1-3. ¿Imamandata Lana paniguca Jehová Dios uyashcataca tucui shunguhuan crin?

LANA shuti precursora paniguca 2012 huatapimi Alemania llactapi puringapaj rirca. Paica Jehová Dios paipa oraciongunata uyashcamandami cushijushcapacha carca. Shinapash ¿imacunatata chai paniguca mañarca? Aeropuertoman trenbi rijushpaca paica mañarcami, villachingapaj shuj gentegutallapash taringapaj ayudahuangui nishpa. Aeropuertoman chayajpica villarcami, pai tigrana avionga cayapami llujshinga nishpa. Paica maipi pacarinatapash, culquitapash ñana charircachu. Chaimandami Jehová Diostaca ayudahuai nishpa mañarca.

² Nara mañashpa tucuchijpillatami paipa punda cumbaca, “Lana” nishpa caparirca. Sudáfrica llactaman rijujpimi Lanapa cumbataca mamapash abuelapash saquingapaj rishcarca. Lana panigu ima pasajujta parlajpimi cumbapa mamaca ñuca huasiman jaculla nirca. Huasipica cumbapa mamapash abuelapash alimi atindirca. Ashtahuangarin, Lana imata crishcata, imamanda villachijtapashmi tapuchirca.

 ³ Cayandi punllapash desayunashca jipami paicunaman Bibliamanda ashtahuan parlashpa catirca. Shinallata shuj ñañagucuna paicunata visitashpa catichunbashmi arreglocunata rurarca. Shinami paniguca cushijushpa, huasimanga tranquilo tigrarca. Jehová Dios paita uyashcataca tucui shunguhuanmi crin (Sal. 65:2).

4. ¿Imatata cai temapica yachajugripanchi?

⁴ Llaquicuna ricurijpica ñapashmi Jehová Diostaca mañanchi. Chaimi Jehová Diospash alicachishpa uyan, ayudanbash (Sal. 34:15; Prov. 15:8). Shinapash padrenuestro oracionbi yachachishca shinaca, shuj minishtirishca cosascunamandapash mañanami canchi. Chaimandami cai temapica padrenuestro oracionba último chuscu yuyaicunamanda yachajugrinchi. Chai yuyaicunami Jehovata tucuipi cazuchun ayudanga (Mateo 6:11-13 *, liingui).

5, 6. ¿Imamandata micunata charishpapash, ñucanchi micunaguta carahuangui nishpa cada punlla mañana capanchi?

⁵ Jesusca yachachircapashmi “ñucanchi micunagutaca, cunan punllapash carahuailla” nishpa mañachun. “Ñuca micunaguta” carahuangui nishpa mañanguichi nishpaca na yachachircachu. Chaita ali intindinaca ¿imamandata minishtirishca can? África llactamanda shuj superintendenteca ninmi: “Ñucanchi huauquipanicuna ayudashcamandami ñuca huarmigupash ñucapash micunaguta siempre charinchi. Imahuanshi arriendotaca pagashun nishpapash na preocuparinajunchichu. Chaimandami Jehová Diostaca tucui shunguhuan agradicini. Cai mundopi culquita tarina shinlli cajpipash ñaupaman catichun ñucanchi huauquicunata ayudapangui nishpami Jehová Diostaca mañani” nishpa.

⁶ Ñucanchicunapa micuna na faltajpipash pobrella huauquipanicunamanda, imapash llaqui apashca huauquipanicunamanda mañashunchi. Mañashpapash na chaipilla saquirinachu canchi. Imagupi ayudai ushashpapash ayudanami canchi. Obra mundial nishca cajagupi churashca contribuciongunata ali ocupanata yachashpami contribuciongunatapash churashpa ayudanalla canchi (1 Juan 3:17).

7. Cayandi punlla ima pasanamanda ama yapata preocuparishpa musparijuchunga ¿imatata Jesusca nirca?

⁷ Padrenuestro oracionmanda parlashca jipaca, ñucanchi minishtishcacunamanda ama yapata preocuparijuchunmi Jesusca nirca, jihuacunatapash juyaillaguta viñachishpa sisachishpaca ‘¿nachu cangunamangarin churajunaguta caramunga? ¿Imatashi micushun? ¿Imatashi ufiashun? ¿Imatashi churajushun? nishpaca na musparinajunachu canguichi’ nishpa. Ña tucuchigrijushpacarin consejarcami, ‘cayandi punllamanda yarishpaca na musparinachu canguichi’ nishpa (Mat. 6:30-34). Jesús yachachishca shinaca, minishtirishca cosasgucunahuanlla cushijunatami yachajuna canchi. Chaimandami, maipi causanaguta carahuangui, mantiniringapaj trabajota charingapaj ayudahuangui, ungushca cashpa ali decisiongunata rurangapaj ali yuyaita carahuangui nishpa mañanalla canchi. Chaicunamanda mañana ali cajpipash shuj ashtahuan importante cosascunamandapash mañanami canchi.

8. ‘Ñucanchi micunaguta cunan punllapash carahuangui’ nishca shimicunata uyashpaca ¿imatata yaripanchi? (Callari dibujota ricupangui.)

⁸ ‘Ñucanchi micunaguta cunan punllapash carahuangui’ nishca shimicunata uyashpaca, micunaguta minishtinshna Jehovamanda yachajuna cashcatami yarinchi. Jesusca nircami: “Gentecunaca, na tandahuanlla causangachu. Ashtahuangarin Taita Dios rimashca tucuilla shimicunahuanmi causanga” nishpa (Mat. 4:4). Shinaca, Jehová Diostaca ashtahuan yachachishpa catihuangui nishpami mañana canchi.

9. ¿Imamandata tucui gentecunaca Jehová Diosman dibijuj cuenda capanchi?

⁹ Jesusca yachachircapashmi ‘ñucanchi juchata rurashcataca cungapailla’ nishpa mañanguichi nishpa (Mat. 6:12; Luc. 11:4). Juchata rurashpaca Jehová Dioshuan dibi quedajuj cuendami canchi. Chaita aliguta intindichingapami 1952 huatapi llujshishca La Atalaya revistapica yachachirca, gentecunaca Jehová Diosta juyana, cazunami can nishpa. Juchata rurashpaca Jehová Diospa Leypi mandashcata na cazushcamandami Jehovapa ñaupajpica dibijuj cuenda ricurinchi. Ñucanchicuna juchata rurashcamandaca Jehová Diosca ñucanchimanda caruyanmanllami carca nircami. Ashtahuangarin nircami: “Taita Diosta na juyajcunami juchata ruran” nishpa (1 Juan 5:3).

10. a) Jehová Diosca ¿imamandata ñucanchitaca perdonan? b) Jehová Dios ñucanchita ayudashcata yarishpaca ¿imashinata sintiripanchi?

¹⁰ Ñucanchicunaca cada punllami Jehová Diostaca perdonahuai nishpa mañana canchi. Jehová Diosca Jesús casi 2 mil huatacuna huashaman paipa causaita cushcamandallami ñucanchi juchacunataca perdonan. Shina ayudashcamandami Jehová Diostaca tucui shunguhuan agradicina canchi. Gentecunapuramandaca pipash paipa causaita cushpa ñucanchita juchamanda, huañuimanda salvaitaca na ushanmanllu carca (Salmo 49:7-9; 1 Pedro 1:18, 19, liingui). ‘Ñucanchi juchacunata cungapangui’ nishpaca shuj huauquipanicunapash perdonachun minishtinajushcatami ninajunchi. Jehová Diosca paicunapipash pensarichun, paicunapash paipa ñaupajpi ali ricurichun munashpa mañachunmi munan. Ñucanchita llaquichijpi perdonashpami paicunata juyashcatapash, Jehová Dios ñucanchita perdonachun minishtishcatapash ricuchinchi (Col. 3:13, NM).

11. ¿Imamandata shujcunataca perdonana capanchi?

¹¹ Juchayucuna caimandaca shuj huauquipanicunata perdonanaca shinllimi can (Lev. 19:18). Ima problemata charishcata shujman shujman parlajpica huaquingunaca ñucanchi ladomi tucunga. Cutin shujcunaca chaishujpa ladomi tucunga. Shinami tucuilla huauquipanicuna tranquilo, tandanajushca cachunga na saquinajunchiman. Na uchalla ali tucushpaca Jesús paipa causaita cushcatami na sirvichinajunchi, na agradicinajunchi (Mat. 18:35). Shujcunata perdonajpillami  Jehová Diospash ñucanchita perdonanga (Mateo 6:14, 15, liingui). Ashtahuangarin, Jehová Dios perdonachun munashpaca, jatun juchacunapica nunca na urmanachu canchi (1 Juan 3:4, 6).

12, 13. a) Jesús bautizarishca jipaca ¿imata pasarca? b) Maijanbash tentacionbi urmashpaca ¿imamandata na shujcunatara culpana capanchi? c) Huañungacaman cazushpaca ¿imatata Jesusca ricuchirca?

¹² Padrenuestro oracionbica Jesusca nircapashmi: “Juchata rurana munaicunamandapash jarcahuangui” nishpa. Chai shimicunaca Jesús bautizarishpa shuj chaquishca pambaman rijpi Diablo tentangapaj munajushcatami yarinchi (Mat. 4:1; 6:13). Shinapash ¿imamandata Jehová Diosca Jesusta Diablo tentangapaj munachun saquirca? Yaripashun. Adán y Eva jardín de Edenbi cashpaca Jehová Diostaca na cazurcachu. Shinaca ¿imapipash pandarichunllu Jehová Diosca gentecunata rurarca? ¿Jucha illaj gentecunaca tentacionguna ricurijpipash Jehová Diosta tucuipi cazuita ushanllu? ¿Diablo nishca shinachu gentecunaca paicunallata mandashpa ashtahuan ali causaita ushana carca? (Gén. 3:4, 5.) Chai tapuicuna cierto cashcata o na cierto cashcata ricuchingapami Jehová Diosca Jesusta cai Alpaman cachamurca. Shinapash cai tapuicunataca shamuj punllacunapimi alipacha yacharinga. Chai punllacunapimi jahua cielopi causajcunapash, cai Alpapi causajcunapash Jehová Dioslla ali mandai ushashcata ricunga.

¹³ Jehová Diosca jucha illaj, santomi can. Paica na pimanbash tentaciongunata churanllu. Diablomi gentecunamanga tentaciongunata churan (Mat. 4:3). Diablo tentajujpipash ñucanchicunami ricuna canchi Diablopa tentacionbi urmanata na urmanatapash (Santiago 1:13-15, liingui). Jesusca Diablo tentangapaj munajujpipash Diospa Shimipi imata nijushcata yarichishpami Diablomanga Jehová Dioslla mandana cashcata ricuchirca. Chaimandami Diabloca shuj tentaciongunata churangapaj ‘asha punllacunata’ shuyarca (Luc. 4:13). Cutin cutin tentangapaj munajpipash Jesusca siempremi Jehovata cazurca. Shinami ricuchirca, jatun llaquicunapi cashpapash jucha illajcunaca Jehovata tucuipi cazui ushashcata. Diabloca na shaijunllu. Ñucanchitapashmi Jehovata na cazuchunga tentangapaj munan.

14. Tentaciongunapi na urmangapaj munashpaca ¿imatata rurana capanchi?

¹⁴ Adán y Evaman nishca shimicuna llulla cashcataca cunanbipashmi ricuchinara can. Chaimandami Jehová Diosca gentecunata Diablo tentashpa catichun saquishca. Shinapash Jehová Diosca gentecuna tentaciongunata mishai ushanataca alimi yachan. Jehová Diosca tentaciongunapi ama urmachunbash ayudanmi. Ayudashpapash paita cazuchun obligangapaca na munanllu. Paita cazunata na cazunataca cada uno decidichunmi munan. Shinaca tentaciongunapi na urmangapaj munashpaca Jehová Diosman ashtahuan quimirishpami mañariana canchi. Shinapash ¿imashinata Jehová Diosca ñucanchi mañashcacunata uyajushcata ricuchin?

15, 16. a) Cunan punllacunapica ¿ima tentaciongunamandata cuidarina capanchi? b) Tentacionbi urmashpaca ¿pipa culpata canman?

¹⁵ Jehová Diosca paipa espíritu santota cushpami ñucanchitaca tentaciongunata mishachun ayudan. Ashtahuangarin Bibliata, congregaciondami cushca. Bibliapi, congregacionbimi ñucanchitaca na minishtirishca cosascunata rurashpa ama shaijuchun, ama tiempota yalichun, ama culquita gashtachun consejan. Espen, Janne shuti cusahuarmicunapa ejemplota ricupashun. Paicunaca Europa jatun llactapa shuj charij pushtupimi causan. Paicunaca ashtaca huatacunatami ayudata minishtijuj congregacionbi precursor  regularcuna carca. Shinapash jipamanga ishcai jari huahuagucunata charishpami precursorcuna caitaca ñana usharca. Cusaca cutin cutinmi Jehová Diostaca mañan carcani nin. Paica Jehovapa ruraicunapi ñana pundashna participai ushashpa imapash tentaciongunapi ama urmangapaj, Jehovamanda ashagutallapash ama caruyangapaj, cushijuihuan villachishpa catingapami mañan carca.

¹⁶ Cunanbica lluchullacuna imapash millanai cosascunata ruranajujta o pornografía nishcata ricunapash shuj jatun tentacionmi can. Chai tentacionbi urmashpaca na Diablotachu culpajuna canchi. Yaripai, Diabloca ñucanchicuna nalita rurachunga na obligaita ushanllu. Huaquingunaca nalicunapi pensarijuimandami pornografiata ricuna tentacionbica urmashca. Shinapash ashtaca huauquipanicunaca pornografiata ricuna tentacionbica na urmashcachu. Ñucanchipash na urmanachu canchi (1 Cor. 10:12, 13).

17. a) “Nalimandapash huacaichihuangui” nishpa mañashpaca ¿imatata mañanajupanchi? b) ¿Imatata Jehová Diosca ñalla ruranga?

¹⁷ “Nalimandapash huacaichihuangui” nishpa mañashpaca Diablomanda cuidahuangui nishpami mañanajunchi. Jehová Dios cuidachun munashpaca ‘cai pachapajtalla rurajcunashnaca na causanachu canchi. Shinallata, cai pachatapash, cai pachapi ima tiajtapash na juyanachu canchi (Juan 15:19; 1 Juan 2:15-17). Ñallami Jehová Diosca Diablota vichashcatashna saquishpa Diablopa munaita rurajcunatapash tucuchinga. Chai punlla chayamungapaj ashalla punllacuna faltajujta ali yachashpami Diabloca ushashcata culirashpa ñucanchitaca ima shinapash Jehovata sirvinata saquichingapaj munan. Chaimandami Jehová Diostaca Diablomanda cuidahuai nishpa mañana canchi (Apoc. 12:12, 17).

18. Para siempre causangapaj munashpaca ¿imatata rurana capanchi?

¹⁸ Para siempre causangapaj munashpaca Diospa Reino ucha shamuchun nishpa, paipa shuti santificado cachun nishpa, paipa munai cai Alpapipash pactarichun nishpami mañana capanchi. Ñucanchi causaipa minishtirishcacunatapash, paipaman quimiringapaj ayudacunatapash carahuangui nishpapash mañanallami capanchi. Ashtahuangarin, padrenuestro oracionbi mañashcata pactachishpami causana capanchi.