1. a) Mar de Galileata yalijujpi ninan huaira jatarijpica ¿imatata Pedroca rurarca? (Callari dibujota ricupangui.) b) ¿Imamandata Pedroca yacupi pambari callarirca?

SHUJ tutaca, Jesuspa catijcunaca mar de Galileatami canoapi yalinajurca. Shina yalinajujpimi ninan huaira jatarishpa yacuta caiman chaiman manllanaita cuyuchijurca. Chaipimi, Jesusta catijcunaca paicuna na yashcapi yacu jahuata Jesús shamujujta ricurca. Jesusta ricushpami Pedroca nirca, ñucapash yacu jahuata purishpa canbaman richun saquihuai nishpa. Shina nijpimi Jesusca shamuilla nirca. Chaimandami Pedroca canoamanda uriajushpa yacu jahuata puri callarirca. Shinapash, chai jipallami Pedroca yacupi pambari callarirca. ¿Imamamandata pambari callarirca? Ninan huaira jatarimujta ricushpami Pedroca manllarishpa yacupi pambari callarirca. Yacupi pambarijushpami Pedroca, Jesús ayudai nirca. Shina nijpimi, Pedrota maquimanda japishpa Jesusca nirca: “¡Na tucui shunguhuan crij runa! ¿Imashpata na ali crircangui?” nishpa (Mat. 14:24-32).

2. ¿Imatata cai temapica yachajupashun?

² Cai temapica, Pedrohuan ima pasashcata yachajushpami cai  quimsa tapuicunata yachajushun: 1) ¿Imashinata Pedroca Taita Diospi feta charishcata callaripica ricuchirca? 2) ¿Imamandata Pedropa feca ñana shinlli carca? 3) Shinlli feta cutin charingapaca ¿imatata Pedroca rurarca? Cai tapuicunata yachajunami ñucanchicunapash ‘crishpa aligutapacha catichun’, o shinlli feta charichun ayudanga (1 Cor. 16:13).

3. a) ¿Imamandata Pedroca yacu jahuata puri callarirca? b) ¿Imatata ñucanchipash Pedro cuenda rurashcanchi?

³ Shamuilla nishpa Jesús cayajpica, Pedroca canoamanda uriajushpami yacu jahuata puri callarirca. Shinami, paitapash Jesusta cuenda Jehová Dios ayudanapi Pedroca tucui shunguhuan crirca. Ñucanchipash Bibliata yachajushpami, Jesusca ñucanchipash paipa catijcuna tucuchun munashcata intindishpa, Jehovaman mingarishpa bautizarircanchi. Shinami Jehová Diospash, Jesuspash ñucanchita tucui horas ayudanapi tucui shunguhuan crircanchi (Juan 14:1; 1 Pedro 2:21, liingui).

4, 5. ¿Imamandata feta charinaca minishtirishcapacha can?

⁴ Crishpa o feta charishpaca na rurai ushashca cosascunatami rurai ushashun (Mat. 21:21, 22). Yaripashun, Pedroca feta charimandami yacu jahuata puri usharca. Ñucanchipash feta charimandami ñucanchi causaipi cambiashcanchi. Shina cambiashcamandami gentecunaca ñucanchitaca casi na rijsin. Jehovata juyaimanda, pai ayudajpimi cambiai ushashcanchi (Colosenses 3:5-10, liingui). Ashtahuanbash, feta charimandami Jehovaman mingarishpa, paihuan ali amigo caita ushashcanchi. Jehová Dios na ayudajpica nimata na rurai ushanchimanllu (Efes. 2:8).

⁵ Feta charimandami Diablopa shinlli trampacuna, llaquicuna ricurijpipash aguantashpa ñaupan cati ushashcanchi (Efes. 6:16). Ashtahuanbash, imata minishtijpipash Jehová ayudanapi feta charimandami, ñucanchi causaipica paipa munaita pundapi churashpa causanchi (Mat. 6:30-34). Shinallata, feta charishpami cai Alpa shuj Paraíso tucujpi para siempre causaita ushashun (Juan 3:16).

6, 7. a) ¿Imata cunanbica ninan huaira jatarijuj cuenda can? b) ¿Imatata nunca na cungana canchi?

⁶ Apóstol Pedrota cutin yaripashun. ¿Imashpata yacu jahuata purijushpata pambari callarirca? Bibliapica ninmi, Pedroca Jesusta ricunapa randica, yacu manllanaita caiman chaiman cuyurijujtami ricurca nishpa (Mat. 14:30). Chaita ricushpami Pedroca paipa fe ñana shinlli cajpi pambari callarirca. Cunanbi llaquicuna, problemacunaca ninan huaira jatarishpa yacuta caiman chaiman cuyuchijuj cuendami can. Shina llaquicuna ricurijpipash aguantashpa catichunmi Jehová Diosca ayudanga. Shinapash, llaquicunapi yapata pensarijushpaca, Jehová ayudanapi ñana feta charishpami yacupi pambarijuj cuenda cashun.

⁷ Tucuicunami asha asha feta chingachi ushanchi. Bibliapica ninmi, feta na charinaca ‘ñucanchipi quipishna urmachingapaj munajuj jucha’ cuendami can nishpa (Heb. 12:1). Pedropa ejemplota ricushpami, llaquicunapilla yapata preocuparijujpica ñucanchi feca chiriyai callarinatami intindinchi. Ñucanchi fe chiriyajushcataca ¿imashinata yachai ushanchi? Chaipaca huaquin tapuicunata yachajupashun.

8. ¿Imamandata Taita Diospa nishcacunapi ñana feta chari callarinchiman?

⁸ ¿Taita Diospa nishcacunapi feta charinchirachu? Jehová Diosca ñallami cai Alpapi Diablopa nali ruraicunataca tucuchinga. Shinapash, cai mundopa ruraicunapi ocupado cashpaca, Diablopa nali ruraicuna ñalla tucurinataca cungashunmi (Hab. 2:3). Shinallata Jehová Diosca nishcami, Jesús huañushcapi feta charijpica juchacunata perdonashami  nishpa. Shinapash, ñucanchicuna punda imapash nali rurashcacunata cutin cutin yarishpa, Taita Diosca na perdonahuangachu yashpaca ¿imashi tucushun? (Hech. 3:19.) Shina pensajushpaca ñana Jehová Diostaca cushilla sirvishun, paimandapash caruyashunmi.

9. Ñucanchi munaicunatara pundapi churajpica ¿imata pasanga?

⁹ ¿Tucui ushaihuanllu Jehovata sirvinajunchi? Apóstol Pabloca nircami: ‘Tucuri punllacaman shuyashpa Dios tucuita pactachingacamambacha catichunmi munanchi’ nishpa. Shinaca tucui shunguhuanmi Jehovata sirvina canchi. Shinapash, ñucanchi munaicunatara pundapi churajpica ¿imata pasanga? Ali ganashpa trabajaimandalla espiritual cosascunata ladoman saquishpa, Jehová Diosta pundashna ñana ali sirvijpica, ñucanchi feca asha ashami chiriyanga. Jehová Diosta tucui shunguhuan sirvinatapash saquishunmi (Heb. 6:10-12).

10. ¿Imamandata ninchi, perdonashpaca Jehovapi feta charishcatami ricuchinchi nishpa?

¹⁰ ¿Perdonaita ushanchichu? Pipash ñucanchita llaquichishcata o culirachishcata cutin cutin yarishpaca, paitapash shinallatami llaquichisha o ñana paihuanga parlashachu yanchipashchari. Shinapash, shinlli feta charishpaca perdonaita ushashunmi. ¿Imamandata shina ninchi? Bibliapica ninmi, imashinami ñucanchicuna pandarishpaca, Jehová Dioshuan dibi tucushca cuenda canchi, shinallatami pipash ñucanchita llaquichishpaca ñucanchihuan dibi tucushca cuenda can nishpa (Luc. 11:4). Pipash ñucanchita llaquichijpi perdonashpaca, Jehová ñucanchihuan cushijunata, ñucanchita perdonanatami crishun. Shujcunata llaquichinapa randica, Jehovapa maquipi saquinami ali can. Jesusta catijcunaca alimi intindirca, shujcunata perdonangapaca fe minishtirishca cashcata. Chaimandami, cutin cutin llaquichijpipash perdonanami canguichi nishpa Jesús mandajpica,  paicuna nirca: “Ashtahuan ali crinata [o feta] carahuai” nishpa (Luc. 17:1-5).

11. ¿Imamandata huaquinbica consejocunata na uyangapaj munanchiman?

¹¹ ¿Imapash consejota cujpica uyanchichu? Shuj huauqui consejajpi na uyangapaj munashpa, chai huauqui pandarijujtara ricujushpa o chai consejoca nalichu can yashpaca, ñucanchillatami na cambiai ushashun. Jehová Diospa yuyaita catingapaj na munashcatapashmi ricuchishun (Prov. 19:20).

12. Ñaupaman pushaj huauquicunamanda quejarijushpaca ¿imatata ricuchinajunchi?

¹² ¿Congregacionda ñaupaman pushajcunamanda quejarinchichu? Israelitacunaca Canaán alpata chapangapaj rishca, feta na charij 10 runacunapa nali villaicunata crishpami Moisesmanda, Aaronmandapash quejari callarirca. Chaimandami Jehová Diosca Moisestaca nirca: ‘Cai gentecunaca ¿ima punllacamanda ñucataca fiñachingayari? ¿Ima punllacamanda ñucataca na crishpa causangayari?’ nishpa (Núm. 14:2-4, 11). Israelitacunaca Moisesmanda, Aronmanda quejarishpaca, Jehovapi feta na charishcatami ricuchinajurca. Ñucanchicunapash congregacionbi ñaupaman pushachun Jehová Dios churashca huauquicunamanda quejarinajushpaca ¿nachu israelitacuna shina cashcata ricuchinajunchiman?

13. Ñucanchi fe ñana shinlli cashcata cuenta japishpaca ¿imamandata na desanimarina capanchi?

¹³ Cai tapuicunata yachajushpaca, ñucanchi fe ñana shinlli cashcatachari cuenta japishcanchi. Shinapash na denanimarinachu canchi. Apóstol Pedropashmi manllaimanda feta chingachi callarirca. Jesusca paipa catijcunatapash cutin cutinmi shinlli feta charinami canguichi nishpa consejarca (Mat. 16:8). Apóstol Pedro paipa fe ñana shinlli cajpi imata rurashcamandapashmi yachajui ushanchi.

14, 15. a) Yacupi pambari callarishpaca ¿imatata Pedro rurarca? b) Ñucanchicunaca ¿imashinata “Jesusta ricujunshna catishun”?

¹⁴ Yacupi pambari callarishpaca ¿imatata Pedroca rurarca? Pedroca nadanata ali yachaimandaca canoaman tigranallami carca (Juan 21:7). Shinapash paipillata confianapa randica Jesustami ayudahuan nirca. Ñucanchicunapash ñucanchi fe ñana shinlli cajta cuenta japishpaca, Pedropa ejemplotami catina canchi. Shinaca ¿imatata rurana canchi?

¹⁵ Pedroca yacupi pambari callarishpaca uchallami Jesusta ricurca. Ñucanchicunapash “Jesusta ricujunshna catishunchi. Paimi, ñucanchi crichun callarichishpa, aligutapacha crishpa causachun pactachijun” (Heb. 12:2, 3). Jesusmanda liishpa, paipa ejemplota catingapaj esforzarishpami ñucanchicunaca Jesusta ricujunshna cati ushanchi. Shinami ñucanchi feca shinlli tucunga. Jesuspa imashina catinamanda huaquin ejemplocunata ricushun.

16. Ñucanchi fe shinlliyachunga ¿imatata rurana capanchi?

¹⁶ Bibliapimi ashtahuan confiana canchi. Biblia Diospa Shimi cajta, chaipi mandashcacuna ali cajtami Jesusca crirca (Juan 17:17). Jesús shina cangapaj, shinlli feta charingapaca Bibliatami cada punlla liina, estudiana, imata yachajushcapi pensarinaca canchi. Imatapash nali intindishpaca ali intindingacamanmi yachajuna canchi. Por ejemplo, tucuri punlla ñalla chayamunata tucui shunguhuan cringapaca, tucurimui punllacunapi ima pasanamanda parlaj profeciacunatami ali yachajuna canchi. Shinallata ¿shamuj punllacunapi Jehovapa nishcacuna pactarinapi tucui shunguhuanllu crinchi? Chaipaca, Jehová Dios ña pactachishca profeciacunata ali yachajushpami ñucanchi feta shinlliyachina canchi. Ashtahuanbash, Bibliapi  ashtahuan feta charingapaca, shuj huauquipanicuna Bibliata yachajushpa paicunapa causaita imashina cambiashcatami liina canchi (1 Tes. 2:13). *

17. a) Llaquicunata aguantachunga ¿imata Jesustaca ayudarca? b) ¿Imashinata Jesuspa ejemplota cati ushanchi?

¹⁷ Jehová imata ruranata yaria causashunchi. “Cushijushpa causagrinata yachashpami” Jesusca shinlli llaquicunatapash aguantarca (Heb. 12:2). Paica cai mundopi cosascunata charingapaca na munarcachu (Mat. 4:8-10). Jesuspa ejemplota catingapaca Jehová imata ruranatami yariana canchi. Chaipaca, Paraisopi cashcata pensarishpami imatalla rurangapaj munashcata escribina, dibujana ali can. O huañushcacuna causarijpi picunatalla rijsinata, imatalla tapunata anotanapash alimi can. Jehovapa nishcacuna pactarijpica, ñucapashmi chai bendiciongunataca chasquisha yashpami pensarina canchi.

18. ¿Imamandata ñucanchi fe shinlli cachunga mañana minishtirin?

¹⁸ Ashtahuan feta charingapaj mañashunchi. Jesusca paipa catijcunataca, espíritu santota carahuai nishpami mañana canguichi nishpa (Luc. 11:9, 13). Espíritu santomi ñucanchicuna ashtahuan feta charichun ayudanga. Shinallata imapi ayudachun minishtishpapash Jehovata mañanallami canchi. Shujcunahuan risintirishca cashpaca ama risintirishca cangapaj, ñucanchi fe shinlli cachunmi Jehová Diostaca mañanalla canchi.

19. ¿Imashina amigocunatata charina canchi?

¹⁹ Shinlli feta charijcunahuan amigo tucushunchi. Jesusca paipa amigocunataca alimi agllan carca. Jesuspa ali amigocunaca apostolcunami carca. Paicunaca shinlli fetami charirca, Jesús nishcacunatapash cazunmi carca (Juan 15:14, 15, liingui). Ñucanchicunapash shinlli feta charij, Jesusta cazujcunahuanmi amigo tucuna canchi. Ali amigocunaca imatapash nali rurajujpica, uchalla imatapash na pacashpami consejota cushpa ayudarin (Prov. 27:9).

20. ¿Imashinata shujcunapa feta shinlliyachinaca ñucanchicunatapash ayudan?

²⁰ Shujcunatapash paicunapa feta shinlliyachichun ayudashunchi. Jesusca paipa catijcunapa fe shinlli cachunmi imata nishpa, imata rurashpapash ayudan carca (Mar. 11:20-24). Ñucanchicunapash Jesuspa ejemplota catishpa, shujcunapa fe shinlliyachun ayudashunchi. Shina rurajpica ñucanchi fepash shinlliyangami (Prov. 11:25). ¿Imashinata shujcunapa feta shinlliyachi ushanchi? Gentecunahuan Bibliamanda parlashpaca, Taita Dios ciertopacha tiashcata, Biblia Diospa Shimi cashcata, Taita Dios ñucanchita llaquishcatami intindichina canchi. Ñucanchi huauquipanicunatapash shinallatami ayudana canchi. Shuj huauqui paipa fe na shinlli cajpi, ancianocunamanda quejarijta uyashpaca, chai huauquihuan culirashpa paimanda nalicunataca na parlajunachu canchi. Chaipa randica, Jehovapi shinlli feta charichun, huauquipanicunapi confiachunmi ayudana canchi (Jud. 22, 23). Cutin joven cashpaca, escuelapi o colegiopi evolucionmanda yachachijujpica, na manllashpami ñucanchi crishcacunamanda parlana cangui. Huaquingunaca alimi chasquinga.

21. ¿Imata rurachunda Jehová Diosca ñucanchita ayudanga?

²¹ Imashinami ricushcanchi, Pedroca Jehovapa, Jesuspa ayudahuanmi manllaita ladoman saquishpa cutin paipa feta shinlliyachirca. Jipamangarin tucuicunapami shuj ali ejemplo tucurca. Jehová Diosca ñucanchicunatapashmi shinlli feta charichun ayudanga (1 Pedro 5:9, 10, liingui). Shinaca, shinlli feta charingapaj ninanda esforzarina cashpapash jipa punllacunaca ninandami cushijushun.