1. Desanimarishca cashpaca ¿imashinata sintiripanchi?

TUCUICUNALLATAMI cada punlla imapash problemacunata charishpa llaquilla sintiripanchi. Chaimi huaquinbica imata ruraita na atinaimanda desanimaripanchi. Shina sintirijujpica problemacunaca ashtahuan shinllimi tucun. Desanimarishpaca manllaihuan llaquillami sintiripanchi. Chaimi problemacuna ricurijpica imata ruraitapash na atinapanchi. Proverbios 24:10​pi nishcashnami can. Chaipica: ‘Imatalla rurana punllapi imata ruranata na munashpa [o na ushashpaca] ushai illajmi tucungui’ nijunmi.

2. a) ¿Imacunata desanimachita ushan? b) Caipica ¿imatata yachajupashun?

² Huaquinbica shuj shuj cosascunamandami desanimarita ushapanchi. Por ejemplo, juchayucuna caimanda, nali munaicunata charimanda o imapash ungüimandami llaquilla causapanchi. Shinallata ñucanchi munashca asignacionda na chasquishcamanda, gentecuna na uyangapaj munaj territoriopi villachishpapashmi desanimarita ushapanchi. Cai yachajuipimi ama llaquilla cangapaj imata ruranata yachajupashun.

3. ¿Imapita na yapata pensarina capanchi?

³ Juchayucuna cashcata yarishpa, nali munaicunata charishcapi yapata pensarishpaca Jehová Dios carasha nishca alpagupi causaitaca na usharingachu yashpa pensari callarinchiman. Shina pensarijunaca ñucanchipallatami nalipacha can. Tucuillacunami juchayucuna capanchi. Jesusllami jucha illaj can (Rom. 3:23). Pero Jehová Diosca ñucanchi pandarishcata yariaca na causanllu. Shinallata ñucanchicuna jucha illaj cachunbash na shuyanllu. Jehová Diosca juyaj, na ñapash culiraj Diosmi can. Ñucanchicuna ali cosascunata rurangapaj,  ama pandaringapaj esforzarijujtaca Jehová Diosca alimi yachan. Chaimandami Jehová Diosca ñucanchicunata siempre ayudangapaj munan (Rom. 7:18, 19).

4, 5. Deborahta, Mariataca ¿imashinata 1 Juan 3:19, 20​pi nishca shimicunaca ama llaquilla sintirichun ayudarca?

⁴ Cunanga Deborah, María panigucunamanda yachajupashun. * Deborah uchillagu cajpica paipa familiaca juyaihuanga na tratanllu carca. Alitami rurarcangui nitaca nimahora na ninllu carca. Shina viñaimandami imagupipash pandarishpaca imapash na sirvinichu nishpami pensarin carca. Cutin pani Mariapash casi shinallatami viñashca carca. Paipa familiaca alita ruraitapash na ushanguica nishpami Mariataca nimapa na sirvijtashna sintichin carca. Mariaca bautizarishca jipapashmi shina sintirin carca. Chaimi ali testigo de Jehová caitapash na ushanichu nishpa pensarin carca.

⁵ Llaquilla causanajushpapash chai panigucunaca Jehovata sirvinataca na saquircachu. Ama llaquilla sintirichunga ¿imata ayudarca? Paicunaca imashina sintirishcatami Jehovata mañashpa paipa maquipi saquirca (Sal. 55:22). Paicunaca imashina viñashcamanda llaquilla sintirinajujta Jehová Dios ali yachajtami cuenta japirca. Huaquinbica ñucanchicuna ali cashcataca na crinchichu. Shinapash Jehová Diosca ñucanchicuna ali cualidadcunata charijtaca alimi yachan. (1 Juan 3:19, 20, liingui).

6. Pipash cutin shuj viciopi urmashpaca ¿imashinata sintirin?

⁶ Shuj huauqui o shuj pani imapash viciota saquingapaj esforzarijushpapash cutin chai viciopillata urmashpaca llaquillapachami sintirita ushan. Shuj juchapi urmashpa llaquilla sintirina o culparijunaca normalmi can (2 Cor. 7:10). Shinapash ñucanchillata culparishpa “nimapa na sirvinichu, Jehová Diosca nunca na perdonahuangachu” nishpaca na pensarinachu capanchi. Shina pensarinaca Jehová Diosmandami caruyachita ushan. Proverbios 24:10​pica desanimarishca cashpaca fuerza illanshnami sintirita ushanchi nijunmi. Chaimi juchataiman rurashca cashpaca uchallami Jehovata perdonahuai nishpa mañana capanchi (Is. 1:18). Jehová Diosllami ciertopacha ñucanchicuna arripintirishcata ricushpa perdonanga. Shinallata ancianocunahuan parlapashunchi. Paicunami na culirashpa Jehovata sirvishpa catichun ayudanga (Sant. 5:14, 15).

7. Huauquipanicuna nali munaicunata saquingapaj esforzarijushpaca ¿imatata yarina can?

⁷ Nali munaicunata saquingapaj esforzarinajuj huauquipanicunamanga Francia  llactamanda Jean-Luc shuti anciano huauquica cashnami nin: “Jehová Diospaca justo gentecunaca na pandarijcunaca na canllu. Ashtahuangarin arripintirishpa, cambiangapaj esforzarijcunami justo gentecuna can” (Rom. 7:21-25). Shinaca nimapa na sirvinichu nishpaca ama pensapashunchichu. Juchayucuna caimandami tucuicunallata pandarinchi. Shinapash Jesús huañushcamandami Jehová Dios ñucanchicunata paipa ñaupapi ali ricurichun ayudan (Efes. 1:7; 1 Juan 4:10).

8. Llaquilla cashpaca ¿imatata rurana capanchi?

⁸ Llaquilla cashpaca huauquipanicuna ayudachun mañapashunchi. Huauquipanicunaca ñucanchita consolachingapaj, uyangapapash listomi can (Prov. 12:25; 1 Tes. 5:14). Nigeria llactamanda Joy shuti panigu desanimarishca sintirijushpa imata rurashcata ricupashunchi. Paica ninmi: “Congregacionmanda turiñañacuna na ayudahuashcajpica imachari tucuiman carcani. Paicunapa ayudata ricushpami Jehová Dios ñucata uyashcata cuenta japiparcani. Paicunami shujcunatapash ayudanata yachachihuashca”. Ñucanchicuna llaquilla cajtaca huauquipanicunaca na yachanllu. Chaimandami shuj huauquihuan o shuj panihuan imashina sintirishcata parlangapaj ñucanchillata mascana capanchi.

9. Salmo 41:3; 94:19​pi shimicunaca ¿imatata yarichin?

⁹ Jehovapa ayudata mascapashunchi. Irquilla cashpa o na jambirinalla ungüihuan cashpaca ali caitaca na usharinllu. Cunanbica ñucanchita jambingapaca Jehová Diosca na shuj milagrota rurangachu. Shinapash ñucanchitaca consolachishpa, llaquicunata aguantashpa catichunmi ayudaita ushan (Salmo 41:3; 94:19, liingui). Por ejemplo, Jehová Diosca ima minishtishcaguta randichun, huasipi imata rurana cajpipash ayudachunmi huauquipanicunata utilizaita ushan. Huauquipanicuna ñucanchihuan Jehová Diosta mañachunbashmi utilizaita ushan. Shinallata shamuj punllacunapi paraíso alpagupi sano cushilla causaita charinamanda parlaj textocunata yarichunbashmi ayudaita ushan (Rom. 15:4).

10. Huauqui Isang ama llaquilla sintirichunga ¿imata ayudarca?

¹⁰ Nigeria llactamanda Isang shuti huauquica shuj accidentetami charirca. Chaimi shuj doctorca cunanmanda vichaica ñana purita ushagringuichu nishpa villarca. Chaita uyashpami paica: “shungupi ninanda llaquirishpa desanimarishcapacha sintirircani” nin. Huauqui Isang ama shina sintirichunga ¿imata ayudarca? Paica ninmi: “Ñuca huarmiguhuan Jehovata mañanata, Bibliamanda yachajunataca na saquircanchichu. Shinallata shuj juyailla paraíso alpagupi causana oportunidadta Jehová Dios carashcamanda, shuj shuj cosascunata carashcamandapashmi agradecido cashcata ricuchingapaj esforzarircanchi”.

11. Panigu Cindy cushilla sintirichunga ¿imata ayudarca?

¹¹ México llactamanda Cindy panigutaca shuj doctorca na jambirinalla ungüitami charingui nishpami villarca. Chaita uyashpaca ¿imatata rurarca? Cada tratamientota rurangapaj rishpaca Bibliamanda villachingapami esforzarirca. Panigu Cindyca ninmi: “Bibliamanda shujcunaman villachinami ñucapa operaricionbilla, ñucapa nanaicunapilla ama yapata pensarichun ayudahuarca. Ñucaca caitami ruran carcani: Doctorcunahuan, enfermerocunahuan parlashpaca quiquingunapa familiaca alillachu can nishpami tapun carcani. Shinallata cai trabajotaca imashpata agllarcangui nishpami tapun carcani. Shinami paicuna munashca yuyaicunamanda parlaita ushan carcani. Doctorcuna, enfermerocunaca alichu cangui nishpaca pacientecunaca na tapunllu ninmi carca. Shina tapushcamandami pagui nishpa agradicihuan carca. Huaquingunacarin paicunahuan ashtahuan parlachun munaimandami  huasipa o celularpa numerota cuhuarca. Cai ungüihuan sufrijujpipash Jehová Diosmi cushilla sintirichun ayudahuashca” (Prov. 15:15).

12, 13. Imapash ungüita charishpa o mayorlla cashpapash villachishpa catingapaca ¿imatata rurai ushapanchi?

¹² Huaquin huauquipanicunaca imapash ungüita charishcamanda o mayorlla caimandami pundapishna ñana villachita ushashpa llaquilla, desanimado sintirishca. Shina cashpapashmi huaquingunaca villachishpa catingapaj esforzarishca. Estados Unidos llactamanda panigu Laurelca 37 huatacunatami paipa pulmón nali cashcamanda shuj maquinahuan respiran carca. Shinallata cáncer ungüitapashmi charirca. Paica tauca viajecunatami operarinapash tucurca. Chai jahuapash paipa aicha caragupica na jambirinalla shuj shuj ungüicunatami charirca. Shina sufrijushpapash chai paniguca villachinataca nunca na saquircachu. Paica paita ayudangapaj shamuj enfermerocunamanmi Jehovamanda villachin carca. Chai paniguca 17 gentecunatami Jehovata rijsichun ayudarca. *

¹³ Francia llactamanda Richard shuj anciano huauquica, villachingapaj na llujshij ushaj huauquipanicunamanga caitami nin: “Publicaciongunataca ricurinalla pushtucunapi churachunmi animapani. Shinami gentecuna ricushpa imashi nishpa tapujpica paicunahuan parlaita ushapashun. Shinami huasin huasin villachingapaj ñana llujshi ushashpapash huauquipanicunaca cushillapacha sintiringa”. Huasicunapi vicharishca cajcunapashmi villachishpa catita ushan. Paicunaca cartacunata escribishpa, telefonopi o celularpi cayashpami villachita ushan.

14. Rey Davidmandaca ¿imatata yachajupanchi?

¹⁴ Huaquinbica ñucanchi munashca asignacionda chasquingapaj munapanchiman. Shinapash na jambirinalla ungüita charimanda, mayorlla caimanda o shuj shuj llaquicunata charimandami na chasquita ushapanchiman. Chaimi llaquilla, desanimarishca sintirita ushapanchi. Shina sintirijushpaca rey Davidpa ejemplomandami yachajuita ushapanchi. Paica Taita Diospa templo huasita shayachingapaca ninandami munarca. Shinapash chaita rurachunga Jehová Diosca shujtami agllarca. Shujta agllajpipashmi rey Davidca templo huasita shayachichunga materialcunata, ashtaca orota, culquita cushpa ayudarca. Chaica ñucanchipaca shuj alipacha ejemplomi can (2 Sam. 7:12, 13; 1 Crón. 29:1, 3-5).

15. Shuj huauquica ama llaquilla cangapaca ¿imatata rurarca?

¹⁵ Francia llactamanda Hugues shuti huauquica shuj ungüita charimandami anciano  canatapash saquina tucurca. Irquilla caimandaca huasipica imagutapash na ruraita ushanllu carca. Paica ninmi: “Callaripica chai ungüita charimandaca nimapa na sirvij cuendami sintirircani. Pero tiempohuanmi usharishcagupi Jehovata sirvishpa cushilla sintiri ushashcata cuenta japircani. Jehovata sirvinataca nunca na saquishachu. Ñucaca Gedeonshna, paipa 300 soldadocunashnami shaijushca cashpapash ñaupaman catisha” (Juec. 8:4).

16. Angelcunamandaca ¿imatata yachajupanchi?

¹⁶ Angelcunapashmi ñucanchipaca shuj alipacha ejemplo can. Shuj viajeca Jehová Diosca Rey Acabhuanga imata rurashpashi ali canman nishpami angelcunataca tapurca. Chai angelcunaca tauca yuyaicunatami nirca. Pero shuj angelpa nishcatallami Jehová Diosca agllarca. Canba nishcami ali llujshinga nircami (1 Rey. 22:19-22). ¿Jehová Dios shina nijpica caishuj angelcunaca “yangami ñuca yuyashcata nishcani” ninajurcachu? Shina ninajushcataca nimaipi na ricupashcanchichu. Angelcunaca humildecuna caimandami Jehová Dioslla alabashca cachun munan (Juec. 13:16-18; Apoc. 19:10).

17. Ñucanchi munashca asignacionda na chasquishpaca ¿imatata ama desanimaringapaca rurana capanchi?

¹⁷ Testigo de Jehová cana, Jehovapa Reinomanda villachinaca shuj jatun bendicionmi can. Imapash privilegiocunata, shuj shuj asignaciongunataca na para siempre charita ushapanchichu. Shinapash Jehovapa, shuj huauquipanicunapa ñaupapica humildecuna canami valishcapacha can. Chaimi humilde cashpa catingapaj ayudahuai nishpa Jehovata mañana capanchi. Punda tiempopi Jehovata sirvij humilde gentecunamandapashmi Bibliapi yachajuna capanchi. Shinallata huauquipanicunata tucui shunguhuan usharishcagupi ayudapashunchi (Sal. 138:6; 1 Ped. 5:5).

18, 19. Gentecuna na uyangapaj munaj territoriopi cushilla villachishpa catichunga ¿imata ayudanga?

¹⁸ Gentecuna na uyangapaj munaj territoriopi villachishpaca desanimarita ushapanchi. Ama shina sintiringapaca ¿imatata rurashun? “ Cushilla villachishpa catichunga ¿imata ayudan?” nishca recuadropa yuyaicunamanda yachajuita ushapanchi. Shinallata imamanda villachina cashcatami ali yachana capanchi. Chaica ¿imatata ningapaj munan?

¹⁹ Taita Diospa shutimanda, paipa Reinomanda villachinami ashtahuan importante can. Jesús cai alpapi cashpaca huaquingunallami  quichiji ñanbica catinga nircami (Mat. 7:13, 14). Villachinajushpaca Jehovata, Jesusta, angelcunatapash ayudana bendiciondami charipanchi (Mat. 28:19, 20; 1 Cor. 3:9; Apoc. 14:6, 7). Jehová Diosmi paita sirvingapaj munajcunata paipa organizacionman pushamun (Juan 6:44). Shinaca pipash Jehovapa Reinomanda cunanbi na uyangapaj munashpapash shuj punllaca talvez uyangapaj munangami.

20. Jeremías 20:8, 9​pi nishca shinaca ama desanimarishca sintirichunga ¿imata ayudanga?

²⁰ Profeta Jeremiasmandapashmi yachajuita ushapanchi. Paica Taita Diosmanda nimamanda na uyangapaj munaj gentecunamanmi villachina carca. Jeremiastaca gentecunaca “punllandimi rimashpa” burlarin carca (Jeremías 20:8, 9, liingui). Llaquillapacha caimandami ñana ushanshna sintirirca. Pero villachinataca na saquircachu. ¿Imamandata na saquirca? Jeremiasca Jehovapa shimicunaca nina rupajunshnami ñuca shungupi tiajun nirca. Ñucanchicunapash Bibliapa yachachishcacunatami ñucanchi yuyaipi, ñucanchi shungupipash alichingapaj esforzarina capanchi. Chaipaca cada punllami Bibliamanda yachajuna, yachajushcapi pensarina capanchi. Shinami cushilla villachishpa catita ushashun (Jer. 15:16).

21. Desanimarishca cashpaca ¿imatata rurai ushapanchi?

²¹ Párrafo 4​pi parlashca panigu Deborahca: “Satanás Diablomi ñucanchicuna llaquilla causachun munan” nircami. Pero Satanasca Jehová Diosta mishaitaca na ushangachu. Ima llaquicunata charishcata, imashina sintirishcatapash tucuita Jehová Diosman villapashunchi. Ñucanchicuna nali sintirijujpi, nali munaicunata saquichun, ñucanchi munashca asignacionda na chasqui ushashpa llaquilla sintirijujpica Jehová Diosllatami ñucanchicuna imata rurachunbash ayudanga. Shinallata imapash ungüihuan cajpipashmi aguantashpa catichunbash ayudanga. Jehovapa Reinomanda na uyangapaj munaj territoriopipash cushilla villachishpa catichunbashmi ayudanga. Jehová Diospa ayudahuanga ñaupaman catishpa ñaña desanimarishunllu.