CALLARI TEMA | ¿TAITA DIOSCA GUERRACUNATA ALICACHINLLU?
Jesuspa punllacunapica ¿imashinata Taita Diosca guerracunataca ricurca?
Jesuspa punllacunapi judiocunaca ñaupa israelitacuna cuendami ninanda llaquichi tucun carca. Judiocunataca romanocunami llaquichijurca. Chaimandami paicunaca Taita Dios salvachun mañanajushcanga. Chai punllacunapimi Jesusca cai Alpapi carca. Huaquingunaca Jesustaca Mesiasta shina ricushpami, romanocunapa maquimandaca ‘paimi israelcunata quishpichinga yashpami shuyanajurca’ (Lucas 24:21). Shinapash, chai punllaca na chayarcachu. Ashtahuangarin, huata 70pica romano soldadocunaca Jerusalén llactata, Diosta adorana huasitapash tucuchircami.
¿Imamandata Taita Diosca punda tiempopi shina israelitacunataca na salvarca? ¿Imamandata paicuna macanajuchunga na saquirca? ¿Taita Dioschu cambiashcarca? Na. Judiocunami Taita Dioshuan ñana ali carca. Paicunaca Jesús Mesías cashcataca na chasquircachu (Hechos 2:36). Chaimandami Taita Diosca judiocunataca paipa agllashca llactata shinaca ñana ricurca (Mateo 23:37, 38).
Taita Diosca judiocunatapash, pai carasha nishca alpatapash ñana cuidajurcachu. Chaimandami, judiocunaca Taita Diosmi ñucanchihuan nishpaca nunca ñana guerramanga rita usharca. Jesús nishca shinaca, Israel llactaca ñana Diospa agllashca llacta carcachu. Chaimandami Taita Diosca paicunataca ñana ayudarca. Chaipa randica, Taita Diosca jahua pachapi paipa mushuj Israel llactatami agllarca (Gálatas 6:16; Mateo 21:43). Paicunaca Jesusta catijpuracunamanda Dios agllashcacunami can. Chaimandami Jesuspa punllacunapica paicunataca nirca: “Cunanga, Taita Diospaj huahuacunamari canguichi” nishpa (1 Pedro 2:9, 10).
Shinaca, Jesusta catijcuna Dios agllashca llacta cajpica ¿romanocuna llaquichinajujpica paicunata ayudarcachu? ¿Macanajushpa difindirichun saquircachu? Na. ¿Imamandata Taita Diosca imatapash na rurarca? Caishuj temapica yachajurcanchimi, Taita Diospa guerracunaca pai ima hora macanajuchun mandajpilla callarina cashcata. Jesuspa punllacunapica, Taita Diosca Jesusta catijcunapa lado tucushpaca na guerracunapi macanajurcachu, macanajuchunbash na saquircachu. Chai punllacunapica nali ruraicunata, llaquichijcunata tucuchina tiempoca nara carcachu.
Chai punllacunapi Jesusta catijcunaca na culirashpami punda tiempopi israelitacuna shina Taita Dios mandangacaman shuyajunalla carca. Chai punllacuna chayangacamanga, judiocunaca paicunapa munai contracunahuan macanajuitaca na usharcachu. Jesusca paipa catijcunataca ama guerracunapi chapuringuichichu nircami. Chaipa randica Jesusca nircami: ‘Cangunata fiñajcunatapash juyanami canguichi. Cangunata catiriashpa llaquichij gentecunamandapash Diosta mañanami canguichi’ nishpa (Mateo 5:44). Romanocuna Jerusalén llactataca llaquichinamanda parlashpapash, Jesusca paipa catijcunataca nircami, macanajunapa randica calpashpami ucha llujshina canguichi nishpa. Chai mandashcataca Jesuspa catijcunaca cazurcami (Lucas 21:20, 21).
Apóstol Pablopash nircami: ‘Na tigrachishpa llaquichinachu canguichi. Dios escribichishca Shimipica cashnami nijun: “Ñucami llaquichisha. Ñucami, paicunaman imatapash tigrachisha ninmi Jatun Diosca”’ nishpa (Romanos 12:19). Apóstol Pabloca ashtaca huatacuna huashaman Levítico 19:18, Deuteronomio 32:35pi Jehová Diospa shimicunata yarishpami shina nijurca. Imashinami ricushcanchi, punda tiempopica Jehovata sirvijcuna contracunahuan guerrapi macanajujpica, paillatami ayudan carca. Apóstol Pablopa shimicunata ricushpaca, Jehová Dios pundamandallata guerracunata imashina ricushcatami intindinchi. Jehová Diosca pundamandallatami guerracunataca nalita rurajcunata, llaquichijcunata tucuchishpa paita sirvijcunata ayudangapaj utilizashca. Imashinami punda tiempopi rurarca, shinallatami Jehová Diosllata ima hora guerra tianata, picuna chai guerrapi macanajunatapash ninga.
Imashinami ña yachajushcanchi, Jehová Diosca Jesuspa punllacunapi paita sirvijcunataca guerracunaman richunga na mandarcachu. Cutin cunanbica, ¿pitapash guerrapi macanajuchun Jehová Diosca agllashcachu? ¿Cunanbica Jehová Diosca paita sirvijcunata ayudangacha? ¿Imashinata cunanbica Jehová Diosca guerracunataca ricun? Caishuj temapimi yachajupashun.
