1, 2. Bibliapi nishca shinaca ¿imamandata juyaica minishtirishcapacha can?

IMASHINAMI yalishca temapi yachajurcanchi, Jehovapa cualidadcunamandaca juyaimi ashtahuan yali can (1 Juan 4:16). Jehová Diosca imatapash nara rurashpallatami Jesustaca rurarca. Jesusca ashtaca ashtaca huatacunatami cielopi causarca. Chaimandami, Jehová Dios juyaj Dios cashcataca ali yachan (Col. 1:15). Jesusca jahua cielopi cashpapash, cai Alpapi cashpapash Jehovapa ejemplotaca alimi catirca. Chaimandami Jesuspash, Jehová Diospash ñucanchicunata juyaihuan mandanata yachanchi.

² Shuj runaca Jesustaca tapurcami, tucui mandashcacunamandaca maijanda ashtahuan yali can nishpa. Chaimandami Jesusca nirca: “Mandashcapica cashnami nijun: ‘Cambaj Taita Diostaca, tucui shunguhuan, tucui almahuan, tucui yuyaihuan juyangui’ nijunmi. Cai mandashca shimimi, tucuimanda punda ashtahuan yali ali. Chaipaj cati mandashca shimipash, chashnallatami nijun: ‘Camba cumba runagutaca, imashna can juyarinshnallata juyangui’ nijunmi” nishpa (Mat. 22:37-39).

3. ¿Pita ñucanchi cumba can?

³ Tucui gentecunaman juyaita ricuchinaca minishtirishcapachami  can. Jesusca nircami, Jehová Diosta, canba cumba runagutapash juyangui nishpa. Shinapash ¿pita ñucanchi cumba can? Cazarashca cashpaca, huarmi o cusami ñucanchipa ashtahuan importante cumba can. Shinallata, congregacionbi ñucanchi huauquipanicuna, shuj gentecunapashmi ñucanchipa cumbacuna can. Shinaca, tucuicunata imashina juyaihuan tratanata ricupashun.

4. Juchayucuna cashpapash ¿imatata cusahuarmicunaca cushilla causangapaca rurana can?

⁴ Jehová Diosca Adanda, Evata rurashpami cusahuarmi cachun paicunataca cazarachirca. Jehová Diosca ishcandicuna cushilla causashpa, cai Alpapi paicuna ninanda mirachunmi munarca (Gén. 1:27, 28). Shinapash, paicunaca Jehová Diosta na cazushpami cusahuarmi causaitaca llaquichirca. Ashtahuanbash, paicunapa huahuacunaca juchayucuna nacirishcamandami huañuna tucurca (Rom. 5:12). Juchayucuna cashpapash cusahuarmicunaca cushilla causaita ushanmi. Bibliami cusahuarmicuna imashina cushilla causanata yachachin. Bibliapi consejocunaca pipa consejocunahuanbash na igualanllu. Cusahuarmi causaita Jehová Dios callarichishcamandami pailla ali consejocunata cuita ushan (2 Timoteo 3:16, 17, liingui).

5. ¿Imamandata cusahuarmicunapa causaipica juyaita ricuchinaca minishtirishcapacha can?

⁵ Bibliapi nishca shinaca, cusahuarmi ali causangapaca shungumanda juyaita ricuchinami minishtirishcapacha can. Apóstol Pabloca juyaimanda parlashpaca cashnami nirca: ‘Juyaita charishpaca llaquita apanllami, shujcunatapash llaquinmi, shujcuna imata charijtapash ñucapa cashcanman yashpaca na ricunllu. Juyaita charishpaca na ñucami ashtahuan ali cani ninllu, na jariyanllu, na imatapash pinganayaita ruranllu, na paipalla alita mascanllu, na ñapash fiñarinllachu, na fiñashcalla causangapaj munanllu. Imatapash [nalita] rurajpica na cushijunllu. Ashtahuangarin na llullashpa aliguta rurajpimi cushijun. Tucui llaquita apanllami, tucuita crinllami, tucuita shuyanllami, ima nalita rurajpipash saquinllami. Juyaica ima horapash na tucurinllu’ nishpa (1 Cor. 13:4-8). Cai shimicunapi aliguta pensarishpa, ñucanchi causaipi pactachishpaca cusahuarmicunaca ali, cushillami causashun.

6, 7. a) Familiata ñaupaman pushanamandaca ¿imatata Bibliapica nin? b) ¿Imashinata cusaca huarmita tratana can?

⁶ Jehová Diosca familiata ñaupaman pushachunga ¿pitata agllashca? Apóstol Pabloca 1 Corintios 11:3pica nircami: “Cristoca, tucui jaricunatami umashna mandajun. Cusapash, paipaj huarmitaca, umashnami mandajun. Taita  Diospash, Cristotaca umashnami mandajun” nishpa. Imashinami ricunchi, cusami familiataca umashna mandana can. Jehová Diosca umashna paipa Churita mandana cashpapash aliguta, consideracionhuanmi tratan. Shina aliguta tratajpimi Jesusca paipa taitata juyaimanda nirca: ‘Ñuca Taitataca juyanimi’ nishpa (Juan 14:31). Jehová Dios nali tratashca cajpica Jesusca na shina ninmanllu carca.

⁷ Cusa paipa huarmita umashna mandana cajpipash Bibliapica ninmi, huarmitaca ali, respetohuanmi tratana can nishpa (1 Ped. 3:7). ¿Imashinata chaitaca pactachi ushanchi? Huarmi imaguta minishtijpipash cusaca ricurianami can. Shinallata, cusaca na paipa munaitalla ruranachu can. Bibliapica ninbashmi: “Cusacunapash, cangunapaj huarmicunataca juyashpami charina canguichi. Tandanajuj crijcunata juyashpami, Cristoca paillata japi tucushpa huañurca” nishpa (Efes. 5:25). Jesusca paipa catijcunamandaca huañuitapash huañurcami. Cusapash Jesuspa ejemplota catishpa aliguta umashna mandajpica, huarmipash tucui shunguhuan juyashpa, respetashpami imagupipash apoyanga (Tito 2:3-5, liingui).

8. Jehovata sirvijcunaca ¿imashinata tratarina can?

⁸ Cunanbica Jehová Diosta ashtaca sirvijcunami paimanda, pai imatalla ruranamandapash mundo enteropi villachinajunchi. Shinaca ¿imashinata huauquipanicunaca tratarina canchi? Bibliapica ninmi, tucuicunatami ali tratana canguichi, ‘crijpuracunami ashtahuanbachaca’ ali tratarina canguichi nishpa (Gál. 6:10; Romanos 12:10, liingui). Apóstol Pedropash nircami: “Na llullashpa villajuj Shimita cazushpa” causaichi. ‘Shinami cangunaca huauquipurashna juyarishpa causanajunguichi’ nishpa. Shinallata nircapashmi: “Tucuimanda yalica, caishuj chaishuj ninanda juyarishpami causana canguichi” nishpa (1 Ped. 1:22; 4:8).

9, 10. ¿Imamandata Jehovata sirvijcunaca tranquilo, cushilla causapanchi?

⁹ Ñucanchi huauquipanicunata tucui shunguhuan juyanami, mundo enteropi ashtahuan ali organización cachun ayudashca. Shinallata, Jehová Diosca ñucanchicuna tucui shunguhuan paita juyaimanda, cazuimandami paipa espíritu santota cushpa ayudan. Chaimandami, ñucanchicunaca mundo enteropi shujlla familia shina tranquilo, cushilla causanchi (1 Juan 4:20, 21, liingui).

¹⁰ Apóstol Pabloca Jesusta catijcunapura juyaita ricuchina minishtirishcapacha cashcamandami nirca: ‘Mushujta churachinshnami tucui shunguhuan pitapash llaquishpa, juyashpa, ali shunguhuan, na jariyashpa, pihuambash aligutapacha causana canguichi. Caishujhuan chaishujhuan cazurishpa, shinallata caishujhuan chaishujhuan llaquichirishca cashpapash, perdonarishpami causana canguichi. [Jehová, NM] cangunapa juchata perdonashcashnallatami, cangunapash perdonarina canguichi. Ashtahuangarin tucui caicunapa jahuaca, juyarishpa causanatami churajunshna yariajlla causana canguichi. Shina juyarishpami, tucuicuna imapipash na pandashpa aliguta causanguichi’ nishpa (Col. 3:12-14). Jehovapa organizacionbica shuj shuj llactamanda, shuj shuj costumbrecunata charij gentecunami tianchi. Shinapash, juyaita charimandami tucuicuna shujlla shina canchi. Shina aliguta causaimandami ninanda agradicinchi.

11. Testigocuna juyaihuan, shujlla shina aliguta causaimandaca ¿imatata ricuchi ushashcanchi?

¹¹ Testigocunaca tucui shunguhuan juyarishpami shujlla shina cashcata, shujlla ali religión tiashcata ricuchinchi. Jesusca nircami: “Juyarishpa causanajujta ricushpami, ñucapaj yachajujcuna cashcataca tucuicuna rijsinajunga” nishpa (Juan 13:34, 35). Apóstol Juanbash  nircami: ‘Maijanlla Taita Diospa huahuacuna cajtapash, shinallata diablopaj huahuacuna cajtapash rijsinallami: Maijanbash imatapash [nalita] rurajcunapash, crijcunata na juyashpa causajcunapash, napacha Taita Diospa huahuacunachu. Caishujhuan chaishujhuan juyarishpami causana canchi nishpa villashcataca, cri callarishca punllallatami uyarcanguichi’ nishpa (1 Juan 3:10, 11). Imashinami ricunchi juyaimanda, shujlla shina aliguta causaimandami testigo de Jehovacunaca ciertopacha Jesusta catijcuna cashcata ricuchinchi. Shinallata, Jehová Diosca mundo enteropi paipa Reinomanda villachingapami ñucanchitaca utilizajun (Mat. 24:14).

12, 13. a) ¿Imatata ‘ashtaca gente’ nishcacunaca ruranajun? b) ¿Imatata ‘ashtaca gente’ nishcacunaca ñalla ricunga?

¹² Jehovata ashtaca sirvijcunaca ‘ashtaca gente’ nishcapurapimi can. ‘Paicunaca cai pachapi tiaj tucui llactacunamanda, aillupuracunamanda, gentepuracunamanda, shuj shuj shimita parlajcunamanda shamushcami’ can. “Paicunami, mandangapaj tiarinapi tiajujpaj [o, Diospa] ñaupajpi, Llamapaj [o, Jesuspa] ñaupajpipash shayanajurca.” “Paicunaca, ninanda llaquichijujmanda shamushcacunami. Churajunatapash tajshashpami, Llamapaj yahuarpi yurajyachishca”. Paicunaca Jesús ñucanchimanda huañushcapimi feta charin. Shinallata, paicunaca Jehová Diostapash, paipa Churi Jesustapash juyaimandami Taita Diostaca “tutapash, punllapash” sirvinajun (Apoc. 7:9, 14, 15).

¹³ Jatun Manllanai Llaqui punllacuna ña tucurijujpica, Jehová Diosca cai mundopi tucui nali ruraicunatami tucuchinga (Mat. 24:21; Jeremías 25:32, 33, liingui). Cutin, paita sirvijcunata juyaimandaca, paicunata salvashpami shuj juyailla Alpapi causana oportunidadta cunga. Casi 2 mil huatacuna huashaman nishca shinaca, Jehová Diosca ‘paicunapa ñavimandaca tucuilla viquitami fichanga. Huañuipash, huacaipash, llaquipash, nanaipash na ashtahuan tiangachu’ (Apoc. 21:4). Nali ruraicuna, huañuicuna, llaquicuna illajpica ¿nacha ñucanchicunaca cushilla causashun?

14. ‘Ashtaca gente’ nishcacunaca ¿imashinata mirashca?

¹⁴ Tucuri punllacunaca 1914 huatapimi callarirca. Chai punllacunapica ashacunallami Jehovata sirvinajurca. Ashallacuna cashpapash, Jehovata sirvij ungidocunaca gentecunata juyaimanda, espíritu santo paicunata ayudajuimandami na shaijushpa villachinajurca. Chaimandami, cunanbica 8 millón yali testigo de Jehovacuna canchi. 115 mil 400 yali congregaciongunami canchi, ashtahuanmi mirashpa catinchi. Año de servicio 2014 huatapillami 275 mil 500 yali gentecuna bautizarirca. Cada semana 5 mil 300 gentecuna bautizarijushca cuendami can.

15. Ñucanchicuna mirachunga ¿imata ayudashca?

¹⁵ Ñucanchicuna ashtacatapacha mirajushcamandaca ninandami cushijunchi. ¿Imata shina mirachunga ayudashca? Ñucanchi publicaciongunaca 700 yali shimicunapimi llujshin. Villajun revistaca, mundo enteropimi cada quilla 52 millón yali, 247 shimicunapi llujshin. Ashtahuanbash, gentecunaman Bibliata yachachingapaca ¿Qué enseña realmente la Biblia? libromi 200 millón yali llujshishca, 250 yali shimicunapi.

16. ¿Imamandata Testigo de Jehovacunaca ninanda miranajunchi?

¹⁶ Jehová Diospi feta charimanda, Biblia Diospa Shimi cashcata crimandami Testigocunaca ninanda miranajunchi (1 Tes. 2:13). Ñucanchicunata Diablo na ricunayachishpa, ninanda llaquichijpipash espiritualmente shinllimi catinchi (2 Cor. 4:4).

17, 18. Testigocunaca ¿imashinata shuj gentecunataca tratana capanchi?

¹⁷ Villachinajushpaca ¿imashinata gentecunataca  tratana canchi? Villachijushpaca shuj shuj yuyaita charij gentecunahuanmi tuparinchi. Ñucanchicunata ali o nali tratajpipash ¿imashinata paicunataca tratana canchi? Bibliapica ninmi: “Pi imata tapuchijpipash, cachihuan mishquiyachishpa churashcatashnami aliguta villangapaca, ña yachajushcalla purina canguichi” nishpa (Col. 4:6). Ñucanchi crishcacunamanda pipash tapujpica gentecunata juyaimandami tranquilo, respetohuan yachachina canchi (1 Ped. 3:15).

¹⁸ Pipash ñucanchicunata na uyangapaj munashpa culirajpi o plitujpica, Jesuspa ejemplota catishpami juyaita ricuchina canchi. Jesusca paita maipash cachun rimajpica na shinallata tigrachircachu. “Ima llaquipash japishpaca alimi canman nijpipash, paica chashnallataca na tigrachircachu. Llaquichi tucujushpapash, paica ñucapash llaquichishami nishpaca na tigrachircachu. Ashtahuangarin imatapash cashcatapacha ruraj Diosmanmi, tucuita mingarca” (1 Ped. 2:23). Shinaca, ñucanchi huauquipanicunahuan o shuj gentecunahuan cashpapash humilde cashcata, 1 Pedro 3:8, 9pi nishcatami cazuna canchi. Chaipica ninmi: ‘Nalita rurajpipash na chashnallata tigrachinachu canguichi. Ima llaquipash japishpaca alimi canman nijpipash, na chashnallata tigrachinachu canguichi. Ashtahuangarin cangunaca, paicunatapash bendicianami’ canguichi nishpa.

19. Jesús nishca shinaca ¿imashinata ñucanchi contracunataca tratana capanchi?

¹⁹ Humilde cashpaca ñucanchicunapash Jesuspa consejotami cazushun. Paica nircami: ‘Canba cumba runagutaca juyangui, ashtahuangarin canda na ricunayachij runataca fiñangui nishcataca uyarcanguichi. Ashtahuangarin, ñucami cangunataca cashna nini: Cangunata fiñajcunatapash juyanami canguichi. Imapash tucushpaca alichari canman nijcunatapash bendicianami canguichi. Cangunata na ricunayachijcunatapash alitami rurana canguichi. Cangunata catiriashpa llaquichijcunamandapash Diostami mañana canguichi. Chashna causashpami, jahua pachapi tiajuj cangunapa Taitapa huahuacunapacha canguichi. Paillatami inditaca nalicunamanbash, alicunamanbash punllayachijun. Tamiatapash [alita] rurashpa causajcunaman, [nalita] rurashpa causajcunamanbash tamiachijun’ nishpa (Mat. 5:43-45). Ñucanchi contracuna imashina tratajpipash, paicunaman juyaita ricuchingapami esforzarina canchi.

20. ¿Ima horata gentecunaca Jehovatapash, shuj gentecunatapash tucui shunguhuan juyanga? (Callari dibujota ricupangui.)

²⁰ Cai temapica, cunanmandallata tucui ñucanchi causaipi ñucanchi cumbacunata o shuj gentecunata juyaihuan tratanatami yachajushcanchi. Chaimandami, villachijujpi na uyangapaj munaj gentecuna imapipash ayudachun minishtijpica ayudana canchi. Apóstol Pabloca nircami: ‘Pimanbash imatapash na divinachu canguichi. Ashtahuangarin caishuj chaishuj juyarinatami charina canguichi. Pipash paipa cumba runaguta juyajca, mandashca shimipi nijujtami pactachijun. Mandashca shimicunapica cashnami nijun: “Cazarashca jahua ama shujcunahuan causanguichu, ama huañuchinguichu, ama shuhuanguichu, ama llullanguichu, shujcuna imata charijtapash ama munanguichu” nijunmi. Maijan mandashca shimicunapipash cashna nijuj shimicunaca: “Canllata juyarinshnallatami cumba runagutapash juyana cangui” nijunmi. Juyaita charishpaca, paipa cumba runagutaca ima nalitapash na ruranllu. Shina juyaita charishpaca, mandashca shimipi nijujtami pactachijun’ nishpa (Rom. 13:8-10). Diablopa munaita rurashpa gentecuna paicunapura na ricunayachirijpipash, testigo de Jehovacunaca tucui shunguhuanmi gentecunataca juyanchi (1 Juan 5:19). Diablotapash, paita catij gentecunatapash cai Alpamanda Jehová Dios tucuchijpica tucuicunami Jehovata, shuj gentecunatapash tucui shunguhuan juyanga. Shina causanaca shuj jatun bendicionmi canga.