Cunan punllacunapica “shuj shuj pushtucunapi guerracuna tiajtami uyanchi” (Mateo 24:6). Ashtaca huauquipanicunami guerracunamanda shuj shuj llaquicunata charin. Shinapash paicuna minishtijuj horasmi Jehová Diosca ayudan. Ucrania llactapi guerramanda llaqui apashca huauquipanicunata ayudangapaj Ucrania llactapa ladolla llactacuna labores de socorrota rurajujtami 2022​pi Cuerpo Gobernantemanda mushuj villaicuna #3​pica villarca. Ucrania llactapi guerra tiajpipash ¿imashinata ñucanchi huauquipanicunataca ayudanajupanchi? Ucrania llactamanda huauquipanicuna paicunata ayudajujta ricushpaca ¿imashinata sintirin? Ucrania llactamanda huauquipanicunaca ¿imacunatallata minishtin?

 Ucrania llactapi 24 de febrero de 2022​pi, guerra callarishca punllapillatami Comité de Coordinadores sirvij huauquicunaca Ucraniamanda huauquipanicunata imashna culquihuan ayudanatami ricunajurca. Ucraniamanda sucursalca minishtirishca cosascunatami randi callarirca y chai cosascunataca Comité de Socorropi sirvij huauquicunami saquingapaj rirca.

 Shinallata Central Mundialmanda huauquicunaca Ucrania llactapa sucursalta imashna ayudatami ricunajurca. Cómite de Coordinadores y Publicación del Cuerpo Gobernantemanda huauquicunaca Departamento mundial de compraspi sirvij huauquicuna Polonia y Ucrania llactamanda sucursalpi sirvij huauquicunahuan imacunatalla ruranata ricuchun nishpami tandanajuchun nirca. Cada punllami departamento de compras, de Envíos y Asuntos Legalespi sirvij huaquin huauquicunaca Comité de Sucursal de Ucraniamanda shuj huauquihuan shinallata Departamento Mundial de Compraspi sirvij huaquin huauquicunahuanmi imata ruranata ricungapaj tandanajun carca.

 Departamento Mundial de Compraspi sirvij Jay Swinney huauquica cashnami nin: “Primeroca, huauquipanicuna imacunatalla minishtijtami yachana carcanchi, micunacunata, aseopa minishtirishca cosascunatami carangapaj munarcanchi. Chai cosasgucunataca uchallami Ucrania llactaman cachangapaj munarcanchi”.

 9 de marzo de 2022​pica, imacunatalla cachanata ñami ali yacharcanchi. Micunata cachangapaj cartonbica porututa, arrozta, jabonda, papel higuienicota shuj shuj cosascunatapashmi churashcanchi. Por persona calculashpaca cada unomandami 65 dolarcunashnami micunacunapica gashtarijurca. Cashna micunagucunataca ashtaca ashtaca huauquipanigucunami minishtigrinajurca chaimandami Comité de Coordinadorespi sirvij huauquicunaca ashtaca culquita gashtachun aprobarca. Chai micunacuna imapash na tucushpalla chayachunga ¿imatata rurana carcanchi?

 13 de marzotami Poloniamanda ishcai huauquicunaca shuj pruebata rurarca, sucursal de Poloniamandapachami micunataca Ucraniapa Leópolis llactapa shuj almacenman carropica cacharca. Chaita rurangapaca sucursal de Ucraniamanda, Poloniamanda huauquicunami ayudarca. Micunata apaj carrocuna fronterata sin problema yalichunmi huauquicunaca tramitecunata rurarca. Shinallata Ucraniaman ña chayashpaca almacenman uchalla chayangapaj maijan ñangunata rinatami aliguta ricurca. Leópolis llactapi micunacuna chayashcandimi Comité de Socorropi sirvij huauquicunamanbash micunataca chayachirca. Micunata entregashca huauquicunaca Polonia llactamanga alimi chayagrirca. Huauquicuna aliguta yuyashpa planificashcamanda y Jehová Diospa bendicionmandapashmi huauquipanicunataca ayudaita ushashcanchi.

 Micunata yalichi ushashca cashpapash huauquicunaca menos de 10 quintaltallami yalichi ushashca carca. Shinapash 2 mil quitalcunashnami entreganaca faltarcara. ¿Imashinashi micunacunataca uchalla entregaita usharina carca?

 Jw.org paginapi ñucanchi huauquipanicuna guerramanda llaquicunata charijta ricushpami ashtaca gentecuna ayudangapaj munarca. Testigo de Jehovacuna culquiguta aliguta utilizanata yachashpami caro llactamanda gentecunaca Obra Mundialpa donaciongunata rurashca. Ucrania ladolla llactapi causa gentegucunaca paicunapa ruraicunahuan, culquigucunahuanmi ayudashca. Paicuna imacunatalla rurashcata ricupashunchi.

 Polonia llactapica ashtaca voluntario huauquipanigucunami cartonbi micunata churashpa ayudarca, cutin huahuagucunaca tarjetacunatami rurarca. Sucursal de Poloniapa Departamento de Compraspi sirvij Bartosz Kościelniak huauquica cashnami nin: “Salmos 110:3​pica Jehovapa llactaca paicunapa munaimi imagutapash ruranga nishcataca tauca viajecunatami liishcani. Ashtaca huauquipanicuna paicunapa munai ayudangapaj shamujta ricushpami cai shimicuna cierto cashcataca cuenta japircani”.

 Empresata charij shuj huauquica paipa camiongunatami mañachirca, gasolinamandapash paillatami pagarca. Chai huauquiguca cashnami nin: “Jehovata, huauquipanigucunatapash juyaimandami ayudaita ushashcani. Ayudaita ushashcamandaca cushillami sintirini”. Micunata entregaj carrocunapa gasolinataca 7 mil 700 litro (2 mil 34 galongunatami) cararca, cutin carrota manejaj huauquicunaca 48 mil kilometrocunata (30 mil millas) manejashpami ayudarca.

 Voluntario huauquipanicuna ayudajpimi 28 de marzotaca micunacunata, aseopa cosascunata, medicinacunata mil quintaltashna Ucrania llactamanga apashcarca. Ashtaca huauquipanigucuna, shuj gentecunapash cosasgucunata carashcamandami na yapa culquita gashtarirca. Cunangamanga testigo de Jehovacunaca Ucrania llactamanga mil 900 yali quintal micunacunatami carashpa ayudashca. Ayudata chasquishca huauquipanigucunaca ¿imashinata sintirishca?

 Leópolis llactaman micuna cajacuna chayajpica Comité de Socorropi sirvij huauquicunaca micunata minishtijuj huauquipanicunamanmi cararca. Shinallata micuna cartongunata Leópolis llactamanda mil300 kilómetro (800 millas) yali carupi caj llactacunamanbashmi saquingapaj rirca. Micunata uchalla chayachingapaj tucuita aliguta rurashpapash ashtaca tiempomi minishtirirca. a

 Ucrania llactamanda Comité de Sucursalpi sirvij Markus Reinhardt huauquica cashnami nin: “Ucrania llactapi guerra tiashcamandami ashtaca huauquipanicunaca Jehová Dios uyashcata, shinallata imapash nara pasajpi Jehovapa organización cushca instrucciongunata catina ali cashcata cuenta japishca”. Por ejemplo, tucuicunatami micunata, yacuta tauca semanacunapa huacaichichun nishca mandashca. Kiev llactamanda anciano Anton huauquica cashnami nin: “Llaquicuna tiajpi imata ruranata yachachishcamandaca ninandami agradicinchi. Yacuta, micunata shuj radiota huacaichishca charimandami salvarishcanchi”. Jehovapa organizacionba instrucciongunata catimandami Sucursalmanda huauquicuna ayudangacaman aguantaita ushashca.

 Minishtirishca cosasgucunahuan ayudajta ricushpaca ñucanchi huauquipanicunaca ¿imashinata sintirirca? Járkov llactamanda Míkola y Zinaidaca cashnami nin: “Ñucanchimanda preocuparishpa micunahuan, medicinahuan ayudashcamandami ninanda agradicinchi. Jehová Dios ñucanchita cuidashcatami ricupashcanchi”. Chai llactapillata causa Valentina panigupash cashnami nin: “Guerra callarijpica micunata randingapaca colapimi shayarina carcanchi. Shinapash ñucanchi minishtishca cosasgucunataca na tarinllu carcanchi. Jehová Dios ñucanchi imata minishtishcataca alimi yacharca. Carashca cajata pascashpa ricujpica ñucanchi minishtishca cosasgucunami tiashcarca. Imata ruranata na atinashca sintirijujpipash Jehovapash paipa organizacionbashmi ñucanchita ninanda cuidan. Minishtijuj horaspi ayudacunata chasquishpaca cushillami sintirinchi”.

 Mariúpol llactamanda llujchishpa rishca Evguen, Irina y Mikita huauquipanicunaca cashnami nin: “Ñucanchi familiata juyaihuan cuidashcamandaca tucui shunguhuan agradicipanchi. Minishtirijuj horaspipachami cosasgucunaca chayamushca, ciertota nishpaca cartonda ricushpaca micunallami tianga yuyarcanimi pero cartonda pascashpa ricujpica huauquipanigucuna tucui juyaihuan carashcatami sintirircani”.

 Jehová Diospa espíritu santo ayudajpi, Jehová pushajpimi guerra tiajpipash minishtijuj huauquipanigucunaman minishtirishca cosasgucunata carai ushashcanchi. Shinallata, donate.pr418.com paginaman yaicushpa obra mundialpi cushca contribuciongunamandapashmi Ucrania llactamanda huauquipanigucunataca ayudaita ushapashcanchi. Quiquinguna carashpa ayudashcamandaca ninandami agradicipanchi.

Minishtirishca cosasgucuna uchalla, seguro chayachunmi ayudashcanchi

1. 24 de febrero de 2022​pica: Comité de Coordinadorespi sirvij huauquicunaca sucursal de Ucraniamanda huauquicuna minishtijuj huauquipanigucunata ayudachunmi aprobarca.

2. 24 de febreromanda 8 de marzo de 2022​camanga: Sucursal de Ucraniapi sirvij huauquipanicunaca Comité de Socorropi sirvij huauquicuna minishtijuj huauquipanicunaman saquigrichunmi cosascunataca randin. Polonia sucursalmanda cosascunata chasquingapami sucursal de Ucraniaca alichirina carca.

3. 9 de marzo de 2022​taca: Comité de Coordinadorespi sirvij huauquicunaca Ucrania llactaman ayudata cachachunmi aprobarca.

4. 10 a 12 de marzo de 2022​pica: Polonia llactamanda Ucrania llactaman micunata cachangapami imata ruranata ricunajurca.

5. 13 de marzo de 2022​pica: Poloniamanda Leópolis llactacaman micunata cashpami shuj pruebata rurarca.

6. 14 a 16 de marzo de 2022​pica: Polonia llactapica Departamento Local de Diseño y Construccionbi sirvij voluntario huauquipanicunaca Salón de Asambleapi tandanajushpami micunacunata, shuj cosascunatapash cartonbi churangapaj organizarirca.

7. 17 de marzo de 2022​pica: Primer pruebata rurashca chuscu punlla jipallami 130 quintaltashna Ucrania llactapa fronteraman micunataca apai callarin.

8. 21 a 27 de marzo de 2022​pica: Poloniapi micuna cartongunata rurashcatami Ucrania llactamanga cachan. Ucrania llactaman micuna chayashcandimi minishtijuj huauquipanicunamanga uchalla cachai callarin.

9. 28 de marzo de 2022​pica: Micunacunata, aseopa cosascunata, medicinacunata Ucrania llactaman cachachun aprobashcamandapachami mil quintaltashna ña carashcarca.

 Cunangamanga Testigo de Jehovacunaca mil 900 yali quintaltashnami Ucrania llactamanga micunacunataca cachashcanchi.