1, 2. ¿Imamandata apóstol Pabloca ushaita na charijcunataca ali intindirca?

TUCUICUNALLATAMI gripe japijpi o imapash ungüi japijpica calajlla sintirishpa imatapash na rurai ushanchi. Shinapash, ashtaca quillacunata calajlla, na valishca sirijushpaca ¿nacha pipash llaquishpa ali tratajpica alillata sintirinchiman?

² Apóstol Pablopash na crij gentecuna llaquichijpi, congregacionbi llaquicunata ricushpami calajlla, irquilla huaquinbica sintirin carca (2 Cor. 1:8; 7:5). Jesusta catijuimanda tucui llaquicunata yarishpami paica nirca: “¿Nachu ñucapash ushai illanshna tucuni?” nishpa (2 Cor. 11:29). Ashtahuangarin tucui huauquipanicunata ñucanchi cuerpo partecunahuan chimbapurashpami nirca, huaquingunaca ‘imatapash na rurai ushanashnalla cashpapash, ashtahuan minishtirishcacunami’ can nishpa (1 Cor. 12:22). ¿Imamandata apóstol Pabloca shina nirca? Ushaita na charijcunataca ¿imashinata Jehová Diosca ricun? ¿Imamandata Jehová Diospa ejemplota catina canchi? Paipa ejemplota catishpaca ¿picunata beneficiarin?

3. Huaquinbica ¿imamandata congregacionbi cutin cutin ayudata minishtijujcunataca nalicachishpa ricui callarinchi?

³ Cunan punllacunapi gentecunaca jovengunata, fuerzata charijcunatami ashtahuan alicachishpa ricun. Ushaita na charijcunataca ladoman churashpami paicunalla alipi llujshingapaj munan. Shuj gentecuna shina cajpipash huaquinbica ñucanchipashmi chai gentecunapa yuyaita catishpa congregacionbi cutin cutin ayudata minishtijujcunataca nalicachishpa ricui callarinchi. Shinaca ¿imashinata Jehová Diospa ejemplota cati ushashun?

4, 5. a) ¿Imatata 1 Corintios 12:​21-23​pica yachachin? b) Na ushanajujcunatapash ayudanaca ¿imashinata ñucanchitapash ayudan?

⁴ Ushaita na charijcunata Jehová Dios imashina ricujta intindichunmi apóstol Pabloca 1 Corintios capítulo 12ta escribirca. Chai cartapica intindichircami, ñucanchi cuerpopi uchila partegucuna o imapapash na sirvij partegucunashnalla cashpapash minishtirishcapachami can nishpa (1 Corintios 12:​12, 18, 21, 22, liingui). Evolucionbi crij gentecunaca ninmi carca, chaquipi huahua dedoca na imapapash minishtirinllu nishpa. Shinapash cunan punllacunapi ashtahuan investigaciongunata rurashpa ricujpica huahua dedoca minishtirishcami can, huahua dedota charimandami chaqui ali sarushpa ali purinchi. *

⁵ Apóstol Pablo yachachishca shinaca, tucuicunami congregacionbica minishtirishcacuna canchi. Diablomi ñucanchitaca imapapash na sirvinichu, Taita Diosca ñucata cungahuashcami yashpa pensachun munan (Job 4:​18, 19). Shinapash Jehová Diospa ñaupajpica na ushanajujcunapash minishtirishcami can. Chaita intindishpaca congregacionbipash, Jehová Diospa organizacionbipash minishtirishcami cashcani yashpami cushilla sintirishun. Yaripashunchi ¿nachu huaquinbica mayorlla personaguta rigramanda apashpa, paipa pasopi alimanda rishpa ayudapashcanchi? Shujcunata chashna ayudashpami cushilla sintirinchi, pacienciata charinchi, juyaita ricuchinchi, ashtahuan ali Testigocunapash tucunchi (Efes. 4:​15, 16). Jehová Diosca munanmi, na ushanichu nij huauquipanicunatapash alicachishpa ricuchun. Tucuilla huauquipanicunata alicachishpa ricujpica congregacionbi tucuillacunami juyarishpa ali catin.

6. Apóstol Pabloca ¿imamandata ushaita na charijcunamandapash, shinlli crijcunamandapash escribirca?

⁶ Apóstol Pabloca, Jesuspi na crij gentecuna Jesusta catijcunata ushaita na charijcuna nishpa rimanajujpi, paillata ushaita na charinshna sintirishpami, ushaita na charijcunamanda escribirca (1 Cor. 1:​26, 27; 2:3). Pabloca ‘shinlli crijcunamandapashmi’ escribirca. Shinapash ¿imamandata ushaita na charijcunamandapash shinlli crijcunamandapash escribirca? Paica pipash na ashtahuan mejor cashcata intindichingapami munarca (Rom. 15:1). Ashtahuangarin, experienciata charij huauquipanicuna mushujcunata pacienciahuan ayudana cashcata intindichunmi munarca.

7. Huaquinbica ¿imamandata shujcunata ayudanaca na fácil can?

⁷ “Imagutapash na charij runaguta” ayudashpaca Jehová Diospa ejemplota catishpami paipa ñaupajpipash ali ricurinchi (Sal. 41:1; Efes. 5:1). Shinapash huaquinbica shujcunata ayudanaca na facilchu can. ¿Imamandata na fácil can? Huaquinbica “paichari ricunga” nishpami llaquipi caj huauquitaca yangata ricunchi. Cutin huaquinbica ima ninatapash na  atinashpa, pingai tucushpami mejor caruyanchi. Shuj ejemplota ricupashun. Rosario * panigutaca cusami jichushpa rirca. Paica ninmi: “Chashna llaquipi cajpica turicuna, ñañacuna ayudachunmi minishtirin. Ayudachun minishtijuj horaspacha turicuna, ñañacuna ladushpa rijpi o na can munashcashna ayudajpica ninandami llaquiririn” nishpa. Rey Davidpash shujcuna paitalla ladoman saquijpimi llaquilla sintirirca (Sal. 31:12).

8. Ñucanchi huauquipanicunata llaquishpa ayudangapaca ¿imatata yarina canchi?

⁸ Ñucanchi huauquipanicunata llaquishpa ayudangapaca ¿imatata yarina canchi? Huaquingunaca na sano caimanda, depresión ungüita charimanda o huasipi familiacuna na Testigo cajpi na ushanajujtami yarina canchi. Shinallata jipa punllacunapi tal vez ñucanchipash chashna llaquipi urmanatami yarina canchi. Israelitacunapash Canaán alpacunaman nara yaicushpaca ninanda sufrishpami Egipto llactamandaca llujshirca. Chaita yarishpa ali tratachunmi Jehová Diosca nirca, cangunapa huauquicuna sufrijujta ricushpaca ‘ama shinlli shungu tucunguichichu’ nishpa. Jehová Diosca tucuilla pobre gentecunata, na ushajuj gentecunatapash ayudachunmi munarca (Deut. 15:​7, 11; Lev. 25:​35-38).

9. Shuj huauqui na ushajujpica ¿imapita ashtahuanga preocuparina canchi? Shuj ejemplota nipai.

⁹ Huaquinbica pensanchipashchari, cai huauqui o cai panica paipa culpamandallatami shina pasajun o imapash nalita rurashpami shina pasajunga nishpa. Shina pensajunapa randica Jehová Diospa ñaupajpi ali ricurichunmi ayudana canchi (Job 33:​6, 7; Mat. 7:1). Shuj ejemplota ricupashun. Motopi accidentarishcata hospitalman apajpica doctorcunaca musparishpachu ¿pipa culpata carca? ¿Paipa culpamandallatachu accidentarirca nishpa? averiguaitara averiguanajun ¿Nachu chaipa randica uchalla jambi callarin? Ñucanchicunapash shuj huauqui na ushajujpica uchallami Taita Diospa ñaupajpi ali ricurichun ayudana canchi (1 Tesalonicenses 5:​14, liingui).

10. ¿Imashinata huaquingunaca na ushanajunshnalla cashpapash shinlli feta ricuchinajun?

¹⁰ Aliguta pensarijpica, na ushanajunshnalla cashpapash huauquipanicunaca shinllimi can. Huaquin ejemplocunata ricupashun. Tauca panicunaca huasipi familiacuna na Testigo cajpimi na ushanajunshnalla purinajun. Shinapash aliguta pensarijpica ¿nachu paicunaca shinlli feta charishcata ricuchinajun? Huaquin mamacunapash paicunallami huahuacunata apashpa tandanajuicunaman rin. ¿Nachu paicunapash feta charishcata, Jehová Diosta cazushcata ricuchinajun? Jovengunapash escuelapi o colegiocunapi nalita rurachun atichinajujpipash paicunaca chai trampacunapi na urmashpami Jehová Diosta sirvishpa catinajun. Shinami paicunaca na ushanajunshna ricurishpapash shinlli feta ricuchinajun (Sant. 2:5).

11, 12. a) Jehová Diospa ejemplota catishpa na ushanajujcunata ali tratangapaca ¿imatata rurana capanchi? b) ¿Imamandata Jehová Diosca Aaronda perdonarca? c) ¿Imatata Jehovapa ejemplomandaca yachajupanchi?

¹¹ Na ushanajujcunata ali tratangapaca Jehová Diospa ejemplotami catina canchi (Salmo 130:​3, liingui). Pensaripai. Uchilla oro huagrata Aarón rurashca jipa gentecunapa culpamandami shina rurarcani nijujta uyajushpa Moiseshuan chaipi cashpaca ¿imatashi pensanchiman carca? (Éx. 32:​21-24.) Shinallata Miriamba shimita uyashpami Aaronga nalicachishpa Moisestaca rimajurca, canga na israelita huarmihuanmi cazarashcangui nishpa. Chaita uyashpaca ¿imatashi pensanchiman carca? (Núm. 12:​1, 2.) Ñucanchimi cai rumimanda  yacuta llujchircanchi nishpa shayanajujta ricushpaca ¿imatashi Moisesmanda Aaronmandapash pensanchiman carca? (Núm. 20:​10-13.)

¹² Jehová Diosca Aarondaca ñapash castiganallami carca. Shinapash Aaronga pandarimandami shina nijun, gentecunapa shimita uyaimandami shina nijun yashpami Jehová Diosca Aaronda intindirca. Aaronbash nalitami rurashcangui nijpica pandarishcanimi nishpami arripintirirca (Éx. 32:26; Núm. 12:11; 20:​23-27). Jehová Diosca Aaronba pandarishcacunata ladoman saquishpami paipa shinlli feta ricushpa perdonarca. Chaimandami jipa huatacunapipash Aarondapash paipa familiatapash shinlli fetami charirca nishpa israelitacunaca yarirca (Sal. 115:​10-12; 135:​19, 20).

13. Jehovapa ejemplota catingapaca ¿imatata rurana capanchi?

¹³ Jehová Diospa ejemplota catingapaca pensarinami canchi, na ushanajujcunamandaca ¿imatata yani? nishpa (1 Sam. 16:7). Pensaripai shuj joven nali diversionda agllashpa, nali purijujta ricushpaca ¿yangata rimai callarinchillachu? ¿Nachu yangata rimanapa randica Jehovata ali sirvichun ayudana ashtahuan ali canman? Shujcunata ayudana munaihuan ñucanchira paicunapaman quimirishpa ayudashpaca paicunata intindinata, paicunata juyanatami yachajushun.

14, 15. a) ¿Imamandata Eliasca huañungapaj munarca? b) Profeta Elías ninanda llaquirijujta ricushpaca ¿imatata Jehová Diosca rurarca? c) ¿Imatata Eliaspa experienciamandaca yachajupanchi?

¹⁴ Depresionhuan cajta ricushpaca ¿imatata Jehová Diosca pensan? Profeta Eliasta Jehová Dios imashina ayudashcata ricupashun. Profeta Eliasca shinlli shayarishpami Baal nishca yanga diospa 450 profetacunataca rimarca. Shinapash, reina Jezabel huañuchigrijujta yachashpaca shitashca, chaquishca pambacunapi  pacajungapami caruta rirca. Ashtahuangarin, ushashcata indijpi shaijushpa, na ushajushpami uchilla quiru ladopi tiarishpa Jehová Diostaca, huañuchun saquihuai nishpa mañarca (1 Rey. 18:19; 19:​1-4).

¹⁵ Paipa ali profeta ninanda manllarishpa, ninanda llaquirishpa shina nijujta uyashpaca ¿imatata Jehová Diosca rurarca? ¿Eliastaca ñana ricunayachishpachu ladoman saquirca? Ladoman saquinapa randica shuj angelta cachashpami Jehová Diosca ayudarca. Taita Diospa angelca ishcai viajemi Eliastaca nirca: “Jatarishpa micui. Can riña ñanga, ashtaca tianrami” nishpa (1 Reyes 19:​5-8, liingui). Imashinami ricunchi, Jehová Diosca Eliasta uyashca jipa, ayudashca jipami imata ruranataca nirca.

16, 17. ¿Imashinata Jehová Diospa ejemplota catishpa congregacionbi huauquipanicunata ayudashun?

¹⁶ ¿Imashinata Jehová Diospa ejemplota catishun? Jehovapa ejemplota catingapaca na yangata consejaimanda consejanallachu canchi (Prov. 18:13). Pundapica imamanda llaquilla sintirijujtami aliguta uyana canchi (1 Cor. 12:23). Shina rurashpami imapi ayudachun minishtijujta intindishpa ayudai ushashun.

¹⁷ Rosario paniguta cutin yaripashun. Cusa saquishpa rijpimi paica paipa ishcai ushigucunahuanlla llaquilla quedarca. Paicuna chashna llaquipi cajpica ¿imatata congregacionmanda huauquipanicunaca rurarca? Rosarioca ninmi: “Telefonopi cayashpa, cusa saquihuarcami nishpa villajpica 45 minutocunapica ñami, turicuna ñañacunaca huasiman shamurca. Paicunapashmi ñucahuan huacarca. Ishcai o quimsa punllacunachu imacharimi ñucata huasipi cumbanajurca. Na micushpa, manllaihuan tianajujta ricushpami paicunapa huasiman pusharca” nishpa. Chai huauquicunapa, panicunapa ejemplota ricushpami Bibliapa cai shimicunata yarinchi, huauquicuna, panicuna micunagu illa, churajuna illa causajujta ricushpa ‘aliguta ripanguichi, aliguta churajupanguichi, micuitapash aliguta micunguichi nishpapash imagutapash na carashpaca ¿alichu canga? Alita ruranacunata na rurashcamandaca paipa crishcapash huañushcashnami tucunga’ nishpa (Sant. 2:​15-17). Congregacionbi huauquicuna, panicuna ayudajpimi cusa shitashcamanda 6 quillacuna jipalla Rosarioca paipa ishcai ushigucunandi alillata sintirishpa precursorado auxiliarta japirca (2 Cor. 12:10).

18, 19. a) Na ushanajujcunataca ¿imashinata ayudashun? b) Na ushanajujcunata ayudajpica ¿picunallata beneficiarin?

¹⁸ ¿Nachu ninanda ungushca cashpa ali tucungapaca ashtaca tiempota minishtishcanchi? Pandarimanda o imapash llaquicunamanda espiritualmente ungushcacunapash ashtaca tiempotami ali tucungapaca minishtin. Paicunaca Bibliata yachajushpa, Jehovata mañashpa, tandanajuicunaman rishpa catinami can. Shinapash ñucanchicunaca ¿paicunata llaquishpa intindishcata, paicunapa ladopi cashcata ricuchishunllu? Na ushanajunshnalla huauquipanicunataca tucuicunallatami juyashpa paicunaca congregacionbi minishtirishcacuna cashcata yarichina canchi (2 Cor. 8:8).

¹⁹ Ñucanchi huauquipanicunata ayudashpaca cushillami sintirishun. Paicuna imashina sintirijuta intindinata, pacienciata charinatapashmi yachajushun. Congregacionbipash tucuillacunami ashtahuan juyaringa. Ashtahuangarin, ‘na ushanajujcunata’ ayudashpaca Jehovapa ejemplota catishpami tucuicunata congregacionbica minishtirishcacunami can nishpa ricushun (Hech. 20:35).