Jehová Diosca gulpi gentecuna paimanda y paipa gobiernomanda yachajuchunmi munan (1 Timoteo 2:3, 4). Chaimandami tucui gentegucuna y sordo gentegucunapash Jehovamanda yachajui ushachunga testigo de Jehovacunaca ashtaca Bibliacunata y Bibliata yachajungapaj shuj publicaciongunatapash rurashca. Ñucanchi organizacionga ashtaca publicaciongunatami señaspi videocunata llujchishca, a chai videocunaca 100 mil yali shuj shuj señascunapimi tian. Cai publicaciongunataca ¿imashinata ruranchi? Ñucanchi huauquipanicunamanga ¿imashinata cachanchi? Cunan punllacunapica ¿imashinata señaspi publicaciongunataca ruran?

 Señaspi publicaciongunataca mundo enteropi tiaj equipocunami traducin. Cada equipomi publicaciongunata imashna traducinataca ricun. Jipaca señaspi intindirinallatami traducin. Publicacionda traducishpa tucuchishpaca videota rurashpami graban. Cunan punllacunapi señaspi Bibliamanda yachajungapaj ayudacunataca, 60 equipocunami traducishpa siempre ayudan, cutin 40 equipocunaca huaquinbillami ayudan.

 Punda tiempocunapi videocunata señaspi ruranaca valishcami carca. Videota rurangapa camaracuna shuj aparatocunapash valishcami carca. Shinallata videocunata grabangapaj cuartocunataca ñucanchillatami ruran carcanchi. Señaspi videocunata grabangapaca 30 mil yali dolarcunami minishtirin carca.

 Contribución culquiguta aliguta utilizangapami ñucanchi organizacionga imacunapilla ashtahuan mejoranata ricushca. Cunanbi aparatocunaca ashtahuan baratollami can. Chaimi chai aparatocunata utilizanchi. Grabangapaj cuartocunata utilizangapaj randica traductorcunaca paicunapa oficinapillatami shuj verde telaguta churashpa videocunataca grabaita ushan. Shuj publicacionda grabachun shuj shuj huauquipanicunata minishtijpica paicunapa huasimandallata o paicunapa oficinamandallatami grabaita ushan.

 Shinallata traductorcuna señaspi grabachun ayudangapami shuj shuj programacunata rurashcanchi. Chai cambiocuna tiaimandami señaspi traducijcunaca asha tiempopilla publicaciongunataca llujshita ushashca. Cai cambiocunamandami ashtaca huauquipanicunaca ninanda agradicin. Alexander huauquica cashnami nin: “Cunanbica señaspi videocunaca ashtahuanmi tian. Cada punllami videocunataca ricuni. Cushillapachami sintirini”.

 Cunan punllacunapi señaspi traducingapaj equipocunaca menos de 5 mil dolarcunami valin. Chaimandami señaspi videocunataca shuj shuj señascunapi ruraita ushashcanchi.

 Shuj publicacionda señaspi grabashca jipaca minishtij huauquipanicunamanmi cachan. Punda tiempocunapica videocasete, CD nishcacunapimi ruran carcanchi. Chaicunata rurangapaca ashtaca tiempo, culquimi minishtirin carca. Grabashcacunata ashtahuan mirachichunga shuj empresamanmi cachan carcanchi. Chaicunata rurashca jipami videocasete, CD nishcacunataca congregaciongunaman cachan carcanchi. 2013 huatapillami CDpi señas videocunata rurangapaca 2 millones yali dolarcuna gashtarirca.

 Sordogucunaca señaspi videocunata charishcamandami ninanda cushijurca. Shinapash casete, CDcuna ashtahuan miraimandami videocunata ricunaca na fácil carca. Huaquinbica Bibliapa shuj librotalla grabangapami ashtaca CDcunata minishtin carcanchi. Brasil llactamanda Gilnei huauquica cashnami nin: “Bibliapa shuj textota liingapaj munashpaca maijan casetpi video tiajujtarami mascana carcanchi y jipami textotaca mascan carcanchi. Chaita ruranaca dificilmi carca”. Rafayane panica señaspi CDcunata imashna utilizashcata yuyarishpaca cashnami nin: “Estudio personalta charinaca yapa shaijuimi carca. Bibliapa textocunata o referenciacunata mascangapajllami yapata demoran carcani”. Ñucanchi huauquipanicuna predicacionman llujshishpaca videocasete, CD apashpami rin carca. Pipash yachajungapaj munajpica paicunapa telepillatami ricuchin carca. Huaquin huauquipanicunaca predicacionman llujshishpaca paicunapa propio computadorata apashpami rin carca. Estados Unidospi causaj Boddy huauqui cashnami nin: “Shuj textota ricuchishca jipa ashtahuan textota ricuchingapaj munashpaca shuj CDtami cambiana carcanchi. Chashna ruranaca yapatami demoran carca. Chaimandami Bibliamanda aliguta parlanaca difícil carca”.

 Jehovapa organizacionga 2013 huatapimi JW Library Sign Language aplicaciondaca llujchirca, chai aplicacionmandami señaspi videocunata huauquipanicunaca telefonopi, tabletpi descargaita usharca. Primeroca, cai aplicacionga señas americano nishcapillami tiarca. 2017 huatapimi JW Library Sign Language aplicaciondaca tucui señascunapi tiachun actualizarca. Chaita yachashpami mundo enteromanda huauquipanicunaca cushilla sintirirca. Brasil llactamanda Juscelino huauquica cashnami nin: “Sordo gentegucunata Cuerpo Gobernantepi sirvij huauquicuna imashna juyajtami ricupashcani shinallata paicunaca ñucanchicunaca espiritualmente Jehovamanda ashtahuan yachajushpa catichunmi munan. Cai aplicacionga Bibliamanda ashtahuan yachajuchunmi ayudahuashca. Cushillapachami sintiripani”.

 Cunan punllacunapica señas videocunataca tabletpi, celularpi charichunmi ruranchi, señaspi videocunataca jw.org paginapi shinallata JW Library Sign Language aplicacionbimi ricuita ushan. Cunanbica asha punllacunapillami señaspi publicaciongunataca traducishpa, grabashpa llujchita ushanchi. Shinallata shuj idiomacunapi ashtaca publicaciongunata llujchinshnallatami ashtaca señascunapipash publicaciongunataca llujchin.

 Sordo huauquipanigucuna ima nijta ricupashun. Klízia paniguca cashnami nin: “Sordo gentegucuna Taita Diosmanda fácil yachajuita ushachunga maijan organizacionbash na ayudashcachu, solo Jehovapa organizacionllami sordo gentegucunamandaca preocuparishca”. Vladimir huauquica cashnami nin: “Videocunata ricushpaca Jehová Dios rinri uyajcunamanda preocuparinshnallatami sordo gentegucunamanda preocuparijta ricushcani”.

 Señas videocunapica cashnami nin: “Cashna publicaciongunahuanmi mundo enteropi gentecunaman Bibliata gratis yachachipanchi. Cashna publicacionguta rurachunga gentecunallatami paicunapa munai culquiguta cushpa ayudan”. Donate.pr418.com paginaman yaicushpa contribuciongunata carashcamandami ninanda agradicipanchi. Cai contribución culquiguhuanmi tucui gentegucuna shinallata sordo gentegucunapash Bibliata charichun y Bibliamanda ashtahuan yachajuchun ayudacunatapash ruranchi.