Cai huataca, ninanda cushijushpami testigo de Jehovacunaca Jesús villachishca ali villaicuna Episodio 1 video llujshichun shuyanajupashcanchi. Chai videotaca, ñami tauca millón gentecuna ricupashcanchi. Pero na solo episodio 1llachu tiapan. Sino 18 episodiocunami tiapan. Episodiocunapa shuj shuj videocunata grabangapaca ¿imashinata huauquipanicunaca shinllita trabajanajun? Chai videocunata grabachunga ¿imashinata tucuicunallata ayudai ushapanchi?

 Australasia sucursalpimi, Jesús villachishca ali villaicuna videopa ashtaca partecunataca grabanajun. Cada parteta grabangapami, más o menos 50 a 80 huauquipanicuna apoyanajun. a Actorcunaman y grabanajuj huauquicunamanga tauca huauquicuna, panicunami almuerzota, meriendata y refrigerio nishcagutapash caranajun. Ima micunaguta caranataca, ashtaca tiempo de anticipacionhuanmi planificanata yachan. Departamento de Servicios de Alimentospi ayudajuj Ester paniguca ninmi: “Micunataca shuj shuj proveedorcunatami randinata yachanchi. Shinami ali calidadta y bajolla preciopa micunataca randinata yachapanchi” ninmi. Shinallata ninmi: “Ama yapa desperdiciocuna llujshichunga, cutin cutin revisashpa, aliguta ricushpami recetacunataca ruranchi” ninmi. Cada punllami más o menos 4 dólares por cada persona gashtaripan.

 Pero actorcuna y grabanajauj huauquicunaca na solo micunatallachu minishtin. Sino cuidachunbashmi minishtin. ¿Imashpata cuidachunbash minishtin? Australia llactaca cunu cunu llactami can. Punllacunaca ushashca calormi tucunata yachan. Cielopash azul azulmi can. Indipash fuerte fuertemi can. Chaimi radiación ultravioletapash yapa alto can. Chaimandami ama yapa tiempota indipi cangapaj y calormanda ama yapata shaijungapaca, asistentes de produccionbi apoyanajuj huauquicunaca carpacunata shayachin, estación de enfriamientocunata churan. Protector solarcuna, sombrillacuna y yacu ama faltachunbash pendientecuna canata yachan. Servicios de Audio y Videopi trabajajuj huauqui Kevinga ninmi: “Asistentes de produccionbica, la mayoriami voluntarios externos de Betel huauquipanicuna apoyanata yachan. Chai huauquipanicunaca, chai trabajocunatapash y shuj trabajocunatapash humildemente, cushijushpami ruran. Paicuna apoyajpimi grabashpa catita ushapanchi” ninmi.

 Huaquin partecunaca, punda tiempo pushtucunashnami ricurina can. Chaimi sucursalpillata grabaitaca na ushapanchi. Sucursal canllaman o shuj estudio de grabacionbi grabanami minishtirin. Shina pasajpica, tucuilla minishtirishca cosascunahuanmi chaicunaman rina tucunchi. Bibliapi nijushca punda tiempo partecunata grabangapaca, micha postecuna illa, pavimentashca ñanguna illa y moderno huasicuna illa pushtucunatami mascana tucupanchi. Ña tarishpaca, actorcunatapash y grabagrinajuj huauquicunatapashmi chaicunaman apana capanchi. Actorcuna churajuna ropacunata, grabangapaj minishtirina cosascunata y equipocunataca empacashpami grabagrijuj pushtucunaman apapanchi. Chai jipaca seguro pushtucunapimi huacaichina capanchi. Grabación nara callarijpillatami, coordinador de asistentes de produccionga micha generadorcuna listo cachun, limpio yacu tiachun y samana pushtugu tiachunbash pendiente can. Actorcuna y grabagrinajuj huauquipanicunaca, chai sectorpi Testigocunapa huasicunapi, causangapaj acomodashca jatun trailercunapi, hotelcunapi o uchilla cuartogucunapimi puñungapaca acomodarina tucun.

 Sucursal canllaman grabangapaca ashtaca culqui, tiempomi minishtirin. Shaijushcapash shaijushcami can. Chaimandami Cuerpo Gobernanteca, año 2023​pica, jatun jatun pantallata randichun autorizacionda curca. Chai jatun pantallaca 2 millón y medio dolarcunami valirca. Chai jatun pantallahuanga shuj ladocunapi grabajunshnallami ricurin. Imagenguna, sonidocunaca claro claro, punchallagumi llujshin. Shinami, shuj ladocunaman rishpa grabana gastocunataca ahorrapashcanchi. Australasia Comité de Sucursalpi sirvijuj huauqui Darrenga ninmi: “Jatun pantallahuan grabajpimi actorcunapash na yapata shaijun y grabanajuj huauquicunapash ali llujshingacaman cutin cutin grabaita ushan. Por ejemplo, indi pacajuj escenacunata grabajushpaca, asha minutocunapillami uchalla grabana carca. Pero cai jatun pantallahuan grabajushpaca, indi pacajuj escenataca ali llujshingacamanmi cutin cutin grabaita ushapanchi” ninmi.

 Jesús villachishca ali villaicuna videopa cada episodiocunata grabangapaca, ashtaca ashtaca actorcuna y grabanajuj huauquipanicunami minishtirin. Paicunata aliguta cuidangapaca, shuj huauquipanicunaca ninandami esforzaripashca. Shina cuidanajushcamandaca ¿imashinata chai huauquipanicunaca sintirishca?

 Amber shuti paniguca Melbourne shuti llactapimi causan carca. Paica chai videota grabana proyectopi apoyangapaj munaimandami, 700 kilometrocuna yalita rishpa apoyangapaj chayarca. Cai proyectopi apoyajushcamandaca ¿imashinata sintiripangui? nishpa tapujpica paica nircami: “Aeropuertoman chayashca ratomandapachami Betelmanda huauquicunaca ninanda ñucataca cuidanajuhuashca. Ashtaca betelitacunaca micungapaj o cafeguta ufiangapami invitahuashca. Grabación pushtupica tucuicunallatami cushilla, ali sintiripashcanchi. Caiman apoyangapaj shamunaca shuj jatun bendicionmi capashca, na imapash shinlli sacrificiochu capashca” ninmi.

 Equipo de produccionbi trabajajuj huauqui Derekca ninmi: “Ashtaca departamentocunapi trabajanajuj huauquipanicunami callarimandapacha ayudanajushca. Mundo enteropi huauquipanicunaca paicunapa charishca cosascunahuan, tiempohuan y paicunapa fuerzahuanmi cai proyectopica apoyanajushca. Paicunaca juyashpa, apoyana munaihuanmi apoyanajushca. Jehová Diosca paicunatapash y ñucanchicunatapashmi bendiciajushca. Jehová Diosca ali grabashca videocuna llujshichun y ñucanchicunapash cada uno ñucanchipa trabajota aliguta rurai ushachunmi tucuicunatallata cuidariajushca” nin.

 Quiquinguna cushca contribución culquigucunahuan, shinallata internetpi donate.pr418.com. direccionbi cushca donaciongunahuanmi, Jesús villachishca ali villaicuna videocunataca ruranajupashcanchi. Quiquinguna shina ayudanajushcamandaca tucui shunguhuanmi agradicipanchi.