Testigo de Jehovacunaca huauquipanicunamandami preocuparin (1 Pedro 2:17). Kenia llactamanda Tannis panigushnami ñucanchicunapash sintirishcanchi. Paica cashnami nin: “Mundo enteromanda ñucanchi turiñañacuna ima pasajta yachanatami gushtani”. Tannis panigushna ¿imashinata millón testigo de Jehovacunaca ñucanchi huauquipanicunamanda chairalla llujshishca noticiacunataca yachaita ushan? Huata 2013​pimi jw.org paginapica noticia nishca parte llujshirca.

 Noticia nishca partipimi testigo de Jehovacunamanda parlaj informacionga llujshin, chaipica shuj shimicunapi llujshishca Bibliacunata villangapaj, llaqui apashca huauquipanicunata ayudashcata villangapaj, shinallata construccionba proyectocunata villangapami utilizan. Shinallata noticia nishca partipica huauquipanicuna paicunapa crishcacunamanda carcelpi churai tucushcacunata villangapapashmi utilizan. Villachina campañacunapi shinallata Conmemoración punllacunapi tiashca experienciacunatami villan. ¿Cai noticiacunataca picunata ruran? ¿imashinata ruran?

 Oficina de Información Pública Departamentoca noticiacunata ruranamandaca encargadomi can. Oficina de Información Pública Departamentoca jatun Betelpimi can. Chai departamentopi sirvij huauquicunataca Cuerpo Gobernantepi sirvij huauquicunami ricurianajun. Chai departamentopica 100 yali huauquipanicunami sirvin. Chai huauquipanipuracunamandaca voluntario huauquipanicunaca escritorcuna, investigadorcuna, artista visualta yachaj huauquipanicuna, shinallata traductorcunami can. Cutin shuj huauquipanicunaca gobiernopa funcionariocunahuan, noticiamanda yachaj maestrocunahuan shinallata prensamandacunahuanbashmi parlan. Mundo enteropi tiaj sucursalcunamanda Sección de Información Publicapi sirvij 80 yali huauquipanicunami Oficina de Informacion Publicapi sirvij huauquicunataca ayudan.

 Oficina de Información Pública y Sección de Información Publicahuanga shuj temata rurangapaca igualmi trabajan. Shuj temata agllashpaca investigaciongunata rurashpa, shuj shuj informaciongunatapash tandachishpami callarin. Huaquinbica chai temacunamanda alipacha yachajcunatami entrevistacunataca ruran. Chai jipami tucuilla minishtirishca informaciongunata tandachishpa chai temataca escribi callarin, editashpa, alichishpa, fotocunata llujchishpami Comité de Coordinadorpi Sirvij Huauquicuna aprobachun cachan.

 JW.ORGpi llujshishca noticia partemandaca huauquipanicunaca ¿imatata yuyan? Filipinas llactamanda Cheryl paniguca cashnami nin: “Tutamanda jatarishpaca testigo de Jehovacunapa organizacionmanda noticiata liinatami ninanda gushtani”.

 Ashtacacunaca jw.org paginapi llujshishca noticiacunahuan shuj noticiacunahuan ricujpica diferentepachami can ninmi. Kazakhstanmanda Tatianaca cashnami nin: “jw.org paginapi noticiacuna cierto cashcamandami chai noticiacunata liinataca ninanda gushtani”. México llactamanda Alma paniguca cashnami nin: “Telepi, radiopi llujshishca noticiacunaca nali noticiacunami can. Cutin jw.orgpi llujshishca noticiacunaca ali noticiacuna caimandami ñucanchitaca animan”.

 Noticia partepi llujshishca informaciongunaca cabalguta villaimandami ñucanchi fetapash shinlliyachin. Kenia llactamanda Bernardca cashnami nin: “Sección Noticiacunaca maijan llactamanda cajpipash huauquipanicunata ashtahuan rijsichunmi ayudahuashca. Jehovata mañashpaca paicunapaj shutipipashmi mañani”. Kenia llactamanda Bybron paniguca cashnami nin: “Shuj shuj shimipi Biblia llujshishca noticiacunata liishpaca ninandami cushijuni, chaita ricushpami Jehová Diosca na ñavita ricushpalla agllaj cashcata yachajuni”.

 Catiriashpa llaquichi tucushca huauquipanicunamanda noticiata liinapashmi ñucanchitaca ninanda ayudan. Kenia llactamanda Jackelineca cashnami nin: “Catiriashpa llaquichi tucushca huauquipanicuna aguantashpa catijta ricushpami ñuca fepash ashtahuan shinlliyan. Huauquipanicuna aguantashpaca catichunga Jehová Diosta mañana, Bibliata liina, canticocunata yachajunami espiritualmente shinlli cachun ayudashcata yachajushcani”.

 Costa Rica llactamanda Beatriz paniguca llaqui tiashcacunamanda parlaj temacunata liinatami gushtan. Paica ninmi: “Llaqui apashca huauquipanicunata Jehovapa organización imagutapash rurashpa ñapash juyaihuan ayudajta ricuchunmi sección Noticiacunaca ayudahuashca. Chaita ricunami Jehová paipa organizacionda ñaupaman pushajujta tucui shunguhuan crichun ayudahuashca”.

 Mundo enteropi huauquipanicunamanda noticiacunata yachaimandami ninanda agradicinchi. Huauquipanicunamanda noticiacunataca donate.pr418.com paginapi obra mundialpa carashca contribuciongunahuanmi rurai usharishca. Quiquingunapa carashca contribuciongunamandaca ninandami agradicinchi.