1, 2. ¿Imashinata Jehová Diosca ñucanchipash juyachun yachachishca?

CASI tucui taitamamacunami nin, huahuacuna yachajuchunga ñucanchicunami ali ejemplota cuna canchi nishpa. Jehová Diospash ejemplota cushpami ñucanchicunataca yachachishca. Chaimandami apóstol Juanga nirca: “Diosra, ñucanchita juyajujpimi, ñucanchipash paitaca juyanchi” nishpa (1 Juan 4:19).

² ¿Imamandata Bibliapica nin, Jehová Diosrami ñucanchita juyashca nishpa? Apóstol Pabloca nircami, Jehová Diosca ñucanchita juyaimandami ‘ñucanchi juchayu cajpipash, Cristo ñucanchimanda huañuchun’ cachamurca nishpa (Rom. 5:8). Shina rurashpami ñucanchita juchamanda, huañuimanda salvarca. Shinami, Jehová Diosca paipa ejemplohuan ñucanchicunapash juyachun, shujcunapi preocuparichun yachachirca. Jehová Dios paipa Churita cachamushcamandami ñucanchipash paiman quimirishpa, paita ninanda juyashcata ricuchi ushanchi (1 Juan 4:10).

3, 4. ¿Imashinata Jehová Diostaca juyana capanchi?

³ Jehová Diosca juyaj Diosmi can. Chaimandami Jesusca cashna nirca: “Cambaj Jatun Taita Diostaca, tucui shunguhuan, tucui  almahuan, tucui yuyaihuan, cambaj tucui ushaihuambash juyangui” nishpa (Mar. 12:30). Imashinami ricunchi, Jehová Diosca paitalla tucui shunguhuan juyachunmi munan. Pitapash paita yali juyachunga na munanllu. Chaimandami tucui almahuan, tucui yuyaihuan, tucui ushaihuan Jehová Diostaca juyana canchi. Chaitaca ñucanchi yuyaicunahuan, ruraicunahuanmi ricuchina canchi (Miqueas 6:8, liingui).

⁴ Imashinami yachajushcanchi, Jehová Diosta tucui shunguhuan juyashcataca ñucanchi charishcacunahuan, tucui ñucanchi causaipimi ricuchina canchi. Chaishuj temapica, Jehová Dios ñucanchicunata ninanda juyashcatami chuscu yuyaicunapi yachajurcanchi. Cutin cai temapica, ñucanchicuna imashina Jehová Diosta juyashcata ricuchi ushashcatami chuscu yuyaicunapi yachajushun.

5. Jehová Dios juyashcamandaca ¿imatata ñucanchica rurana canchi?

⁵ Pipash ñucanchiman imagutapash carajpica ¿imatata ruranchi? Chai carashcaguta cuidashpa, ocupashpami agradicishcata ricuchinchi. Jehová Diospash ñucanchicunamanga ashtaca viajemi imacunatapash carajun. Chaimandami apóstol Santiagoca nirca: “Taita Diosca, jahua pachamandami juyailla aliguta imatapash na pandashpa rurachun caramujun. Paica, jahuapi punchayachijcunata ruraj Taitami” can nishpa (Sant. 1:17). Jehová Diosca nunca na cambianllu. Paica ñucanchicunata juyaimandami, cushilla causachun ñucanchi ima minishtishcata caramujun. Jehová Dios ninanda juyajta ricushpaca ¿nachu ñucanchipash paita juyangapaj munanchi?

6. Jehová Dios bendiciashpa catichunga ¿imatata israelitacunaca rurana carca?

⁶ Israelitacunataca Jehová Diosca ashtaca huatacunatami cuidarca. Chai tucui huatacunapica paicunapa causaipi, espiritualmentepash imatalla minishtishcatami Jehová Diosca cararca (Deut. 4:7, 8). Shinapash, Jehová Dios bendiciashpa catichunga, paipa mandashcacunatami israelitacunaca cazuna carca. Por ejemplo, israelitacunaca ‘alpapi punda fucushca granocunatami’ Jehová Diosman cuna carca (Éx. 23:19). Chai mandashcata cazushpami Jehová Diosta agradicishcata ricuchinajurca (Deuteronomio 8:7-11, liingui).

7. Jehovata juyashcata ricuchingapaca ¿imashinata ñucanchi charishcacunataca utilizana capanchi?

⁷ Cunanbica Jehová Diosca israelitacunapa tiempopi shina imapash sacrificiocunata rurachunga na mañanllu. Shinapash Jehová Diosca ñucanchicuna ‘imalla alicunata carachunmi’ munan (Prov. 3:9). Chaimandami charijcuna cashpa o ashallata charishpapash, usharishcaguhuan congregacionbi o mundo enteropi huauquipanicunata ayudangapaj utilizana canchi. Shina rurashpami Jehová Diosta ninanda juyashcata ricuchinajushun. Jehovata juyashcataca ¿imashinata ashtahuan ricuchi ushanchi? (2 Cor. 8:12.)

8, 9. a) Jehová Diosta juyashcata ricuchingapaca ¿imatata rurana capanchi? b) Mike shuti huauquipash, paipa familiapash ¿imatata rurarca?

⁸ Jesusca paipa catijcunataca nircami, Diospa Reinotara pundapi churashpa, imatata micushun, imatata churajushun nishpaca na pinarijunachu canguichi. Jehová Diosllatami tucui canguna ima minishtishcata cunga nishpa (Mat. 6:31-33). Ñucanchi imata minishtijushpapash, Jehová Diosllata ayudanata crishpami paita juyashcata ricuchinchi  (Sal. 143:8). Chaimandami cada uno cashna tapurina canchi: ¿Ñucapa tiempohuan, fuerzahuan, rurashcacunahuan Jehovata juyashcata ricuchijunichu? Imagutapash minishtijushpaca ¿Jehová Dios ayudanapi crinichu? nishpa.

⁹ Mike shuti huauquica tucui shunguhuan Jehová Diosta juyashpami Jehovapi confian. Chai huauquica jovenmandapachami shuj llactaman rishpa ashtahuan villachingapaj munan carca. Chaimandami cazarashpa, ishcai huahuacunata charishpapash shuj llactapi sirvina munaitaca na cungarca. Chai munaita pactachingapami paipash, paipa familiapash shuj llactapi villachingapaj rinamanda temacunata liin carca. Chai temacunami minishtirishca cosascunahuanlla causachun paicunataca ayudarca. Shinami paicunaca jatun huasita jatushpa ashtahuan uchila huasiman causangapaj rirca. Trabajaitapash ashatallami trabajai callarirca. Shinami Mike huauquica paipa familiahuan shuj llactapi sirvingapaj rita usharca. Ishcai huatacunata cushilla sirvijushpami chai huauquica nirca: “Ñucanchi causaipi pactarishcamandami Mateo 6:33pi shimicuna ciertopacha cashcata ricushcanchi” nishpa.

10. ¿Imamandata Jehovapa rurashcacunata, mandashcacunataca yarina capanchi?

¹⁰ Rey Davidca Jehová Dios rurashcacunata ricushpami cashna nirca: “Jahua pachaca. Taita Dios punchapamba cajtami villajun. Chaipi imalla tiajcunapash, paipaj maquihuan rurashcatami villajun” nishpa. Shinallata Taita Diospa mandashcacunata yarijushpami cashnami nirca: “Mandaj Dios mandashcacunaca, ima pandapash illaj cashpami, almataca mushuj causaiman tigrachin. Imashna causanata Mandaj Dios yachachishca shimicunaca, imatapash pactachij cashpami, yanga runataca, alipacha yachajushcata ruran” nishpa. Rey Davidca Jehová Dios rurashcacunata, mandashcacunata yarishpami Jehová Diosman ashtahuan ali cashpa juyana munaita charirca. Chaimandami nirca: “Mandaj Dioslla Jatun Rumishna ñuca Dioslla, ñucata quishpichijmi cangui. Ñuca shimihuan nishcacunapash, ñuca shungupi yarijushcapash, cambaj ñaupajpica chasqui ushanalla cachun” nishpa. Imashinami ricunchi, rey Davidca Jehovapa amigo cashcatami ricuchirca (Sal. 19:1, 7, 14).

11. Cunan punllacunapi Jehová Dios ñucanchiman yachachishcahunga ¿imatata rurana capanchi? (Callari dibujota ricupangui.)

¹¹ Cunanbica Jehová Dios imata rurashcata, Jehová Dios imata ruragrijujtaca ashtahuan alimi yachanchi. Shinapash, shuj gentecunaca universidadcunapi yachachishcacunatami ashtahuan alicachishpa causan. Chaimandami gentecunaca ñana Taita Diospi crin. Shinapash Bibliapica ninmi, ali yachaita charishpapash ali yuyaitami charina can nishpa. Ali yuyaita charinaca ñucanchi alipallata, shujcunapapash alimi can nishpa (Prov. 4:5-7). Jehová Diosca ‘tucuicuna quishpirichunmi munan. Paimanda na llullashpa villajuj Shimitapash yachachunmi munan’ (1 Tim. 2:4). Chaimandami, tucui gentecunaman Jehová Dios imata ruragrijujta villangapaj ninanda esforzarinchi (Salmo 66:16, 17, liingui).

12. Shannon shuti paniguca ¿imatata nirca?

¹² Jovengunapashmi Jehová Diosta juyashcata, espiritualmente carashcamanda ninanda agradicishcatapash ricuchi ushan. Shannon shuti paniguca ninmi: 11 huatacunata  charishpami, 10 huatacunata charij ñuca ñañandi, ñuca taitamamandi “Devoción piadosa” nishca Quimsa Punlla Jatun Tandanajuiman rircanchi. Chai jatun tandanajuipa shuj discursopaca jovengunalla tiarichunmi shuj pushtuta agllashcarca. Shannon paniguca chai pushtupimi tiarigrirca. Ashata manllajushpapash Lo que los jóvenes preguntan. Respuestas prácticas nishca librota carajpica ninandami cushijurca. Paica ninmi: “Chaipimi Jehová Dios ciertopacha tiajta, ñucata ninanda juyajta cuenta japircani. Jehová ñucata juyaimanda espiritualmente regalocunata carajpica ninandami cushijuni” nishpa.

13, 14. Jehová Dios ñucanchicunata disciplinajpica ¿imatata rurana capanchi?

¹³ Bibliapica ninmi: “Churita juyashpa taita llaquichinshnallatami, Mandaj Diospash pai juyashcacunata llaquichin” nishpa (Prov. 3:12). Jehová Dios ñucanchita disciplinajpica ¿imatata rurana canchi? Jehová disciplinajpica chai ratoca llaquilla, nalimi sintirinchi. Shinapash, Jehovapa disciplinataca chasquinami canchi. Shinami, ima ali cashcata ruranata yachajushpa cushilla sintirishun (Heb. 12:11, NM). Jehová Diosta juyashcata ricuchingapaca, paipa disciplinataca aliguman na culirashpami chasquina canchi. Huaquinbica consejocunata cazunaca shinllimi can. Shinapash Jehová Diosta juyanami consejocunata cazuchun ayudanga.

¹⁴ Profeta Malaquiaspa punllacunapi israelitacunaca, sacrificiocunata rurashpapash Jehová mandashcashnaca na ruranajurcachu. Chaimandami Jehová Diosca paicunataca shinllita consejarca (Malaquías 1:12, 13, liingui). Cutin cutin consejajpipash israelitacunaca na cazurcachu. Chaimandami Jehová Diosca paicunata llaquichirca (Mal. 2:1, 2). ¿Imatata yachajunchi? Jehová Dios ñucanchicunata juyaimanda consejajpi o disciplinajpi na cazungapaj munashpaca, ñucanchillatami na ali causashun.

15. ¿Imamandata cunanbi gentecunashnaca na cana capanchi?

¹⁵ Cunanbi ashtaca gentecunaca paicunapa munaita rurashpami causan. Chaimandami, pandarijunguimi o nalitami rurajungui nichunga na gushtan. Cutin huaquingunaca jahua shungullami ima consejotapash chasquin. Ñucanchicunaca na shina canachu canchi. Bibliapica ninmi: “Na cai pachapajtalla rurashpa” causanachu canguichi. ‘Imami Taita Diospaj munai cajta, paita cushichinata, ima pandatapash na rurashpa causanatami yachajuna’ canguichi nishpa (Rom. 12:2). Jehová Diosca paipa organizacionda utilizashpami ñucanchi minishtishca consejocunata cun. Chaimandami cai mundopa ruraicunapi na chapurinata, shuj jarihuan shuj  huarmihuan cuidadota charinata, amigocunata ali agllanatapash yachachin. Jehovapa consejocunata ali shunguhuan chasquishpa, pactachishpaca paita juyashcata, agradicishcatami ricuchishun (Juan 14:31; Rom. 6:17).

16. Imatapash decidigrijushpaca ¿imamandata Jehová Diospa ayudata mascana capanchi?

¹⁶ Huahuacunaca taitamamacuna ayudachun, cuidachunmi minishtin. Ña asha asha viñarishpaca paicunapa munaimi imagutapash rurai callarin. Ña jatunyashpacarin paicunallatami imatapash rurangapaj ña dicidirin. Shina cashpapash huaquinbica imatapash ruragrijushpa, imatapash decidigrijushpaca taitamamacuna ayudachun minishtinrami. Jehová Diospash ñucanchicunallata imata ruranatami agllachun saquin. Shinapash siempremi paipa ayudata, consejota minishtinchi. Shinami paipi confiashcata, juyashcata ricuchishun. Jehová Diospa ayudata mañajpica, paipa espíritu santota cushpami imagutapash ali rurai ushachun ayudanga (Filip. 2:13).

17. Jehovapi confianapa randica ¿imatata israelitacunaca rurarca?

¹⁷ Profeta Samuelpa punllacunapica, israelitacunaca filisteocunahuan macanajushpami mishai tucunajurca. Paicunaca Jehová Diospi confiashpa, imata ruranata Jehovata tapunapa randica, paicunapa munaimi israelitacunaca Jehová Diospa arca del pactota chai macanajuiman apashpa rirca. Israelitacunaca arcata apajpica filisteocunata mishachun Jehová ayudangami yarcami. Shina rurashpaca israelitacunaca Jehová Diosta na yarishcatami ricuchirca. Paicunapa munashcata ruraimandami 30 mil soldadocuna huañurca, arca del pactotapash filisteocuna aparca (1 Sam. 4:2-4, 10, 11; Proverbios 14:12, liingui).

18. Jehovapi confianzata charinamandaca ¿imatata Bibliapica nin?

¹⁸ Salmo capítulo 42ta escribijca nircami: “Taita Diostalla shuyai. Paitaca alicachisharami, ñuca Taita Dioslla, ñuca almaca ninanda shaijushcamari. Chaimandami candaca yarijushalla” nishpa (Sal. 42:5, 6). Shina nishpaca, chai runaguca Jehová Diosta ninanda juyashcata, paipi confianzata charishcatami ricuchijurca. ¿Ñucanchipash shinallatachu sintirinchi? Shina sintirishpapash, Jehová Diospi cada punlla ashtahuan confianzata charingapami esforzarina canchi. Bibliapica ninmi: “Mandaj Diostaca, cambaj tucui shunguhuan yariangui. Aligutapacha yarishpami purini yashpaca, ama jariyanguichu. Imata rurangapajpash, Diostara yaringui. Paimi, can purina ñangunapipash aliguta pushanga” nishpa (Prov. 3:5, 6).

19. Jehová Diostaca ¿imashinata juyana capanchi?

¹⁹ Cai temapi yachajushca shinaca, Jehová Diosca ejemplota cushpami ñucanchicunamanga yachachishca. Pairami ñucanchicunata juyashca. Shinami ñucanchicunapash Jehová Diosta juyanata yachajushcanchi. Shinaca, Jehová Diosta cada punlla tucui shunguhuan, tucui almahuan, tucui yuyaihuan, tucui ñucanchi fuerzahuan juyashcata ricuchingapaj esforzarishunchi (Mar. 12:30).