2020 huatapa Quimsa Punlla Jatun Tandanajuitaca primera vezmi grabashpa, internetpi churarcanchi. Shinapash Malaui, Mozambique llactamanda huauquipanicunaca jatun tandanajuitaca internetta na utilizashpallami ricuita usharca. ¿Imashnata chashnaca ricuita ushashcanga?

 Comité de Coordinadorespi sirvij huauquicuna, shinallata Comité de Enseñanzas del Cuerpo Gobernantepi sirvij huauquicunami Malaui y Mozambique llactapi jatun tandanajuita telepi, radiopi yalichichun aprobarca. ¿Imamandata jatun tandanajuitaca telepi, radiopi yalichichun aprobanaca minishtirishca carca? Malaui llactapi internetta churanaca valishcami can. Chaimandami huaquin huauquipanicunalla internetca charin. Malaui llactapi Comité de Sucursalpi sirvij huauqui William Chumbica cashnami nin: “Malaui llactamanda huauquipanicunaca jatun tandanajuitaca telepi, radiopi yalichijpillami ricuita ushana carca”. Luka Sibeko huauquipash cashnami nin: “Telepi, radiopi na yalichijpica huaquin huauquipanicunallami jatun tandanajuitaca ricuita ushanman carca”. Shinallata Mozambique llactamanda huauquipanicunaca jatun tandanajuita ricungapaca huaquingunallami shuj celularta o tablettaca randita ushanman carca.

 COVID-19 unguimandami congregacionba tandanajuitaca telepi, radiopi ña yalichinajurca. a Ñucanchi huauquicunaca telepi, radiopi trabajajcunataca ñucanchi jatun tandanajuita yalichichunmi mañarca.

 Malaui llactapica ñucanchi huauquicunaca shuj jarcaitami chimbapurarca. Imagutapash telepi, radiopi yalichingapaca casi siempremi shuj horastalla parana carca. Telepi, radiopi trabajajcunaca imapash programacunata shuj horas yalita churajpica, gentecunaca na uyangapaj munangachu nishpami yuyan. Shinapash ñucanchi huauquicunaca ñucanchi programacunaca gentecunata ayudangapami can nishpami intindichirca. Cai pandemia punllacunapipashmi Bibliamanda ali villaigucunata gentegucunamanga villachinajushcanchi. Shinami ali gentecuna cachun, shinallata familiapipash cushilla cachun ayudanajushcanchi. Gentecunata ayudangapaj cashcata yachashpami telepi, radiopi trabajajcunaca jatun tandanajuita yalichichunga ari nirca.

 Malaui llactapica jatun tandanajuitaca telepi, radiopimi yalichirca. Telepi, radiopi yalijujtaca Malaui llactamanda millón gentecunami uyaita ushan. Mozambique llactapica telepica shuj canalpillami jatun tandanajuitaca yalichirca. Cutin radiopica 85 emisorapimi yalirca.

 Malaui y Mozambique llactacunapica 28 mil 227 dolarcunatami jatun tandanajuita telepi yalichingapaca gashtarca. Cutin radiopi yalichingapaca 20 mil dolarcunami gashtarirca. Huaquin llactacunapilla radiopa emisora uyarichunga 15 dolarcunallami valirca. Cutin Malaui llactapa tucui llactacunapi radiopa emisora uyarichunga 2 mil 777 dolarcunami valirca.

 Ñucanchi huauquicunaca carashca culquiguta imapilla utilizanatami aliguta ricurca. Por ejemplo, Malaui llactapica telepi, radiopi yalichingapaca baratolla preciopi, shinallata 30% descuentohuanmi tarirca. Chashna descuentocunahuan tarimandami mil 711 dolarcuna ahorrarirca. Mozambique llactapica testigo de Jehovacuna na llullacuna cashcata, shinallata puntual pagan cashcata yachaimandami jatun tandanajuita telepi, radiopi yalichichunga preciota rebajarca.

 Ñucanchi huauquipanicunaca jatun tandanajuita telepi, radiopi ricuita uyaita ushashcamandaca ninandami cushijurca. Malaui llactamanda Patrick anciano huauquica cashnami nin: “Cuerpo Gobernantemanda huauquicuna cai pandemiapipash ñucanchita ayudashcamandaca ninandami agradicinchi”. Malaui llactamanda Isaac huauquipash cashnami nin: “Tabletta, computadorata na charishpapash jatun tandanajuita Jehovapa organización radiopi uyachun ayudashcamandaca ninandami agradicinchi. Chashna rurashcamandami jatun tandanajuitaca tucuilla ñuca familiapash uyaita usharca. Jehová paipa llactata ninanda juyajtami ricurcanchi”.

 2020 huatapimi Mozambique llactamanda shuj publicadorca jatun tandanajuitaca primera vez charirca. Paica ninmi: “Telepi jatun tandanajuita ricui ushashcamandaca Taita Diosca ninan ushaita charishcatami yuyarcani. Cai pandemiapash ñucanchi huasillapita espiritual micunaguta Jehová Dios carachunga na jarcaita ushashcachu. Taita Diosta sirvijcunaca tucuicuna juyarin cashcatami ricurcani. Ciertopacha Taita Diosta sirvin cashcatapashmi cuenta japircani”.

 Wyson anciano huauquica cashnami nin: “Aliguta cazushpa, aliguta yarishpa sirvij esclavotaca cai pandemiapi cuidashcamandaca ninandami agradicingapaj munapani. Ñucanchi causajuj llactaca pobre pobremi can. Chaimandami ashagutalla charinchi. Shinapash jatun tandanajuita radiopi, telepi ricushcamandami ninanda cushijunchi”.

 Comité de Coordinadorespi sirvij huauquicuna, shinallata Comité de Enseñanzapi sirvij huauquicunaca cutinmi 2021 huatapipash jatun tandanajuita telepi, radiopi huaquin llactacuna ricui ushachunga arreglocunata rurarca. Telepi, radiopi jatun tandanajuita yalichichunga ¿ima culquihuanda pagan? donate.pr418.com paginaman yaicushpa obra mundialpa cushca contribución culquiguta utilizashpami pagashcanchi. Shina carashcamandaca ninandami agradicipanchi.