SARA huarmiguca Oriente Medio llactamanda juyailla huarmigumi carca. Pensaripashunchi, paica cuarto muyundita ricushpami shayajun. Shinapash ¿llaquillachu can? Llaquillami can yarin. Chai huasipica paipa juyashca cusa Abrahanhuan ashtaca huatacunatami cushilla causashca. a Ishcandimi chai huasipica ali causashca.

Chai cusahuarmicunaca Ur llactapimi causarca. Chai llactaca charij charijmi carca. Chaipica paicunallata imatapash rurashpa jatujcuna, negociante gentecunami tiarca. Shinaca Sarapash, Abrahanbash ashtaca cosascunatami charishcanga. Shinapash Sara huarmiguca cosascunata alichingapallaca huasitaca na charircachu. Chai huasipica ashtaca huatacunatami paipa cusahuan llaquicunata chimbapurashpa, cushilla causaitapash charishcarca. Chai huasipimi tauca viajeta Jehová Diosta mañan carianga. Chaimandami Sara huarmiguca chai huasipi canataca ninanda gushtan cashcanga.

Shinapash shinlli cajpipash Sara huarmiguca tucuita saquishpa ringapaj listomi carca. Sara huarmigu casi 60 huatacunata charishpapash na rijsishca llactaman rishpa, peligrocunata, imapash shuj llaquicunata chimbapurashpami causagrijurca. Shinallata Ur llactamanga cutinga ñana tigragrijurcachu. ¿Imamandata chai ali causaita saquigrijurca? Sara huarmigupa femandaca ¿imatata yachajunchi?

Sara huarmiguca Ur llactapimi viñarianga. Cunanbica chai llactaca yanga shitashca pambami can. Shinapash, chai tiempopica barcocunami caiman chaiman Éufrates yacutaca yalinajushcanga. Chai barcocunapica valishca jatunacunami shuj shuj llactacunamanda Ur llactaman chayan cashcanga. Chai llactapa quichiji ñangunataca ashtaca gentecunami caiman chaiman purin cashcanga. Shinallata barcocuna chayana pushtucunapica barcopurami tuparinajushcanga. Jatun tiendacunapica ashtaca ashtaca cosascunami tiashcanga. Shinaca Sara huarmigu chai jatun llactapi viñashcata yuyapai. Chaipimi paipa familiapash causarca. Chaipi causajcunataca Sara huarmiguca shutipimi rijsirianga. Shinallata paitapash gentecunaca alimi rijsirianga. Shina juyailla huarmigutaca pipash na cungaita ushanllu.

Bibliapica Sara huarmigu shinlli feta charishcatami parlan. Sara huarmigu Ur llactapa dios luna nishcapi feta charishcata na ninllu. Chai llactapica dios luna nishcata adorangapami shuj jatun torreta charirca. Shinapash Sara huarmiguca Jehová Diostallami adoran carca. Bibliapica Sara imashina feta chari callarishcataca na parlanllu. Sarapa taitaca asha tiempota yanga dioscunatami adorashcanga. Sara huarmiguca Abrahán jarihuanmi cazararca. Abrahanga 10 huatacunatami Sarapaca mayor carca. Bibliapica ninmi: ‘tucui crijcunapajpash Abrahanga taitami tucurca’ nishpa (Génesis 17:17; Romanos 4:11). b Chai cusahuarmica respetarishpa, imagutapash ali parlarishpa, imapash llaquicuna tiajpica randimandami ayudarin carca. Shinallata ishcandimi Taita Diosta ninanda juyaimanda rijsishcacuna carca.

 Sara huarmiguca paipa cusataca ninandami juyan carca. Paihuanmi Ur llactapi paicunapa familiapa ladollapi causanajurca. Shinapash asha tiempo jipaca ninandami llaquiyarca. Bibliapica ninmi, Sara huarmiguca huahuata charita na usharcachu nishpa (Génesis 11:30). Chai tiempopi gentecunapaca huahuata na chari ushanaca ninan pinganaimi carca. Shinapash Sara huarmiguca paipa cusatapash, Taita Diostapash ali cazushpami catirca. Abrahanba sobrino Lotca taita illaj caimandami Sarapa, Abrahanbaca shuj churi cuenda tucurca. Shina causanajujpimi shuj punllaca, paicunapa causaica na yashcapi cambiarca.

Chai punllaca Abrahanga cushijushcami Sarapaman rirca. Abrahanga pai imata ricushcataca na crijurcachu. Taita Diosmi shuj angelta utilizashpa paihuan parlashcarca. Chaita uyashpaca Sara huarmiguca Abrahanda ricushpami cashna tapushcanga: “¿Imatata nirca villahuai?” nishpa. Abrahanga tal vez Jehová Dios imatalla nishcata aliguta pensarishparami paipa huarmimanga villashcanga. Jehová Diosca cashnami nishcarca: “Cambaj llactata, cambaj familiacunatapash, saquishpa Ilujshi. Ñucami, can maipi causagrichumbash ricuchisha” nishpa (Hechos 7:2, 3). Shinami ña ashata tranquilo cashpa, Jehová Dios imata mandashcapi pensarinajurca. Paicunaca ali causaita saquishpami carpa huasicunapi caiman chaiman rishpa causagrinajurca. Shina causanamandaca Sara huarmiguca ¿imatashi nirca? Abrahanga ali alimi Sara imata nigrijujta ricujushcanga. ¿Sara huarmiguca Abrahanda apoyagrijurcacha?

Sara huarmiguca ¿imatashi ruragrijurca? Quiquinga cashnachari pensarijungui: “Jehová Diosca ñucanchicunataca Sarata, Abrahanda shina familiacunata saquichunga na mandashcachu” nishpa. Nachu ñucanchipash paicunashnallata ¿imatapash decidina canchi? Cunanbica ashtahuan charingapaj munaj gentecunapa, paicunapilla pensarishpa causajcunapa, charishca cosascunahuanmi seguro causanchi nij gentecunapa chaupipimi causanchi. Shinapash Bibliaca ninmi, ñucanchipa munaita pundapi churanapa randica, espiritual cosascunatara pundapi churashpa Taita Diosta cushichichun nishpa (Mateo 6:33). Sara imata rurashcata pensarishpaca cashnami tapurina canchi “¿ñuca causaihuanga imatashi rurasha?” nishpa.

Sara huarmiguca ringapaj imata apanata, imata na apanatami pensarijushcanga. Shuj shuj ladocunaman rigrijuimandaca alimi ricuna carca. Burropi o camellopi apai ushanatallami apana carca. Chaimandami huaquin cosascunataca jatuna o carana carca. Chai llactapi ali causana pushtuta, mercadocunapi granocunata randinata, aichata, frutacunata, ali ropacunata randinata, shuj cosascunata charinatapash saquishpami rigrijurca.

Sarapaca pai causajuj pushtuta saquinami ashtahuanbachaca llaqui carca. Arqueologocuna Ur llactapi tarishca huasicuna shina cashca cajpica Sara huarmiguca ali causaitami saquishpa rigrijushcanga. Chai llactapi huaquin huasicunaca 12 yali cuartocunata, yacu pugyucunata, yacu tanquecunatapashmi charirca.  Pobrella gentecunapa huasicunapash ali pircacunata, ali pungucunatami charirca. ¿Sara huarmiguca chai ali causaita saquishpa carpa huasicunapi causashpaca alichu causagrijurca? Chai llactacunapica shuhuacuna, leonguna, leopardo nishca animalcuna, lobocuna, osocunami tiarca.

Sara huarmiguca ¿pimanllata rijushcata villana carca? Taita Diosca mandarcami paipa llactata, familiata saquishpa richun. Chaica Sarapaca shinllimi cashcanga. Sara huarmiguca turicunata, sobrinocunata, tiocunata ninandami juyan cashcanga. Shinapash paicunataca cutinga ñana ricugrijurcachu. Shina cajpipash Sara huarmiguca Ur llactamanda ringapami segurashpa catirca.

Sara huarmiguca chai llactamanda ringapaca tucuitami ña listo charirca. Taré jarica casi 200 huatacunata charishpapash Sarahuan, Abrahanhuanmi rigrijurca (Génesis 11:31). Sara huarmiguca Taré mayorlla cajpi paita cuidashpami ocupada cagrijurca. Shinallata Lotpashmi paicunahuan rigrijurca. Jehová Diosca mandarcami: “Caldea shuti llactamanda Ilujshishpa” richi nishpa. Chai mandashcataca paicunaca cazurcami (Hechos 7:4).

Gulpi tandanajushcami Harán llactaman ri callarirca. Chaiman chayangapaca casi mil kilometrocunatami Éufrates yacuta catishpa rinajurca. Harán llactaman chayashpaca tal vez Taré irqui cashpa ñana ri ushajpimi chaipi asha tiempota quedashcanga. Taré runaguca 205 huatacunata charishpami huañurca. Chaicamanmi chai llactapi causanajurca. Chai llactamanda nara llujshijpillatami Jehová Diosca Abrahandaca cashna nirca, chai llactamanda llujshishpa. Ñuca mandashca llactamanmi chayana cangui nishpa. Ashtahuanbash Abrahanmanga cashnami nirca: ‘Canba miraimandaca, shuj jatun llactatami rurasha’ nishpa (Génesis 12:2-4). Harán llactamanda llujshishpaca Abrahanga 75 huatacunatami charirca. Cutin Sara huarmiguca 65 huatacunatami charirca. Paicunaca huahuacunataca na charircachu. Abrahanga ¿imashinata paipa miraimanda jatun llactata charigrijurca? ¿Shuj huarmitacha japigrijurca? Chai tiempopica tauca huarmicunata charinallami carca. Chaitami Sara huarmiguca pensarijun cashcanga.

Harán llactamandami ri callarin. ¿Picunallata paicunahuanga rinajun? Bibliapica ninmi, Abrahán, paipa familiacuna, tucui charishca cosascuna, “Harán pueblopi randishca runacunatapash pushashpami” rinajurca nishpa (Génesis 12:5). Paicunaca Abrahanba sirvijcunami cashcanga. Uyangapaj munaj gentecunamanga Abrahanbash, Sarapash paicunapa crishcamandami parlan cashcanga. Punda tiempopi traducishcacunaca ricuchinmi, judío tucushca gentecunapash Abrahanhuan, Sarahuan Jehová Diosta adorai callarishcata. Chaica Sarapa fe shinllipacha cashcamanda pai shujcunaman Taita Diosmanda parlashpa, Taita Dios imata cusha nishcatapash crichun ayudashcatami ricuchin. Cunan punllacunapica Sara shinlli feta charishcapi pensarinaca alimi can. Cunanbi gentecunaca fetaca na charinllu, Dios cusha nishcacunatapash na crinllu. Shinaca quiquin Bibliamanda yachajushpaca ¿nachu shujcunaman parlangapaj munapanguiman?

Éufrates yacuta yalishca jipaca, Jesús cai Alpaman shamungapaj 1943 huatacuna faltajpi 14 de nisanbimi, Jehová Dios carasha nishca alpacunaman ri callarishcanga (Éxodo 12:40, 41). Yuyapai, chai alpaman rijushpa Sara huarmiguca, ali pushtucunata, juyailla cosascunata ricushpa, alicachishpami rijushcanga. Siquem llacta ladolla Moré nishca quirucunata yalinajujpimi, Abrahanman cutin Jehová Dios ricurishpa cashna nirca: “Cambaj miraicunamanmi, cai llactataca carasha” nishpa. Caita uyashpaca Abrahanga ¿imashinashi sintirishcanga? “Mirai” shimita uyashpaca jardín de Edenbi Jehová Dios, Diablotaca shuj miraimi tucuchinga nishcatami yarishcanga. Abrahanmanga Jehová Diosca nishcarcami, canba miraimandaca cai Alpapi tucui gentecunata bendiciasha nishpa (Génesis 3:15; 12:2, 3, 6, 7).

Jipamanga Abrahanba familiatapashmi cai mundopi llaquicunaca japirca. Shuj ejemplota ricupashun, shuj punllaca Canaán llactapi ninan yarjai tiajpimi Abrahanga paipa familiandi Egipto llactaman rirca. Chaiman chayashpaca llaqui apagrijushcatami cuenta japirca. Chaimi Abrahanga Sarataca cashna nirca: ‘Ricui, cunanmi candaca juyaillaguta ricujuj huarmi cajta ricuni. Egiptopi causajcuna canda ricushpaca: ‘Paipa huarmimi’ nishpami ñucataca huañuchishpa candaca na huañuchinga. Cunanga canga ñucapa panimi cani ningui. Canmanda imapash ali llujshichun, shinallata canmanda ñuca causaita charingapami, chashna nina cangui’ nishpa (Génesis 12:10-13). Abrahanga ¿imamandashi shina nirca?

Huaquingunaca ninmi, Abrahanga manllaimandami shina llullashcanga nishpa. Shinapash Abrahanga na llullajurcachu. Sara huarmiguca taitamandalla paipa  panimi carca. Abrahanga imamanda shina ruranataca alimi yacharca. Paicunaca paicunamanda shuj mirai shamunata, paicunamanda Diosta sirvingapaj shuj llacta llujshina cashcataca alimi yacharca. Chaimandami Abrahanga paipa causaitaca ninanda cuidana carca. Arqueologocunaca nishcami, Egipto llactamanda mandajcuna cazada huarmicunata japishpaca, chai huarmipa cusataca huañuchin carca nishpa. Chaimi Abrahanga ali ali pensarishpa paipa huarmiguhuan imata ruranata parlashcanga. Sara huarmiguca humilde caimandami paipa cusata cazurca.

Egipto llactaman yaicushca jipallami Abrahán imata pensajushcacunaca pactarirca. Faraonba catij mandajcunaca Sara mayor cashpapash juyailla huarmigu cajtami ricurca. Faraonman villajpimi paica cashna mandarca, ñuca huasiman chai huarmita apamupai nishpa. Chaita uyashpaca Sara huarmiguca ninandami manllarishcanga. Abrahanbash ninanda preocuparishcami carianga. Paicuna imashina sintirishcataca yaitallapash na yai ushanchichu. Faraonba huasiman Sarata apashpaca ali alimi tratarca. Faraonga tal vez paipa tucui valishca cosascunata Saraman ricuchishpami, paipa huarmi tucuchun nishpa Sarapa turihuan parlangapaj munashcanga (Génesis 12:14-16).

Sarapi yuyapai, paica Faraonba huasi jahuamanda Egipto llactata ricujushcangami. Cutin juyailla huasigupi, mishqui micunata ricushpaca ¿imashinashi sintirishcanga? Ur llactapi causajushcatapash ashtahuan yali ali causangapaj ¿munarcacha? Sara huarmigu paipa cusa Abrahanda saquishpa, Faraonba huarmi tucujpica Diabloca ninandami cushijunman carca. Shinapash Sara huarmiguca na chaita rurarcachu. Paica paipa cusata, Taita Diostapash na saquingapaj munarcachu. Cunan punllapi cusahuarmicunaca Sarashna, Abrahanshna cashpaca alimi canman. Cunanbica cazarashca jahuami shujcunahuan rinlla. ¿Shinaca ñucanchi juyashca familiacunata, amigocunata ali tratangapaca Sarapa ejemplota cati ushanchichu?

Jehová Diosmi Sara huarmiguta cuidashcanga. Chaimandami Faraonda, paita sirvijcunatapash Jehová Diosca plagacunahuan llaquichirca. Sara, Abrahanba huarmi cashcataca Faraonga yachaj chayarcami. Chaimi Sarataca paipa cusapaman cachashpa, paipa tucui familiacunandi Egipto llactamanda richun mandarca (Génesis 12:17-20). Abrahanga paipa huarmiguta cutin ricushpaca ninandami cushijushcanga. Abrahanga cai shimicunataca ñami nishca carca: “Ricui, cunanmi candaca juyaillaguta ricujuj huarmi cajta ricuni” nishpa. Abrahanga Sara juyaillagu cashcamandallaca na juyarcachu. Sara huarmigu paipa shungu ucupi imashina cajtami juyarca. Chaitami Jehová Diospash alicachirca (1 Pedro 3:1-5). Tucuicuna Sara shina caita ushanchi. Chaipaca imatapash ashtahuan charinapa randica, ñucanchi causaipi espiritual cosascunatami pundapi churana canchi. Shinallata Taita Diosmanda ñucanchi yachajushcatami shujcunaman parlana canchi. Ashtahuanbash imapash tentacionguna ricurijpica, Tucuita Ruraj Diospa mandashcacunatami cazuna canchi. Shinami Sara huarmigupa feta ñucanchipash chari ushashun.