1, 2. a) Israelitacunaca ¿imashinata llamagucunataca cuidan carca? b) ¿Imamandata taitamamacunaca llamaguta michijcunashna can?

ISRAELITACUNAPA tiempopi llamaguta michijcunaca rupaipi o chiripipash aligutami cuidan carca. Millai animalcuna ama micuchun, shuhuacuna ama shuhuachunbash aligutami ricurian carca. Chugrijpi o ungujpipash aliguta jambishpami cuidan carca. Huahua llamacunatacarin ashtahuan aliguta ricuriashpami cuidan carca (Gén. 33:13). Imashinami ricupanchi chai tiempocunapi llamaguta cuidanaca na facilchu carca.

² Taitamamacunapash llamaguta michijcunashnami can. Huahuacunataca ‘[“Jehová”, NM ] munanshnami viñachina can’ (Efes. 6:4). Shinapash huahuacunata aliguta viñachinaca na facilchu can. Huahuacunapash juchayucuna caimandaca, alita rurangapaj munashpapash nalitami ruran. Chai jahuapash Diabloca paipa nali munaicunatami caipi chaipi yachachijun (2 Tim. 2:22; 1 Juan 2:16). Quiquinbash huahuacunata aliguta viñachingapaj munashpaca ¿imatata rurana capangui? Pundapica huahuacunata aliguta rijsinami capangui. Shinallata micunaguta caranshnami Jehová Diosmanda yachachina,  maijan ñanda catinatapash aliguta ricuchina capangui. Shinaca chai quimsa yuyaicunata yachajupashunchi.

3. Huahuacunata aliguta rijsingapaca ¿imatata taitacunaca rurana can?

³ Llamacunata aliguta michijcunaca paipa tucuilla llamacunatami ali rijsin. Taitacunapash paicunapa huahuacunataca alimi rijsina can. Bibliapica ninmi: ‘Canba llamacuna imashina purinajujtaca aliguta ricuriangui’ nishpa (Prov. 27:23). Huahuacuna imata shinanajujta, imata pensanajujta, imashina sintirinajujta yachangapaca cutin cutinmi taitacunaca paicunahuan parlariana can.

4. a) Huahuacuna ima pasajujta villachunga ¿imatata taitacunaca rurai ushan? (Callari dibujota ricupangui.) b) Quiquinba huahuacuna ima pasajujta villachunga ¿imatata rurapashcangui?

⁴ Shinapash huaquin taitacunapaca solteroyanajuj huahuacunahuan parlanaca shinllimi can. Huahuacuna solteroyanajushpaca paicunalla cangapami munan, ima pasajujta parlangapapash tal vez na munangachu. Huahuacuna shina cajpica ¿imatata rurashun? Tiachishpa unaita tapuchijunapa randica shuj ratoguta puringapaj rishpa, imagutapash pugllajushpa o huasipi imatapash igual rurajushca horascunapi huahuacunataca parlachishunchi (Deut. 6:6, 7). Chai tiempocunata ali aprovechashpa parlachijpica huahuacunapash ali sintirishpami parlanlla.

5. Parlachingapaj munajpipash huahuacuna na parlangapaj munajpica ¿imatata taitacunaca rurana can?

⁵ Parlachingapaj munajpipash na parlajpica ¿imatata rurana capangui? Cai punllaca imatata rurarcangui nishpa quiquinba ushita tapunapa randica, quiquin imata rurashcatara pundapica parlapangui. Shina rurajpimi paicunapash imata rurashcata parlanga. Shinallata tabacota chupanamanda o shuhuanamanda imata pensajta yachangapaj munashpaca tapupangui: “Quiquinba amigacunaca ¿imatata tabacota chupanamanda, shuhuanamandaca yan? Paicunata ayudangapaca ¿imatata nipanguiman?” nishpa.

6. Huahuacuna shungupi imata pensajujta yachangapaca ¿imatata rurana capanchi?

⁶ Huahuacuna shungupi imata pensajujta yachangapaj munashpaca, paicunata uyangapaj tiempota charishcata, paicuna ima nijta uyangapaj munashcatami ricuchina can. Taitamamacuna ocupado cajta ricushpaca huahuacunapash na parlangapaj munanllu. Shinaca ¿imashinata huahuacunata uyangapaj munashcataca ricuchishun? Huaquinbica taitamamacunaca ninchipashchari, “imata cashpapash, ima hora cashpapash villahuanguilla” nishpa. Shina nishpapash paicuna parlajujpica, na manllarishcachu uyanajuna canchi. Shinallata paicuna parlajta na valichishpaca na uyajunachu canchi. Chaimi paicunapash pensanga, ciertomi ñuca imata nijujta uyangapaj munan nishpa. Shuj ejemplota ricupashun. Kayla shuti cuitsaguca 19 huatacunatami charin. Paica ninmi: “Ñuca taitamanga tucuitami parlani. Ñuca parlotaca na fitishpa uyajunllami. Uyashca jipami ali consejocunata cuhuan” nishpa.

7. Cuitsahuan, huambrahuan purinamanda parlashpapash ¿imashinata taitamamacunaca huahuacunata na fiñachishpa aliguta intindichina can?

⁷ Huahuacuna viñashpaca cuitsahuan, o huambrahuan puringapami munan. Chai cosascunamanda huahuacunahuan parlanaca shinllimi can. Shinapash, huahuacunataca chai cosascunamandapash parlashpami aliguta intindichina canchi. Pensaripashunchi. Ñucanchi munashca micunata micungapaj shuj restauranteman rinajushcanchiman. Shinapash pipash nishcaman, chai restaurantepica can munajushca micunaca vijsata huaglichinllami nishpa. Shuj micunatami micusha nijujpipash nishcanman, chai micunapash vijsata huaglichinllami nishpa. Shinaca ¿nachu shuj restaurantepi micungapaj rinchiman? Shinallata ñucanchi huahuacuna consejota mañajpi cada imata nishcata chaica nalichu can nijujpica ¿nachu paicunapash shuj ladopi consejota mascangapaj rinman? (Colosenses 3:21, liingui.) Cada rato nalichu can nijunapa randica ima horas consejana ali cajta ricushpa consejangui. Shinallata  na consejashpa yangata saquinapash nalichu can. Emily shuti paniguca ninmi: “Ñuca taitamamacunaca huambrahuan purinamandapash ñucahuanga parlanmi. Paicunaca huambrahuan purinaca nalichu can nishpaca na manllarishcata parlanajunllu. Ashtahuangarin ninmi, shuj huambrata aliguta rijsishpa, paihuan puri callarishpa, paihuan cazaranaca alimi can nishpa. Shina parlashpa aliguta intindichijpimi paicunahuan parlanataca na pinganayachini. Imata parlana cashpapash parlanillami. Pihuanbash puri callarishpaca, ñuca taitamamacunamanga villashami, na pacalla purijushachu” ninmi.

8, 9. a) ¿Imamandata huahuacuna parlai tucuchingacaman na culirashpa ali uyana capanchi? b) Huahuacunata uyashpaca ¿ima experienciatata charipashcanguichi?

⁸ Kayla shuti cuitsagu nishca shinaca, huahuacuna imagutapash parlajujpica na ñapash culirashpami uyana canchi (Santiago 1:19, liingui). Katiapa ejemplota ricupashun. Paica paillami paipa ushiguta viñachijun. Paica ninmi: “Ñuca ushi imatapash parlajujpica nara parlai tucuchijpillatami ñapash culiranlla carcani. Cutin huaquinbica shaijushca caimandami pitapash na uyangapaj munan carcani o pipash molestachunga na munan carcani. Shinapash cunanbica ñana pundashnachu cani. Chaimi ñuca ushipash pai imashina sintirishcata parlai callarirca”.

⁹ Ronald shuti huauquipash ninmi: “Shuj punllaca ñuca ushica shuj huambrahuanmi purijuni nishpami parlahuajurca. Parlajujta uyashpallatami ninanda culirarcani. Shinapash chai ratomi yarircani, Jehová Diosca na ñapash culiranllu, gentecunataca intindinmi nishpa. Chaita yarishpami ashata trancarishpa ñuca ushi imata parlajujta uyashpa catircani. Ñuca ushi ima nijujta uyaimandami pai imashina sintirijujta intindishpa paitaca llaquishpa, juyaihuan consejai usharcani. Shina consejajpimi ñuca ushipash aliguta uyashpa, cazushami nihuarca”. Huahuacunahuan cutin cutin parlashpami paicuna imata pensanajujta, imashina sintirinajujta yachashpa ali ñanda agllachun ayudaita ushanchi”. *

10, 11. Congregacionmanda ama caruyachunga ¿imashinata huahuacunataca ayudashun?

¹⁰ Huaquin llamacunaca ladolla pambacunapi jihuata ricushpami chai pambacunaman rishpa chaishuj llamacunamandaca asha asha caruyan. Chaimandami llamacunata ali michijcunaca tucuilla llamagucunata cuidan. Ñucanchi huahuacunapash nali cumbacunamanda o nali diversiongunamandami congregacionmandaca asha asha caruyanlla (Prov. 13:20). Shinaca quiquinba  huahuacunapash congregacionmanda ama caruyachunga ¿imatata rurai ushapangui?

¹¹ Huahuacuna ashata pandarijujta ricushpaca uchallami ayudana capangui. Shinallata imapi alita rurajujta ricushpami animana capangui (2 Ped. 1:5-8). Paicunata animangapaca Familiahuan Adorana Tutatami aprovechana capanguichi. Huata 2008, octubre quillapi llujshishca Ministerio del Reino hojapica nijurcami: “Tucuilla taitacunatami animapanchi, Jehová Diospa mandashcata pactachishpa cangunapa familiaman Bibliata aliguta yachachipanguichi” nishpa. Shinaca quiquinba huahuacunata llamaguta michinshna aliguta yachachingapaca ¿Familiahuan Adorana Tutataca alichu aprovechanajupanguichi? Aliguta yachachingapaj munanajujta ricushpaca quiquinba huahuacunapash agradicingami (Mat. 5:3; Filip. 1:10).

12. a) Familiahuan Adorana Tutaca ¿imashinata jovengunataca ayudan? ( “Huahuacunaca agradicinmi” nishca recuadrotapash ricupangui.) b) Familiahuan Adorana Tutaca ¿imashinata quiquindaca ayudashca?

¹² Familiahuan Adorana Tutamanda parlashpaca Carissa shuti paniguca ninmi: “Tucuicunahuan tandanajushpa parlanatami gushtani. Chai tutataca tucuicunami alicachishpa parlanchi. Ñuca taitaca Familiahuan Adorana Tutapi yachachinataca yariami can. Chaimandami ñucapash chai tutataca yaria cani. Ñuca taita cajpi, shinallata Jehová Diospa mandashcata pactachishpa aliguta yachachijpimi ñuca taitataca tucui shunguhuan respetani” nishpa. Brittney shuti panigupash ninmi: “Familiahuan Adorana Tutapimi ñuca taitamamacunaca ñuca problemacunapi pensarinajushcata, ñucata ayudangapaj munajushcata ricuchihuashca. Familiahuan Adorana Tutami ñuca taitamamacunaman quimirichun, paicunahuan ashtahuan ali llevarichun ayudahuashca” nishpa. Imashinami ricupanchi Familiahuan Adorana Tutapimi micunaguta caranshna yachachishpa, huahuacunataca llamaguta michinshna cuidanajunchi. *

13. Huahuacuna Jehová Diosta sirvingapaj munachunga ¿imatata taitamamacunaca rurana can?

¹³ Llamacunata aliguta michijcunaca vara caspiguhuan astichishpami llamagucunataca maita rinata ricuchin o imapash animalcuna ricurijpica vara caspihuan shayarishpami difindin. Ashtahuanbachaca vara caspiguhuan tandachishpami llamacunataca ‘ali jihuacuna’ tiaj pushtucunaman apan (Ezeq. 34:13, 14). ¿Nachu quiquinba huahuacunatapash Jehová Diosta sirvij ñanman apashpa Salmistashna sintirichun munapanguiman? Salmistaca nircami: “Ñuca Taita Dioslla, cambaj munaita rurashpami cushijushcani. Can mandashcatapash, ñuca shungupimi charijuni” nishpa (Sal. 40:8). Quiquinba huahuacunapash salmistashna sintirishpaca Jehová Diosman mingarishpa bautizaringapaj munangami. Shinapash bautizaringapaca aliguta intindishpara, Jehová Diosta sirvina munaihuanmi bautizarina can.

14, 15. a) Taitamamacunaca ¿imatata huahuacunaman yachachina, yarichina can? b) Huaquin jovengunaca ¿imamandata ishcai shungu tucun?

¹⁴ Cutin quiquinba huahua, Jehová Diosman na quimiringapaj munajpi o Bibliapi yachajushcacunata na cringapaj munajujpica ¿imatata rurai ushapangui? Pundapica Jehová Diosta juyanatami yachachina capangui. Shinallata, Jehová Dios imatalla carashcatami yarichina capangui (Apoc. 4:11). Shinami Jehová Diosta juyashpa, paita agradicimandaca paita sirvingapaj munanga.

¹⁵ Jehovata na sirvingapaj munashpa ishcai shungu tucushca purijujpica, imamanda shina sintirijujta cuenta japichunmi quiquinba huahuataca ayudana capangui. Jehová Diosta sirvijcuna ashtaca bendiciongunata chasquijtami aliguta intindichina capangui. Pundapica imamanda ishcai shungu tucujujtami ali yachana capangui. ¿Quiquinba huahuaca Bibliapi yachachishcacunata na crimanda o cumbacunapa ñaupajpi Bibliamanda na parlai ushaimandachu ishcai shungu tucujun? ¿Jehová Diosta cazunaca nalichu can  nishpa o pailla sintirijuimanda o shujcuna nalicachishpa ricujpichu ishcai shungu tucujun?

16, 17. Taitamamacunaca ¿imashinata huahuacunataca Jehová Diosman quimirichun ayudaita ushan?

¹⁶ Huahuacuna imamanda ishcai shungu tucushca cajpipash ama ishcai shungu tucuchunmi ayudana capanguichi. Huaquin taitamamacunaca cashna nishpami huahuacunataca tapuchishca: “¿Canga testigo de Jehová cangapaj munanguimanllu o Testigo canaca shinllichu can? Testigo cashpaca ¿ima bendiciongunata o ima llaquicunatashi charinguiman? Cunan punllacunapi canba munashcacunata huashaman saquishpapash ¿nachu cunan punllacunapipash shamuj punllacunapipash ashtahuan jatun bendiciongunata charinaca ali canman?” nishpa. Chai tapuicunata nishpapash quiquinba shimicunapillata nipangui, shinallata juyaihuan, ayudana munaihuan, alimodos tapuchipangui. Ama maipash cachun tapuchipanguichu. Huahuacunahuan parlajushpaca Marcos 10:29, 30 textocunamanda yachachipangui. Huaquin jovengunaca Jesusta catina imamanda ali cashcata, Jesusta na catina imamanda nali cashcatami shuj hojagupi escribin. Shinami paicunaca imamanda ishcai shungu tucujushcata intindishpa alita rurai ushan. Ashtahuangarin ¿quiquinba huahuacunamanga Enseña librohuan Amor de Dios librohuan yachachipashcanguichu? Shuj gentecunamanbash chai librocunahuan yachachishpaca ¿nachu quiquinba huahuacunamangarin chai librocunahuan yachachina capangui?

¹⁷ Huahuacuna viñarishpaca paicunallatami Jehová Diosta sirvinata o na sirvinatapash agllana can. Taitamamacunaca na pensanachu can, Jehová Diosta ñuca sirvijushcamandaca huahuacunapashmi Jehovata sirvinga nishpa. Ama cungapanguichichu, huahuacunaca na maquinacunachu can. Maquinacunami imata rurachun churajpipash ruranlla. Cutin huahuacunaca paicunallata Jehová Diosman quimirishpa catinatami yachajuna can (Prov. 3:1, 2). Quiquinba huahuacuna Jehová Diosman na quimiringapaj munajpica quiquinba huahuacunallata cashna pensarichun ayudapangui: “¿Imamandata Taita Dios cierto tiajtaca crini? ¿Imamandata yachani Jehová Dios ñucata llaquishpa ricujujta? ¿Imamandata Jehová Diosta cazunaca ñucapallata ali can?” nishpa. Quiquinba huahuacuna Jehovata sirvishpa causana ali cashcata cuenta japichunga, maijan ñanda agllanataca na ñapash culirashpa yachachipangui (Rom. 12:2). *

18. ¿Imashinata taitamamacunaca Jehová Diospa ejemplota cati ushan?

¹⁸ Jesusta catijcunaca tucuicunami alipacha michij Jehová Diospa ejemplota catingapaj munanchi (Efes. 5:1; 1 Ped. 2:25). Ashtahuanbacha taitamamacunami paipa juyashca huahuacunata ali rijsishpa, Jehová Dios carasha nishca bendiciongunata chasquichun ayudana can. Shinaca, tucuilla taitamamacuna, quiquinba huahuacunamanga Jehová Diosta juyanata yachachipaichi.