Pinarishpa musparina a unguita charijcunaca ¿imashinata caita ushan? Cai unguita charijcunaca manllaimanda imatapash na rurangapaj munan, camamandapash na jataringapaj munan, o llaquicunamandalla parlaj gentecuna can nipanguipashchari.

 Pinarishpa musparina o ansiedad nishca unguita charij jaricunaca huaquingunaca chashnallatami caita ushan. Cai unguimanda yachaj doctorcunaca cai unguica jaricunatami ashtahuan llaquichita ushan ninmi. Ansiedad unguimanda parlaj shuj revistaca ninmi: “Ansiedad unguita charij jaricunaca chai unguimanda ali sintiringapaj nishpami tragocunata, drogacunata, doctorcuna na cachashca pastillacunatapash ufiai callarin. Chaimi yapata tragota ufiajcunaca ansiedad unguita charita ushan. Jaricunaca chai ansiedad unguita charimandami yapata culiralla, aburridopash yalin”.

 Na tucui jaricunachu chashna can. Bibliapica tucurimui punllacunapica ashtahuan jatun llaquicunami shamunga nin. Chaimi ansiedad ungui nishcaca ashtahuan mirashca (2 Timoteo 3:1). Pinarishpa musparina unguita charijpica ¿Bibliaca quiquinda ayudaita ushanllu?

 Pinarishpa musparijujpica Bibliapa consejocunami ayudaita ushan. Bibliapa quimsa consejocuna:

1.  1. “Shina cashcamanda cangunaca, na cayandi punllamanda yarishpa musparinachu canguichi. Punllandimi llaquicunaca tian. Ima llaqui shamushpapash, punllandi yalijunllami” (Mateo 6:34).

    ¿Imatata ningapaj munan? Jipa punllacunapi ima pasanamandaca na yapata preocuparinachu canchi. Huaquinbica ñucanchi pensashcashnaca imapash na pasanllu. Huaquinbica na yashcapimi ali cosascuna pasan.

    Caita rurapai: Nali cosascuna pasanga yashpa seguro cajpipash ali cosascuna pasashcapi pensaripai. Chai jipaca cunanbi charishca problemacunapi yuyarishpa chai problemacunaca ¿ashtahuan jatun llaquicunamanlla apanga? nishpa pensaripai.

2.  2. “Jirruca, jirruhuanllatami filoyachirin. Shinallatami runapash, paipaj cumbaman ali yuyaita cun” (Proverbios 27:17).

    ¿Imatata ningapaj munan? Ñucanchi amigocuna, ñucanchi familiacunami ansiedad unguita mishachunga ayudaita ushan. Shinapash ñucanchi ayudachun saquijpimi paicunaca ayudaita ushanga. Paicunapash chai unguita charishcamandami ali consejocunata cuita ushan. Chai consejocunami ashtahuan tranquilo sintirichun ayudaita ushan.

    Caita rurapai: Shuj amigo ñucanchi charishca problematallata charishpa chai problemata imashina mishai ushashcapi pensarishpa paipa ayudata mascapai. Ansiedad unguita charishcamanda imata rurashcata, imata na rurashcata tapupai.

3.  3. “Diosmi cangunataca cuidajun. Shina cajpimi ima llaqui japijpipash, paiman mingashpa saquina canguichi” (1 Pedro 5:7).

    ¿Imatata ningapaj munan? Taita Diosca llaquicunata charijcunamandami ninanda preocuparin. Taita Diosca ñucanchi shungu ucupi imashina sintirishcata paiman parlachunmi munan.

    Caita rurapai: Ima llaquicunata charishcata shuj cuadernopi anotapai. Caita rurashca jipaca imata rurai ushashcata yachangapaj Taita Diosta mañapai.

 Bibliapica ama yapata pinarishpa musparichunmi ali consejocuna tian. Shinallata ñalla llaquicuna illaj causanatapash yachachin. Pero ¿imashinata llaquicuna illajca causashun?

 Taita Diospa Reino mandajujpimi llaquicuna illajca causashun (Apocalipsis 21:4). Chaimi cunanbi charishca llaquicunatapash cungashpa cushilla causashun (Isaías 65:17).

 “Casilla ali causaiguta caramuj Taita Diosmi” ñucanchipash casilla ali causaiguta charichun munan (Romanos 16:20). Chaimi Taita Diosca cashna nin: “Cangunaman ñuca imatalla ruranata yarijushcataca, ñucami yachani. Casilla ali causaiguta caranatami yarijuni, llaquicunataca na cachashachu. Canguna shuyanajushcatami caragrini” (Jeremías 29:11).