1. Ashtahuan villachinajuj huauquicunata, panicunataca ¿imashinata apóstol Pabloca ricurca?

HUAUQUICUNA, panicuna ashtahuan villachinajujta ricushpami apóstol Pabloca paicunata ninanda alicachirca. Chaimandami paica nirca: ‘Canguna alipacha crishpa, ninan juyaita charishpa, imatapash aliguta rurashpa causanajujtaca na cungashpami Taita Diosta mañanajunchilla’ nishpa (1 Tes. 1:3). Jehová Diospash paita sirvijcuna tucui shunguhuan ashalagutalla ruranajujpi o ashtacata ruranajujpipash alicachishpami ricun (Heb. 6:10).

2. Cai temapica ¿imatata yachajugripanchi?

² Ñaupa punllacunapipash cunan punllacunapipash Jehová Diosta tiempo completopi * sirvingapami ashtaca huauquipanicunaca paicunapa munaita huashaman saquishca. Shinapash ñaupa punllacunapica ¿imashinata huaquingunaca Jehová Diosta sirvirca? Cunan punllacunapi Jehová Diosta tiempo completopi sirvinajujcunaca ¿imatallata ruranajun? ¿Imashinata paicunata ayudai ushanchi? Chai quimsa tapuicunata yachajupashunchi.

3. Ñaupa punllacunapi Jehová Diosta sirvijcunaca ¿imatata ruran carca?

³ Bautizarishca jipallami Jesusca villachijurca, shujcuna villachichunbash  yachachishpa saquirca (Luc. 3:21-23; 4:14, 15, 43). Jesús huañushca jipapash ali villaicuna ashtahuan mirachunmi apostolcunaca ricurianajurca (Hech. 5:42; 6:7). Cutin shujcunaca paicunapa huasita saquishpami caru llactacunapi villachingapaj rirca. Felipepash Palestina llactapica shuj shuj ladocunapimi villachirca (Hech. 8:5, 40; 21:8). Pablopash caru llactacunaman rishpami ali villaicunataca villachirca (Hech. 13:2-4; 14:26; 2 Cor. 1:19). Cutin Marcos, Lucasca Bibliapa huaquin librocunatami escribirca. Silvano o Silasca Pedropa secretariomi carca (1 Ped. 5:12). Panicunapashmi villachingapaj rij huauquicunataca imagupipash ayudan carca (Hech. 18:26; Rom. 16:1, 2). Escrituras Griegas Cristianas nishcata ricujpica ashtaca huauquipanicuna imashina na manllashpa villachishcatami parlan. Chai huauquipanicunapa experienciacunami yachachin, Jehová Diosca paipa sirvijcunata alicachishpa cuidajujta.

4. Tiempo completo sirvij huauquipanicunaca ¿imashinata mantinirin carca?

⁴ Tiempo completopi sirvinajushpapash, apóstol Pablopash paihuan villachishpa purijcunapash paicunallata huaquin punllacunata trabajashpami mantinirin carca. Shuj huauquipanicuna ayudachunga na shuyanajunllu carca (1 Cor. 9:11-15). Shinapash huaquin huauquipanicunaca micungapaj invitashpa, huasipi mingachishpami paicunataca ayudarca. Shujlla cashpa o tucuilla congregación cashpapash ayudangapami munan carca (Hechos 16:14, 15; Filipenses 4:15-18, liingui).

5. Tiempo completopi sirvinamanda parlashpaca ¿imatata shuj cusahuarmica nirca?

⁵ Cunan punllacunapipash ashtaca huauquipanicunami ninanda empeñarishpa Jehová Diostaca tiempo completopi sirvinajun ( “Tiempo completopi sirvij huauquipanicunaca ¿imatallata ruran?” nishca recuadrotapash ricupangui). Tiempo completopi sirvinata agllashca huauquipanicunahuan parlashpaca ninandami animaringui. Shuj huauquipa ejemplota ricupashun. Callaripica precursor regularmi carca. Jipamanga precursor especialmi carca. Chai jipaca misioneromi carca. Cunanga shuj caru llacta Betelpimi sirvijun. Paica ninmi: “18 huatacunata charishpaca imata ruranataca na atinajurcanichu. Ashataca precursor regular tucungapaj, universidadpi estudiangapaj o semana enterota trabajangapami munarcani. Shinapash ñuca munaicunata huashaman saquishpami tiempo completopi sirvinata agllarcani. Jehová Diosca ñucanchi rurashcacunataca na cunganchu cashca. Tiempo completopi sirvinata agllaimandami na rurai ushashachu yajushcacunatapash ali rurachun Jehová Diosllata ayudahuashca” ninmi. Paipa huarmipash ninmi: “Shuj shuj privilegiocunata chasquinami Jehová Diosta ali sirvichun ayudahuashca. Jehová Diosca siempremi ñucanchita cuidajushca, maijan ñanda catinatapash ricuchijushca. Ñucanchi cosascunapilla preocuparishpaca na ashtaca bendiciongunata charinchimanllu carca. Cada punllami tiempo completopi sirvijushcamandaca Jehovata agradicini” nishpa. ¿Nachu quiquinbash shinallata sintiringapaj munapanguiman?

6. Paita sirvinamanda imaguta rurajpipash ¿imashinata Jehová Diosca ricun?

⁶ Huaquingunaca tiempo completopi sirvingapaj munashpapash na ushanllu. Quiquinbash imata rurai ushashcatalla rurashpa sirvijujpica alicachishpami Jehová Diosca ricujun. Cunanga apóstol Pablota yarishun. Paica Colosas congregacionmanda huauquipanicunapa rurashcacunata ninanda alicachishpami, huaquingunatacarin shutipi saludapangui nishpa shuticunata escribirca (Filemón 1-3, liingui). Imashinami ricupanchi Pablopash, Jehová Diospash chai huauquipanicunataca alicachishpami ricujurca. Jehová Diosca quiquindapash alicachishpami ricujun. Shinapash tiempo completopi sirvinajujcunataca ¿imashinata tucuicuna ayudai ushanchi?

7, 8. a) Precursorcunaca ¿imatata ruran? b) ¿Imashinata precursorcunataca ayudai ushapanchi?

⁷ Precursorcunaca punda tiempopi Jesusta catijcunapa  ejemplota catishpami congregacionda shinlliyachishpa ayudan. Ashtacacunaca cada quillami 70 horascunata villachin. Shinaca ¿imashinata paicunata ayudai ushanchi?

⁸ Shari shuti precursoraca ninmi: “Cada punlla villachingapaj llujshimanda shinllishnalla cashpapash shujcuna animachunmi minishtinchi” nishpa (Rom. 1:11, 12). Shuj panigupash ashtaca huatacunatami precursora carca. Paipa congregacionbi precursorcunamanda parlashpaca ninmi: “Precursorcunaca congregacionbi ali ayudangapami munan. Pipash carropi apajpi, micungapaj invitajpi, carro gasolinapa o imapash gastogucunapa culquita cujpica ninandami cushijun. Shina ayudajpimi paicunapi preocuparijushcata cuenta japin” nishpa.

9, 10. Congregacionbi precursorcunata ayudangapaca ¿imatata huaquingunaca ruran?

⁹ Villachingapaj llujshishpapashmi precursorcunataca ayudanchi. Shuj precursora paniguca llaquirishpami nirca: “Chaupi semanacuna villachingapaj cumbachunmi minishtinchi” nishpa. Shuj panigupash ninmi: “Huaquinbica chishicunapica pipash na cumbangapaj munanllu” nishpa. Cutin Brooklyn Betelpi sirvijuj paniguca precursora cashca punllacunamanda parlashpaca ninmi: “Carrota charij ñañagumi ñucataca nin carian: ‘Cumba na tiajpica cayahuanguilla, cumbashpa rishallami’ nishpa. Pai ayudajpimi precursorado horascunataca pactachi usharcani” nishpa. Shari shuti paniguca ninmi: “Villachingapaj llujshishpaca soltero precursorcunaca cumbahuanmi villachinajun. Chai jipaca paicunallami can. Ama paicunalla sintirichunga, huaquinbi huaquinbica Familihuan Adorana Tutaman invitashpa o imapash ruranacunamanbash invitashpaca alimi can” nishpa.

¹⁰ Shuj panigupash casi 50 huatacunatami tiempo completopi sirvijushca. Soltera precursoracunahuan sirvijushca punllacunamanda parlashpaca ninmi: “Ancianocunaca siempremi tapun carian, alillachu cashcanguichi, trabajopica alichu paranajunguichi, imamandapash preocuparinajunguichichu nishpa. Huaquinbicarin huasiman shamushpami ¿nachu imagupipash ayudachun minishtinajunguichi? nin carian. Ancianocunaca tucui shunguhuanmi ñucanchimanda preocuparin carca”. Chai panigupa shimicunata uyashpaca tal vez apóstol Pablopa shimitachari yarinchi. Paica Éfeso congregacionmanda shuj huauqui familiata mantinina cashpapash, paita ayudashcamanda agradicishpami chai huauquimanda escribirca (2 Tim. 1:18).

11. Precursor especialcunaca ¿imatata ruran?

 ¹¹ Cutin huaquin congregaciongunaca precursor especialcunata charina bendiciondami charin. Ashtacacunaca 130 horascunatami cada quilla villachin, congregacionbi shuj cosascunatapash rurashpami ayudan. Chaimandami huaquingunaca trabajangapaj ashalla tiempota charin o huaquinbicarin tiempota na charin. Villachinapi ashtahuan empeñarichunmi sucursalca asha culquihuan cada quilla ayudan.

12. ¿Imashinata ancianocunapash, shuj huauquipanicunapash precursor especialcunata ayudaita ushapanchi?

¹² Precursor especialcunataca ¿imashinata ayudashun? Betelpi sirvijuj ancianoca ashtaca precursor especialcunahuanmi parlan. Paica ninmi: “Ancianocunaca precursor especialcunahuan parlashpami paicuna imashina causanajujta, imata minishtinajujta yachashpa ayudana can. Huaquin huauquicunacarin yanmi, cada quilla sucursal ayudajushcamandaca alimi causanajunga nishpa. Shinapash aliguta pensarishpaca precursor especialcunataca ninandami ayudai ushanchi” nishpa. Imashinami precursor regularcunaca villachingapaj cumbajpica cushijun, shinallatami precursor especialcunapash villachingapaj cumbachun munan. Quiquinbash precursorcunata cumbai ushashpaca alipachami canman.

13, 14. a) ¿Imatata superintendente de circuitocunapash minishtinajun? b) Superintendentecunata ayudangapaca ¿imatata rurapanguiman?

¹³ Superintendente de circuitocuna paicunapa huarmicunapash shinlli fetami charin, siempremi ñucanchitaca ayudanajun. Shinapash paicunapashmi paicunata animachun, villachingapaj cumbachun minishtin. Shinallata, huauquipanicunahuan pugllanata o imacunatapash nishpa o rurashpa asinajunatami gushtan. Huaquinbicarin ungushcami can, hospitalpimi can. Chai ratocunapipash paicunamanda preocuparishpa visitashpaca alimi canman. Yaripashun. Hechos librota escribij Lucasca doctormi carca. Paitaca ninandami shujcunaca juyan carca. Paimi Pablotapash, Pablota cumbashpa villachijcunatapash llaquishpa cuidan carca (Col. 4:14; Hech. 20:5–21:18).

¹⁴ Superintendentecuna, paicunapa huarmicunapash amigocunatami minishtin. Shuj superintendenteca ninmi: “Ñuca amigocunaca llaquilla cajta yachanshnami ñuca minishtijushca horas animahuashca. Paicuna tapuchijpi parlashpaca alimi sintirini. Uyajpillatami ninanda cushijuni” nishpa. Paicunatapash yaipi charishpa ayudajpica, paicunapashmi tucui shunguhuan agradicin.

15, 16. a) Betelpi o Jatun Tandanajui Huasipi sirvijcunaca ¿imatata ruranajun? b) ¿Imashinata chai huauquipanicunataca ayudashun?

¹⁵ Mundo enteropica ashtaca huauquipanicunami Jehová Diospa ali villaicuna ashtahuan mirachun Betelpi o Jatun Tandanajui Huasicunapi sirvinajun. Ñucanchi congregacionbi o circuitopi betelitacuna tiajpica ¿imashinata ayudashun?

¹⁶ Shuj huauqui o shuj pani Betelman rishpaca, familiatapash, amigocunatapash saquishpami rin. Ama paicunalla sintirishpa llaquirinajuchunga Betelpi cashpa o congregacionbi cashpapash cushijushpa chasquipashunchi. Paicunahuanbash ali rijsicuna tucushunchi. Shina tratajpica ninandami paicunaca cushijunga (Mar. 10:29, 30). Betelpi sirvinajushpapash cada semanami tandanajuicunaman, villachingapapash congregacionhuan llujshita ushan. Shinapash huaquinbica, tandanajuiman o villachingapaj llujshina horascunapi Betelpi trabajana cajpimi tandanajuiman o villachingapaca na rita ushan. Shina pasajpica imamanda paicuna na chaipi cashcata intindishpami congregacionmanda huauquipanicunaca paicunapa trabajota alicachishcata ricuchina can (1 Tesalonicenses 2:9, liingui).

17, 18. Caru llactacunapi sirvijuj huauquipanicunaca ¿imatata ruran?

¹⁷ Tiempo completopi sirvinajuj huaquin huauquipanicunaca  caru llactapi causangapami rin. Caru llactaman chayajpica na rijsishca costumbrecuna, na micushca micunacunami tian. Shuj idiomatapash yachajunami tucun. Shinapash ¿imamandata paicunaca caru llactaman rin? Caru llactaman rishpaca ¿imatata ruran?

¹⁸ Huaquin huauquipanicunaca misionerocunami can. Ashtaca horascunatami villachinajun. Paicunaca ashtacata yachajushca, ashtaca experienciata charij huauquipanicunami can. Chaimandami congregaciongunataca ushashcata ayudan. Misionerocuna maipi causanatapash sucursalmi ricuriajun. Paicunapa gastocunapapash sucursalmi asha culquihuan ayudan. Cutin shujcunaca Betelpi sirvingapaj o Tandanajui Huasicunata, Jatun Tandanajui Huasicunata, Oficina de Traducciongunata, Betel huasicunata rurashpa trabajangapami caru llactaman rin. Shina rijpica Betel o paicuna ayudanajuj congregacionmi maipi mingarinata, micunatapash cun. Imashinami betelitacunaca tandanajuicunaman, villachingapapash rita ushan, shinallatami paicunapash congregacionhuan tandanajuicunaman rin, villachingapapash llujshin. Chai huauquicuna, paicunahuan sirvinajujpimi congregacionga ninanda cushijun.

19. Ñucanchi llactapi sirvingapaj shamushcacunataca ¿imashinata ayudashun?

¹⁹ Caru llactamanda sirvingapaj shamushca huauquipanicunataca ¿imashinata ayudashun? Pundapica yarinami capanchi, paicunaca chairami ñucanchi micunacunata malinajun, ñucanchi costumbrecunatapash ricunajun. Chaimandami micungapaj invitashpaca tapuna capanchi ¿ima micunatata nara micupashcanguichi, ima micunatata malingapaj munapanguichiman o ima micunatata na gushtapanguichi? nishpa. Shinallata shuj mushuj shimitami yachajunajun. Callaripica panda pandami parlanajun. Ñucanchicuna imata parlanajujtapash na ucha intindi ushanllu. Paicunaca ñucanchi shimita yachajungapami munan. Chaimandami aliguta parlachunga alimanda, na ñapash fiñarishpa ayudana capanchi.

20. Tiempo completopi sirvijuj huauquipanicunatapash paicunapa taitamamacunatapash ¿imashinata ayudai ushapanchi?

²⁰ Tiempo completopi sirvinajushpapash huaquinbica taitamacunata imashina cuidanatami decidina can. Taitamamacuna Testigo cashpacarin huahuacuna tiempo completopi sirvinata saquichunga na munanllu (3 Juan 4). Tiempo completopi catinajushpapash taitamacuna ali cajtaca ricuriashpa catinami can, usharishca horascunapash visitashpa catinami can. Tiempo completopi sirvinajuj taitamamacunapa ladopi causashpaca ¿imashinata ayudai ushanchi? Paicuna ayudachun minishtijushca horascunapica ayudanallami canchi. Tiempo completopi sirvijuj huauquipanicunaca Jesús mandashcatami pactachinajun (Mat. 28:19, 20). Shinaca quiquinllata o quiquinba congregación paicunapa taitamamacuna mayorlla cajpi o ungushca cajpi ayudashpaca alipachami canman.

21. Congregacionmanda huauquipanicuna ayudajpi, animajpica ¿imashinata tiempo completopi sirvijcunaca sintirin?

²¹ Tiempo completopi sirvinata agllashcacunaca na culquimandachu tiempo completopi sirvinajun. Paicunaca Jehovata ashtahuan sirvingapaj munaimanda, shujcunata ayudangapaj munaimandami tiempo completopi sirvinajun. Imashinapash ayudajpica tucui shunguhuanmi agradicin. Caru llactapi sirvijuj paniguca nircami: “Shuj hojagupi pagui nishpa escribijpillatami agradicinmi, yarihuashcami yashpa cushijuni” nin.

22. Tiempo completopi sirvinamandaca ¿imatata pensapangui?

²² Tiempo completopi sirvinajuj huauquipanicunaca cushilla causana ali ñandami agllashca. Paicunaca paraíso Alpagupi causashpa catingapami ñamandallata yachajunajun. Ñallami Jehová Diosta sirvijcunaca cada punlla cushijushpa Jehovapa munaita ruranajunga. Chai punlla chayamungacamanga tiempo completopi sirvinajuj huauquipanicuna ‘ninan juyaita charishpa, imatapash aliguta rurashpa causanajushcataca ama cungapashunchichu’ (1 Tes. 1:3).