1, 2. Jesusca ¿imashinata gentecunata juyashcata ricuchirca?

JEHOVÁ DIOSCA paipa punda Churi Jesusta rurashpami alipacha yuyaita charishcata ricuchirca. Jehová Dios jahua cielotapash, cai Alpatapash rurajujpica Jesusmi tucuipi alipacha ayudajurca. Tucuita Jehová Dios rurajujpica Jesusca tucui shunguhuanmi cushijurca. Shinapash gentecunata rurajpimi Jesusca ashtahuan cushijushpa gentecunata juyarca (Prov. 8:22-31).

² Jesusca Jehová Diostapash gentecunatapash ninanda juyaimandami cai Alpaman shamushpa gentecunata salvangapajpash paipa causaita curca (Filip. 2:5-8; Mat. 20:28). Ashtahuangarin, Jehovapa ushaihuan milagrocunata rurashpami gentecunata juyashcata, shamuj punllacunapi ali causai tianatapash ricuchirca.

3. ¿Imatata cai temapica yachajugripanchi?

³ Jesusca Diospa Reino mandashpa Diospa shutita llullacunamanda limpianata yachashpa, tucuilla llaquicunata tucuchinata yachashpami Diospa Reinomanda villachirca (Luc. 4:43). Villachijushpa imalla milagrocunata Jesús rurashcata Bibliapi liishpami, ñucanchita llaquishcata yachashun, shamuj punllacunapi  ali causai tianatapash seguro cashun. Chaimandami cai temapica Jesuspa chuscu milagrocunamanda yachajupashun.

4. Lepra ungüita charij runaguhuan Jesús tuparijpica ¿imata pasarca?

⁴ Jesusca villachishpa purijushpami Galilea nishca llactaman rirca. Chaipimi lepra nishca ungüihuan shuj runagu juyaipa causajushcata ricurca (Mar. 1:39, 40). Lepra ungüihuan nalipacha cajpimi Lucas librota escribij doctorca cashna nirca: “Lepra ungüi jundashcami” carca nishpa (Luc. 5:12). Lepra ungüihuan runaguca Jesús jambi ushanataca alimi yacharca. Shinapash Jesús ciertopacha jambingapaj munashcata yachangapami ‘Jesusta ricushpaca alpaman chayajta cumurishpa Jesuslla, can munashpaca mapa illajta saquihuayari’ nirca. Lepra ungüita charimandaca chai runagupa ñavipash llaquinaitami ismujurianga. Chai punllacunapi fariseocunacarin leprahuan cajta ricushpaca millanayachishpami ricun carca. Shinaca chai runagupa ñavita ricushpaca ¿imashinashi Jesusca sintirirca? ¿Jesuspashchu chai runagutaca millanayachishpa ricurca? Quiquin chaipi cashpaca ¿imatashi ruranguiman carca?

5. ¿Imamandata Jesusca nirca: “Ari, mapa illaj cachunmi munani” nishpa?

⁵ Moisesman cushca Leypica mandanmi carca, lepra ungüihuan cajcunaca “mapami cani, mapami cani” nishpami caparina can nishpa (Lev. 13:43-46). Shinapash chai runaguca na shina nishpa caparircachu. Leypi mandashcata na pactachijpipash Jesusca na culirarcachu. Ashtahuangarin, chai runaguta ninanda llaquishpami chai runagupaman quimirishpa, paita tacarishpa juyaihuan cashna nirca: “Ari, mapa illaj cachunmi munani” nishpa. Shina nishcandimi lepra ungüica ñapash chingarirca (Luc. 5:13). Jesús milagrocunata rurachun, gentecunata ninanda juyashcata ricuchichunmi Jehová Diosca Jesusman ushaita curca (Luc. 5:17).

6. a) Jesusca ¿imashinata milagrocunataca ruran carca? b) ¿Imatata Jesuspa milagrocunamandaca yachajupanchi?

⁶ Jesusca Jehová Diospa ushaihuanmi lepra ungüihuan cajcunatapash jambirca shuj milagrocunatapash rurarca. Bibliapica cashnami nin: ‘Na rimai ushajcunapash rimarcallami. Jangacunapash purircallami, ñausacunapash ricurcallami’ nishpa (Mat. 15:31). Cunan punllacunapi doctorcunaca operashpami gentecunataca jambin. Shinapash Jesusca operanataca na minishtircachu. Ashtahuangarin, chai ratomi Jesusca jambinlla carca, carupi cashpapash jambinllami carca (Juan 4:46-54). Shinaca ¿imatata yachajunchi? Ñucanchi Rey Jesucristo tucuilla ungüicunata chingachingapaj ushaita charishcata, ashtahuangarin tucuilla ungüicunata chingachingapaj munashcatami yachajunchi. Jesús cai Alpapi cashpa ungushcacunata jambishcata yachashpami shamuj punllacunapipash ‘imagutapash na charijcunata llaquinata’ seguro canchi (Sal. 72:13). Tucuilla ungushcacunata Jesús jambingapaj munajujtaca yariami cana canchi.

7, 8. Betzata nishca jatun tanque yacuman nara rishpaca ¿imatata Jesusca rurarca?

⁷ Galilea llactapi lepra ungüihuan runaguta jambishca jipaca Judea llactapi villachingapami  Jesusca rirca. Jesús villachijpi, llaquishpa ayudajpimi ashtaca ashtaca gentecunaca Jesús paicunata juyashcata cuenta japirca. Jesusca pobre gentecunaman, esclavoshna causanajuj gentecunaman, shungu faquirishcashna causanajujcunaman cushichij, ali villaicunata villachingapami munarca (Is. 61:1, 2; Luc. 4:18-21).

⁸ Nisán quilla chayajpica Moisesman cushca Leypi mandashcata pactachishpami Jesusca Pascua fiestata yaringapaj Jerusalén llactaman rirca. Fiesta caimandaca ashtaca ashtaca gentecunami chaiman rirca. Chaipi cashpaca Jehová Diospa huasi jahua ladoman tiajuj Betzata nishca jatun tanque yacumanmi Jesusca rirca. Chaipimi na puri ushajuj suchu runaguta ricurca.

9, 10. a) ¿Imamandata ashtaca gentecunaca Betzata nishca jatun tanque yacuman rin carca? b) Jesusca ¿ima milagrotata rurarca? (Callari dibujota ricupangui.) c) ¿Imatata Jesuspa milagromandaca yachajupanchi?

⁹ Betzata nishca jatun tanque yacumanga ungushca ashtaca ashtaca gentecunami rin carca. Paicunaca crinmi carca, yacucuna cuyurijuj horas yacuman yaicushpaca jambirishunmi nishpa. Chaipica ungushca ungushca gentecunallami carca. Shinapash Jesusca na imapash ungüita charircachu. Paica sanomi carca. Shinaca ¿imamandata Jesusca chaiman rirca? Jesusca ungushcacunata jambingapaj munashpami rirca. Chaimandami 38 huatacunata ungushcalla causajuj runagupaman quimirirca. Chai runaguca Jesús nara nacirishca punllamandallatami ungushca causajurca (Juan 5:5-9, liingui).

¹⁰ Chai runaguta ricushpa jambiringapaj munanguichu nijpica chai runaguca llaquillami ari nirca. Shinapash yacu cuyurijhuan ñucata apachunga na pitapash charinichu nircami. Shina nijpimi Jesusca chai runagutaca cashna nirca: ‘Jatari, can mandashpa sirijushcataca aparishpa rilla’ nishpa. Shina nishcandimi chai runaguca ali tucushpa pai mandashca sirijushcataca apashpa rirca. Chai milagrota yarishpami shamuj punllacunapi Jesús imata ruranata crinchi. Jesusca ashtahuan sufrijuj runaguta mascashpami jambirca. Shinaca ¿imatata yachajunchi? Ñucanchicunapash Jesuspa ejemplota catishpami jatun llaquicunahuan sufrinajuj gentecunata mascashpa ayudana canchi.

11. Marcos 5:25-34​pi nishca shinaca ¿imashinata yachanchi Jesusca ungushca gentecunata llaquishcata?

¹¹ Marcos 5:25-34, liingui. Shuj huarmiguca 12 huatacunatami ungushcalla causajurca. Llaquinaitami causajurca. Paica Jehovapa huasiman rishpa Jehovata ali sirvitapash na usharcachu. Paica ali tucungapaj munashpami doctorcunapaman rishpa paipa tucuilla culquita tucuchirca. Shinapash paica na ali tucurcachu. Shuj punllaca Jesús jambijlla cashcata uyashpami Jesús shamujujta yachashpaca ashtaca gentecunapurapi satirishpa Jesuspa ropata tacarirca (Lev. 15:19, 25). Shina tacarijpimi Jesusca ‘ñuca ushaihuanmi maijandachari alichini yashpa, maijanda ñuca churajushcapi tacarircanguichi nishpa tucui gentecunata tapurca’. Shina tapujpimi 12 huatacunata ungushcalla causajuj huarmiguca ‘ninanda manllarishpa chujchurirca.’ Ashtahuangarin ‘Jesuspa ñaupajpi cungurishpami na llullashpa tucuita villarca’. Chaimandami Jesuspash Jehová Dios jambishcata cuenta japishpa chai huarmigutaca llaquishpa nirca: “Ñuca huahualla, ñucata  tucui shunguhuan crishpami quishpirishcangui. Cunanga, ninanda cushijushpa rilla. Astinshna llaquichijuj chai nanaica, cutinga na llaquichingachu” nishpa.

12. a) Cai temapi yachajushca shinaca, Jesusca ¿imashinata can? b) ¿Imashinata Jesuspa ejemplota cati ushapanchi?

¹² Imashinami cai temapi yachajunajunchi, Jesusca ungushcacunataca llaquishpami juyan. Cutin Diabloca, pipash na juyanllu nishpa pensachunmi ñucanchitaca pandachingapaj munan. Diablo shina pensachingapaj munajpipash Jesusca milagrocunata rurashpami gentecunata juyashcata, ayudangapaj munashcata ricuchirca. Ñucanchi Rey, sumo sacerdote Jesusca ñucanchitaca tucui shunguhuanmi llaquin, ñucanchicuna imashina sintirijtapash alimi intindin (Heb. 4:15). Huaquingunaca ñucanchicuna na charishca ungüitami charin. Chaimandami paicuna imashina sintirinajujta ali intinditaca na ushanchi. Shinapash Jesusta yaripashun. Jesusca sanomi carca. Ima ungüitapash na charircachu. Shinapash ungushca gentecunataca alimi intindirca. Shinaca, Jesuspa ali ejemplota catishpa imapash ungüihuan sufrinajuj gentecunata intindingapaj esforzaripashunchi (1 Ped. 3:8).

13. Lazarota causachishcata yachashpaca ¿imatata Jesusmandaca yachajupanchi?

¹³ Gentecuna sufrinajujta ricushpaca shungu ucucamanmi Jesusca llaquirin carca. Shuj ejemplota ricupashun. Shuj punllaca paipa ali amigo Lázaro huañujpimi Lazaropa familiacunapash rijsicunapash ashta huacanajurca. Chaita ricushpami, Jesusca Lazarota causachinata yachashpapash, gentecunatapash na pinganayachishpa huacarca  (Juan 11:33-36, liingui). Huacajujta ricushpami gentecunaca Lazarota Jesús llaquishcata cuenta japirca. Ashtahuangarin, paipa ali amigo Lazarotapash paipa familiatapash tucui shunguhuan juyaimandami Jesusca Jehová Dios cushca ushaihuan Lazarotaca causachirca (Juan 11:43, 44).

14, 15. a) ¿Imashinata yachanchi, Jehová Diosca llaquicunata tucuchingapaj munashcata? b) Griego shimipi ‘pambai tucushcacuna’ nishpaca ¿imamandata parlajun?

¹⁴ Bibliapica ninmi, Taita ‘Dios imashina cajtaca paipa Churimi ricuchijun’ nishpa (Heb. 1:3). Shinaca, Jesuspa milagrocunami Jehová Dios tucuilla ungüicunata, huañuitapash tucuchingapaj munashcata ricuchin. Ñallami Jesuspash Jehová Diospash ashtaca ashtaca gentecunata causachinga. Chai punllacunapimi Jesús nishca shinaca ‘huañushpa pambai tucushcacunaca’ causaringa (Juan 5:28, 29).

¹⁵ Griego shimipi ‘pambai tucushcacuna’ nishpaca yuyarinamandami parlajun. Chai shimica ¿imatata yachachin? Chai shimica Tucui Ushaita Charij, Tucuita Ruraj Jehová Dios huañushca gentecuna imashina cashcata tucuita alipacha yarijtami yachachin (Is. 40:26). Huañushcacuna imashina cajta ali yari ushashpapash, huañushcacunata alipacha yaringapami Jehová Diosca munan. Shinaca ñaupa punllacunapi huañushcacunata causachishcata yachashpami shamuj punllacunapipash ashtaca ashtaca huañushcacuna causarinata yachanchi.

16. Armagedón chayamungacaman tucuipi cazushcacunaca ¿ima bendiciongunatata charinga?

¹⁶ Jehová Diosta tucuipi cazushpaca, Armagedón chayamujpica na huañushunllu. Shinami ñucanchicunapash shuj jatun milagro ñucanchipi pactarijta ricushun. Armagedón jipaca tucuilla ungüicunami chingaringa (Is. 33:24; 35:5, 6; Apoc. 21:4). Chai punllacunapica lentescunata, taunacunata, silla de ruedascunataca ladomanmi saquishun. Armagedón jipa imapash ungüita ñana charishpaca sano, shinllimi cashun. Shinami, cai Alpataca shuj juyailla paraisoguta rurai ushashun (Sal. 115:16).

17, 18. a) ¿Imamandata Jesusca milagrocunata rurarca? b) ¿Imamandata Taita Dios carasha nishca juyailla paraíso Alpagupi causangapaj esforzarina capanchi?

¹⁷ Cai Alpapi causana esperanzata charijcunaca Jesuspa milagrocunamanda yachajushpami paicunapa ungüicuna ñalla tucurinataca tucui shunguhuan crin (Apoc. 7:9). Milagrocunata rurashpami Jesusca gentecunata llaquishpa juyashcata ricuchirca (Juan 10:11; 15:12, 13). Gentecunata Jesús llaquishcata ricuchijpimi Jehová Diospash tucuilla paipa sirvijcunata llaquishpa juyashcata yarinchi (Juan 5:19).

¹⁸ Cai mundopica ashtaca huañuicuna, llaquicunami tian (Rom. 8:22). Chaimandami juyailla paraíso Alpagupi, ima ungüipash illaj causanata minishtinchi. Malaquías 4:2​pica yachachinmi, ima ungüitapash ñana charishpami gentecunaca ‘cushijunga’ nishpa. Shinaca Jehová Diospa nishcacuna pactarinata crishpa, agradicishpaca chai sumaj punllacunapi causangapami esforzarina capanchi. Jesuspa milagrocunata yarishpami huaranga huatacunata Jesús mandashpa ashtahuan jatun milagrocunata ruranataca tucui shunguhuan crinchi.