1. ¿Imamandata Jehová Diostaca agradicina capanchi?

JEHOVÁ DIOSCA ‘jahua pachamandami juyailla aligutalla caramujun’. Chaimandami paitaca tucui shunguhuan agradicina canchi (Sant. 1:17). Ñucanchita llaquishpa Michij Dios caimandami tucui ñucanchi imata minishtijushcata cushca (Sal. 23:1-3). Ashtahuangarin, llaqui punllacunapica Taita Diosmi ñucanchita ayudashca, ñucanchipa shinlli torreshna’ cashca (Sal. 46:1). Chaimandami Salmos librota escribij runagushna sintirishpa ninchi: “Jehová Diostami pagui nina canguichi. Paica alimi can. Paica causaita causaicamanmi ñucanchitaca llaquin” nishpa (Sal. 106:1, NM ).

2, 3. a) ¿Imamandata Jehová Dios carashca bendiciongunamanda agradicinataca cunganchilla? b) Cai temapica ¿maijan ishcai tapuicunatata yachajugripanchi?

² Shinapash ¿imamandata agradicinataca yaria causana canchi? Cai tucuri punllacunapica agradicinata na yachaj gentecunapurapimi causanajunchi (2 Tim. 3:2). Ashtacacunaca Taita Diospa carashcacunata pagui ninataca yaritallapash na yarinllu. Charishca cosascunahuanlla cushijunapa randica na minishtishpapash ashtaca cosascunatami charingapaj munan. Ñucanchicunapash na cuidarishpaca  israelitacunashna tucushpami, Jehová Diospa ñaupajpi ali ricurinatapash, pai carashca bendiciongunatapash na agradici callarinchiman (Sal. 106:7, 11-13).

³ Llaquicuna shamujpica ¿imatashi ruranchiman? ¿Nachu llaquicuna shamujpica, llaquillapacha sintirishpa Jehová Dios carashca bendiciongunataca ñapash cunganchiman? (Sal. 116:3.) Ama ñapash cungangapami cai temapica ishcai tapuicunata yachajugripanchi: Jehová Dios carashca bendiciongunata tucui shunguhuan agradicinata yachajungapaj o agradicishpa catingapaca ¿imatata rurana canchi? Llaquicunapi cashpapash Jehová Diosta agradicingapaca ¿imatata rurana canchi?

4. Agradicishpa catingapaca ¿imatata rurana capanchi?

⁴ Jehová Dios carashca bendiciongunata tucui shunguhuan agradicinata yachajungapaj o agradicishpa catingapaca ¿imatata rurana canchi? Ñucanchita imashina bendiciashcatami aliguta yarina canchi. Shinallata, chai bendiciongunata carashpa ñucanchita imashina juyashcatami aliguta pensarina canchi. Salmos librota escribij runagupash shina pensarishpami Jehová Dios paita imashina ayudashcata yarishpa Jehová Diosta alicachirca (Salmo 40:5; 107:43, liingui).

5. Apóstol Pablopa ejemploca ¿imatata yachachin?

⁵ Agradicishpa catingapaca apóstol Pablopa ejemplota yaripashunchi. Paica Jesusta catijcunataca ‘catiriashpami llaquichin’ carca, ‘nali shimicunata rimashpami causan’ carca. Shina cajpipash Pablota ninanda llaquishpami ‘shuj gentecunaman villachichun Jehová Diospash Jesuspash agllarca. Chaita cutin cutin yarishpami apóstol Pabloca Jehová Diostapash Jesustapash tucui shunguhuan agradicirca (1 Timoteo 1:12-14, liingui). Ashtahuangarin, Pabloca paipa huauquicunataca ninanda juyashpami chai huauquicunaca alimi sirvinajun nishpa Jehová Diostaca cutin cutin agradicin carca (Filip. 1:3-5, 7; 1 Tes. 1:2, 3). Llaquicuna japijpipash huauquipanicuna paita ayudashcamandami ucha Jehová Diosta agradicin carca (Hech. 28:15; 2 Cor. 7:5-7). Chai tucui ayudacunamandami apóstol Pabloca paipa tucuilla huauquipanicunataca nishcanga: ‘Taita Diostaca pagui ninajunallami canguichi. Salmocunata, Diospa espíritu yachachishca juyailla candanacunatapash [“Jehová Diosta”, NM] pagui nishpami tucui shunguhuan candana canguichi’ nishpa (Col. 3:15-17).

6. Jehová Diospa ¿maijan bendiciondata ashtahuan agradicipangui?

⁶ Apóstol Pablopa ejemplota catingapaca ¿imatata cada uno rurana capanchi? Pundapica Jehová Dios ñucanchita imashina bendiciashcatami yarina canchi (Sal. 116:12). Jehová Diosca imashinata quiquinda bendiciashca nijpica ¿imatata nipanguiman? Jehová Diospa ñaupajpi ali ricurina bendiciondami charini ¿nipanguimanllu? Jesús paipa causaita cujpi juchacunamanda salvai tucuna bendiciondami charini ¿nipanguimanllu? Llaquicunapi cajpi huauquicuna ayudangapaj shamushcami shuj bendición carca ¿nipanguimanllu? Shinallata ñuca huarmi, ñuca cusa, ñuca huahuacunami shuj jatun bendición cashca ¿nipanguimanllu? Jehová Dios imashina bendiciashcata aliguta yarishpaca tucui shunguhuanmi Jehová Diosta agradicingapaj munashun. Shinami Jehová Diostaca cada punlla agradicingapaj munashun (Salmo 92:1, 2, liingui).

7. a) ¿Imamandata Jehová Diostaca pagui nishpa mañana capanchi? b) ¿Imamandata pagui nishpa mañanaca ñucanchipallata ali can?

⁷ Jehová Dios imashina bendiciashcata yarishpaca  paita pagui ningapami munanchi (Sal. 95:2; 100:4, 5). Ashtaca gentecunaca imatapash munashpallami Jehová Diostaca mañan. Shinapash Jehová Diosca imagumandapash pagui nishpa mañajpimi ashtacata cushijun. Bibliapica Jehová Diosta ali sirvij Anamanda, Ezequiasmandami parlan. Paicunaca tucui shunguhuan agradicishpami Jehová Diosta mañan carca (1 Sam. 2:1-10; Is. 38:9-20). Ñucanchicunapash paicunapa ejemplota catishpami Jehová Diostaca tucuimanda agradicina canchi (1 Tes. 5:17, 18). Shina mañashpami Jehovata ashtahuan juyashun, paiman ashtahuan quimirishun, animarishunbash (Sant. 4:8).

8. ¿Imamandata Jehová Diosta agradicinataca cunganchiman?

⁸ ¿Imamandata Jehová Diosta agradicinataca cunganchiman? Pundapica Adán y Evapa huahuacuna caimandami agradicinata cunganchilla. Adán y Evata yaripashun. Jehová Diosca shuj juyailla paraíso Alpagupi causachunmi paicunataca churarca. Paicunamanga tucui imata minishtishcatami curca. Ashtahuangarin unai unaicamanmi causaita ushana carca (Gén. 1:28). Shinapash paicunaca Jehová Diosta agradicinata na yarishpami paicunaman carashcatapash na contendashpa jatun llaquipi urmarca (Gén. 3:6, 7, 17-19). Cunan punllacunapipash pagui ninata na yachaj gentecunapurapimi causanchi. Chaimandami paicunapa chaquita ama catingapaj cuidarina canchi. Na cuidadota charishpaca Jehová Diospa alipacha rijsi canata, mundo enteropi ashtaca huauquipanicunata charina shuj jatun bendición cashcataca na yarinchimanllu. Ashtahuangarin cai mundopirami chapurinajunchiman (1 Juan 2:15-17). Chai trampapi ama urmangapaca Jehová Dios ñucanchita imashina bendiciashcatami yarina canchi. Paipa organizacionbi canatapash tucui shunguhuanmi agradicina canchi (Salmo 27:4, liingui).

9. ¿Imamandata llaquicuna japijpica Jehová Dios imashina bendiciashcata yarina capanchi?

⁹ Jehová Diosta tucui shunguhuan agradicinata yachashpaca ima llaquicuna shamujpipash llaquicunata aguantai ushashunmi. Huaquinbica ñucanchi huarmi o cusa shujhuan japirijpi, imapash nali ungüi japijpi, ñucanchi familia huañujpi o imapash jatun llaqui japijpichari llaquilla canchi. Chashna llaquicunapi cashpaca Jehová Dios imashina bendiciashcata yarishpami animarishpa ñaupaman cati ushashun.  Shinaca huaquin huauquipanigucuna llaquicunata imashina aguantashcata ricupashun.

10. Jehová Dios imashina bendiciashcata cada punlla yarinaca ¿imashinata Irina panigutaca ayudashca?

¹⁰ Irina shuti paniguca Estados Unidosmanda precursora regularmi can. * Paipa cusaca anciano cashpapash shuj huarmihuan japirishpami paitapash paipa quimsandi huahuacunatapash jichushpa rirca. Shina llaquipi cashpaca ¿imashinata Irina paniguca Jehová Diosta sirvishpa cati usharca? Irinaca ninmi: “Jehová Dios ñucata siempre llaquishpa cuidariajushcamandaca tucui shunguhuanmi agradicini. Jehová Dios imashina bendiciashcata cada punlla yarishpami pai ñucata alipacha rijsishpa, Taita cuenda ñucata cuidajushcata cuenta japini. Paica nunca na ñucataca jichuhuangachu” ninmi. Jatun llaquicuna japijpipash Irinaca cushillami can. Cushilla caimandami paica animarishpa shujcunatapash animan.

11. Ungushca cashpapash ñaupaman catichunga ¿imata Kyung-sook panigutaca ayudashca?

¹¹ Kyung-sook shuti paniguca Asia llactapimi causan. Paipash paipa cusapash 20 huatacuna yalitami precursorcuna can. Ali purijushcapimi doctorca panigumanga villarca cáncer ungüitami charingui, quimsa o sujta quillacunatallami causangui nishpa. Paicunaca shuj shuj llaquicunata charishpapash siempremi sano sanocuna carca. Chaimandami chai paniguca nirca: “Huañugringuimi nijpica na crircanichu. Chai punllaca tucuita chingachishcashna sintirishpami ninanda manllarircani” nishpa. Shinapash ¿imashinata chai paniguca ñaupaman cati usharca? Paica ninmi: “Cada tutami nara puñushpallata terrazaman rishpa chai punlla ima picha cosascunapi Jehová Dios bendiciashcata agradicishpa uyarijta oracionda rurani. Shinami alillata sintirishpa paita juyashcatapash nini” ninmi. Shina mañanaca ¿imashinata chai panigutaca ayudashca? Chai paniguca ninmi: “Cunanmi ashtahuan cuenta japishcani, llaquicunapi cajpica Jehová Diosca ayudanbachami cashca. Shuj shuj llaquicunata charishpapash ashtaca bendiciongunatami chasquinchi” ninmi.

12. Jason shuti huauquica ¿imashinata huarmi huañujpipash ñaupaman cati ushashca?

¹² Jason shuti huauquica África sucursalpimi sirvijun. Paica 30 huatacuna yalitami tiempo completopi sirvijun. Paica ninmi: “Ñuca huarmiguca ñami 7 huatacunata chingariparca. Cáncer ungüihuan ñuca huarmigu imashina sufrijushcata yarishpaca ninandami llaquirijurcani” nishpa. Shinapash chai huauquica ¿imashinata chai llaquitaca aguantai usharca? Paica ninmi: “Shuj punllaca ñuca huarmiguhuan ninanda cushijushcata yarishpami Jehová Diosta pagui nishpa mañarcani. Shinami jipamanga alillata sintirircani. Chai punllamandami Jehová Diostaca ñuca huarmiguhuan cushilla punllacunata yalishcata agradicini. Ñuca huarmigu huañushcamanda llaquirishpapash ñuca huarmiguhuan ali causashcamanda, Jehová Diosta juyaj huarmiguhuan causashcamandami tucui shunguhuan Jehovata agradicini” nin.

13. Sheryl shuti paniguca ¿imashinata paipa casi tucui familia huañujpipash ñaupaman cati ushashca?

¹³ Huata 2013​pica ushashcatapacha huairashpa, tamiashpami Filipinas llacta chaupipi uchilla pueblogucunataca tucuchirca. Chai punllacunapica Sheryl shuti paniguca 13 huatacunatallami charirca. Paipa taitamamacunapash quimsa turipanicunapashmi huañurca. Paica ninmi: “Ñuca huasipash tucurirca, casi tucui ñuca familiapashmi huañurca” nishpa. Paica ¿imashinata chai jatun llaquitaca aguantai ushashca? Paica Jehová Dios imashina bendiciashcata pensarishpami aguantai ushashca. Paica ninmi: “Jehová Diospa organizacionga ushashcatami ñucanchitaca ima  minishtirishcapi ayudarca, animarcapash. Tucuilla ladocunamanda turicuna, ñañacunami ñucamanda mañanajushcanga. Jehová Diostaca ñuca Taita Dios cashcamandami agradicini. Paica siempremi ñucanchi imata minishtijushcata cun” nishpa. Imashinami ricupanchi, llaquicunahuan na ushajushpaca Jehová Dios carashca bendiciongunatami yarina canchi. Jehová Diosta tucui shunguhuan agradicishpaca ima llaquicuna ricurijpipash ñaupaman cati ushashunmi (Efes. 5:20; Filipenses 4:6, 7, liingui).

14. Shamuj punllacunapica ¿imashinata causashun? (Callari dibujota ricupangui.)

¹⁴ Jehová Diosta sirvijcunaca ñaupa punllacunamandami Jehová bendiciajpi ninanda cushijushcanchi. Israelitacunata yaripashunchi. Paicunaca mar Rojopi cashpa faraonmanda, paipa soldadocunamandapash salvarishpami tucui shunguhuan cushijushpa Jehová Diostaca alabashpa pagui nishpa candarca (Éx. 15:1-21). Ñucanchicunapash shamuj punllacunapi tucui llaquicunamanda Jehová Dios salvanata yachashpami cunanmandallata tucui shunguhuan cushijunchi (Sal. 37:9-11; Is. 25:8; 33:24). Pensaripashun. Tucuilla contracunata tucuchishpa ñucanchiman shuj juyailla Alpaguta Jehová Dios carajpica ¿imashinashi sintirinajushun? Tucui shunguhuanmi agradicinajushun (Apoc. 20:1-3; 21:3, 4.)

15. Cai 2015 huatapica ¿imatata rurana capanchi?

¹⁵ Cai 2015 huatapica ashtaca bendiciongunatami Jehová Diosca caranga. Ashtaca bendiciongunata charishpapash tal vez jatun llaquicunatapash charishunmi. Shinapash siempre yaripashunchi, ima llaquicuna ricurijpipash Jehová Diosca nunca na ñucanchitaca jichungachu (Deut. 31:8; Sal. 9:9, 10). Paita tucui shunguhuan cazushpa catichunga Jehová Diosllatami ayudanga. Chaimandami profeta Habacucpa ejemplota catina canchi. Paica nircami: ‘Jigos yuracuna na sisajpipash, uvas yuracuna na granujpipash, olivoscuna na fucujpipash, chagracuna na fucujpipash, llamacuna pambamanda tucurijpipash, huarmi huagracuna corralcunapi illajpipash ñucaca Mandaj Dioshuanmi cushijusha. Ñucata quishpichij Taita Diospimi cushijuita charisha’ nishpa (Hab. 3:17, 18). Shinaca, cai 2015 huatapica Jehová Dios carashca bendiciongunapi pensarishpa, cai huata textopa shimicunatapash yarishpa causapashunchi. Cai huata textopica ninmi: “Jehová Diostami pagui nina canguichi. Paica alimi can” nishpa (Sal. 106:1, NM ).