Janetca ninmi: “Ñuca taita huañushca jipallami ñuca cusaca nihuarca, shuj huarmitami charini nishpa. Shuj punllacarin upallami paipa ropata tandachishpa ñucataca ishcai huahuacunahuan jichushpa rihuarca” nishpa. Janetca shuj trabajota tarircami. Shinapash tucuilla gastocunataca na pagai ushajurcachu. Chai jipapash shuj problemacunatami charirca. Janetca ninmi: “Cusa illaj, ñucallaca imatata rurashayari yashpami ninanda preocuparin carca. Shuj taitamamacuna cuenda na ñuca huahuacunaman cuita ushashpami llaquirin carcani. Ñuca huahuacunata, ñucataca ima yashpashi gentecunaca ricun, cusahuan ali causangapaca na empeñarircachu yashpachari ricunajuhuan yashpami cunangaman preocuparini” nishpa.

Janetca oracionda rurashpami Taita Diosman quimirirca, na yapata pinarircapash. Paica ninmi: “Tutacunami ashtahuan ñucalla sintirini. Ashtaca nali pensamientocunami umaman shamun. Taita Diosta mañashpa, Bibliata liishpami puñui ushashcani. Ñucaca Filipenses 4:6, 7​pi shimicunatami alicachini. Chaipica ninmi: ‘Ima illajpipash na chaitalla yariashpa llaquilla causanachu canguichi. Ashtahuangarin Taita Diosmanmi imatapash villashpa ninanda mañana canguichi. Tucui imamandapash pashi nishpa mañaichilla. Casilla ali causaitaca Taita Diosmi caramunga. Chashna aliguta causanataca pipash na yachajui ushanalla cajpimi cangunapa shungutapash, yuyaicunatapash huacaichijunga’ nishpa. Tutacunaca Taita Diostami ninanda mañariajushcani, Jehová Diosmi tranquilo sintirichun ayudahuashca” nin.

Ama yapata pinarishpa preocuparijungapaca Jesuspa cai shimicunami ayudaita ushan: “Canguna nara mañajpillatami, cangunapaj Taitaca canguna imaguta minishtijtapash ña yachan” (Mateo 6:8). Ñucanchi imata minishtijujta ali yachashpapash  Taita Diosca paita mañachunmi munan. Mañashpa Taita Diosman quimirijpillami paipash ñucanchiman quimiringa (Santiago 4:8).

Jehová Diosman tucuita parlashpami ali sintirinchi. Jehová Diosca mañashcacunata uyaj Taita Dios cashpami paipi confiajcunataca ali cuidan (Salmo 65:2). Chaimandami Jesusca paipa catijcunataca ‘na shaijushpa mañanguichi’ nirca (Lucas 18:1). Taita Dios uyanataca tucui shunguhuan crishpa ali ñanda ricuchihuai, ayudahuai nishpa mañashunchi. Pai ayudangapaj munajujta, ayudanataca seguro cashunchi. Na shaijushpa mañashpami paipi confiashcata ricuchinchi (1 Tesalonicenses 5:17).

Taita Diospi feta charingapaca Taita Diostami ali rijsina canchi (Juan 17:3). Bibliata yachajushpami Taita Dios imashina cajta, imata pensajta, gentecunata cada unota juyajta yachajunchi. Shinapash Taita Diostaca na jahua jahuallachu rijsina canchi. Imashinami pitapash ali rijsingapaca tiempo minishtirin, shinallatami Taita Diospi ashtahuan confiangapaca Taita Diosta ashtahuan ali rijsishpa, paita cazushpa, pai imashina ayudajta cuenta japishpa catina canchi (2 Corintios 10:15; Juan 8:29). Ashtahuan shinlli feta charinami Janettaca ama yapata pinarichun ayudan.

Janetca ninmi: “Llaquipi cajpi Jehová Dios ayudajujta sintishpami ashtahuan shinlli feta charishcani. Shinlli llaquicuna shamujpica na ushashunllu yarcanchimi. Shinapash cutin cutinmi Jehová Diosta mañanajushcanchi. Jehová Diosca siempremi ayudajushca. Jehová Dios imashina ayudajuhuashcata yarishpami paitaca pagui nishpa oracionda rurani. Paica siempremi minishtijuj horaspipacha ayudahuashca. Shinallata Taita Diosta ali sirvij ashtaca ali amigocunatami charini. Paicunapash siempremi ayudahuashca, huahuacunamanbash ali ejemplotami ricuchin” nishpa. *

Janetca ninmi: “Ñuca cusa shuj huarmimanda ñucata jichushpa rijpimi Malaquías 2:16​pi shimicunataca ali intindi ushashcani. Chai textopica Jehová Diosca ninmi, cusahuarmicuna divorciarichunga nimamanda na munanichu nishpa. Ñuca cusa jichushpa rishcamanda ashtaca huatacuna yalishca cajpipash huaquinbica shungu ucucamanmi ñucalla sintirini. Shina sintirijushpaca pitapash imagupipash ayudashpami ñucapa llaquitaca cungai ushani” nishpa. Janetca Bibliapi nishca shinami, ama solalla sintiringapaj cuidarin (Proverbios 18:1, NM). *

Janetca ninbashmi: ‘Taitamama illajcunata, sapalla mamagucunata’ Taita Dios cuidajujta yachashpami animarini. Paica nunca na ñucataca jichuhuangachu” nishpa (Salmo 68:5). Janetca Taita Dios llaquicunata na cachamujtaca alimi yachan. Ashtahuangarin llaquicunahuan ama yapata pinarinajuchunmi Taita Diosca ali yuyaita, ‘ninan ushaita’ caran (Santiago 1:5, 13; 2 Corintios 4:7).

Cutin, ñucanchi causaimanda ama yapata pinarijuchunga ¿imatata rurana capanchi?