Cada quillami, shuj shuj programacunata, JW Broadcastingbi llujshishca videocunata ricungapaj cushijushpa shuyapanchi. Shinapash África llactamanda huauquipanicunaca cai videocunataca internetpica na ricuita ushanllu. Cai videocunataca ¿imamandata internetpica na ricuita ushan?

 Internetca África llactapica na aliguta japinllu. Chaimi internet tiashca pushtupipash yapa lento, o internetta churanaca yapa valishcami can. Shuj punllaca Madagascar llactamanda superintendente de circuitoca, internetta charij localpi JW Broadcastingba shuj videota descargangapaca 16 dolarcunatami pagarca. Chai 16 dolarcunataca huaquin gentecunallami semanapica ganaita ushan.

 Internet valishca cajpipash, África llactamanda ashtaca gentecunami cunanbica JW Broadcasting programataca internet na utilizashpalla ricuita ushan. Internetta na charishpapash ¿imashinata videocunataca ricuita ushan?

 2017 huatamandapachami África subsahariana llactapi causajcunaca satélite nishcata utilizashpa JW Broadcasting programataca ricuita ushashca. JW Broadcasting programataca 16 shimicunapimi cada punlla telepica ricuita ushan.

 Satélite nishcata utilizashpa JW Broadcasting programacunata tucuicuna ricui ushachunga, testigo de Jehovacunaca telepa canaltami alquilan. Satelitepa señalca África subsahariana llactapa 35 llactacunamanmi chayan. Cai programata telepi yalichingapaca 12 mil dolarcunami cada quilla valin. Huaquinbica chai rato imagutapash shuj canalpi yalichingapaj munashpaca ashtahuanmi valin. Chashna ruraimandami ashtaca gentecunaca quimsa punlla jatun tandanajuita, shinallata Cuerpo Gobernante cachashca huauquipa discursotapash uyaita ushan.

 Cai programataca tucui gentecunami telepi ricuita ushan. Shinapash huaquin huauquipanicunaca teletaca na charinllu. Chaimi 3.670 tandanajui huasicunapi satelitepa señal chayachunga antenacunata, shujta minishtirishca cosascunatapash churashca. Chaimi huauquipanicunaca JW Broadcasting programataca tandanajui huasipi ricuita ushan. Tandanajui huasipi teleta o shuj proyectorta charijpica, satelitepa señalta churanaca 70 dolarcunami valin. Chai cosascunata na charishpaca 530 dolarcunami valita ushan.

 Huauquipanicunaca JW Broadcasting programata telepi ricui ushaimandami ninanda agradicin. Camerún llactamanda shuj anciano huauquica: “Ñuca familiapaca cai programata telepi ricunaca, chaquishca pambapi manata tarishcashnami can” ninmi. Nigeria llactamanda Odebode huauquica ninmi: “JW Broadcasting programata ricungapami, semanapi quimsa viajeta ñuca familiahuanga tandanajunchi. Ñuca huahuacunaca chai punllacuna chayachunga cushijushpami shuyan. Huaquinbicarin chai programata shuj punllacuna churachunmi mañan”. Nigeria llactamanda Rose panigupash cashnami nin: “Pundapica noticiacunatami yapata ricun carcani, cunanbica JW Broadcasting programata ricushpami ninanda cushijuni. Pundaca noticiacunata ricushpaca jaicatami culiran carcani. JW Broadcasting programapi ali yuyaicunatami yachachin, chaimi tranquila sintirini. Chai programaca Jehovapa bendicionmi can”.

 Mozambique llactapa superintendente de circuitoca, tandanajui huasicunapi JW Broadcasting programata ricungapami, satelitepa señal chayachun antenata shuj minishtirishca cosascunatapash churashca ninmi. Huauquipanicunaca JW Broadcasting programata ricungapami, shuj horas faltajpillata tandanajuimanga rin.

 Johannesburgopica huata 2019​pimi, shuj Asamblea Internacional tiarca. Chai tandanajuipi Cuerpo Gobernantepa cushca discursocunataca 9 pushtucunapimi cai canalta utilizashpa uyaita usharca. Sudáfrica llactapa Betelpi Departamento Local de Broadcastingbi sirvij Sphumelele huauquica cashnami nin: “Pundaca cai discursocunataca internetta utilizashpami ricuchin carcanchi. Chaita rurangapaca aliguta japij internetta charina carcanchi o internetta charingapaca saldotami churachina carcanchi. Shinapash cunanbica satélite nishcata utilizashcamandami ashtahuan baratolla llujshishca.

 Contribución culquiguhuanmi África llactamanda huauquipanicunaca satélite nishcata utilizashpa JW Broadcasting programata, shuj videocunatapash ricuita ushashca. Obra mundialpa cushca contribución culquigumanda, shinallata donate.pr418.com paginaman yaicushpa cushca culquigumandapashmi agradicipanchi.