1, 2. ¿Imamandata huarmipa miraita cuidanaca minishtirirca?

JEHOVÁ DIOSCA paipa munaita pactachingapaj munashpami jardín de Edenbica Diablotaca nirca: ‘Canhuan huarmihuanga fiñanajushpa causachunmi churagrini. Canba miraihuanbash, huarmipa miraihuanbash fiñanajuchunmi churasha. Paipa miraimi candaca umapi [“sarunga”, NM ]. Canga chaqui talonbimi chugrichingui’ nishpa (Gén. 3:15). Imashinami ricunchi, Diabloca ninandapacha culirashpami huarmipa miraitaca imashinapash tucuchingapaj munana carca.

² Chaimandami Salmo librota escribij runaguca Jehová Diostaca nirca: ‘Ricui, canda fiñajcunaca león huacanshnami caparinajun. Canda na ricunayachijcunaca, umata alsashpami jariyashca purinajun. Can agllashcacunata fiñashpa llaquichingapami, huashalla parlanajushca. Paicunaca cashnami ninajushca: “Ama llacta tucuchun, tucuchingapaj shamuichi”’ nishpa (Sal. 83:2-4). Diabloca huarmipa mirai ama tiachun munashpami huarmipa mirai shamuna punda familiataca huaglichingapaj, tucuchingapaj munarca. Shinapash Jehová Diosca huarmipa mirai na huaglichun saquishpami, paipa Reino paipa munaita pactachichun  ricuriajurca. Chaimandami shuj pactocunatapash rurarca.

3, 4. a) ¿Ima huatapita Taita Diosca israelitacunahuan pactota rurarca? b) Israelitacunaca ¿imatata rurashunllami nirca? c) Moisesman cushca Leyca ¿imashinata huarmipa mirai ama mapayachun ayudarca?

³ Abrahanba, Isaacpa, Jacobpa huahuacuna mirajpimi Jehová Diosca nirca, cangunami Israel llacta canguichi nishpa. Chai punllacunapimi Jehová Diosca Moisesta agllashpa israelitacunamanga leycunata curca. Chaimi israelitacunapash chai leycunata cazushunmi nishpa ari nirca. Chai ari nishcatami Moisesman Leyta Cushca Pacto nin. Chai punllacunamanda parlashpaca Bibliapica ninmi: Moisesca ‘Dioshuan ari nijushca escribishca librota japishpami, israelcuna uyajta liirca. Shina liijpimi paicunaca ninajurca: “Ñucanchica, Mandaj Dios tucui ima nishcata cazushpa rurapashunllami” nishpa. Chai jipami Moisesca [jari huagracunapa] yahuarta japishpa israelcunapa jahuapi tsirapachishpa nirca: “Ricuichi, caica Mandaj Dios cangunahuan ari ninajushcata ricuchij yahuarmi”’ can nishpa (Éx. 24:3-8).

⁴ Jehová Diosca Jesús shamungapaj 1513 huatacuna faltajpimi tucui llactacunamanda Israel llactata agllarca. Chai huatapimi israelitacunaca Sinaí urcupi cashpa nirca, Moisesman cushca Leytaca cazushunmi nishpa. Paicunahuan pactota rurashpami Jehová Diosca israelitacunapa Juez, Rey, Leycunata cuj Dios tucurca (Is. 33:22). Israelitacunaman cushca Leypica nijurcami, Jehovata na sirvij gentecunahuanga na cazaranachu canguichi, yanga dioscunataca na adoranachu canguichi nishpa. Chai leymi huarmipa mirai punda familiacuna ama mapayachun ayudana carca (Éx. 20:4-6; 34:12-16).

5. a) Moisesman cushca Leyta cazushpaca ¿ima bendiciongunatata israelitacunaca charinman carca? b) ¿Imamandata Jehová Diosca Israel llactata na chasquirca?

⁵ Moisesman Leyta Cushca Pactoca jipa punllacunamanbash sacerdotecuna tianatami ricuchijurca (Heb. 7:11; 10:1). Israelitacuna Jehovapa leycunata cazushpaca paicunapashmi Diospa Reinopica sacerdotecunashna mandaj llacta tucuna carca (Éxodo 19:5, 6, liingui). Shinapash paicunaca na cazurcachu. Ashtahuangarin, Abrahanba mirai Jesusta chasquinapa randica na ricunayachircachu. Chaimandami Jehová Diospash paicuna paipa llacta cachunga ñana chasquirca.

6. ¿Imamandata ninchi, Dios cushca Leyca na imapipash pandarircachu nishpa?

⁶ Israel llactata Jehová Dios ñana chasquijpimi huaquin israelitacunalla sacerdotecuna tucuita usharca. Chaimandami sacerdoteshna mandaj llacta tucuitaca ñana usharca. Shinaca Dios cushca Leyca ¿imapipash panda cashcatachu ricuchijurca? Na. Diospa Leyca na imapipash pandarijurcachu. Israelitacunaman  cushca Leymi huarmipa miraitaca ama imapash mapayachichun cuidajurca. Ashtahuangarin, chai Leymi Mesías shamujpi paita rijsichun ayudarca. Chaimandami Bibliapica nin: “Cristomi, mandashca shimicunataca pactachishpa tucuchirca” nishpa (Rom. 10:4). Shinaca ¿picunata Diospa Reinopi sacerdotecuna tucuita ushana carca? Chaita yachangapaca Jehová Diospa shuj pactota ricupashun.

7. Jehová Diosca ¿imatata profeta Jeremiasmanga villachirca?

⁷ Moisesman Leyta Cushca Pacto nara tucurijpillatami Jehová Diosca profeta Jeremiasmanga villachirca, shuj mushuj pactotami Israel llactahuan ruragrini nishpa (Jeremías 31:31-33, liingui). Cai mushuj pactopica juchacunata Jehová Dios perdonachun nishpa animalcunata huañuchinaca ñana minishtirircachu. ¿Imamandata ñana minishtirirca?

8, 9. a) Jesús paipa yahuarta jichashcamandaca ¿ima bendiciongunata tian? b) Jehová Diospa ñaupajpi ali ricurimandaca ¿imatata ungidocunaca chasqui ushana carca? (Callari dibujota ricupangui.)

⁸ Ashtaca huatacuna jipami Jesusca 14 de nisán punllapi, huata 33​pi paipa 11 apostolcunahuan tandanajushpa vino copata yalichishpa nirca: ‘Cai vino copaca, cangunapa ali cachun jicharina ñuca yahuarmi. Caihuanmi Diosca gentecunahuan shuj mushuj ari nishcata [pactota] pactachigrin’ nishpa (Luc. 22:20). Mateo libropipash Jesusca nircami: ‘Caica ashtaca gentecunapa juchacunata anchuchingapaj, jicharina ñuca yahuarmi’ can nishpa (Mat. 26:27, 28).

⁹ Jesús paipa yahuarta jichajpimi Mushuj Pactoca tiaita ushan. Shinallata Jesús paipa yahuarta jichajpimi Jehová Diosca gentecunapa juchacunata perdonan. Jesusca jucha illajmi carca, juchacunata perdonachunga na minishtijurcachu. Chaimandami Jesusca Mushuj Pacto tianataca na minishtijurca. Shinapash Adanba huahuacunaca Jesús paipa yahuarta jichashpa salvachunmi minishtinajurca. Chaimandami Jehová Diosca, gentecunapa juchacunamanda Jesuspa yahuarta alicachishpa chasquirca. Ashtahuangarin Jesús paipa yahuarta jichajpimi Jehová Diosca Jesusta huaquin ali catijcunata agllashpa espíritu santota curca paipa ‘huahuacunatashna’ chasquingapaj (Romanos 8:14-17, liingui). Taita Diospa ñaupajpi juchacunamanda limpio caimandami ungidocunaca ‘Cristo japinshnallata’ mandai ushana can. Ashtahuangarin, Israel llacta na cazujpipash ungidocunami sacerdotecunashna mandaj llacta tucuita ushan. Apóstol Pedroca nircami: ‘Cangunami Dios agllashca miraicuna, curacuna, jucha illaj llacta cachun Taita Dios randishcacuna canguichi. Taita Diospa rurashcacunata villachun agllashcacunami canguichi. Paillatami cangunataca, yanapi causanajushcamanda michaman llujshichun cayarca’ nishpa (1 Ped. 2:9). Imashinami ricunchi, Mushuj Pacto tiaimandami Jesusta huaquin catijcunapash Abrahanba mirai caita ushan.

10. a) Mushuj Pactoca ¿ima huatapita pactari callarirca? b) ¿Imamandata chai huatapira pactari callarina carca?

¹⁰ Mushuj Pactoca ¿Jesús paipa 11 apostolcunahuan tandanajushpa vino copata yalichijuj tutachu pactari callarirca? Na. Mushuj Pacto pactari callarichunga Jesusca paipa yahuarta jichanarami carca. Shinallata Jesusca jahua pachaman tigrashpa paipa yahuarhuan gentecunata salvashcata Jehová Diosman ricuchinarami carca. Ashtahuangarin, Jesushuan mandangapaj rinacunapash espíritu santota chasquinarami carca. Jesusta huaquin catijcunaca huata 33​pi, Pentecostés fiesta punllapimi espíritu santota chasquirca. Shinaca chai huatapimi Mushuj Pactoca pactari callarirca.

11. a) Mushuj Pactoca ¿imashinata judiocunatapash na judiocunatapash Taita Diospa Israel tucuchun ayudarca? b) Mushuj Pactopica ¿mashna gentecunata cana carca?

 ¹¹ Profeta Jeremiasman Mushuj Pacto tiagrinmi nishpa Jehová Dios villachijpipash Moisesman Leyta Cushca Pactoca huata 33camanmi sirvijurcara (Heb. 8:13). Mushuj Pacto pactari callarijpimi Jehová Diosca judiocunatapash, na judiocunatapash chasquirca. Leypi nishcata catishpa circuncisionda ruranaca ñana minishtirircachu. Taita ‘Diosca shungupimi circuncisionda rurai callarirca’ (Rom. 2:29). Mushuj Pactota rurashpami Jehová Diosca ‘paicunapa yuyaipi, shungupipash’ paipa mandashcacunata ‘escribinshna churana carca’ (Heb. 8:10). Mushuj Pactopica 144 mil gentecunami cana carca. Paicunami Taita Diospa Israel tucuna carca (Gál. 6:16; Apoc. 14:1, 4).

12. Moisesman Leyta Cushca Pactoca ¿imacunapita Mushuj Pactohuanga igual can?

¹² Moisesman Leyta Cushca Pactoca ¿imacunapita Mushuj Pactohuanga igual can? 1) Moisesman Leyta Cushca Pactopica Jehová Diosmi Israel llactamanda gentecunahuan pactota rurarca. Cutin Mushuj Pactopica Jehová Diosllatami paipa Israelhuan pactota rurarca. 2) Moisesman Leyta Cushca Pactopica Moisestami Jehová Diosca utilizarca. Cutin Mushuj Pactopica Jesustami Jehová Diosca utilizarca. 3) Moisesman Leyta Cushca Pacto sirvichunga animalcunapa yahuartami jicharca. Cutin, Mushuj Pacto sirvichunga Jesuspa yahuartami jicharca. 4) Moisesman Leyta Cushca Pactopica Moisesmi Israel llactataca ñaupaman pushajurca. Cutin Mushuj Pactopica congregacionda ricujuj Jesusmi ñaupaman pushajun (Efes. 1:22).

13, 14. a) Mushuj Pactoca ¿imashinata ayudan? b) Ungidocuna jahuan cieloman rishpa mandachunga ¿imata minishtirijurcara?

¹³ Mushuj Pactomi Jesusta catijcuna jucha illaj llactashna tucushpa Diospa Reinopi reycuna, sacerdotecuna cachun ñanda pascan. Paicunami Abrahanba miraipash caita ushan (Gál. 3:29). Imashinami ricupanchi, Mushuj Pactoca Abrahanhuan Rurashca Pacto ciertopacha pactarinatami ricuchijun.

¹⁴ Mushuj Pactomi Taita Diospa Israel tiai callarichun ayudan. Chaimandami ungidocunaca Jesushuan jahua cielopi mandangapaj rita ushan. Shinapash ungidocuna Jesushuan mandangapaj rinata, jahua cielopi sacerdotecuna canata segurachunga shuj pactomi minishtirijurcara.

15. Jesusca ¿ima pactotata paipa 11 apostolcunahuanga rurarca?

¹⁵ Jesusca paipa 11 apostolcunaman tandata, vinota yalichishca jipaca nircami, cangunapash ñucahuan mandachunmi shuj pactota rurani nishpa. Chaitami Diospa Reinopi Mandangapaj Pacto nin (Lucas 22:28-30, liingui). Chaishuj pactocunataca Jehová Diosmi rurarca. Cutin cai pactotaca Jesusmi paipa catij ungidocunahuan rurarca. Shinapash ‘ñuca Taita ñuca mandachun ushaita carashcashnalla’ o ñucahuan pactota rurashcashnallatami nishpaca ¿imatata Jesusca nijurca? Jesusca ‘causaita causaicamanmi Melquisedec [sacerdoteshna] cangui’ nishpa, Jehová Dios paihuan pactota rurashcata yarishpami shina nijushcanga (Heb. 5:5, 6).

16. Diospa Reinopi Mandangapaj Pacto tiashcamandaca ¿imatata ungidocunaca ruranga?

¹⁶ Jesuspa 11 apostolcunaca ima llaquicuna ricurijpipash tucuipimi Jesustaca catinajurca. Diospa Reinopi Mandangapaj Pactoca ungidocuna jahua cieloman rishpa reycuna, sacerdotecuna canatami segurajurca. Shinapash na 11 apostolcunallachu Jesushuan mandangapaj rina carca. Jesusca shuj muscuipishna ricurishpami apóstol Juanmanga nirca: “Nalicunata mishajmanmi, ñuca mandashpa tiarinapi ñucahuan tiajuchun carasha. Ñucapash nalicunata mishashpami, ñuca Taitahuan pai mandashpa tiarinapi tiajuni” nishpa (Apoc. 3:21). Shinaca, Diospa Reinopica Jesusta ali catij 144 mil ungidocunapashmi  mandanajunga (Apoc. 5:9, 10; 7:4). Diospa Reinopi Mandangapaj Pacto tiaimandami ungidocunaca Jesushuan jahua cielopi mandanataca seguro caita ushan. Ali intindingapaca shuj ejemplota churapashun. Huaquin llactacunapica reyhuan cazarashpaca huarmipashmi llactataca mandai callarin. Bibliapica ungidocunatami nin, Jesushuan ‘cazaragrijuj huarmigumi’ can nishpa. Ashtahuangarin ungidocunatami ‘jarihuan nara tacarishca cuitsaguhuan’ chimbapuran (Apoc. 19:7, 8; 21:9; 2 Cor. 11:2).

17, 18. a) ¿Imashinata 6 pactocunaca Diospa Reinomandanata yachachin? Ashalla shimicunapi intindichipai. b) ¿Imamandata Diospa Reino mandanataca tucui shunguhuan crina capanchi?

¹⁷ Cai temapi yachajushca pactocunapash ñaupa temapi yachajushca pactocunapash, Diospa Reinomanda shuj o ishcai yuyaicunatami ñucanchimanga intindichijushca (“Taita Diosca ¿imashinata paipa munaita pactachinga?” nishca recuadrota página 15​pi ricupangui). Cai pactocunaca Diospa Reino ciertopacha mandanatami ricuchijun. Jehová Dios paipa Reinopi Jesusta mandachun churashpa gentecunapapash, cai Alpapipash paipa munaita pactachinataca tucui shunguhuan cripashunchi (Apoc. 11:15).

¹⁸ Imashinami ricupanchi, Taita Diospa Reino mandajpimi tucui llaquicuna tucuringa, ashtaca bendiciongunapash tianga. Chaimandami gentecunamanga cushijushpa Diospa Reinomandaca villachina capanchi (Mat. 24:14).