1. ¿Imata Jesuspaca ashtahuan importante carca?

JESUSCA Diospa Reinomanda villachinataca ninandami gushtan carca. Bibliapi nishca shinaca, Jesuspaca Reinomanda parlanami ashtahuan importante carca. Chaimandami, cai Alpapi villachijushpaca 100 viaje yalita Diospa Reinomanda parlarca. Reinomanda parlanataca Jesusca paipa shungupimi charirca (Mateo 12:34, liingui).

2. Mateo 28:19, 20pi shimicunataca ¿mashna gentecunata uyarca?

² Causarishca asha punllacuna jipaca, Jesusca 500 yali gentecunamanmi ricurirca (1 Cor. 15:6). Chaipimi, “cai pachapa gentecunapajman rishpa” Diospa Reinomanda villachinguichi nishpa mandarianga. Chaita pactachinaca na facilchu cana carca. * Jesusca nircami, ‘tucurimui punllacuna tucuringacamanmi’ shina villachina can nishpa. Villachishpaca Jesuspa shimicuna pactarichunmi ayudanajunchi (Mat. 28:19, 20).

3. Ñucanchicuna villachichunga ¿ima quimsa cosascunata ayudan?

 ³ Jesusca paipa catijcunaman villachichun mingashca jipaca nircami, cangunahuanmi casha nishpa (Mat. 28:20). Shinaca, Jesusllatami villachinataca ñaupaman pushagrijurca. Ashtahuanbash, Jehová Diosmi paipa sirvijcuna ali villachichunga, ‘pai munashcashna imagutapash tucuita aliguta rurai ushachun yachachijushca’ (Heb. 13:20, 21). Cai temapica, Jehová munashca shina yachachingapaj quimsa ayudacunatami ricushun: 1) Villachingapaj imacunatalla utilizashcata, 2) ima arreglocunalla tiashcata, 3) imashina yachachijushcata. Shinaca, cai último cien huatacunapi villachingapaj imacunatalla utilizashcata ricupashun.

4. Ñucanchi Rey Jesusca ¿imatata villachingapaca cushca?

⁴ Jesusca nircami, Dios Reinomanda villachinaca alpapi shuj muyuguta tarpuna shinami can nishpa (Mat. 13:18, 19). Tarpuj runaguca, alpata amujyachishpa tarpungapaca shuj shuj herramientacunatami charin. Ñucanchi Rey Jesuspash ashtaca ashtaca gentecunapa shunguman chayashpa, muyuguta tarpuj cuenda Diospa Reinomanda ali villachingapami shuj shuj herramientacunata ñucanchicunamanga cushca. Huaquingunataca huaquin huatacunatallami utilizashcanchi. Cutin shujcunataca ashtaca huatacunatami utilizashcanchi. Imashina cashpapash ashtahuan ali villachichunmi ayudashca.

5. a) Tarjeta de testimonio nishcaca ¿imata carca? b) ¿Imashinata chai tarjetataca utilizan carca?

⁵ Huata 1933pica, huauquicunaca tarjeta de testimonio nishcahuanmi villachirca. Ashtacacunataca chai tarjetami primera vez villachichun ayudarca. Chai tarjetaca, Bibliamanda asha shimicunata escribishca uchilla tarjetami carca. Huaquinbi huaquinbica shuj mushuj yuyaihuanmi tarjetacunaca llujchin carca. ¿Imashinata chai tarjetataca utilizan carca? Shuj huauquiguca 10 huatacunata charishpami primera vez chai tarjetata utilizarca. Paica ninmi: “Callaringapaca cashnami nin carcanchi: ‘Cai tarjetata liipai’ nishpa. Gentecuna chai tarjetata liishca jipaca, shuj publicacionda saquishpami rin carcanchi” nishpa.

6. ¿Picunatata tarjeta de testimonio nishcacunaca ayudarca?

⁶ Tarjeta de testimonio nishcahuan villachinaca ashtacata parlaj huauquicunata, parlanata manllajcunatapashmi ayudarca. Huaquin huauquicunaca villachinata munashpapash, manllaimandami imatapash na nita ushan carca. Cutin shujcunaca, na manllashpami asha ratopilla imata yachashcataca tucuita parlan carca. Chaimandami, chai tarjetacunaca tucuicuna ali, intindirinalla shimicunahuan villachichun ayudarca.

7. ¿Imamandata huaquinbica tarjetacunahuan villachinaca asha shinlli carca?

⁷ Huaquinbica chai tarjetacunahuan villachinaca asha shinllimi carca. Shuj paniguca ninmi: “Huaquinbica huasi dueñoca ninmi carca: ‘¿Imatata targetapica nijun? ¿Nachu quiquinllata liishpa uyachita ushahuangui?’” nishpa. Huaquin gentecunaca na liinata yachanllu carca. Cutin shujcunaca, tarjetaca japishcandimi punguta vichan carca. Shujcunacarin ninanda culirashpami tarjetataca liquishpa saquin carca. Shinapash, ñucanchi huauquipanicunaca gentecunaman villachinata yachajurcami. Chaimandami, gentecunaca chai tarjetacunahuan villachimanda paicunataca Reinomanda villachijcuna nishpa rijsin carca.

8. ¿Imashinata gramofonocunataca utilizan carca? (Callari dibujota ricupangui.)

 ⁸ Huata 1930 jipaca, apashpa rinalla gramófono nishcahuanmi villachi callarirca. Gramofonoca discopi grabashca discursocunata uyachingapami carca. Huaquingunaca gramofonotaca “Aarón” nishpami rijsin carca. ¿Imamandata shina nin carca? Paicunapa randi villachijpimi shina nin carca (Éxodo 4:14-16, liingui). Gentecuna uyangapaj munajpica, huauquicunaca grabashca discursota uyachishpami shuj publicacionda saquingapaj munani nin carca. Huaquinbica, gulpi familiami grabashca discursota uyangapaj tandanajun carca. Huata 1934pica, ñucanchi organizacionllatami villachingapaca gramofonocunata rurai callarirca. Jipamanga, shuj shuj temamanda 92 discursocunatami grabarca.

9. ¿Imashinata gramofonohuan villachinaca ayudarca? Shuj ejemplota nipai.

⁹ Shuj jarica Bibliamanda grabashca discursota uyashca jipaca, vecinocunapash Reinomanda uyachun nishpami gramofonotaca shuj semanapa mañarca. Chai jari chaita rurashcamandami, tauca gentecuna Bibliata yachajui callarishpa bautizarirca. Chai jaripashmi bautizarirca. Jipamangarin, paipa ishcai ushicunaca Galaad Escuelaman rishpami, caru llactaman sirvingapaj rirca. Imashinami tarjeta de testimonio nishcaca, ashtacacunata primera vez villachichun ayudarca, shinallatami gramofonopash ashtacacunata ayudarca. Cutin ashtaca huatacuna jipaca, Rey Jesusca paita catijcuna ashtahuan ali villachichunmi Bibliamanda Yachachingapaj Escuela nishcahuan ayudarca.

10, 11. Gentecunaman villachichunga ¿imashinata periodicopash, radio emisorapash ayudashca?

¹⁰ Jehovata sirvijcunaca ashtaca gentecunaman villachingapaca, Rey Jesuspa ayudahuanga shuj shuj arreglocunatami charishcanchi. Chai arreglocunami ashalla Testigocuna tiashca huatacunapipash ayudashca (Mateo 9:37, liingui). Yalishca huatacunapica, periodicocunata utilizashpa villachina arreglomi tiarca. Tucui semanacunami huauqui Charles Russellca, noticiacunata escribij pushtuman shuj discursota cachan carca. Chai pushtumandami chai discursotaca Estados Unidos, Canadá, Europa llactacunamanda periodicocunapi llujshichun cachan carca. Huata 1913pica, huauqui Russellpa discursocunaca 2 mil periodicocunapimi llujshin carca. Chai periodicocunataca casi 15 millón gentecunami liin carca.

¹¹ Radio emisorapi villachingapaj arreglocunata ruranapashmi ayudarca. 16 de abril de 1922pica, Joseph Rutherford huauquimi primera vez shuj radio emisorapi discursota curca. Chai discursotaca casi 50 mil gentecunami uyashcanga. Cutin, 24 de febrero de 1924pica ñucanchi organizacionllatami WBBR radio emisorata funcionachi callarirca. Huata 1924 tucurijujpica, cai revistallatami inglés shimipica nirca: “Radiopi yalichishpa Reinomanda villachinaca ashtaca gentecunaman chayangapaj, ama yapa culquita gashtangapami ayudashca” nishpa. Periodicopash, radiopash ashalla Testigocuna tiashca llactacunapi villachingapami ayudashca.

12. a) Predicación pública nishcamandaca ¿maijandata ashtahuan gushtapangui? b) Predicación publicapi na manllashpa villachingapaca ¿imata ayudanga?

¹² Cunanbica, predicación pública nishcata charingapami arreglocuna tian. Shinami tren paradacunapi, terminalcunapi, mercadocunapi, plazacunapipash villachinajunchi. Cai pushtucunapi villachinata manllashpaca, Jehovatami ayudahuai nishpa mañana cangui. Shinallata, shuj superintendente huauqui  ima nishcapi pensaripai. Paica nircami: “Villachinapi cambiocuna tiajpica, Jehovata ashtahuan sirvina, cazuna, ñucanchi feta ashtahuan shinlliyachina oportunidadmi can nishpami yan carcanchi. Ñucanchicunaca imashina villachina cajpipash, Jehovata sirvishpa catingapaj munashcatami ricuchingapaj munarcanchi” nishpa. Villachinapi imapash cambiocuna tiajpi na yacharishpapash, ñucanchicuna ayudashpaca Jehovapi confiashpami ashtahuan paiman quimirishun (2 Corintios 12:9, 10, liingui).

13. a) ¿Imashinata jw.org paginaca ayudajun? b) ¿Imashinata jw.org paginata utilizashpa villachipashcangui?

¹³ Ashtaca publicadorcunaca Internetpi jw.org paginamanda gentecunaman parlanatami gushtan. Chai paginapica, 700 yali shimicunapimi Bibliamanda publicaciongunata liita, descargaita usharin. Cada punllami, 1 millón 600 mil yali gentecuna chai paginataca ricun. Imashinami yalishca huatacunapi Reinomanda villaicunahuan na chayanalla pushtucunaman radio emisorata utilizashpa chayashcanchi, shinallatami cai paginaca caru llactacunapi gentecunaman ali villaicunahuan chayachun ayudajun.

14. a) Huauquipanicunaca ¿imamandata ashtahuan yachajuna carca? b) ¿Ima escuelata ñucanchicuna ashtahuan ali yachachijcuna tucuchun ayudashca?

¹⁴ Cunangamanga ali villachingapaj imacunatalla utilizashcata, ima arreglocunalla tiashcatami ricushcanchi. Cunanga villachingapaj imashina yachachishcata ricushun. Gramofonopi discursocunata uyachijpica, huaquingunaca na cringapaj munanllu carca. Cutin shujcunaca, tarjeta de testimonio nishcata liishpaca ashtahuan yachajungapami munan carca. Chaimandami huauquicunaca ali yachachinata, gentecuna na uyangapaj munajpi imata ninatapash ali yachajuna carca. Diospa espíritu santomi huauqui Nathan Knorrtaca ayudarca, huauquicuna gentecunaman aliguta yachachichun ayudana cashcata cuenta japichun. Chaimandami, 1943 huatapica Bibliamanda Yachachingapaj Escuela tandanajui tiai callarirca. Chai escuelaca ali yachachijcuna tucuchunmi ñucanchitaca ayudashca.

15. a) Bibliamanda Yachachingapaj Escuelapi discursota charijcunaca ¿imata tucushca? b) ¿Quiquinga Salmo 32:8pi shimicuna pactarijta cuenta japipashcanguichu?

¹⁵ Ashtacacunapaca ñaupaman yalishpa yachachinaca shinllimi carca. Julio Ramu huauquica, huata 1944pimi Bibliamanda Yachachingapaj Escuelapi paipa primer discursota curca. Chai discursopica, Doeg runamandami parlana tucurca. Doeg shutica Bibliapica picha viajellami ricurin. Huauqui Julioca chai picha textocunamandallami parlana tucurca. Paica ninmi: Cuerpo entero chujchujushpapash,  ñucapa punda discursotaca tucuchircanimi nishpa. Bibliamanda Yachachingapaj Escuelapica, huahuacunapashmi asignaciongunata chari callarirca. Callaripica paicunapaca dificilmi carca. Párrafo 12pi parlashca superintendente huauquita yarishunchi. Paica ninmi, 6 ó 7 huatacunata charij shuj huahuaca, “discursota cui callarijushpallatami manllaimanda huacai callarirca. Huacai huacaipash discursotaca tucuringacamanmi curca” nishpa. Cunanbipash, huauquipanicunaca gentecunapa ñaupajpi parlanata manllaimandami comentangapaj maquitapash na alzan, plataformaman vitsanatapash manllan. ¿Quiquinbash shinallatachu sintiringui? Shina sintirishpaca, manllaita ama charingapami Jehovata mañana cangui. Jehová Diosca, Bibliamanda Yachachingapaj Escuela chaira callarijujpi huauquipanicunata ayudashca shinallatami quiquindapash ayudanga (Salmo 32:8, liingui).

16. Galaad Escuelaca ¿imapata ayudan?

¹⁶ Jehová Diosca paita sirvijcunataca Galaad Escuela nishcahuanbashmi ashtahuan yachachijushca. Galaad Escuelapi yachachij huauquica ninmi: “Cai escuelaca yachajungapaj shamuj huauquipanicunataca shuj gentecunaman villachina munaita ashtahuan charichunmi ayudan” nishpa. Galaad Escuelaca huata 1943pimi callarirca. Chai huatamandaca, 8 mil 500 yali huauquipanicunatami chai escuelaca ayudashca. Paicunaca 170 llactacunamanmi sirvingapaj rishca. Huata 2011mandaca Galaad Escuelamanga precursor especialcuna, superintendentecuna, betelitacuna, Galaad Escuelaman nara rishca misionerocunallami ri ushan.

17. ¿Imashinata Galaad Escuelaca ayudashca?

¹⁷ Galaad Escuela tiai callarishcamandaca ¿imashinata ayudashca? Japón llactapica, huata 1949 agosto quillapica casi 10 publicadorcunallami tiarca. Chai huatapillatami Galaad Escuelata yalishca 13 misionerocuna Japón llactaman chayarca. Cunanbica casi 216 mil publicadorcunami tian. Paicunamandaca casi chaupimi precursorcuna can.

18. Jehovata sirvijcuna espiritualmente ñaupaman catichunga ¿ima escuelacunata tian?

¹⁸ Jehovata sirvijcuna espiritualmente ñaupaman catichun, ali yachachijcuna tucuchunga shuj escuelacunapashmi tian. Bibliamanda Yachachingapaj Escuela, Precursorcunapa Escuela, Diospa Reinomanda Villachijcunapa Escuelami tian. Shinallata, superintendente de circuitocuna paicunapa huarmindi rina Escuela, Comité de Sucursalmanda huauquicuna paicunapa huarmindi rina Escuelapashmi tian. Imashinami ricunchi, Jesusca cunangamanmi yachachishpa catijun.

19. a) Villachinamanda parlashpaca ¿imatata huauqui Russellca nirca? b) ¿Huauqui Russell nishca shimicunaca pactarishcachu?

¹⁹ Diospa Reinopi Jesús mandai callarishcamandaca ñami 100 huatacuna yali tucushca. Rey Jesusca yachachishpa catijunrami. Huata 1916pica, cai punllacunapi ima pasanata parlashpami huauqui Charles Russellca nirca: “Villachinaca ninandami mirajun. Ashtahuanmi mirashpa catinga. Diospa Reinomanda ali villaicunataca mundo entero gentecunamanmi villachina canchi” nishpa (La fe en marcha, de A. H. Macmillan, pág. 69). Cunanbi ricujpica, chai huauquipa shimicunaca tucuimi pactarijun. Chaimandami, paipa munaita ali pactachingapaj yachachijushcamanda, villachingapaj tucuita cushcamanda Jehová Diostaca ninanda agradicinchi.