Ashtacacunaca ninmi, oracionda ruranaca yangami, pipash na uyanllu nishpa. Shujcunaca oracionda rurashpapash pipash ayudajtaca na sintinllu. Shuj ateo runaca, Dios imashina cajta pensashpami cashna mañarca: “Imatallapash nihuayari” nishpa. Shinapash, Diosca imatallapash na nihuarcachu ninmi.

Shinapash Bibliapica ninmi, Taita Diosca ñucanchi mañashcacunata uyanmi nishpa. Chaimandami, Bibliapica punda tiempopi shuj llactamanga cashna nirca: “Diosca, canguna huacashpa caparinajujta uyashcandimi tigrachinga” nishpa (Isaías 30:19). Shuj textopipash ninmi: “Alita rurajcuna mañajpica cushijunmi” nishpa (Proverbios 15:8).

Bibliapica gentecuna mañajpi Taita Dios uyashcamandaca huaquin ejemplocunami tian. Bibliapica ninmi: Jesusca ‘ninanda mañashpa, caparishpa huacashpami huañunamanda quishpichi ushaj Diosta mañajurca’ nishpa. Shina ‘mañashcamanda paita uyashpami’ Taita Diosca causachirca (Hebreos 5:7). Shuj ejemplocunataca Daniel 9:20, 21; 2 Crónicas 7:1​pimi ricui ushapanchi.

Shinaca ¿imamandata huaquingunaca mañajpi pipash na uyanllu nin? Jehová * Dios ñucanchi mañashcacunata uyachunga, paitallami mañana canchi. Shuj dioscunata o pitapash na mañanachu canchi. Ashtahuanbash, Tucuita Ruraj Jehová Diostaca pai munashcashnami mañana canchi. ‘Pai munashcashna ñucanchi imaguta mañajpipash uyanllami’ (1 Juan 5:14). Shinaca, ñucanchi mañashcacunata Jehová uyachunga paita ali rijsina, cazunami canchi.

Ashtaca gentecunaca crinmi, Taita Diosta mañanaca maijanbash religionba costumbrellaca na canllu. Taita Diosca mañashcacunata uyashpa ayudanmi nishpa. Kenia llactamanda Isaac shuti jarica ninmi: “Bibliata intindingapami Taita Diosta mañarcani. Chai jipallami Bibliamanda yachachi callarihuarca” nishpa. Filipinas llactapi causaj Hilda huarmiguca, tabaco chupanatami saquingapaj munarca. Mashna viajecharimi saquisha yarca. Shinapash na ushashcarcachu. Paipa cusaca Taita Diosta ayudahuai nishpa mañayari nircami. Chaimandami Hildaca Taita Diosta mañarca. Paica ninmi: “Mañanaca ninandami ayudahuarca. Tabacota chupana munaica asha ashami anchurirca. Tabaco chupanataca saqui usharcanimi” nishpa.

Imamandapash pinarijushpa Taita Dios munashcashna mañajpica ¿nacha Taita Diosca ayudanga?