Noticiacunapica siempremi gentecuna shujcunata na ricunayachishpa nalicunata rimashcacunata, ñavitalla ricushpa shujcunata llaquichishcata, shuj llactamandacunata nali tratashcata, guerracuna tiashcata uyapanchi.

•   “Cunanbica Israel llactahuan y Gaza pushtuhuan guerra tiashcamanda, shinallata huaquin gentecuna shujcunata llaquichichun animanajushcamandami redes sociales nishcacunapica ashtaca ashtaca gentecuna shujcunata na ricunayachishpa parlashcacunata ricupashcanchi” (The New York Times, 15 de noviembre de 2023).

•   “7 de octubre punllamandapachami cai mundopica shujcunata na ricunayachimanda rimashcacuna, huañuchicuna, llaquichicunapash ashtahuan mirashca” (Dennis Francis, presidente de la Asamblea General de las Naciones Unidas, 3 de noviembre de 2023).

 Shujcunata na ricunayachishpa rimana, shujcunata llaquichina, guerracunapash pundamandapachami tiashca. Bibliapica punda tiempopipash ‘flechata shitanshna jayaj shimita cacharijcuna’, macanajuita callarichijcuna, llaquichij gentecuna tiashcatami ricuchin (Salmo 64:3; 120:7; 140:1). Pero ñucanchi punllacunapica cai cosascunaca ashtahuanmi mirashca. Bibliapica imamanda shina pasajujtami intindichin.

 Bibliapica cunan punllacunapi gentecuna imamanda paicunapura na ricunayachirishcatami villan. Ishcai yuyaicunata ricupashunchi:

1.  1. Bibliapica cunan punllacunapi ‘ashtaca gentecuna juyarishpa causanata saquinga’ nishpa ñami villashca carca (Mateo 24:12). Gentecunaca shujcunata juyashcata ricuchinapa randica, shujcunata na ricunayachishcatami ashtahuan ricuchina carca (2 Timoteo 3:1-5).

2.  2. Cunanbica shujcunata na ricunayachishpa tratanaca ashtahuanmi mirashca. Chaimandami cai mundota Diablo mandajushcata yachapanchi. Bibliapica: “Cai mundo enterotaca Diablomi mandajun” ninmi (1 Juan 5:19; Apocalipsis 12:9, 12).

 Shinapash Bibliapica Taita Diosmi gentepura na ricunayachirishcamanda tiashca tucui llaquicunata tucuchitapacha tucuchinata villan. Bibliapica ninmi:

•   Diosmi “gentecunapa ñavimandaca tucuilla viquita fichachinga. Huañuipash nunca más ñana tiangachu. Ima llaquipash, huacaipash, ima nanaipash nunca más ñana tiangachu. Ñucanchita sufrichishca cosascunaca ñami tucurishca” (Apocalipsis 21:4).