1, 2. a) Moisesca ¿imamandata jatun llaquipishna carca? (Callari dibujota ricupangui.) b) Moisesca ¿imamandata faraón culiranataca na manllarca?

FARAONGA ninan jatun mandajmi carca. Egipciocunaca paitami dios nin carca. Shuj libropipash ninmi, chai tiempopi gentecunaca ninmi carca ‘faraonmi gulpi gentecunata yali ashtahuan shinlli, ashtahuan yachan’ nishpa (When Egypt Ruled the East [Cuando Egipto gobernaba el Este]). Egipciocuna manllachun, contracunata ñapash tucuchigrijujta ricuchunmi faraonga paipa coronapica, ña picagrijunshna culebra moldeta charin carian. Shinaca pensaripashunchi: ¿Imashinashi Moisesca sintirirca ‘ñuca agllashca israelitacunata Egiptomanda llujchimui’ nishpa Jehová Dios mandajpica? (Éx. 3:10.)

² Moisesca Jehová mandashcashnami Egiptoman rishpa faraonhuan parlarca. Ña 9 viajeta rijpica ashtahuan culirashpami faraonga nirca: ‘Ñuca ñavipica ama ashtahuan ricurihuaichu. Ima punllapash ñuca ñavita ricushpaca huañunguimi’ nishpa (Éx. 10:28). Shinapash Moisesca faraondaca nircami, na uyashpaca  canba punda churi huañungami nishpa (Éx. 11:​4-8). Chai jipaca gulpi israelitacunata cayashpami Moisesca nirca, shuj chivogupa o shuj jari llamagupa cungata cuchushpami, chai yahuartaca cangunapa huasi pungu yaicuna caspipi javina canguichi nishpa. Egipciocunaca jari llama moldetami ñucanchi Ra shuti dios nin carca (Éx. 12:​5-7). Shinapash Moisesca ‘pipa ñavipipash na ricurij Diosta ricujunshna aligutapacha catijushcamandami’ faraón culiranataca na manllarca (Hebreos 11:​27, 28, liingui).

3. Moisesmandaca ¿ima quimsa tapuicunatata yachajugripanchi?

³ ¿Ñucanchicunapash shinlli feta charinchichu? (Mat. 5:⁠8.) ‘Pipa ñavipipash na ricurij Diosta ricujunshna aliguta catishpa’, shinlli feta charingapaca Moisespa ejemplota yachajushpa cai quimsa tapuicunata ricupashunchi: 1) Feta charinaca ¿imashinata Moisestaca gentecunata na manllachun ayudarca? 2) ¿Imashinata Diospa nishcacuna pactarinapi crishcata ricuchirca? 3) ‘Pipa ñavipipash na ricurij Diosta ricujunshna causanaca’ ¿imashinata israelitacunapash Moisespash llaquipi cajpica ayudarca?

4. Moisesta faraonhuan chimbapurajpica Moisesca ¿imashinata carca?

⁴ Moisesta faraonhuan chimbapurajpica Moisesca na imapash carcachu. Faraonga pai munashca horas Moisestaca huañuchinallami carca. Chaimandami Moisesca Jehová Diostaca tapushcanga: ‘Faraonbaman rishpa, israelitacunata Egiptomanda llujchingapaca ¿ñucaca pita cani?’ nishpa (Éx. 3:11). Chai punllacunapica ñami Moisesca Egiptomanda llujshishpa 40 huatacunata shuj llactapi causajurca. Moisesca tal vez pensashcangami: “Egiptoman tigrashpa faraonda culirachishpaca ¿alitacha rurasha?” nishpa.

5, 6. ¿Imata Moisestaca ayudarca faraonda manllanapa randica Jehová Diosta manllachun?

⁵ Egiptoman nara rijpillatami Jehová Diosca Moisesmanga yachachirca, ñucata manllanaca minishtirishcapachami can nishpa. Moisespash Job libropica nircami: ‘Jatun Diosta manllanami ali yachaita’ cun nishpa (Job 28:28). Chai shimicunata aliguta intindichunmi Jehová Diosca Moisestaca tapurca: ‘Shimitaca ¿pita runaman curca? ¿Nachu Mandaj Dios ñucallata rurarcani?’ nishpa (Éx. 4:11).

⁶ Imashinami ricunchi, Moisesca na faraonda manllanachu carca. Jehová Diosllata Moisesta faraonbaman cachajushcamandaca Jehová Diosllatami ayudana carca. Shinallata, faraonda Jehová Dioshuan chimbapurajpica faraonga yangami carca, na ushaita charircachu. Ashtahuangarin, Jehová Diosca ñami Abrahandapash, Josetapash, Moisestapash punda faraongunamanda salvashcarca. Tucui chaicunata yarishpami Moisesca faraondaca na manllanachu cani yashcanga (Gén. 12:​17-19; 41:​14, 39-41; Éx. 1:22–2:10). Moisesca ‘pipa ñavipipash na ricurishca Diosta ricujunshna aligutapacha catijuimandami’ faraonba ñaupaman rishpa Jehová Diospa tucuilla nishcacunata na manllashpa villarca.

7. Feta charimandaca ¿imatata shuj paniguca rurarca?

⁷ Ella shuti panigupash Jehová Diospi feta charimandami gentecunata manllana trampapica na urmarca. Paitaca 1949 huatapimi policiacunaca Estonia llactapi preso japirca. Panigupa ropata llujchichijpimi joven policiacunaca nali pensamientocunahuan panigutaca ricunajurca. Chai paniguca ninmi: “Policiacuna ricunajujpica ninandami pinganayarca. Shinapash Jehová Diosta mañashpami alillata sintirircani” nishpa. Chai jipaca quimsa punllacunatami paitalla shuj yana yana ucupi vicharca. Policiacunaca caparinajurcami: “Estonia llactapica pipash Jehová shutitaca na yaringachu. Candaca shinllita trabajachunmi  cachashun, cutin shujcunataca Siberia llactamanmi cachashun. Canba Jehovaca maipitayari’ nishpa. Shina nishpa burlarinajujpica ¿imatashi paniguca rurarca? ¿ Jehová Diospi confiarcachu? ¿Gentecunata manllana trampapi urmarcachu? Villachinata saquijpica libre llujchishunmi nijpipash paniguca nircami: “Libre llujshishpa Jehová Diospa ñaupajpi nali ricurinapa randica carcelpimi quedasha” nishpa. Chai paniguca Jehovata ricujunshna catijuimandami chai policiacunataca na manllarca. Feta charimandami paniguca llaquipi cashpapash Jehovata tucuipi cazurca.

8, 9. a) Gentecunata ama manllangapaca ¿imatata rurana capanchi? b) Gentecunata manllashpaca ¿pitata yarina capanchi?

⁸ Ñucanchicunapash Jehovapi feta charishpaca na manllashunllu. Taita Diosta ñana adoranachu canguichi nishpa gobiernocuna mandajpica tal vez manllarishpachari tapurishun: “Jehovata cazuimanda autoridadcunata culirachishpaca ¿alitachu ruragrijuni?” nishpa. Shina yashpaca caitami yarina canchi: Gentecunata manllanapa randica Jehová Diostami manllana canchi (Proverbios 29:​25, liingui). Ñucanchicunapash aliguta intindichunmi Jehová Diosca nin: ‘Cangunaca ¿imamandata jupashna huañuna runatara manllanguichi?’ nishpa (Is. 51:​12, 13).

⁹ Llaquicunapi cashpaca ñucanchi jahua pachapi Tucui Ushaita Charij Taita Diosta yarishunchi. Gobiernocuna ñucanchita llaquichinajujpica Jehová Diosca llaquishpami ricujun, ayudangami (Éx. 3:​7-10). Gobiernocunahuan parlanata ama manllachunmi Jesusca nirca: ‘¿Imashinata rimasha, imatata nisha?’ nishpaca, na manllanachu canguichi. Canguna rimajuj horaspi imata rimanataca’ Taita Diosmi ayudanga nishpa (Mat. 10:​18-20). Jehová Dioshuanga maijan gobiernopash na ushangachu. Shinaca cunanllata ñucanchi feta shinlliyachishunchi. Shinami, llaqui punllacuna shamujpica Jehová Dios ayudangapaj munajujta yaria cashun.

10. a) Jehová Diosca ¿imatata israelitacunataca mandarca? b) Moisesca ¿imamandata Jehová Diosta cazurca?

¹⁰ Jesús shamungapaj 1513 huatacuna faltajpimi Jehová Diosca Moisestapash Aarondapash mandarca israelitacunamanga cashna ninguichi nishpa, shuj chivopa o shuj jari llamagupa cungata cuchushpa yahuartaca huasi pungu yaicuna caspipi javinguichi nishpa (Éx. 12:​3-7). Moisesmanda parlashpaca apóstol Pabloca nircami: ‘Moisesca crishpami pascua fiestata callarichirca. Paica pungu jahuacunapi llamapa yahuarta javichunmi mandarca’. Israelitacunapa ‘punda huacharishca jari huahuacunata huañuchij ama tacarichunmi shina mandarca’ nishpa (Heb. 11:28). Moisesca Jehová Dios cierto nijujta yachashpami egipciocunapa punda churicunata huañuchinataca tucui shunguhuan crirca.

11. Moisesca ¿imamandata Jehová Dios mandashcata israelitacunaman villarca?

¹¹ Moisespa huahuacunaca Madián llactapi caimandami na imapash peligropi carca (Éx. 18:​1-6). Shinapash Moisesca israelita huahuacunata llaquishpa, na huañuchun munashpami Jehová Dios mandashcataca tucuita villarca. * Bibliapica ninmi: ‘Moisesca israelitacunata mandaj rucucunata tucuillata cayashpami nirca: “Maltun llamata llujchishpa pascua punllapi huañuchinguichi” ’ nishpa (Éx. 12:21).

12. Jehová Diosca ¿imata villachichunda mingashca?

¹² Cunanbipash angelcuna ayudajpimi gentecunamanga cashna nishpa villanchi: ‘Taita Diosta manllashpami, punchapambagumi cangui nina canguichi. Pai llaquichina punllacunami ña pactamushca. Chaimandami jahua pachata, cai pachata, mama cuchata, pugyu yacucunata ruraj Diostaca, ninanda alicachina canguichi’ nishpa (Apoc. 14:7). Cunanmi gentecunataca,  ‘ama llaquichi tucungapaca’ Babilonia shuti jatun pueblomanda llujshichi nishpa villachina canchi (Apoc. 18:4). Ungidocunapash ‘shuj llamagucuna’ nishcacuna ayudajpimi gentecunamanga ‘Taita Dioshuan ali tucupaichi’ nishpa villachinajun (Juan 10:16; 2 Cor. 5:20).

13. Ashtahuan villachina munaita charingapaca ¿imatata rurana capanchi?

¹³ Jehová Dios llaquichina punlla ña pactamushcata yachashpami uchashpa villachinchi, yachachinchi. Apóstol Juanga shuj muscuipishna ricushpami nirca: ‘Cai pachapi tiaj chuscundi manñacunapimi angelcuna shayanajurca. Paicunaca alpamanbash, huaira ama shamuchunmi, huairataca chuscundi manñacunapi jarcashpa shayanajurca’ nin (Apoc. 7:1). Shinaca ¿chuscundi ladocunapi shayanajuj angelcuna huairata ñalla cacharinataca crinchichu? Chaipi crishpaca ashtahuan villachina munaitami charishun.

14. ¿Imamandata nalita rurajcunataca ali ñanman tigraichi nishpa villachinchi?

¹⁴ Jesusta ali catijcunaca ñami Jehová Dioshuan ali tucushcanchi, shinallata unai unaicaman causana esperanzatapash charinchimi. Shinapash nalita ruraj gentecunamanga nali ñanda saquishpa, alita rurashpa salvarichunmi villachina canchi (Ezequiel 3:​17-19, liingui). Ñucanchica na villaimandalla villachinchichu. Jehovata juyaimanda, gentecunata juyaimandami villachinchi. Jesusca paipa catijcuna shujcunata llaquishpa ayudachunmi samaritano runagumanda parlarca. Shinaca tapuripashunchi: “¿Chai samaritano runagushnachu gentecunataca llaquishpa ricuni? ¿Gentecunata llaquimandachu villachini? ¿Levita runa cuenda o sacerdote cuendachu imatapash nij tucushpa na shujcunaman villachini? nishpa (Luc. 10:​25-37).  Jehovapa nishcacuna pactarinata crimanda, gentecunata juyaimandami tiempo tiajpillata ashtahuan villachina canchi.

15. ¿Imamandata israelitacunaca ninanda manllarinajurca?

¹⁵ ‘Pipa ñavipipash na ricurij Taita Diosta ricujunshna’ causanami Moisestaca israelitacuna Egiptomanda llujshishpa llaquipi cajpica ayudarca. Bibliapica ninmi: ‘Israelitacunaca Egiptopi causajcuna huashata catimujujtami ñapash ricurca. Chaimandami israelitacunaca ninandapacha manllarishpa, Mandaj Diosta caparishpa mañanajurca’ nin (Éx. 14:​10-12). Shinapash paicunaca na manllanachu carca. Jehová Diosca nishcarcami: ‘Ñucami cangunata catichun Faraonba shungutaca shinlliyachisha. Faraondapash, paipa tucui soldadocunatapash tucuchishcamandami, ñucaca punchapambami cangui ni tucusha. Egiptopi causajcunaca, ñucalla Mandaj Dios cajtami yachanga’ nishpa (Éx. 14:4). Israelitacunaca egipciocuna jatun carretacunapi huashata shamunajujtami ricurca. Cutin ñaupamanga na chimbanalla jatun jatun yacutami ricurca. Paicunata pushajujpash llamacunata michij rucugumi carca. Chaicunata ricushpami israelitacunaca ninanda manllarinajurca.

16. Mar Rojopi cajpica ¿imashinata feta charinaca Moisesta ayudarca?

¹⁶ Shinapash Moisesca egipciocunataca na manllarcachu. Paica Jehová Dios paicunamanda macanajushpa ‘quishpichinatami’ crirca (Éxodo 14:​13, 14, liingui). Moisespa feta ricushpami israelitacunapash mar Rojotaca ‘chaquishca pambatashna yalinajurca. Paicuna yalijpimi Egiptomanda soldadocunapash paicunashnallata yalingapaj munashpa catijuimandaca yacupi pambarirca’ (Heb. 11:29). Chaita ricushpami ‘israelitacunaca Mandaj Diosta manllashpa’ Moisestapash Mandaj Diostapash crinajurca (Éx. 14:31).

17. Shamuj punllacunapica ¿ima llaquitata charishun?

¹⁷ Ñallami ñucanchicunapash shuj jatun llaquipi cashun. Ninan Manllanai Llaqui Punllacuna ña tucurinallapimi gobiernocunaca jatun religiongunatapash tucuchinga (Apoc. 17:16). Chai punllacunapica Jehová Dios nishca shinami, ‘jatun pircacunapash, aldabacunapash, pungucunapash illajshna’ cashun (Ezeq. 38:​10-12, 14-16). Gentecuna ricushpaca na salvarita ushangachu yangami. Shinapash ¿imashinata sintirishun?

18. ¿Imamandata ‘ninan manllarina punllacunapica’ na manllarina capanchi?

¹⁸ Ñucanchicunaca na manllanachu canchi. Jehová Diosca salvashami nishpami cashna nirca: ‘Ñuca llactata Gog shuti runa llaquichingapaj shamujpica, nina rupajunshna ninandapacha fiñarishpami rimasha’ nishpa (Ezeq. 38:​18-23). Jehovata sirvijcunata llaquichingapaj munajcunaca tucuchi tucungami. ‘Ninan manllarina punllacunapi’ Jehová Dios cuidanata crishpami Jehová Dios salvajta ricushpa tucuipi cazushpa causashun (Joel 2:​31, 32).

19. a) Moisesca ¿imashinata Jehová Dioshuanga llevarirca? b) Imata ruragrijushpapash Jehová Diosta yarishpaca ¿ima bendiciondata charipashun?

¹⁹ Imashinami ricupanchi ali punllacunami tianga. Shinaca ‘pipa ñavipipash na ricurij Taita Diostaca ricujunshna’ causashunchi. Bibliamanda yachajushpa, mañashpa Jehová Diosman ashtahuan quimirishunchi. Moisesca Jehová Diospa ali amigomi carca. Chaimandami Jehová Diosca paipa munaita pactachichun Moisesmanga manllanai cosascunata rurachun poderta curca. Bibliapica ninmi, Moisestaca ‘ñavi ñavimi’ Taita Diosca rijsirca nishpa (Deut. 34:10). Moisespa ali ejemplota catishpa ñucanchicunapash shinlli feta charishpaca Jehovaman ashtahuan quimirishpami Jehová Diosta ricujunshna causanajushun. Bibliaca ninmi: ‘Imata ruranajushpapash Diostara yaringui’. Paimi ñucanchi ‘purina ñangunatapash aliguta pushanga’ nishpa (Prov. 3:6).