1, 2. Jehová Diosca ¿imashinata paipa sirvijcunataca caitami rurana canguichi nijushca?

JEHOVÁ DIOSCA siempremi paita sirvijcunamanga imata ruranata nijushca. Punda tiempocunapica angelcunata cachashpa o muscuipishna ricurishpami imata rurachun munashcata, jipa punllacunapi ima pasanata paita sirvijcunamanga villan carca (Núm. 7:89; Ezeq. 1:1; Dan. 2:19). Huaquinbica paipa shutipi rimachun, pai imata ruragrijujta villachunmi Jehová Diosca huaquin gentecunata agllarca. Jehová Diospa nishcacunata uyashpa cazujcunaca ashtaca bendiciongunatami chasquirca.

² Cunan punllacunapipash Bibliahuan, paipa espíritu santohuan, congregacionhuanmi ñucanchimanga imata ruranata ricuchijun (Hech. 9:31; 15:28; 2 Tim. 3:16, 17). Jehová Diosca ñucanchi rinri huashapi parlajuj cuendami cashna nijun: “Ñanga caitamari, cai ñanda purichi” nishpa (Is. 30:21). Congregaciondaca Jesusmi ñaupaman pushajun. Cutin Jesusca aliguta cazushpa, aliguta yarishpa sirvij esclavotami churashca congregaciongunata ñaupaman pushangapaj (Mat. 24:45). Jehová Diospa nishcacunata uyashpalla, cazushpallami unai unaicaman causai ushashun (Heb. 5:9).

3. Huaquinbica ¿imamandata Jehová Diosta na cazunchi? (Callari dibujota ricupangui.)

³ Jehová Diosta cazushpaca unai unaicamanmi causashun. Shinapash  Diabloca ñucanchicuna Jehová Diosta cazushpa unai unaicaman causachunga na munanllu. Chaimandami tauca trampacunata churan. Shinallata umachijlla shungutami charinchi. Ñucanchi shungupash Jehová Diosta ama cazuchunga pandachinllami (Jer. 17:9). Chaimandami cai temapica cai tapuicunata yachajushun: ¿Imashinata Diabloca Jehová Diospa nishcacunata ama uyachun pandachingapaj munan? ¿Imashinata oraciongunata ruranaca ima pasajpipash Jehová Diosman quimirichun ayudan?

4. Diabloca ¿imacunahuanda gentecunataca umachin?

⁴ Diabloca panda yachachishcacunahuanmi gentecunataca umachin (1 Juan 5:19, liingui). Periodicocunata, librocunata, revistacunata, radiota, televisionda, Internettaca mundo enteropi gentecunami ricun. Chaicunapi ali información tiashpapash, Jehová Dios imata nalicachishcataca na villanllu. Ashtahuangarin Jehová Dios imata nalicachishcataca alimi nishpami gentecunamanga cutin cutin yachachin (Jer. 2:13). Shuj ejemplota ricupashun. Librocunapi, televisionbi Internetpica jaripura, huarmipura cazaranaca normalmi can ninmi. Chaita ricushpa, uyashpami ashtaca gentecunaca yan, Bibliapillami jaripura huarmihuanshna puñunataca nalicachijun nishpa (1 Cor. 6:9, 10).

5. Diablo ama pandachichunga ¿imatata rurana capanchi?

⁵ Diablo ama umachichunga ¿imatata Jehová Diosta cazungapaj munajcunaca rurana can? ¿Imashinata yachai ushan ima ali cajta, ima nali cajta? Bibliapica ninmi, Taita Diospa “Shimita cazushpallami, mapa illaj canga” nishpa (Sal. 119:9). Bibliapa consejocunami ima ali cajta ima panda cajta yachachun ayudan (Prov. 23:23). Taita Diospa Shimimanda parlashpami Jesusca nirca: ‘Gentecunaca Taita Dios rimashca tucuilla shimicunahuanmi causana’ can nishpa (Mat. 4:4). Shinaca, Bibliapa consejocunata ñucanchi causaipi imashina pactachinatami yachajuna canchi. Josepa ejemplota ricupashun. Josepa punllacunapica cazarashca huarmihuan o jarihuan na canachu cangui nishca leytaca Jehová Diosca nara churarcachu. Shinapash Joseca pensarircami, Potifarpa huarmihuan falta urmashpaca Taita Diospa ñaupajpica jatun juchatamari rurasha nishpa (Génesis 39:7-9, liingui). Chai huarmi puñushun nishpa atichijujpipash nimamanda na uyashpami Jehová Diosta uyangapaj munarca. ¿Imatata yachajunchi? Ima ali cajta ima nali cajta yachangapaca Jehová Dios imata nijtami uyana canchi. Panda yachachishcacunahuan Diablo pandachingapaj munajujpica uyaitallapash na uyangapaj munanachu canchi.

6, 7. Diablopa consejocuna ñucanchicunata ama pandachichunga ¿imatata rurana capanchi?

⁶ Cunan punllacunapi religiongunaca shuj shuj yuyaicunatami yachachin. Chaimandami ashtaca gentecunaca ali religiondaca yangami mascaringa nin. Shinapash Jehová Diosta uyangapaj munajpica jahuallagutami paipa Shimitaca intindichin. Ñucanchicunaca chai ratopillata ishcaipura parlajtaca na uyai ushanchichu. Chaimandami Jesús imata nishcata uyana canchi.  Jehová Diosca Jesusmanmi mingashca paita catijcunataca llamagucunatashna michichun (Juan 10:3-5, liingui).

⁷ Jesusca nircami: “Ñuca imata villajujtapash, aliguta uyashpa yaringuichi” nishpa (Mar. 4:24). Jehová Diosca ima pasanata ali yachashpami consejan. Chaimandami Jehová Diostaca siempre uyana canchi. Na cuidadota charishpaca Diablopa nali consejotara uyashpami Jehová Dios llaquishpa consejashcataca huashaman saquinajunchiman. Shinaca Diablopa mundo imapash musicacunahuan, videocunahuan, colegio cumbacunahuan, librocunahuan, estudiashca canchi nij gentecunahuan ñucanchita pandachichunga na saquinachu canchi (Col. 2:8).

8. a) ¿Imamandata shuj jatun peligropi canchiman? b) Ñucanchi shungupi ima pasajujta sintishpapash na imatapash rurashpaca ¿imata pasanchiman?

⁸ Diabloca ñucanchicuna juchayucuna nacirishcata ali yachashpami imashinapash pandachingapaj trampacunata churan. Trampacuna ricurijpimi Jehovata sirvinaca shinlli ricurin (Juan 8:44-47). Pensaripashun. Mañanata cungashpa, ñana pundashna villachishpa, tandanajuicunaman faltai callarijushpaca ñucanchi shunguca shuj jatun peligropimi canman. Ñucanchi shunguhuan na cuidadota charishpaca asha ashami Jehová Dios imata nijujtaca na uyashpa nali munaicunata chari callarishpa nalipi urmanchiman (Rom. 7:15). Ama chashna pandaringapaca, ñucanchipi imapash nalita sintishpallatami nalitaca ucha saquishpa Jehová Dios imata nijta uyana canchi. Shinallata, Jehová Diosmanda caruyashpa pandata yachachijcunapa yuyaicunatapash na uyanachu canchi (Sal. 101:3).

9. Imapi pandarijushcata sintishpaca ¿imamandata uchalla cambiana capanchi?

⁹ Imashinami ima ungüita charishcata uchalla yachashpaca gentecuna salvarita ushan, shinallatami Diablopa trampacunapi ama urmangapaca imapi pandarijushcata sintishpaca uchalla cambiana canchi (2 Tim. 2:26). Shinapash, nali pensamientocunata, munaicunata charishpaca ¿imatata rurana capanchi? Uchallami Jehová Diosman tigrana canchi, pai imata nijta uyana canchi, cazuna canchi (Is. 44:22). Huaquingunaca Jehová Diosman tigrashpapash nalita rurashcamandami llaqui apan. Nalita rurashca jipa ama llaqui apajungapaca nalita nara rurashpallatami Jehová Diosta uyana canchi.

10, 11. a) Jariyashcacunaca ¿imashinata can? b) ¿Imatata Coremanda, Datanmanda, Abirammandaca yachajupanchi?

¹⁰ Ñucanchi shunguca pandachishpa Jehová Diosmanda caruyachinllami. Shungupi jariyashca cashpa o shujcuna imata charishcata ansiarishpa munashpaca Jehová Dios imata nijujta  na uyashpami llaquipi urmanchiman. Jariyashcacunaca paicunami ashtahuan importante canchi yashpami ima munashcata ruranlla. Chaimandami shujcuna consejajpi, ancianocuna consejajpi, Jehovapa organización imata nijpipash ni pita na uyangapaj munan. Paicunapaca Jehovapa nishcacunaca carupi imapash bullayajunshnallami uyarin.

¹¹ Moisespa punllacunapi Coreta, Datanda, Abiramda yaripashun. Paicunaca Moisesta, Aarondaca na cazungapaj munarcachu. Paicuna munashcashnami Jehová Diostaca adorangapaj munarca. Chaita nalicachishpami Jehová Diosca chai quimsandicunatapash, 250 gentecunatapash tucuchishpa saquirca (Núm. 26:8-10). Imashinami ricupanchi, Jehová Diosta na cazungapaj munajcunaca jatun llaquipimi urman. Shinallata jariyashcacunaca “nara llaqui japijpillami jariyashca causanajun” (Prov. 16:18; Is. 13:11).

12, 13. a) Ansiarishpa munaimanda nalita rurajcunaca ¿imashinata llaqui apan? Shuj ejemplota nipai. b) ¿Imamandata ansiarishpa munana yuyaicuna ñucanchi shungupi ama sapiyachun cuidarina capanchi? Shuj ejemplota nipai.

¹² Cunanga ansiarishpa munanamanda parlapashunchi. Shujcuna ima charishcata ansiarishpa munajcunaca Jehovapa consejocunaca na ñucapachu yashpami uyan. Shujcunapa cashcatapash japinallami cani yanmi. Profeta Eliseopa punllacunapi ima pasashcata ricupashun. Profeta Eliseomi Siria llactamanda soldadocunata mandaj Naamandaca lepra ungüimanda jambirca. Jambijpimi Naamanga huaquin cosascunata Eliseoman carangapaj rirca. Shinapash Eliseoca na japingapaj munarcachu. Cutin Eliseota sirvij Guehazica (Guejazica) chai regalocunata ansiarishpa ricujuimandami pensarirca: ‘Mandaj Diosca causajunbachami. Naamán runata catishpa calpashpaca, imagullatapash japigrishami’ nishpa. Shina yashpami Guehazica Eliseomanda pacalla rishpa Naamanda catiria rirca. Naamanbanman chayashpaca llullacunata nishpami ‘quimsa chunga chuscu kilota pezaj culquita, ishcai mudana churajunatapash’ mañarca. Guehazica Naamandapash, Eliseotapashmi llullarca. Ansiarishpa munajuimandaca ¿imata Guehazica pasarca? Naamanba lepra ungüica Guehazipamanmi chimbarca (2 Rey. 5:20-27.)

¹³ Imatapash munajushpaca ama ansiarishpa munajungapami cuidadota charina canchi. Na cuidadota charishpa, chai munaicuna ñucanchi shungupi sapiyajpica, jatun llaquicunapimi urmashun. Cunanga israelitacunapa punllacunapi Acán ima pasashcata ricupashun. Acanga nircami: “Tandachijushpaca Babilonia llactamanda juyailla jatun churajunatami ricurcani. Shinallata ishcai kilo chaupitashna pezaj culquitapash, chaupi kilo yalita pezaj barra orotapashmi ricurcani. Shina ricushpami, chaicunata ninanda munashpa, pacalla japishpa apamurcani” nishpa. Paipa nali munaita na ladoman saquishpami, Acanga ricujushca cosascunataca ansiarishpa chai cosascunataca shuhuashpa paipa huasipi pacangapaj rirca. Pai imata rurashcata yachaj chayashpaca Josueca nircami, Jehová Diosca can shuhuashcataca na yanga saquingachu nishpa. Josué nishca shinaca chai punllallatami Acanbash paipa familiapash rumihuan pigai tucushpa huañurca (Jos. 7:11, 21, 24, 25). Imashinami ricunchi, imacunatapash ansiarishpa munajunamandaca cuidarinami canchi. Na cuidadota charishpaca ansiarishpa munana trampapimi urmashun (Luc. 12:15, NM). Huaquinbica tal vez shuj jarihuan o shuj huarmihuanllari imapash nali pensamientocunata charinchi. Chashna pensamientocuna ñucanchi shungupi sapiyashpa nalipi urmachichunga na saquinachu canchi. Uchallami chai nali pensamientocunataca ñucanchi umamanda llujchina canchi (Santiago 1:14, 15, liingui).

14. Jariyashca munaihuan, ansiarishpa imatapash rurangapaj munajushpaca ¿imapita pensarina capanchi?

¹⁴ Imashinami ricupanchi, jariyajuna, ansiarishpa imatapash munajunaca jatun llaquicunamanmi  apan. Chaimandami nara llaquipi cashpallata pensarina capanchi, Jehová Diosta na uyashpaca ima llaquicunapita urmasha nishpa (Deut. 32:29). Bibliapimi Jehová Diosca ali ñanda ricuchijun. Ali ñanda catimanda ima bendicionguna tianata, ali ñanmanda caruyaimanda ima llaquicuna tianatapash yachachijunmi. Ñucanchi shungupi jariyashca caimanda o ansiarishpa imatapash munajuimanda imatapash ruragrijushpaca pensaripashunchi: ¿Imashinata ñucallata, ñuca familiatapash, Jehová Diostapash llaquichigrijuni nishpa?

15. Jesusca jucha illaj cashpapash ¿imatata ruran carian?

¹⁵ Jehová Diosca ñucanchicuna ali causachunmi munan (Sal. 1:1-3). Paica imata cushpapash ñucanchi minishtijuj horaspimi cun (Hebreos 4:16, liingui). Jesusca jucha illaj cashpapash cutin cutinmi Jehová Diosta mañashpa parlan carian. Shina mañajpimi Jehová Diospash ninanda Jesustaca ayudarca. Shuj viajeca paipa angelcunata cachashpami animarca. Cutin shuj viajeca espíritu santota cushpami, 12 apostolcunata agllachun ayudarca. Shuj viajecarin, paita alicachishcata, ayudajushcata crichunmi Jehová Diosca jahua cielomanda parlarca (Mat. 3:17; 17:5; Mar. 1:12, 13; Luc. 6:12, 13; Juan 12:28). Ñucanchicunapash Jesuspa ejemplota catishpami ñucanchi shunguta pascashpa Jehová Diosman tucuita villana canchi (Sal. 62:7, 8; Heb. 5:7). Shinami Jehová Diosman ashtahuan quimirishpa pai munashcashna causai ushashun.

16. Jehová Dios ayudachun munashpaca ¿imatata rurana capanchi?

¹⁶ Jehová Diosca paipa consejocunata catichunga na pitapash obliganllu. Jehová Dios ayudachun munashpaca paipa espíritu santota cuchunmi mañana canchi. Shina mañajpica na mitsashpami paipa espíritu santota cunga (Lucas 11:10-13, liingui). Shinapash Bibliapica ninmi: ‘Ñuca villajujta uyashcataca aliguta yaringuichi’ nishpa (Luc. 8:18). Shinaca, mapa munaita saquingapaj ayudahuai nishpapash pornografiata, mapa peliculacunata ricujushpaca ¿ciertopachachu ayudahuai nishpa mañanajunchiman? Espíritu santota cuhuai nijushpaca tandanajuicunapimi cana canchi. Tandanajuicunapimi Jehová Diosca paipa espíritu santota cun. Ashtaca huauquicunaca tandanajuicunaman rishpa Jehová Dios ima nishcata uyashpami paicunapa shungupi nali munaicunata charishcata cuenta japishpa chaicunataca saqui ushashca. Shina rurashpami ashtaca llaquicunamanda librarishca (Sal. 73:12-17; 143:10).

17. ¿Imamandata na ñucanchipillata confiana canchi?

¹⁷ Cunanga Israel llactapa rey Davidtapash yaripashun. Pai joven cashpaca jatun jatun runa Goliathuan macanajushpami paita misharca. Jipamanga soldado, reymi tucurca. Rey caimandami israelitacunata cuidarca, ali decisiongunatapash agllarca. Shinapash jipamanga paipillata confiajpimi Davidpa shunguca pandachirca. Paica Bat-seba huarmihuan falta urmashpami paipa cusa Uriastapash huañuchichun cacharca. Chashna jatun juchacunata rurashpapash Jehová Dios consejajpica na jariyashpami, pandashcanimi nishpa Jehová Diospa ñaupajpi cutin ali ricurirca (Sal. 51:4, 6, 10, 11).

18. Jehová Diospa nishcacunata uyangapaca ¿imatata rurana capanchi?

¹⁸ Bibliapi 1 Corintios 10:12​pi consejota catishpami ñucanchicunapillataca na confiana canchi. Ñucanchicunaca ñucanchi causaipi ali mandaitaca na ushanchichu. Chaimandami pensarina canchi, Jehová Diostachu uyagrini o Diablopa nishcatachu uyagrini nishpa (Jer. 10:23). Shinaca, ama shaijushpa Jehová Diosta mañashunchi. Paipa espíritu santohuan ayudajujtapash sintishpa Jehová Dios imata nishcata uyashunchi.