Alemania llactamanda canciller Angela Merkel huarmiguca cashnami nin: “Tucuicunami cutin aliguta causangapaj munanchi”.

 Chai huarmigu nishcashnami tucuicuna cutin ali causaiguta charingapaj munanchi. Shinapash COVID-19 unguimi mundo enteropi llaquichishpa catijunra. Pero pundashna ali causaigu nishpaca ¿imatata ningapaj munan? ¿Gentecunaca shamuj punllapi ima pasanatata shuyan?

•   COVID-19 ungui nara chayamujpi ali causaiguta charinata. Huaquingunaca shujcunahuan ashtahuan tiempota yalinata, ugllarinata, maqui japirinatami ninanda gushtan. Shinallata shujcunaca cutin paseangapaj rinatami gushtan. Doctor Anthony Faucica a cashnami nin: “Gentecunaca cutin normal causashpaca, teatrocunaman rinata, restaurantecunaman rinata, cutin shuj cosascunata rurana cashcatapashmi yuyan”.

•   Paicunapa causaipi mejoranata. Huaquingunaca COVID-19 unguimandami paicunapa causaipi cambiocunata rurai ushashcata ricushca. Huaquingunaca yapata trabajana tiempota cambiangapaj, shuj gentecunata paicunapa costumbrecunamanda nali tratana yuyaita cambiangapami pensarishca. Shinallata ashtaca gentecuna sufrijushcamandami, cambiocunata rurana minishtirishca. Fundador del Foro Económico Mundial, Klaus Schwab jarica cashnami nin: “COVID-19 unguimi ñucanchi causaipi pensarichun ayudashca. Shinami ima cambiocunata rurana cajpipash ruraita ushashcanchi. Ñucanchi causaipi cambiocunata ruraita ushachunga, pandemiaca na siempre tiangachu”.

 COVID-19 unguica huaquingunataca ninandami llaquichishca, chaimandami huaquingunaca cutin “ali causaigutaca” ña na charita ushashunllu nishpa yuyan. Por ejemplo, cai unguimandami ashtacacunaca paicunapa trabajota, paicunapa huasitapash chingachishca, shinallata paicunapa familiapuracunamandapashmi huañushca tian.

 COVID-19 ungui jipa imashina causana cashcataca pipash na yachaita ushanllu (Eclesiastés 9:11). Shinapash shamuj punllapi imashina causai tianata yachachun ima pasajpipash aguantashpa catichunga Bibliami ayudaita ushan. Ashtahuangarin shamuj punllapi ali causaigu tianamandami Bibliapica parlan. Bibliapi nishcashna jipa punllacunapi ali causaigu tiana cashcamandaca talvez nunca na pensaripashcanguichu.

 Bibliapica ashtaca huatacuna huashamanllatami, “tucurimui punllacunapica” unguicuna o epidemiacuna shuj shuj ladocunapimi tianga nishpa villashca (Lucas 21:11; Mateo 24:3). Shinaca cai COVID-19 ungui tiashcamandaca Bibliapi nishca profeciacuna pactarijushcatami yuyana capanchi. Shinallata Bibliapica, terremotocuna, guerracuna, shuj shuj llaquicuna tianatapashmi villan.

 Bibliapi nishcata yachanaca ¿imashinata ayudan?: Cai COVID-19 ungui tucurishpapash, Bibliapica “tucurimui punllacunapica” jatun llaquicunami shamunga nishpami villan (2 Timoteo 3:1). Tucurimui punllacunapi jatun llaquicunahuan causanata yachanami, cunan punllacunapi llaquicunahuan causanata yachachun ayudan.

 Bibliapi nishcacunata yachanami imamanda llaquicunahuan causajushcata yachachun ayudan. Shinapash ñallami shuj ali causaiguta charipashun.

 Bibliapica llaquicuna tianamandallaca na parlajunllu. Shamuj punllacunapi ali causaigu tianamandapashmi parlan. Cai alpapi tiaj gobiernocunaca, llaquicunata tucuchingapaj munashpapash na ushashcachu. Taita Diosllami cushilla ali causaigutaca caraita ushan. “Taita Diosmi, paicunapaj ñavimandaca, tucuilla viquita fichanga. Huañuipash, huacaipash, llaquipash, nanaipash, na ashtahuan tiangachu” (Apocalipsis 21:4).

 Jehová b Diosca ninmi: “Ricui, ñucami imatapash tucuita mushujta rurani” (Apocalipsis 21:5). Jehová Diosllami tucui llaquicunataca tucuchinga. Paillami ali causaigutaca caranga:

•   Ñucanchi cuerpopash, ñucanchi yuyaipash sanomi cashun. Unguipash o nanaipash, huañuipash, na ashtahuan tiangachu (Isaías 25:8; 33:24).

•   Ñucanchi munashca trabajotami charishun. Chaimi cushilla sintirishun.Tucuicunami cushilla, ali causaiguta charishun (Isaías 65:22, 23).

•   Micuna illapash, pobrepash ña na causashunllu ( Salmos 72:12, 13; 145:16).

•   Cunan llaquicuna tiashca llaquicunamandapash ña na sufrishunllu. Ñucanchi huañushca familiacunatapashmi cutin ricushun (Isaías 65:17; Hechos 24:15).

 Bibliapi nishcata yachanaca ¿imashinata ayudan?: Bibliapica ninmi: “Imashinami shuj ancla gancho jirruca barcota shinllita charijun, shinallatami ñucanchi shuyajushca esperanzapash ñucanchi causaitaca shinllita charijun” (Hebreos 6:19, TNM). Jipa punllacunapi ali causai tiana esperanzata charimandami, cunan punllacunapi tiashca llaquicunata aguantachun, tranquilo sintirichun, cushilla sintirichunbash ayudan.

 Pero Bibliapi nishca promesacunataca ¿ciertopachachu crita ushapangui? Caimanda yachangapaj munashpaca “Bibliami cabalguta yachachin” nishca temata ricupai.

•   Quiquinba causaita valichipai

   Bibliapica ninmi: “Ali yachaica, alipacha yachajushcacunaman causaita cuj cashcamandami ashtahuan ali” (Eclesiastés 7:12).

   ¿Imashinata cai consejotaca catita ushapangui?: Ali decisiongunata japishpami unguimandaca na contagiaripangui. Quiquin causajuj llactapi gobiernocuna saludmanda imata nijtami aliguta yachana capangui. Imashnapura contagiarishcata, imashnapura vacunarishcatapashmi yachana capangui.

•   Cuidarishpa catipai

   Bibliapica ninmi: “Alipacha yachajushca runaca, nalita ruranata manllashpa caruyanmi. Ashtahuangarin juizu illaj runaca, yapata jariyashpami purin” (Proverbios 14:16).

   ¿Imashinata cai consejotaca catita ushapangui?: Quiquinba saludta cuidashpa catingapaj ima minishtirishcaguta rurashpa catipai. Doctorcunaca coronavirus unguica unaitami paranga ninmi.

•   Na tucui informaciondachu crina capanchi

   Bibliapica ninmi: “Na yachajushca runaca, imata nijpipash tucuita crinllami. Ashtahuangarin ali yachajushca runaca, imata rurangapapash aliguta yarinrami” (Proverbios 14:15).

   ¿Imashinata cai consejotaca catita ushapangui?: Saludta cuidana consejocunata imashina catinata ricupai. Na ciertota nishca informaciongunata catishpaca, quiquinba causaitaca peligropimi churapangui.

•   Ali yuyaicunapi pensaripai

   Bibliapica ninmi: “Ima horasllapash ama: “¿Imashpashi punda huatacunaca, cunan huatacunata yali ali carca?” ninguichu. Shina nishpaca, ima horallapash na ali yachaihuan tapunguichu” (Eclesiastés 7:10).

   ¿Imashinata cai consejotaca catita ushapangui?: Cunanbi ima cosascunata rurai ushashcata pensaripai. Pandemia ungui nara chayamujpi ima cosascunatalla rurai ushashcacunapica ama pensaripaichu. Shinallata pandemiamanda ima cosascunatalla na rurai ushashcamandaca ama juchachiripaichu.

•   Shujcunata respetapai

   Bibliapica ninmi: “Tucuicunatami alicachina canguichi” (1 Pedro 2:17).

   ¿Imashinata cai consejotaca catitaca ushapangui?: Gentecunaca cai pandemia unguimandaca shuj shuj yuyaicunatami charishca. Paicunapa yuyaicunataca respetanami capangui. Shinapash, quiquin ima ali decisiongunata japishcatami catina capangui. Na vacunarishca gentecunata, mayorcunata, na sano gentegucunataca juyaihuanmi tratana capangui.

•   Pacienciata charipai

   Bibliapica ninmi: “Juyaita charishpaca, llaquita apanllami, shujcunatapash llaquinmi” (1 Corintios 13:4).

   ¿Imashinata cai consejotaca catita ushapangui?: Pandemia unguimanda imatapash ruranata manllajpica, paicunataca intindinami capangui. Pundashna imagutapash na ruraita ushashpaca quiquinmandallatami pacienciata charina capangui.

 Testigo de Jehovacunataca Bibliapa promesacunata yachanami ninanda ayudashca. Chaimi pandemia unguipilla ama yapata pensarichun, tranquilo cachunbash ayudashca. Bibliapa nishcata catimandami, tandanajushpa catishca. Chaimi caishujmanda chaishujmanda animarishpa catita ushashca (Hebreos 10:24, 25). Cai pandemiamandami tandanajuitaca testigo de Jehovacunaca internetpi charishca. Cai tandanajuicunataca tucuicunami uyaita ushan.

 Huaquin gentecunataca cai pandemiapi testigo de Jehovacunahuan tandanajuimandami, paicunataca ayudashca. Por ejemplo, COVID-19 unguihuan contagiarishca shuj huarmiguca, testigo de Jehovacunapa tandanajuiman conectaringapaj invitaciondami chasquirca. COVID-19 unguimanda paipa salud nali cajpipash, testigo de Jehovacunapa tandanajuica na yapata llaquilla sintirichunmi ayudashca. Asha tiempo jipaca paica cashnami nirca: “Testigo de Jehovacunaca ñuca familiashna cajtami sintini. Bibliata liinami, ñuca yuyaipipash tranquila, cushilla sintirichun ayudahuashca. Ñuca problemacunapi pensarinapa randica, Shamuj punllapi ali causaigu tianata pensarichunmi ayudahuashca. Taita Diosman quimirichun ayudashcamandaca ninandami agradicini. Siempremi chaitaca munashcani”