Shuj ataque terrorista tiajpica talvez cashnachari tapurinchi: “Taita Diosca ¿ima pasajushcataca ricujunlla? ¿Imashpashi cashna llaquicunaca tian? ¿Ima punllapash terrorismoca a tucuringacha? Cai llaquimanda preocupado sintirishpaca ¿imashinashi causai usharinga?”. Cai tapuicunataca Bibliami contestan.

 Taita Diosca nali ruraicunata, terrorismotaca na ricunayachinllu (Salmo 11:5; Proverbios 6:16, 17). Jesuspash Taita Dioshnallatami yan. Chaimandami paipa catijcunata nalita rurajpica na chashna ruranachu canguichi nishpa consejarca (Mateo 26:50-52). Huaquin gentecunaca Taita Diospa ñaupapi ali ricuringapaj nishpami nali cosascunata ruran. Shinapash Taita Diosca chai cosascunataca na alicachinllu. Paicunapa mañaicunatallapash na uyanllu (Isaías 1:15).

 Taita Diosca sufrinajuj tucui gentecunamandami preocuparin. Terroristacuna llaquichishca gentecunamandapashmi preocuparin (Salmo 31:7; 1 Pedro 5:7). Ashtahuanbash Bibliapica Taita Diosca nalita rurajcunataca tucuchishami nin (Isaías 60:18).

 Bibliapica terrorismo imamanda tiashcatami aliguta intindichin. Caipica ninmi: ‘Runaca paipa llaquipajllata caishuj runata llaquichishpa charin’ nishpa (Eclesiastés 8:9). Poderta charij gentecunaca tucui tiempomi shujcunata llaquichingapaca terrorismota utilizashca. Chaimandami llaqui tucushca gentecunapash chashnallata tigrachishca (Eclesiastés 7:7).

 Taita Diosca tucui nalicunata tucuchishpami cai alpamanga tranquilo causaita apamusha nin (Isaías 32:18; Miqueas 4:3, 4). Caitami ruranga:

•   Terrorismotaca tucuchitapachami tucuchinga. Taita Diosca cai alpapi gobiernocunapa randica, mundo enterota mandachunmi pai agllashca gobiernota churanga. Jesusmi cai gobiernopica mandanga. Paica tucuicunatami ali tratanga, tucui nalicunatapashmi tucuchinga (Salmo 72:2, 14). Chai gobierno mandajujpica terrorismoca ñana tiangachu. Ashtahuanbash tucui gentecunami ‘casilla ali causaihuan ninanda cushijunajunga’ (Salmo 37:10, 11)..

•   Terrorismomanda tiashca llaquicunatapashmi tucuchinga. Terrorismomandami huaquin gentecunaca ungushca, manllaihuan, nali causanajun. Taita Diosca chai gentecunatapashmi jambinga (Isaías 65:17; Apocalipsis 21:3, 4). Ashtahuanbash terrorismopi huañushca gentecunatapashmi shuj juyailla, tranquilo alpagupi causachinga (Juan 5:28, 29).

 Chai shimicuna ñalla pactarinaca seguro cachunmi Bibliapica huaquin razongunata ricuchin. Shinapash ¿imashpashi Taita Diosca terrorismota na ucha tucuchin? nishpachari tapuringui. Cai tapuimanda ashtahuan yachajungapaj munashpaca, Diosca ¿imamandata llaquicuna tiachun saquishca? videota ricupangui