yachajushpaca cai quimsa tapuicunapi pensaripashunchi: 1) Feta charimandaca ¿imashinata Moisesca nali munaicunata huashaman saquirca? 2) Shujcuna nalicachishpa ricujpipash ¿imashinata feta charimandaca Jehová Diosta sirvinata ninanda alicachirca? 3) ¿Imamandata ‘Dios carajpi japinataca yaria’ causarca?

4. ‘Juchata rurashpa cushijunamandaca’ ¿imatata Moisesca yarca?

⁴ Feta charimandami Moisesca cai mundopi cosascuna, munaicunaca shuj ratopalla cashcata ali intindirca. Shinapash feta na charij gentecunaca yanmi carca, Egiptopi causajcuna yanga dioscunata adorashpa, brujeriacunata ruranajushpapash jatun llactami can, cutin israelitacunaca yanga esclavocunallami can nishpa. Gentecuna shina pensanajujpipash Moisesca nalicunata Taita Dios tucuchinata crishpami causarca. Moisesca shinlli feta charimandami chai gentecunashna ‘juchata rurashpa ashacamanlla ninanda cushijunataca’ na agllarca.

5. ‘Juchata rurashpa ashacamanlla ninanda cushijuna’ munaita ama charingapaca ¿imatata rurana capanchi?

⁵ Ñucanchicunapash ‘juchata rurashpa ashacamanlla ninanda cushijuna’ munaita charishpaca ¿imatata rurana canchi? Nali munaicunaca asha ratotalla cushichijtami yarina canchi. Shinallata ‘cai pachapash tucui nali munaicunandi tucurinatami’ yarina canchi (1 Juan 2:​15-17). Nalita rurajcuna na arripintirishpaca ‘lluchanalla’ alpapi cuendami purinajun. Paicuna ñalla tucuchi tucunatami yarina canchi (Sal. 73:​18, 19). Juchata rurana munaicuna shamujpica tapurishunchi: “Juchata rurashpaca ¿imashi tucusha?” nishpa.

6. a) ¿Imamandata Moisesca “Faraonba ushipa churimi cangui” ni tucunataca na munarca? b) Quiquinga ¿imamandata nipanguiman, Moisesca ali decisiondami agllarca nishpa?

⁶ Moisesca feta charimandami, ‘ña viñashpaca “Faraonba ushipa churimi cangui” ni tucunataca na munarca’ (Heb. 11:24). Paica na pensajurcachu, Egipto llactata mandashpapash Jehová Diosta sirvishallami nishpa. Shinallata na pensajurcachu egipciocuna cushca culquihuan, poderhuanmi israelitacunataca ayudasha nishpa. Ashtahuangarin Jehová Diosta tucui shunguhuan, tucui fuerzahuan, tucui almahuan sirvingapami munarca (Deut. 6:5). Jehovata sirvimandami ashtaca llaquicunamanda Moisesca salvarirca. Egipciocunapa valishca cosascunatapash israelitacunallatami japirca (Éx. 12:​35, 36). Faraondapash Jehová Diosmi pinganaita huañuchirca (Sal. 136:15). Cutin Moisestaca israelitacunata Egiptomanda llujchishpa salvachunmi agllarca. Imashinami ricunchi, Moisesca ashtaca bendiciongunatami chasquirca.

7. a) Mateo 6:​19-21​pi nishca shinaca ¿imamandata shamuj punllacunata yarina capanchi? b) ¿Imamandata na cunan punllacunapilla pensarina capanchi? Shuj experienciata parlapai.

⁷ Jovenguna ¿imashinata feta charinaca ali decisiongunata agllachun ayudan? Ali decidingapaca shamuj punllacunapi ima pasanatami yarina capangui. Jehová Dios imata ruranataca yaria causapangui. Ashacamanlla cushijunata mascanapa randica unai unaicaman cushijushpa causanata mascapangui (Mateo 6:​19-21, liingui). Sofiapa ejemplota ricupashun. Paimanga ballet nishca baileta estudiashpa catichunmi becacunata cungapaj munarca. Tucui Estados Unidos llactamanda jatun ali empresacunapashmi caipi trabajapai nishpa cayanajurca. Sofiaca ninmi: “Gentecuna alicachishpa ricuchunmi munan carcani. Cumbacunamanda ashtahuan yali sintirishpapash na cushilla carcanichu. Jipamanga Los jóvenes preguntan... ¿Qué haré con mi vida? nishca videotami ricurcani.  Chaimi cuenta japircani Jehová Diosta huashaman saquishpa cai mundopi gentecunatara pundapi churajushcata. Chaimandami Jehovata tucui shunguhuan mañashpa balletta bailanataca saquircani” nin. Chai decisionda agllashcamandaca ¿imashinata Sofiaca sintirin? Sofiaca ninmi: “Balletta bailanata saquishcamandaca na arripintirinichu. Cunanga ñuca cusandimi precursorcuna canchi. Na famosocuna cashpapash, na ashtaca cosascunata charishpapash cushillami causanchi. Ñucanchica Jehová Diosman quimirishcanchi, gentecunaman Bibliata yachachinchi, Jehovata ashtahuan sirvina munaitapash charinchimi” nin.

8. Jovenguna ali decisionda agllachunga ¿Bibliapi ima consejota ayudan?

⁸ Jehová Diosca jovengunapash ali causachunmi munan. Moisesca tapurcami: ‘Cangunata Mandaj Taita Diosca ¿imatata cangunataca mañan? Mandaj Taita Diosta manllachun, cazuchunmi mañan. Shinallata tucui shunguhuan, tucui almahuan juyashpa, sirvishpa causachunmi mañan. Mandashcacunata pactachishpa causachun tucuipi ali llujshichunmi’ mañan (Deut. 10:​12, 13). Jovenguna cunanmi Jehová Diosta tucui shunguhuan, tucui almahuan sirvinata agllana capanguichi. Jehovata sirvinata agllashpaca cushilla, alimi causangui.

9. ¿Imamandata Moisespaca israelitacunata Egiptomanda llujchinaca shinlli carca?

⁹ Moisesca ‘Egiptopi ninanda charijyanapa’ randica, Cristoshna rimai tucunatami agllarca (Heb. 11:26). Moisestaca ¿imamandata Cristoshna nin? Israelitacunata Egiptomanda llujchichun Jehová Dios agllajpimi Cristoshna nin. Israelitacunata ayudanaca shinllimi carca. Shuj punllaca shuj israelitallatami Moisestaca nalicachishpa nirca, ‘¿pita candaca ñucanchita mandachun, ñucanchi juez cachun churarcayari?’ nishpa (Éx. 2:​13, 14). Chaimi Moisesca Jehová Diosta nirca: ‘Faraongarin ¿imamandata uyahuangayari?’ nishpa (Éx. 6:12). Nalicachishpa ricunata yachashpami Moisesca manllanayanmi nishpa Jehovata mañarca. Shina nishpa mañajpica ¿imashinata Jehová Diosca ayudarca?

10. Jehová Diosca ¿imashinata Moisestaca ayudarca?

¹⁰ Pundapica Moisés ama manllachunmi Jehová Diosca, “Ñucami canhuan casha” nirca (Éx. 3:12). Shinallata Moisés shinlli tucuchunmi Jehová Diosca nirca: ‘Ñucami cani. Ñuca, ñucallatami cani’ shutimi cachamun ningui nishpa (Éx. 3:14). * Shina nishca jipapash, gentecuna crichunmi, Moisesmanga milagrocunata rurana poderta curca (Éx. 4:​2-5). Ashtahuangarin, gentecunahuan parlashpa Moisesta cumbachunga Aarondami Jehová Diosca cacharca (Éx. 4:​14-16). Chaimandami Moisés ña huañugrijushpaca Josuetaca nirca: ‘Mandaj Diosmi, canda ñaupashpa ringa. Paimi canhuan canga. Napacha saquingachu, na jichungachu. Ama manllaichu’ nishpa (Deut. 31:8).

11. Moisesca ¿imamandata Jehová Diospa mingashcata pactachi usharca?

¹¹ Jehová Dios ayudajpimi Moisesca ‘Egiptopi ninanda charijyanata’ saquishpa Jehovapa mingashcata pactachirca. Pensaripashunchi ¿imata ashtahuan ali carca, faraonda sirvina o Tucui Ushaita Charij Jehová Diosta sirvina? ¿Egiptopi mandana o Jehová Diospa agllashca canachu ashtahuan ali carca? Jehová Diosta sirvinata agllaimandami Moisesca Jehová Diospa ñaupajpi ali ricurirca. Jehovapash israelitacunata Canaan alpacunaman apachunmi Moisesmanga ‘ninan ushaita’ curca (Deut. 34:​10-12).

12. Jehová Diosca ¿imatata ñucanchicunamanbash mingashca?

¹² Jehová Diosca imashinami apóstol Pabloman, shujcunamanbash ali villaicunata  villachun mingarca, shinallatami ñucanchicunamanbash mingashca (Hechos 9:​15, liingui). Chaimandami tucuicuna villachina canchi (Mat. 24:14; 28:​19, 20). Huaquingunaca precursorcunami can. Cutin huaquingunaca congregacionbi huauquipanicunata ashtahuan ayudangapaj munashpami siervo ministerialcuna o ancianocuna can. Shinapash huaquinbica na Testigo familiacunaca ninmi, Jehovata sirvinaca na minishtirinllu nishpa. Huaquinbicarin, yangami purijungui nishpami nalicachishpa riman (Mat. 10:​34-37). Shina nishpa desanimachijpica, yangami purijuni, Jehovapa mingashcataca nali pactachijunichu nishpa yai callarinchipashchari. Shinaca shujcuna nalicachishpa rimajpica ¿imashinata feta charinaca ñaupaman catichun ayudanga?

13. Paipa mingashcacunata pactachichunga ¿imashinata Jehová Diosca ayudan?

¹³ Ama desanimaringapaca tucui shunguhuan Jehovapi crishpa ayudahuai nishpa mañashunchi. Imata manllajushpapash imamanda pinarijushpapash Jehovaman villashunchi. Paillata villachichun mingashcamandaca paillatami ayudanga. Imashinami Moisesta ayudarca shinallatami ñucanchitapash cashna ayudanga: 1) Jehová Diosca ñucanchitaca ninmi, ‘na shaijunachu canguichi, ñucami cangunaman ushaita cuj Taita Dios cani. Ñuca ali lado maquihuanmi cangunapa tucui causaipi ayudajushalla’ nishpa (Is. 41:10). 2) Paipa nishcacunapi confiachunmi Jehová Diosca nin: ‘Ñuca yarijushcataca pactachishapachami’ nishpa (Is. 46:11). 3) Chai jahuapash paipa ninan ushaitami Taita Diosca cunga (2 Cor. 4:7). 4) Paipa mingashcata pactachichunga mundo enteropi ashtaca huauquipanicunatami cushca. Paicunahuanmi randimanda animarishpa, alita ruranata yarichirinchi (1 Tes. 5:11). Paipa mingashcata pactachichun Jehová Dios ayudajpimi ñucanchicunapash Jehová Diospi ashtahuan crinchi. Ashtahuangarin, cai mundopi cosascuna yangalla cashcata intindishpami Jehová Diosta sirvinata ashtahuan ninanda alicachinchi.

14. Moisesca ¿imamandata shamuj punllacunapi chasquinataca ricujunshna causarca?

¹⁴ Moisesca ‘Dios carajpi japinata yaria, causashpami shamuj punllacunapi ima pasanata na cabalta yachashpapash ali decisiongunata agllarca (Heb. 11:26). Moisesca huañushcacuna causarinatami Abrahanshna shuyajurca (Luc. 20:​37, 38; Heb. 11:​17-19). Ashtahuangarin  40 huatacunata pacajushpa purijushcata, shuj 40 huatacunatapash chaquishca pambacunapi purijushcataca na arripintirircachu. Taita Diospa Shimi imashina pactarinata na cabalta yachashpapash shamuj punllacunapi chasquinataca ricujunshnami causarca.

15. ¿Imamandata shamuj punllacunapi chasquinataca yaria causana capanchi?

¹⁵ Ñucanchicunapash shamuj punllacunapi chasquinataca ¿yariachu causanchi? Imashinami Moisesca Taita Diospa munai imashina pactarinataca na cabalta yacharca, ñucanchicunapash Ninan Manllanai Llaqui Punllacuna ¿ima hora callarinataca na yachanchichu (Mar. 13:​32, 33). Shinapash shamuj punllacunapi Paraíso tianataca crinchimi. Na tucuita yachashpapash Diospa Reino mandajpi ali causai tianataca tucui shunguhuanmi crinchi. Chaimandami shamuj punllacunapi chasquinataca ricujunshna causanajunchi. Paraisota ricujunshna causanami Taita Diospa Reinota pundapi churachun ayudanga. Pensaripashun. Shuj huasi imashina cajta na ali yachashpaca ¿chai huasita randinchimanllu? Shinallata, Taita Diospa nishcacuna na pactarina cajpica ¿Taita Diospa munaita pundapi churashpa causajunchimanllu? Feta charimandaca Paraisopi imashina causanataca yariami causana canchi.

16. Diospa Reino mandajpica ¿ima bendiciondata charingapaj munapanguiman?

¹⁶ Paraisota yaria causangapaca pensaripashunchi: Ashtaca huañushcacuna causarijpica ¿imatata tapusha? Tucurimui punllacunapi causaica ¿imashinata carca? nijpica ¿imatata nisha? nishpa. Shinallata punda tiempo gentecuna causarijpica Jehová Dios paicunata causachingapaj, paicunaman unai unaicaman causana esperanzata cungapaj imata rurashcatami parlai ushashun. Ashtahuangarin, Paraisopica cunanbi millai animalcunapash mansomi canga. Paicunata ricushpaca ninandami cushijushun. Juchapash chingarishpa catijpimi Jehová Diosman ashtahuan quimirishun.

17. Shamuj punllacunapi ali causai tianata yaria causanaca ¿imashinata ayudan?

¹⁷ Shamuj punllacunapi ali causai tianata yaria causashpami cunanbica cushilla causaita ushashun. Ima decisionda agllagrijushpapash alimi agllashun. Apóstol Pabloca nircami: ‘Ñucanchi shuyanajushcataca ali shunguhuanbachami shuyanchi’ nishpa (Rom. 8:​25, Mushuj Testamento Imbabura). Cunanbica tucuicunallatami huañunchi. Shinapash shinlli feta charimandami shamuj punllacunapi unai unaicaman causanata shuyanajunchi. Moisespa ejemplota catishpami Jehová Diosta sirvinataca na arripintirinchi. Ashtahuangarin ‘imata ricushcacunapash tucurinllami. Na ricushcacunami’ unai unaicaman causaita cunga nishpami causanchi (2 Corintios 4:​16-18, liingui).

18, 19. a) ¿Imamandata feta charinaca shinlli can? b) Shamuj temapica ¿imatata yachajupashun?

¹⁸ Feta charimandami ‘japigrinataca aligutapacha yachanchi’ (Heb. 11:1). Cutin feta na charij gentecunapaca Jehová Diosta sirvinaca yangami can. Paicunapa ñaupajpica juizu illajcunallami Taita Diostaca sirvin (1 Cor. 2:14). Shinapash ñucanchicunaca na huañushpa causangapami munanchi. Huañushcacuna causarijtapash ricungapami munanchi. Feta na charijcunaca chaitaca na crinllu. Huañushcacuna causarinamanda villachijpica ñaupa tiempopi apóstol Pablotashnami llullashpa pandachinajunguichi nin (Hech. 17:18).

¹⁹ Feta na charijpuracunapi causaimandami feta charinaca shinlli can. Chaimandami Jehová Diostaca alipacha crishpa catichun ayudahuai nishpa mañana canchi (Luc. 22:32). Moisespa ejemplomi ñucanchitaca ayudan: 1) Juchata rurashpa cushijunaca ashapalla cashcata intindichun, 2) Jehovata sirvina ali cashcata crichun, 3) shamuj punllacunapi ali causai tianata yaria causachun. Shinapash ¿imashinata feta charinaca ‘pipa ñavipipash na ricurij Diosta ricujunshna’ causachun Moisestaca ayudarca? (Heb. 11:27.) Chaitaca shamuj temapimi yachajushun.