1, 2. a) Jehová Diosca ¿imatata munan? b)  Cai temapica ¿maijan tapuicunatata yachajugripanchi?

APÓSTOL Pedroca Jehová Dios yuyachijpimi Levítico libromanda parlashpaca nirca, Jesusta catijcunapash israelitacunashnallatami tucuipi jucha illaj, limpio cana can nishpa (1 Pedro 1:14-16, liingui). Jehová Diosca jucha illaj Diosmi can. Paica ungidocunapash shuj llamagucuna nishcacunapash tucui rurashcacunapi, tucui causaipi limpio cachunmi munan (Juan 10:16).

² Cai temapica Levítico libromanda yachajushpami Diospa mandashcacuna imashina tucuipi limpio cachun ayudajta yachajushun. Shinallata chai mandashcacunata imashina pactachinatapashmi yachajushun. Ashtahuangarin cai tapuicunatami yachajushun: ¿Imamandata Taita Diospa mandashcacunataca siempre cazuna canchi? Levítico libroca ¿imashinata ñucanchita Mandaj Taita Diosta cazunata yachachin? Israelitacunapa sacrificiocunamandaca ¿imatata yachajunchi?

3, 4. a) ¿Imamandata Jesusta catijcunaca Jehovapa mandashcacunata, consejocunataca siempre cazuna capanchi? b) ¿Imamandata shujcunata randi llaquichina, paicunahuan risintirishcalla purinaca nali can?

³ Jehová Dios ñucanchita alicachichunga paipa mandashcacunata,  paipa consejocunataca siempremi alicachishpa cazuna canchi. Paipa mandashcacunata, consejocunata na valichina, na sirvichinaca nalichu canman. Moisesman cushca leycunata ñana catina cashpapash chai leycunami Diospa ñaupajpi ima ali cashcata ima nali cashcata intindichun ayudan. Shuj ejemplota ricupashun. Israelitacunataca Jehová Diosca mandarcami: ‘Canda llaquichijpipash na chashnallata llaquichinachu cangui. Canba llactapuratapash ama fiñashpalla puringuichu. Ashtahuangarin, canba cumba runagutaca imashina can juyarinshnallata juyangui. Ñucami Mandaj Dios cani’ nishpa (Lev. 19:18).

⁴ Imashinami ricunchi, pipash llaquichijpi paita randi llaquichichun, o risintirishca purichunga Jehová Diosca na munanllu (Rom. 12:19). Jehová Dios mandashcata na cazushpaca Jehovapa shutita mapayachishpami Diablota cushichinchiman. Villachinamanda parlashpaca Bibliapica ninmi, villachinaca alpa mangapi churashca ninan valishca oroshnami can nishpa (2 Cor. 4:1, 7). Pihuanbash risintirishca purinaca orota huaglichij imapash nali yacu cuendami can. Shinaca, shujcunahuan risintirishca purijushpaca ninan valishca oro tiajuj mangapillatami orota huaglichij yacuta churanajunchiman. Chaita ruranaca napacha alichu canman.

5. ¿Imatata Aaronmandaca yachajupanchi? (Callari dibujota ricupangui.)

⁵ Levítico 10:1-11​pica ninmi, Aaronba churi Nadab, Abihú nalicuna tucujpimi Jehová Diosca paicunata ninahuan tucuchishpa, Aaronda paipa familiatapash mandarca, Nadabmanda, Abihumandaca na llaquirinachu canguichi nishpa. Aaronbaca Jehovata cazunaca shinllimi carianga. Ñucanchicunapash shina llaquipi cashpaca ¿imatashi ruranchiman? ¿Congregacionmanda llujchi tucushca familiacunahuan o rijsicunahuan na tandanajunachu canguichi, na cumba tucunachu canguichi nishpa mandashcata cazushpa tucuipi limpio cashcataca ricuchinajunchichu? (1 Corintios 5:11, liingui.)

6, 7. a) Iglesia ucuman cumbanata o na cumbanata yachangapaca ¿imatata rurana capanchi? (Notata ricupangui.) b) “Cazarajunimi, iglesiaman cumbahuai” nijpica ¿imatata nipanchiman?

⁶ Cunanbica na Aaronshna llaquita charinchichu. Shinapash pensaripai: “Cazarajunimi, iglesiaman cumbahuai” nishpa ñucanchi familia invitashcanman. ¿Imatashi ruranchiman? Bibliapica, iglesiapi cazarajujpi iglesia ucumanga na cumbanachu canguichi nishca leyca na tianllu. Shinapash Bibliapi huaquin consejocunami iglesia ucuman cumbanata o na cumbanata aliguta intindichun ayudan. *

⁷ Na cumbai ushapashachu nijpica huaquin familiacunaca culiranllami. Paicunaca ñucanchicuna tucuipi limpio cangapaj munashcata, Jehovata cazungapaj munashcataca na intindinllu (1 Ped. 4:3, 4). Shinapash paicunata nali sintichingapaca na munanchichu. Chaimandami aliguman parlashpa paicunata na cumbai ushanataca uchalla parlana canchi. Parlashpaca nita ushanchimi: Pagui invitashcamanda. Cazaranaca ninan cushijuimi can. Shinapash iglesia ucupi rezanajujpi, santiguarinajujpi o imatapash rurachijpi ñuca chaicunata na rurashpa quiquinda llaquichingapaj, pingaichingapaca na munapaimanllu nishpa. Shina aliguta parlashpami Jehovapa mandashcacunatapash tucuipi cazui ushashun.

8. Levítico libroca ¿imatata aliguta intindichijun?

⁸ Levítico libropica Jehová Dioslla mandana cashcata aliguta intindichingapami 30 viaje yalita nijun, Jehová Diosmi leycunata curca nishpa. Jehová Dios leycunata cushcamandami Moisesca Jehovatalla cazun carca (Lev. 8:4, 5). Ñucanchicunapash ñucanchita Jatun Mandaj Jehová Diostami cazuna canchi. Jehovapa organización ayudajpipash Jesuspa ejemplota catishpami ñucanchilla cashpapash Jehovata tucuipi cazungapaj munajushcata ricuchina canchi (Luc. 4:1-13).  Shinaca Jehová Diospi confiashpa, pai ñucanchita mandajujta ali intindishpaca, Jehovata na cazunachu cangui nijpipash na manllashpami Jehová Diosta cazushpa catishun (Prov. 29:25).

9. ¿Imamandata gentecunaca ñucanchita na ricunayachin?

⁹ Jesusta catijcunaca llaquicuna shamunataca alimi yachanchi. Jesusca nircami: ‘Ninanda llaquichinajuchunmi cangunataca japichinajunga, shinallata huañuchinajungami. Ñuca shutipi catinajujpimi, cangunataca tucui gentecuna na ricunayachinga’ nishpa (Mat. 24:9). Shujcuna na ricunayachijpipash villachishpami catinchi, imata rurajushpapash tucuipi limpio cangapami munanchi. Gobiernocunapa leycunatapash cazunchi, causaipipash cuerpopipash limpiomi canchi. Shinaca ¿imamandata shuj gentecunaca ñucanchita na ricunayachin? (Rom. 13:1-7.) Ñucanchita mandaj Jehová Diostalla cazujpimi ñucanchitaca na ricunayachin. Ñucanchica paitallami adoranchi, paita cazunataca na saquishunllu (Mat. 4:10).

10. Jehová Dios nishcata na cazuj huauquica ¿ima llaquipita carca?

¹⁰ Bibliapica ninmi, Jesusta catijcunaca ‘na cai pachapajta rurashpa causanachu’ can nishpa. Chaimandami ñucanchicunaca na guerracunaman rinchi, politicacunapipash na chapurinchi (Juan 15:18-21; Isaías 2:4 liingui). Bibliapi shina mandajpipash huaquin huauquicunaca na cazushpami cai pachapa ruraicunapi chapurishca. Shinapash jipamanga arripintirishpami huaquingunaca Jehovaman tigrashca (Sal. 51:17). Cutin shuj huauquicunaca na arripintirishcachu. Hungría llactapi ima pasashcata ricupashun. Segunda Guerra Mundial punllacunapica huaquin huauquicunaca na guerracunapi chapuringapaj munarcachu. Chaimandami soldadocunaca 45 huatamanda urai huatacunata charij 160 huauquicunataca shuj carcelcunamanda tandachishpa shuj carcelpilla vicharca. Chaipi cajpica soldadocuna tucuchunmi obligangapaj munarca. Chai 160manda ashtaca huauquicunaca na munarcachu. Shinapash 9puracunaca soldado tucungapaj ari nishpami soldado ropacunatapash chasquirca. Ishcai huatacuna jipaca chai 9puramanda shujca jatun llaquipimi carca. Paitapash, shuj soldadocunatapashmi mandarca, Testigocunata filapi shayachishpa disparashpa huañuchinguichi nishpa. Disparangapaj shayarijpica paipa huauqui propiomi huañuchi tucuna filapi shayajushcarca. Paipa huauqui propiota ricushpaca ninandami manllarishcanga. Shinapash huañuchina nishcataca ñana rurachun mandarcachu.

11, 12. Israelitacunaman cushca Leypica ¿imatata Jehová Diosmanda yachajunchi?

¹¹ Moisesman cushca Leypica nijurcami, israelitacunaca ali, sano animalta huañuchishpami Jehová Diosman carana can nishpa (Lev. 9:1-4, 15-21). Chai ruraica Jesús paipa jucha illaj causaita cunatami ricuchijurca. Ashtahuangarin, Leypi mandashca shinami animalcunataca huañuchishpa Jehovaman carana carca. Shuj ejemplota ricupashun. Levítico 12:6​pica ninmi, huahuata ungushca jipaca ‘mapa illaj tucuna punllacuna pactajpimi, jari huahuamanda na cashpaca huarmi huahuamanda cashpapash, Diosman cushpa tucuillata rupachingapaj shuj huatata charij maltun llamata apamunga. Juchamandapash shuj palomata na cashpaca shuj urpitami, Dioshuan tuparina jatun carpaman apamushpa curaman cunga’ nishpa. Shinapash pobrellagu caimanda maltun llamata na apai ushashpaca ishcai urpigucunata o ishcai huahua palomagucunatami apanalla carca. Imashinami ricunchi Jehová Diosca usharishcagutalla mañaj, llaquij Diosmi can (Lev. 12:8). Uchilla animalguta apajpi o jatun animalta apajpipash Jehová Diosca ishcanditallatami alicachishpa chasquirca. Chaimandaca ¿imatata yachajunchi?

¹² Apóstol Pabloca Jesusta catijcunataca animarcami, ‘Diosman animalta cushpa huañuchinshnami, Jesusmandaca Taita Diosta  punllandi alicachina’ canguichi nishpa (Heb. 13:15). Ñucanchicunaca Jehová Diospa shutimanda villachishpami animalta huañuchishpa caranshna Diosman cunajunchi. Shinapash huaquingunaca ungushcacuna o ña mayorllacuna caimandami, huasimanda na llujshi ushashpa cartacunata escribishpa, telefonopi cayashpa o visitangapaj rijcunaman villachin. Ashagutalla rurashpapash paicunaca tucui rurai ushashcata rurashpami Jehová Diosta ninanda alicachishcata ricuchinajun (Rom. 12:1; 2 Tim. 2:15).

13. ¿Imamandata informe hojataca cuna capanchi?

¹³ Ñucanchicunaca pipash obligashcamandaca na villachinchichu. Jehovata juyaimandami villachinchi (Mat. 22:37, 38). Shinaca, villachishca informe hojata cada quilla cupaichi nijpica ¿imashinata sintinrinchi? Informe hojata cushpami Jehová ‘Diosta yarishpa causajushcata’, juyashcata, cazushcata ricuchinchi (2 Ped. 1:7). Shinapash na informe hojapi ashtaca horascunata churanamandallachu villachina canchi. Huaquingunaca ungushcapacha caimanda, mayorllagucuna caimandami quillapica 15 minutocunatalla villachin. 15 minutocunatalla villachishpapash informe hojata jundachishpa cunallami can. Chaigutalla villachijpipash tucui shunguhuan villachishcata ricushpami Jehová Diosca alicachishpa chasquin. Imashinami israelitacunaca pobre cashpapash Jehovaman caraita usharca shinallatami cunan punllacunapi ungushca o mayorlla huauquipanicunapash imata rurai ushashcaguta rurashpa, informe hojataca cushijushpa cuna can. Mundo enteropi publicadorcuna informe hojata cujpimi, Jehovapa organizacionga maipi ashtahuan villachina minishtirijujta ricushpa aliguta ayudan. Shinaca quilla tucurijpica cushijushpa informe hojataca cupashunchi.

14. ¿Imamandata tapurina capanchi, Bibliataca alichu yachajujuni nishpa?

¹⁴ Caicamanga ashtaca ali yuyaicunatami Levítico libropica yachajushcanchi. Levítico libro Bibliapi cashcamandaca agradicinchimi (2 Tim. 3:16). Levítico libromi ñucanchitaca, Jehovata tucui shunguhuan alicachingapaj munashpa, pai munashcashna tucuipi limpio causachun ayudan. Ashtahuangarin, Levítico libromi Bibliata ashtahuan yachajungapaj munachun ayudan (Proverbios 2:1-5, liingui). Tucuicunami ñucanchi rurashcacunata Jehová Dios alicachishpa chasquichun munanchi. Chaimandami tapurina canchi: “Ñucaca ¿imashinata Bibliataca yachajujuni? ¿Televisionmanda, videojuegocunamanda, pugllanacunamanda o imapash cosascunamandachu Bibliata ali yachajunataca ladoman saquijuni? nishpa. Jehovamanda yachajunata ladoman saquijushpaca Hebreocunaman apóstol Pablo escribishca shimicunatami yarina canchi.

15, 16. ¿Imamandata apóstol Pabloca shinlli shimicunahuan consejarca?

¹⁵ Apóstol Pabloca hebreocunataca nircami: ‘Cangunaca na ashtahuan uyangapaj munajcunami’ canguichi nishpa (Hebreos 5:7, 11-14, liingui). ¿Imamandata apóstol Pabloca chai shinlli shimicunahuan consejarca? Apóstol Pabloca imashinami Jehová Dios chai huauquicunata juyan carca shinallata juyaimandami shina consejarca. Chai huauquicunaca huahuacunashna lechetalla munajuj cuendami Bibliapa callari  yachajushcacunahuanlla causangapaj munanajurca. Bibliapa callari yachaicunata yachajuna minishtirishca cajpipash, Taita Diosta ali catingapaj munashpaca shinlli micunata minishtijuj cuendami, Bibliapa shinlli yuyaicunatapash aliguta yachajuna carca.

¹⁶ ‘Shinlli micunata’ na micuimandami paicunaca shujcunaman yachachijunapa randica paicunaman yachachichunra minishtinajurca. Cunanga ñucanchipi pensaripashun. Bibliapa shinlli yuyaicunata yachajunataca ¿alicachinchichu? ¿Intindingapaj munashpa esforzarishcanchichu? ¿Jehovata mañangapaj, Bibliata yachajungapaca tiempota llujchinchichu? Bibliapa shinlli yuyaicunata na alicachishpa, na intindingapaj munashpa, na tiempota llujchishpaca jahua jahuallami Bibliataca yachajunajunchiman. Yaripashunchi, gentecunaman villachina ali cajpipash paicunamanga yachachinami canchi, Jesusta catichunbashmi ayudana canchi (Mat. 28:19, 20).

17, 18. a) ¿Imamandata Bibliapi shinlli yuyaicunata aliguta intindingapaj esforzarina capanchi? b) Tandanajuicunaman nara rishpa ufianamandaca ¿imatata pensana capanchi?

¹⁷ Bibliata yachajunaca huaquingunapaca shinllillami can. Jehová Diospash estudianami cangui nishpaca na pitapash obliganllu. Shinapash Bibliata chairalla yachajui callarishca cashpa o ña unaillata yachajujushca cashpapash tucuipi limpio causangapaca Bibliapa shinlli yachachishcacunatapash yachajushpa catinami canchi.

¹⁸ Jehová Diospa ñaupajpi tucuipi limpio ricuringapaj munashpaca, aliguta intindishpami Bibliataca yachajuna canchi, paipa mandashcacunatapash pactachina canchi. Aaronba churi Nadabta, Abihuta cutin yarishunchi. Paicunaca Jehovata na cazushpa inciensota rupachishcamandami tucuchi tucurca. Paicunaca tal vez ufiashca caimandami shina rurashcanga (Lev. 10:1, 2). Chai jipa Aaronman Jehová Dios imata mandashcata ricupashun (Levítico 10:8-11, liingui). Shinaca ¿tandanajuicunaman nara rishpa napacha ufiana cashcatachu nijun? Pensaripashunchi. Ñucanchicunaca Moisesman mandashca Leytaca ñana pactachinachu canchi (Rom. 10:4). Bibliapipash ashatalla ufianamandaca na imatapash ninllu. Machajta ufianatami nali can nin (1 Cor. 6:10; 1 Tim. 3:8). Pascua punllapica chuscu copa vinotami utilizan carca. Jesuspash ñuca huañushcata yaringuichi nishca jipaca, ñuca yahuarta ricuchij vinota ufiaichi nishpami paipa apostolcunaman curca (Mat. 26:27). Huaquin llactacunapica shuj shuj costumbrecunatami charinchi. Huaquin huauquicunaca nara tandanajuiman rishpallatami micujushpaca asha vinota ufian. Cutin shujcunaca concienciapi nali sintirishpami tandanajuiman o villachingapaj nara rishpaca ashalagutallapash na ufiangapaj munan. Shinaca imata ruranata agllajushpapash Jehová Dios ñucanchita alicachichun, tucuipi limpio ricuringapami munanchi. Chaimandami Jehová Diospa ñaupajpi ‘imacunalla mapa cajta, imacunalla na mapa cajtapash’ ali intindina canchi.

19. a) Familiahuan Adorana Tutata, estudio personalta aliguta aprovechangapaca ¿imatata rurai ushapanchi? b) Tucuipi limpio cangapaca ¿imatata rurana capanchi?

¹⁹ Aliguta mascajpica oroshna valishca yachachishcacunami Bibliapica tian. Chaimandami Jehovapa organizacionga Familiahuan Adorana Tutapi o estudio personalpi aliguta yachajuchunga ashtaca ayudacunata cushca. ¿Chai ayudacunataca sirvichinajunchichu? Jehová Diosmanda, paipa munaimandapash ashtahuan yachajushpa Jehovaman ashtahuan quimirishunchi (Sant. 4:8). Salmo librota escribij runagushna Jehovata mañashunchi: ‘Can mandashca juyailla shimicunata ricungapaca, ñuca ñavita pascapayari’ nishpa (Sal. 119:18). Jucha illaj Jehová Diosta siempre cazushpa ‘ali villaicunata’ cushijushpa villachishpa catishunchi (1 Ped. 1:15; Rom. 15:16). Ashtahuangarin shinlli punllacunapi causanajushcamandaca, tucuipi limpio causangapaj esforzarishpa, ñucanchita Mandaj Jehová Diostalla sirvishunchi.