Bibliapica cremación * nishcata na ruranataca na imatapash ninllu.

Bibliapa huaquin textocunapica ricuchinmi, huañushca gentecunapa cuerpota o tullucunata rupachinmi carca nishpa (Jos. 7:25; 2 Crón. 34:4, 5). Huaquinbica nali gentecuna huañujpimi rupachin carca. Cutin huaquinbica na chaimandachu rupachin carca.

Huaquin ejemplocunata ricupashun. Shuj punllaca rey Saulpash paipa quimsa churicunapash filisteocunahuan macanajushpami huañurca. Saulpa shuj churica Davidpa ali amigo Jonatanmi carca. Jabés-galaad llactapi israelitacuna paicuna huañushcata yachashpaca paicunapa cuerpocunata apashpami cuerpocunataca rupachishpa tullucunataca pambarca. Israelitacuna chaita rurashcata yachashpaca, Davidca alitami rurashcanguichi nircami (1 Sam. 31:2, 8-13; 2 Sam. 2:4-6).

Bibliapica ninmi, Taita Diosmi huañushcacunata causachinga nishpa. Huañushcata rupachishca cajpi na rupachishca cajpipash, Jehová Diosca paicunata causachita ushanga. Punda tiempocunapi quimsa judío huambragucunata yaripashun. Paicunataca rupachun nishpami rey Nabucodonosorca rupajuj jornoman shitachun cacharca. Jehová Dios causachinata yachashpami paicunaca ninapi rupanataca na manllarca (Dan. 3:16-18). Adolf Hitlerpa punllacunapi rupachi tucushca Jesusta ali catijcunapash causachi tucungami. Shinallata, imapash tugyajpi huañushcacunapa cuerpocuna tucuritapacha tucurishca cajpipash paicunaca causaringami (Apoc. 20:13).

Jehová Diosca huañushcacunata causachingapaca, huañushcacunapa tullucunata, uchufacunata tandachinataca na minishtinllu. Ungidocunapa cuerpo ima pasajta yarishun. Paicuna causarishpaca ‘na ismuna cuerpohuan’ espíritu cuerpohuanmi causaringa. Paipa causai imashina cashcata, imata pensajushtaca cabalmi yaringa. Aichayu tulluyu cuerpohuanga na cielomanga ringachu (1 Ped. 3:18; 1 Cor. 15:42-53; 1 Juan 3:2).

Huañushcacunapa cuerpota rupachijpi na rupachijpipash huañushcacunaca causaringami. Jehová Dios paipa nishcacunata pactachingapaj munaita, ushaita charijta crishpaca causaringami (Hech. 24:15). Ñaupa punllacunapi imashina causachishcata o shamuj punllacunapi imashina causachinata nali intindishpapash, huañushcacunata Jesusta causachishcashna Jehová Dios causachinataca seguromi canchi (Hech. 17:31; Luc. 24:2, 3).

Huañushcacunapa cuerpohuan imata rurana cashpapash Jesusta catijcunaca llactapi ima costumbrecuna tiashcata, gentecuna imashina sintirishcata, ima leycuna tiashcatami ricuna canchi (2 Cor. 6:3, 4). Shinaca, cremación nishcata ruranata na ruranataca cada unomi ricuna canchi.