1. Jehovata sirvijcunaca ¿imamandata ninan llaquicunata chimbapuranchi?

SHAMUJ punllacunapi na huañushpa causangapaca ‘ninan llaquicunatami’ Jehová Diosta sirvijcunaca chimbapurana canchi. Chairalla o unai tiempota Bibliamanda yachajushca cashpapash, cai mundota Diablo mandajujpimi ninan llaquicunapi causanchi (Apoc. 12:12).

2. a) Tucui gentecuna charishca llaquicunata charishca jahuapash ¿ima llaquitata Jesusta catijcunaca charinchi? (Callari dibujota ricupangui.) b) ¿Pita ñucanchicunataca llaquichingapaj munan? c) ¿Imamandata shina ninchi?

² Juchayu caimandami tucui gentecuna charishca llaquicunata charinchi. Shinapash Jesusta catijcunaca shuj llaquitapashmi charinchi (1 Cor. 10:13). Ñucanchicunataca Diospa mandashcacunata cazushpa causajpimi catiriashpa ninanda llaquichin. Jesusca paipa catijcunataca nircami, sirvij runaca paipa amota yalica na canllu. “Ñucata catiriashpa llaquichinshnami, cangunatapash catiriashpa llaquichinga” nishpa (Juan 15:20). Diablomi ñucanchicunataca llaquichichun munan. Bibliapica ninmi, Diabloca ‘león huacashpa pitapash micungapaj mascajunshnami’ Diosta sirvijcunataca  llaquichingapaj munan nishpa (1 Ped. 5:8). Diabloca ñucanchicunata Taita Diosmanda imashinapash caruyachingapami munan. Apóstol Pablohuan ima pasashcata ricupashun.

3. Listra llactapi cashpaca ¿imashinata apóstol Pabloca llaquichi tucurca?

³ Apóstol Pabloca Taita Diosta sirvijuimandami ashtaca viajeta ninanda llaquichi tucurca (2 Cor. 11:23-27). Shuj viajeca Listra llactapi cashpami, huacharishca punllamandapacha na puri ushaj runaguta jambirca. Jambijta ricushpami Pablotapash Bernabetapash gentecunaca dioscunatashna ninanda alicachishpa caparinajurca. Shina caparinajujpimi Pablopash Bernabepash gentecunataca nirca, ama ñucanchitaca shina alicachinajuichichu nishpa. Shinapash Judea llactamanda gentecuna chayashpami Pablomanda, Bernabemandapash llullacunata parlarca. Llullacunata crishpami gentecunaca Pablota rumicunahuan pigashpa, huañushcami yashpa shitashpa saquirca (Hech. 14:8-19).

4, 5. Ninan llaquicunatami apana canchi nishpapash ¿imashinashi Pablopash Bernabepash Jesusta catijcunataca animashcanga?

⁴ Derbe llactapi cashca jipaca Pablopash Bernabepash ‘Listra, Iconio, Antioquía pueblocunaman tigrashpami Jesusta catijcuna aliguta crishpa catinajuchunga cashna nishpa [animarca]: “Ninan llaquicunata apashpami, Taita Dios mandajuj llactamanga yaicugrina canchi”’ nishpa (Hech. 14:21, 22). Ninan llaquicunatami apashun nishca shimicunaca pitapash na animanashnallami ricurirca. Shinapash ¿imashinata chai shimicunaca shuj huauquipanicunata animashcanga?

⁵ Chaipaca apóstol Pablo imata ningapaj munashcata intindipashunchi. Paica nircami: ‘Ninan llaquicunata apashpami, Taita Dios mandajuj llactamanga yaicugrina canchi’ nishpa. Pabloca ninan llaquicunata apanamandallaca na parlajurcachu. Ashtahuangarin Taita Diosta tucui shunguhuan sirvijcuna, jipa punllacunapi na huañushpa causanamandami parlajurca. Jesusca nircami: “Tucurimui punllacaman llaquicunata apajllami quishpiringa” nishpa (Mat. 10:22).

6. Cunanbi aguantashpaca jipa punllacunapica ¿imatata chasquishun?

⁶ Cunanbi aguantashpaca jipa punllacunapica ¿imatata chasquishun? Jesusta catij ungidocunaca jahua cielopimi na huañushpa causanga, Jesushuanbash mandanga. Cutin ‘shuj llamagucuna’ nishca gentecunaca cai Alpa paraíso tucujpimi, para siempre alitalla rurashpa causanajunga (Juan 10:16; 2 Ped. 3:13). Shinapash chai punlla chayamungacamanga, Pablo nishca shinaca ninan llaquicunatami chimbapurana canchi. Shinaca, Jesusta catijcuna ima ishcai cosascunata aguantana cashcata ricupashunchi.

7. Jesusta catijcunaca ¿imashinata ñavi ñavi llaquichi tucun?

⁷ Jesusca nircami: ‘Cangunata japishpaca mandajcunapa ñaupamanmi apanajunga. Shinallata tandanajuna huasicunapimi astinga. Ñucata catinajushcamandami llactata mandajcunapa ñaupaman, jatun mandajcunapa ñaupaman apai tucunguichi’ nishpa (Mar. 13:9). Cai textopica Jesusta huaquin catijcuna macai tucushpa ñavi ñavi llaquichi tucunatami parlajun. Huaquinbica panda religionda ñaupaman pushajcuna o politicapi purij gentecunami shina llaquichichun mandanga (Hech. 5:27, 28). Cutin apóstol Pablopi pensaripashunchi. Paita llaquichinajujpica apóstol Pabloca na manllarcachu (Hechos 20:22, 23, liingui).

8, 9. a) Pabloca ¿imashinata ricuchirca llaquichi tucunatapash na manllashcata? b) Cunan punllacunapipash ¿imashinata huaquin huauquicunaca na manllaita charishcata ricuchin?

⁸ Apóstol Pabloca Diablo llaquichijujpipash na manllashpami nirca: ‘Ñuca causaitapash na llaquinichu. Taita Diosca ninanda juyashpami  quishpichijun nishpa villachunmi, Jesusca mingahuarca. Caitaca ñuca huañuna punllacaman cushijushpa pactachinatami charini’ nishpa (Hech. 20:24). Pabloca catiriashpa llaquichi tucunataca na manllarcachu. Ashtahuangarin ima llaquicuna ricurijpipash Diosmanda villachinataca na saquingapaj munarcachu.

⁹ Cunan punllacunapipash ashtaca huauquicunami Pabloshnallata na manllaita charin. Shuj llactapica tauca huauquicuna, panicunami politicapi na chapuringapaj munashpa casi 20 huatacunata carcelpi paranajushca. Chai llactapa leypi mandashca shina difindirichunllapash na saquishcachu. Ashtahuanbash paicunapa familiacuna carcelpi visitachunbash na saquinllu. Huaquingunatacarin macashpa, juyaipata maltratashpami charin.

10. Cungashcapi llaquicuna ricurijpipash ¿imamandata na manllana capanchi?

¹⁰ Shuj llactacunapipash ñucanchi huauquicunataca cungashcapi llaquicuna japijpimi llaquicunata aguantanajun. Quiquindapash cungashcapi imapash llaquicuna japijpica, na manllanachu cangui. Josepi pensaripai. Josetaca paipa huauquicunami esclavotashna jaturca. Shinapash ‘José jatun llaquihuan cajpipash Diosca cacharichircami’ (Hech. 7:9, 10). Quiquindapash shinallatami Jehová Diosca ayudanga. Bibliapica ninmi: “Taita Diosca paita yarijcunatami ima llaquimandapash quishpichin” nishpa (2 Ped. 2:9, Mushuj Testamento Quichua Imbabura). Chaimandami llaquicuna ricurijpica, Taita Diospi confiashpa imatapash na manllashpa llaquicunataca aguantashpa catina canchi. Ñucanchicunaca alimi yachanchi, Taita Diosca cai nali mundomanda salvashpa, shuj juyailla Alpagupi na huañushpa causachun saquinata (1 Ped. 5:8, 9).

11. Ñavi ñavi llaquichij llaquicunaca ¿imashinata can? Cutin na sintijta llaquichij llaquicunaca ¿imashinata can?

¹¹ Huaquinbica na sintirijtami llaquicunapi urmanchi. Ñavi ñavi llaquichij llaquicunaca ¿imashinata can? Cutin na sintijta llaquichij llaquicunaca ¿imashinata can? Ñavi ñavi llaquichij llaquicunaca shuj jatun acapana cuendami can. Acapanaca cungashcapi jatarishpami ñapash shuj huasita urmachin. Cutin na sintijta llaquichij llaquicunaca polilla juru cuendami can. Polilla juruca pipash na sintijtami huasi caspicunataca asha asha micushpa catin. Na ucha cuenta japijpica huasitapash urmachi ushanmi.

12. a) Na sintijta llaquichingapaca ¿imatata Diabloca ruran? b) ¿Picunatapashta desanimachi ushan? c) Apóstol Pabloca ¿imamandata desanimarirca?

¹² Diabloca Jehová Diosmanda caruyachingapaj munashpami ñucanchicunataca ñavi ñavi llaquichin o na sintijtami asha asha ñucanchi feta chiriyachishpa desanimachin. Huaquinbica apóstol Pablopashmi desanimarishca sintirin carian (Romanos 7:21-24, liingui). Apóstol Pabloca Taita Diosta ali sirvijmi carca. Ashtahuanbash chai punllacunapica cuerpo gobernantepimi sirvijushcanga. Shinapash ¿imamandata nirca, ñucaca ‘imapapash na valijmi’ cani nishpa? Pabloca juchayu caimandami shina sintirirca. Paica nircami alitalla rurangapaj munajpipash nalita rurana munairami ricurimun nishpa. Quiquinbash desanimarishca cashpaca, apóstol Pablota yarishpami animarita ushapangui.

13, 14. a) Huaquingunaca ¿imamandata Diosta sirvinajushpapash desanimarin? b) ¿Pita ñucanchicunataca llaquichingapaj munan? ¿Imamandata llaquichingapaj munan?

¹³ Ashtaca huauquipanicunami huaquinbica ninanda llaquirishca, desanimarishca, imapapash na valij shina sintirishca. Shuj precursora paniguca ninmi: “Ñuca pandarishcacunata cutin cutin yarishpami nali sintirini. Chaicunata yarishpami yani, ñucataca pipash na llaquihuangachu, Jehová Diosllapash ñucataca na juyahuangachu” nishpa.

¹⁴ Jehová Diosta tucui shunguhuan sirvij huauquipanicunaca ¿imamandata nali sintirin?  Huaquingunaca paicunamandallata nalicachirishpa o nali causanajuimandami nali sintirin (Prov. 15:15). Cutin shujcunaca imapash ungüita charimandami nali pensamientocuna japijpi nali sintirin. Shinapash Diablomi gentecunataca desanimachishpa Jehová Diosta ama sirvichun munan. Diabloca jipa punllacunapi pai huañunata ali yachashpami ñucanchicunapash llaquilla sintirishpa, jipa punllacunapi ali causai tianataca na crichun munan (Apoc. 20:10). Diabloca ñavi ñavi o na sintirijta llaquichij llaquicunahuanmi nali sintirichun, desanimarichun, Jehová Diosmanda caruyachunbash munan. Shinapash na cunganachu capanchi, Jehová Diosta sirvijcunaca Jehovata tucui shunguhuan sirvinajushcataca ricuchinami capanchi.

15. 2 Corintios 4:16, 17​pi nishca shinaca ¿imatata rurangapaj munapanchi?

¹⁵ Jipa punllacunapi imata chasquinata yarishpami, Taita Diosta sirvinataca ima horapash na saquina canchi. Corinto llactapi huauquicunamanga Pabloca nircami: ‘Ñucanchi cuerpo rucuyajujpipash, shaijuitapash na shaijushpami na saquinchi. Ñucanchi shungutaca punllandimi Diosca mushujyachijun. Cai causaipi ñapash yalinalla jatun llaquicunaca, ashacamanllami japin. Ashtahuangarin cai llaquicunaca causaita causagrichunmi’ ayudanga nishpa (2 Cor. 4:16, 17).

16. Jipa punllacunapi llaquicunata chimbapurangapaca ¿imamandata cunanmandallata alistarina capanchi?

¹⁶ Caicaman ricushca shinaca, shuj shuj trampacunapi urmachingapami Diabloca munan (Efes. 6:11, NM ). Chaimandami ñucanchicunaca apóstol Pedro imata nishcata na cungana capanchi. Paica nircami: ‘Aliguta crishpami Diablotaca mishana canguichi’ nishpa (1 Pedro 5:9, Mushuj Testamento Quichua Imbabura). Chaita pactachingapaca cunanmandallatami ñucanchi shunguta, ñucanchi yuyaita  preparana canchi. Soldadocunapi pensaripashunchi. Soldadocunaca guerracuna nara tiajpillatami shinlli ejerciciocunata rurashpa alistarin. Ñucanchicunapash jipa punllacunapi ima llaquicunata chimbapuranata na yachashpapash cunanmandallatami uchalla alistarina capanchi. Taita Dios yarichijpimi apóstol Pabloca Corinto congregaciondaca consejarca: ‘Cangunallatami: “¿Ñachu alipacha crij cani, narachu ali crij cani?” yashpa, ricurina canguichi. Imashina cashcataca cangunallatami yarina canguichi’ nishpa (2 Cor. 13:5).

17. Taita Diosta tucui shunguhuan sirvijushcata o na sirvijushcata yachangapaca ¿imatata tapurina capanchi?

¹⁷ Taita Diosta tucui shunguhuan sirvijushcata o na sirvijushcata yachangapaca tapuripashunchi: “¿Cutin cutinllu Taita Diosta mañani? ¿Ñuca imata crishcataca na manllashpachu villachini? ¿Gentecunapa nishcata catinapa randica Taita Diospa mandashcatachu cazuni? ¿Tucui tandanajuicunamanllu rini? ¿Imashinami huauquipanicunaca na ñapash fiñarishpa ñucataca tratahuan, shinallatachu paicunatapash tratani? ¿Congregacionbi ancianocunata, Jehovapa organizacionbi ñaupaman pushaj huauquicunataca tucuipichu cazuni?”.

18, 19. Escuelapi o colegiopi cashpa imata crishcata na manllashpa parlachunga ¿imata jovengunataca ayudanga?

¹⁸ Ñucanchicunaca pandachingapaj munaj gentecunapurapimi causanchi. Chaimandami joven huauquicuna, panicunaca na manllashpa na pinganayachishpa paicuna imata crishcataca escuelapi o colegiopi villachina can. Joven huauquipanicunataca ¿imata ayudashca na manllashpa villachingapaj? Paicunaca ñucanchi revistacunapi llujshishca consejocunata catishpami na manllashpa villachi ushashca. Julio de 2009 ¡Despertad! revistapica parlarcami, escuelapi o colegiopi shuj cumba “¿imamandata evolucionbi na cringui nijpica” joven Testigoca nita ushanmi: “Alipacha estudiashpapash cientificocunaca na alipacha intindi ushashcachu. ¿Imamandata ñucara evolucionbi crina cani?” nishpa. Taitamamacuna, quiquingunapa huahuacuna imata ninata yachachunga huasipillata aliguta repasapaichi.

¹⁹ Ñucanchi crishcata shujcunaman parlana o Jehovapa mandashcacunata cazunaca huaquinbica na facilchu can. Tucui punlla trabajashpa chishashcamanda tandanajuicunaman ringapaca ninanda esforzarinami minishtirin. Shinallata tutamandata jatarishpa villachinaman rinaca na facilchu can. Shinapash tandanajuicunaman, villachinaman llujshina costumbreta charishpaca imapash llaquicuna ricurimujpica na ñapash llaquichi tucushunllu.

20, 21. a) Jesús ñucanchimanda huañushcata yarinaca ¿imashinata ayudanga? b)  Ninan llaquicuna ricurimujpipash ¿imatata rurangapaj munapanchi?

²⁰ Desanimachishpa na sintirijta llaquichij llaquicunata aguantachunga ¿imata ayudanga? Chai llaquicunata aguantachunga Jesús ñucanchimanda huañushcata yarinami ayudanga. Apóstol Pabloca juchayu caimandami huaquinbica imapapash na valij shina sintirirca. Shina sintirijushpaca juchayu gentecunata salvangapaj Jesús huañushcata yarinami paitaca ayudarca. Chaimandami Pabloca nirca: ‘Taita Diospa Churita crishpami causajuni. Paica huañuchijcunaman japi tucushpami, ñucamanda huañurca’ nishpa (Gál. 2:20). Apóstol Pabloca Jesús huañushpa paitapacha salvashcatami intindirca.

²¹ Ñucanchicunapash desanimarishca cashpaca cada unomanda Jesusta huañuchun Taita Dios cachamushcata yarishpami animarina canchi. Shinapash huaquingunaca cai Alpa paraíso tucungacamanmi desanimarishca sintirinajunga. Ama cungapanguichu, aguantashpa catijcunallami na huañushpa causaitaca ushanga. Ashtahuangarin Diospa Reinoca ñallami cai Alpata mandashpa tucui gentecunataca jucha illaj cachun, tranquilo causachun ayudanga. Shinaca Diospa Reino mandajuj Alpapi causangapaca ninan llaquicuna ricurimujpipash aguantashpa catipashunchi.