▪ Trinidadmanda parlashpaca shuj shuj yuyaicunatami gentecunaca charin. Shinapash ashtacacunaca ninmi: “Taitaca Diosmi can, Churipash Diosmi can, Espíritu Santopash Diosmi can. Quimsa cashpapash shujlla Diosmi can” nishpa (Credo Atanasiano). Shinapash ¿chaitachu Bibliapica yachachin?

Ashtaca gentecunaca Mateo 28:19​ta ricushpami Trinidadpi crin. Chai textopica Jesusca nircami: ‘Ñucapa yachajujcuna tucuchunmi, cai pachapa gentecunapaman rishpa villana canguichi. Paicunataca Taitapa, Churipa, Diospa jucha illaj Espiritupa shutipimi bautizana canguichi’ nishpa. Cai textopica Taitamanda, Churimanda, espíritu santomandami parlajun. Shinapash chai quimsacuna shujlla cashcataca na nijunllu. Chai textopi shimicunataca paita catij judiocunamanmi Jesusca nirca. Judiocunaca ¿imatata crin carca?

Israelitacunata paipa llacta cachun agllashpaca Taita Diosca nircami: “Ñuca ñaupajpica, ama shuj dioscunata charinguichu” nishpa (Deuteronomio 5:7). Cai textopica shujlla Taita Dios cashcatami nijun. Deuteronomio 6:4​pipash ninmi: “Israelcuna, aliguta uyahuaichi: Ñucanchita Mandaj Taita Diosca, shujlla Mandaj Diosmi” can nishpa. Imashinami cai textopi ricunchi, shujlla Taita Diosmandami parlajun. Quimsa Dioscunamandaca na parlajunllu. Shinallata Taita Dios nara salvajpica israelitacunaca Egipto llactapimi causarca. Egiptopi gentecunaca Osiris, Isis, Horus nishca quimsa dioscunatami adoran carca (dibujota ricupangui). Chashna gentecunapa yuyaicunata ama catichunmi Taita Diosca israelitacunataca mandarca, shujlla Diostami adorana canguichi nishpa. Judiocunapa leyta ali estudiashca J. H. Hertzca ninmi: “Chai leytaca ama tauca dioscunata adorashpa shujlla Diosta adorachunmi curca. Cristianocuna trinidadmanda yachachijpipash Shemá * nishcaca shujlla Taita Dios tiajtami yachachin” nishpa.

Jesuspash judío caimandaca shujlla Taita Diostami adoran carian. Chaimandami bautizarishca jipa, Diablo tentangapaj munajpica nirca: ‘Satanás, caimanda anchuri. Escribishcapica, cashnami nijun: “Canda Mandaj Taita Diostalla ninanda alicachingui. Paitalla sirvishpa causangui”’ nishpa (Mateo 4:10; Deuteronomio 6:13). Cai textopica ¿trinidad tiashcatachu nijun? Pensaripashun. Jesusllata Taita Dios cajpica ¿imamandata Diabloca nijurca Taita Diosta adoranapa randica ñucata adorahuai nishpa? Diablo tentangapaj munajpica Jesuspash nircami, ‘Paitallami sirvishpa causana cangui’ nishpa. Jesusca paita adorachunga na munashpami shina nirca.

Shinaca gentecuna Taitapa, Churipa, espíritu santopa shutipi bautizaringapaca, primeroca Taita Diosmanda cabalta yachajushpami paita sirvi callarina can (Mateo 28:19). Shinallata Jehová Dios tucuita mandajujta ali intindishpami cazuna can. Jesuspa shutipi bautizaringapaca Taita Diospa munaita Jesús imashina pactachinatami intindina can (Salmo 83:18, NM; Mateo 28:18). Espíritu santopa shutipi bautizaringapaca, Taita Diospa espíritu santo ima cashcata, imashina ayudajtami ali intindina can (Génesis 1:2; Gálatas 5:22, 23; 2 Pedro 1:21).

Imashinami ricupanchi, Trinidad yuyaicunaca ashtaca gentecunatami cunangaman pandachijushca. Shinapash Jesusca siempremi paita catijcunamanga cabalta yachachishpa, shujlla Taita Jehová Diosta rijsichun ayudarca (Juan 17:3).

[Epígrafe de página 28]

Musée du Louvre (París)