1. a) Apóstol Juanga ¿imata rurachunda ñucanchicunata animarca? b) Jehová Dios ñucanchita juyashcataca ¿imamandata yaipi charina capanchi?

APÓSTOL JUANGA nircami: ‘Ricuichi, Taita Diosca ñucanchita ninandapachami juyan’ nishpa (1 Juan 3:1). Apóstol Juanga, Jehová Dios ñucanchijta ninanda juyashcata, ñucanchicunamanda preocuparishcata yarichunmi shina nirca. Chai shimicunata yaipi charishpaca, ñucanchicunapash Jehová Diosman ashtahuan quimirishpami paita ashtahuan juyashun.

2. ¿Imamandata huaquin gentecunaca Taita Diosca na juyanllu nin?

² Huaquin gentecunaca, Taita Dios ñucanchicunata juyajtaca na crinllu. Paicunaca yanmi, Taita Diosca imacunatapash mandangapalla, imapipash pandarijpi castigangapallami shuyajun nishpa. Paicunaca uchilamandapacha Taita Diosmanda llullacunata yachajushpami, Taita Diostaca shuj millai Diosta shina ricun. Paita juyaitaca na ushanchichu nin. Shujcunaca ninmi, alita o nalita rurajpipash Taita Diosca tucuicunatallatami juyan nishpa. Cutin ñucanchicunaca Jehová Dios juyaj Dios cajta, ñucanchicunata salvangapaj paipa shujlla Churita cachamushcatapashmi Bibliapi yachajushcanchi (Juan 3:16; 1 Juan 4:8). Shinapash, ñucanchi causaipi imapash pasashcamandami Jehová Diosca na juyanllu nishpa yai callarinchi.

3. ¿Imamandata Jehová Dios ñucanchicunata juyanmi ninchi?

 ³ ¿Imamandata Jehová Dios ñucanchicunata juyanmi ninchi? Jehovami ñucanchita ruraj, causaita cuj Dios can (Salmo 100:3-5, liingui). Chaimandami Bibliapica Adandaca ‘Taita Diospa churi’ nin (Luc. 3:38). Ashtahuanbash Jesusca paipa catijcunataca nircami, Diosta mañashpaca ñucanchi Taita nishpa mañanguichi nishpa (Mat. 6:9). Jehová Diosca causaita ñucanchiman cushcamandami ñucanchi Taita can. Jehová Diosca shuj ali taita paipa huahuacunata juyan cuendami ñucanchitaca juyan.

4. a) Jehová Diosca ¿imashina Taitata can? b) ¿Imatata cai temapi, chaishuj temapipash yachajupashun?

⁴ Huaquin gentecunaca paicunapa taitacuna nali tratashpa viñachishcamandami, Jehová Dios juyaj, ali taita cuenda cashcataca na intindi ushan. Shinapash, Jehová Diosca gentecunashnaca na canllu (Sal. 27:10). Jehová Diosca ciertopachami juyan, ñucanchimanda preocuparin. Paica ñucanchicunataca nunca na sufrichingachu. Chaimandami paiman quimiringapaj munanchi (Sant. 4:8). Cai temapica, ñucanchicunata ciertopacha Jehová Dios juyashcatami chuscu yuyaicunapi yachajushun. Cutin chaishuj temapica, ñucanchicuna Jehová Diosta juyashcata imashina ricuchi ushashcatami chuscu yuyaicunapi yachajushun.

5. Atenas llactapi gentecunamanga apóstol Pabloca ¿imatata nirca?

⁵ Apóstol Pabloca Atenas llactaman rishpaca, chai llactapi griegocunapa yanga dioscunahuan junda cajtami ricurca. Chai llactamanda gentecunaca, chai dioscunami causaita cun nishpami crin carca. Shinapash apóstol Pabloca chai gentecunataca nircami: Taita Diosmi “cai pachatapash, cai pachapi tucui ima tiachumbash rurashca”. “Paica causaita, samaita, imata munashcatapash tucuicunamanmi caramujun”. “Paimandami causanchi, purinajunchi, imatapash ruranchi” nishpa (Hech. 17:24, 25, 28). Jehová Diosca ñucanchicunata juyaimandami ñucanchicuna cushilla causachun tucui ima minishtishcata rurashca. Imacunatalla rurashcata ricupashun.

6. Jehová Diosca ¿imashina Alpagutata gentecuna causachunga rurashca? (Callari dibujota ricupangui.)

⁶ Cai Alpa imashina rurashca cashcata ricupashun. Bibliapica ninmi, Jehová Diosca ‘cai Alpataca huañuna aichayu runacunamanmi cushca’ nishpa (Sal. 115:15, 16). Cientificocunaca ñucanchi Alpahuan igual planetata taringapaj nishpami ashtaca culquita gashtashca. Ashtaca planetacunata tarishpapash cai Alpapishna gentecuna causai ushana planetataca na tarishcachu. Cai Alpa shina shuj planetaca na tianllu. Cai Alpataca Jehová Diosmi ñucanchicuna cushilla, ali causachun juyaillaguta rurashca (Is. 45:18). Cai Alpa imashina cashcata ricushpami Jehová Dios ñucanchicunata juyashcata intindinchi (Job 38:4, 7; Salmo 8:3-5, liingui).

7. Ñucanchita rurashpaca ¿imatata Jehová Diosca ricuchirca?

⁷ Jehová Diosca gentecuna causachunga shuj juyailla alpagutami rurarca. Gentecunatapash paiman rijchajtami rurarca (Gén. 1:27). Gentecunata shina rurashcamandami Jehová Dios ñucanchita juyajta cuenta japinchi, paita juyashcatapash ricuchi ushanchi. Imashinami shuj uchila huahua paipa taita juyajpi cushijun, shinallatami ñucanchicunapash cushilla sintirinchi. Ashtahuanbash Jesusca nircami: “Diosmanda yachajungapaj, paicunapaj shungupi ninanda munajcunaca, ninandami cushijun” nishpa. Chaimandami Jehová Diosman quimirishpaca cushilla sintirinchi (Mat. 5:3).  Imashinami ricushcanchi, Jehová Diosca ñucanchita juyaimandami ‘ñucanchicuna cushijushpa causachun’ espiritualmente cashpa, imata minishtishca cajpipash tucuita caramujun (1 Tim. 6:17; Sal. 145:16).

8. ¿Imamandata Jehová Dios ñucanchita yachachichun munanchi?

⁸ Taitamamacunaca huahuacunata juyashpami ali ñanda catichun yachachin. Shinapash, ashtaca taitamamacunaca Bibliapi mandashcacunata paicunallata na cazushpami causan. Chaimandami familia ucupi imata ruraita na atinashpa nali causan (Prov. 14:12). Cutin, Jehová Diosca ‘na llullaj Dios’ caimandami paipa huahuacuna ali ñanda catichun imashina ayudanata ali yachan (Sal. 31:5). Chaimandami, Jehová Diosca ñucanchipa maijan ali ñan cashcata, paita imashina sirvinata yachachin. Tucui ñucanchi causaipi ali catichunbashmi yachachin (Salmo 43:3, liingui). ¿Imacunatata Jehová Diosca yachachishca? Yachachishpaca ¿imashinata juyaita ricuchishca? Cai tapuicunata yachajupashun.

9, 10. a) ¿Imatata Jehová Diosca paimanda yachachin? b) ¿Imatata Jehová Diosca ñucanchicunamanda yachachin?

⁹ Jehová Diosca pai pi cashcata, shutita charishcatapashmi yachachishca. Taita Diospa shutica tucui shuticunamanda yalimi Bibliapica ricurin. Shinallata Jehová Dios imashina cashcatami yachajushcanchi. Chaimandami, Jehová Dios imacunatalla rurashcata ricushpaca tucuita Ruraj, Poderta charij Dios cashcata cuenta japinchi (Rom. 1:20). Bibliata liishpami Jehová Dios tucuita yachaj, juyaj Dios cashcata intindinchi. Jehová imashina cashcata ashtahuan yachajushpaca paimanmi ashtahuan quimirinchi (Sant. 4:8).

¹⁰ Shinallata, Jehová Diosca ñucanchicunataca paipa familiata cuendami ricun. Paipa familiahuan igual, cushilla sirvichunmi munan. Ashtahuanbash Bibliapica yachachinmi, ñucanchicunallata ima ali cajta, ima nali cajtaca na nita ushanchichu nishpa. Huaquingunaca paicuna munashcata ruraimandami llaquipi urmashca (Jer. 10:23). Chaimandami, Jehová Dioslla ñucanchicunata mandana derechota charishcata intindina canchi. Shinami ali, tranquilo causaita ushanchi. Jehová Diosca ñucanchicunata juyaimandami cai tucui cosascunata yachachin.

11. Jehová Diosca ñucanchicunata juyaimandaca ¿imatata rurasha nishca?

¹¹ Ali taitamamacunaca shamuj punllacunapi paicunapa huahuacuna imashina causanamandami preocuparin. Huahuacuna ali, cushilla causachunmi munan. Shinapash, shamuj punllacunapi ima pasanataca casi ni pi na yachanllu. Chaimandami, imacunatapash charingapalla yapata trabajashpa causan. Shinapash na cushilla causaita ushanllu (Sal. 90:10). Cutin, Jehovata sirvijcunaca ñucanchi causaipi imata ruranata alimi yachanchi. Jehová Diosca shamuj punllacunapi ali causaita cusha nishca. Shinami Jehová Dios ñucanchicunata ninanda juyashcata ricuchin.

12. Jehová Diosca ¿imashinata Caindapash Baructapash juyashcata ricuchirca?

¹² Caín runa nalita ruragrijujta ricushpaca Jehová Diosca nircami: “¿Imashpata ninanda fiñarishpa, cambaj ñavipash shujpacha tucungui? Alita rurashpaca, ¿nachu jatunyachi tucunguiman?” nishpa. Shinallata advirtircami: “Nalita rurajpimi, juchaca pungupi chapanshna, canda mandangapaj shuyajun. Chai juchataca, canmi mishana cangui” nishpa (Gén. 4:6, 7). Jehová Diosca nara nalita  rurajpillatami Caindaca consejarca. Shinapash Cainga consejajpipash na cazushcamandami llaquipi urmarca (Gén. 4:11-13). Baruc runagutapashmi Jehová Diosca consejarca. Baruc runaguca shuj gentecunashna cangapaj munashpami desanimarishca shaijushca sintirirca. Chaimandami Jehová Diosca Baructaca ama shina pensashpa catichun consejarca. Caín runahuan chimbapurashpa ricujpica, Baruc runaguca Jehová Diospa consejota cazushpami salvarirca (Jer. 45:2-5).

13. Jehová Diosca ¿imamandata paita sirvijcuna llaquicunata charichun saquirca?

¹³ Apóstol Pabloca nircami: ‘Diosca maijandapash juyashpami llaquichin. Shinallata, paipa huahua cachun pai chasquishcacunataca tucuicunatami astin’ nishpa (Heb. 12:6). Jehová Diosca ñucanchicuna minishtijujpipachami consejan. Shinallata, ñucanchicuna ashtahuan ali yachajushcacuna cachunmi consejan, disciplinan. Jehová Diosca José, Moisés, David runacuna llaquicunata charichunmi saquirca. Llaquicunata chimbapuranami paicunaman ashtahuan responsabilidadta cujpi, chai responsabilidadta ashtahuan ali pactachichun ayudarca. Jehová Diosta sirvijcunamanda Bibliapi liishpami, Jehová ñucanchicunata ninanda juyashcata cuenta japinchi (Proverbios 3:11, 12, liingui).

14. ¿Imamandata ninchi, Jehová Diosca juyaimandami disciplinan nishpa?

¹⁴ Jehová Diosca ñucanchicuna pandarijpipash juyashpa catinmi. Shinallata ñucanchicuna imapi pandarishpapash paipa consejota, disciplinata chasquishpa arripintirijpica Jehová Diosca perdonanmi (Is. 55:7). Chaimandami rey Davidca nirca: “Tucui ima nalicunata can rurashcataca, paimi cungan.  Paimi, cambaj tucui nanaicunatapash jambin. Paimi, can pambai tucuna utujuman rinamandapash quishpichin. Paimi ashtaca alicunatapash, juyanatapash, coronata churachinshna canman caran” nishpa. Ashtahuanbash Davidca nircami: “Indi llujshimuj ladoca, indi huashajuj ladomandaca carupimi. Chashnallatami ñucanchi na cazushcacunatapash, ñucanchimanda caruyachirca” nishpa (Sal. 103:3, 4, 12). Jehová Diosca ñucanchita ninanda juyaimandami consejan o disciplinan (Sal. 30:5).

15. Ñucanchicuna Jehová Diospa ninan valishca cashcamandaca ¿imahuanda chimbapuran?

¹⁵ Taitamamacunapaca huahuacuna ali cachun cuidanami ashtahuan importante can. Shinallatami Jehová Diospash ñucanchicunata cuidangapaj munan. Salmo librota escribijca nircami: “Paimi, paipajlla causajcunapaj almataca cuidajun. Paita na manllajcunapaj maquimandapashmi cacharichin” nishpa (Sal. 97:10). Pensaripai, ñucanchi ñavicunaca minishtirishcapachami can. Chaimanda ¿nachu ñucanchi ñaviman imapash yaicungrijujta ricushpaca uchalla vichanchi? Jehovapa ñaupajpica ñavicuna cuendami ninan valishca canchi (Deuteronomio 32:10, liingui).

16, 17. Jehová Diosca ¿imashinata paita sirvijcunataca cuidashca?

¹⁶ Jehová Diosca siempremi angelcunata utilizashpa paita sirvijcunataca cuidashca (Sal. 91:11). Shuj viajeca shuj angelmi shuj tutapilla 185 mil soldadocunata huañuchishpa Jerusalén llactataca salvarca (2 Rey. 19:35, NM). Ashtaca huatacuna jipaca, apóstol Pedro, apóstol Pablo, shuj huauquipanicunatapash angelcunami carcelmanda llujchirca (Hech. 5:18-20; 12:6-11). Cunanbipash Jehová Diosta sirvijcunataca shinallatami angelcuna cuidanajun. Huaquin huatacuna huashamanga África llactapimi manllanai guerracuna tiarca. Chai llactapica shuhuashpa, huañuchishpa, violashpami llaquichirca. Jehová Diosta sirvijcunamandaca ni pipash na huañurcachu. Shinapash ashtacacunami imagupash illaj quedarca. Shina llaquipi cashpapash Jehová Dios cuidashcatami ricurca. Paicunata alillatachu canguichi nishpa tapujpica, cushijushpami Jehová Dios cuidashcamandaca alimi canchi nirca.

¹⁷ Jehovata sirvimandaca Estebanbash, shujcunapash huañushcami. Paita sirvijcuna huañuchun saquishpapash, Jehová Diosca paita sirvijcuna Diablopa trampacunapi ama urmachunmi advirtishpa ayudajun (Efes. 6:10-12). Chaipaca Bibliapi, publicaciongunapi consejocunahuanmi Jehová Diosca Internetta ali utilizanamanda, ama yapata charijyanamanda, cai mundopa pinganai ruraicunamanda cuidarichun advirtijun. Jehová Diosca shuj ali taita cuendami ñucanchicunamanda preocuparishpa cuidan.

18. Jehová Dios juyashcata yachashpaca ¿imashinata sintiripanchi?

¹⁸ Moisesca ashtaca huatacunata Jehová Diosta sirvishcata yarishpami, Jehová Dios paita juyashcata ricurca. Chaimandami nirca: “Tutamandata, can llaquishcahuan ayudahuayari. Tucui ñucanchi causaipimi, ñucanchipash cushijushpa candapashun” nishpa (Sal. 90:14). Jehová Dios ñucanchitapash juyashcata ricushpaca ¿nachu ñucanchipash Moisés cuenda cushilla sintirinchi? Ari. Chaimandami ñucanchicunapash apóstol Juan cuenda ninchi: ‘Ricuichi, Taita Diosca ñucanchita ninandapachami juyan’ nishpa (1 Juan 3:1).