¿Ashtaca religiongunaca gentecunaman Taita Diosmanda yachachinapa randica ashtaca culquita gananapilla yuyajta ricupashcanguichu? Culquimandallami imatapash cushpa imatapash rurashpa ayudan. Religiongunata ñaupaman pushajcunaca ashtaca culquitami cobran shinallata valishca cosascunatami charin. Religionda ñaupaman pushajcuna imashina causajta huaquin yuyaicunapi ricupashun.

•   Shuj investigacionbica shuj obispoca13 huatacunatami iglesiapa culquita gashtashpa 150 viajecunata valishca barcocunapi purishca, 200 viajecunataca limusina carrocunapi purishcatami villarca. Shinallata 4 millones yali culquitaca iglesiapi charishca huasita alichingapa gashtashcatami villarca.

•   África llactapa shuj llactapi shuj predicador yachachijta uyangapami ashtaca gentecunaca chaiman rin. Chai predicadorpa jatun iglesia ucupica “aceite milagroso” nishcacunata, toallacunata, camisetacunapi paipa fotota churashcacunatami jatun. Chai predicadorca rico ricomi can cutin paita cati gentecunaca casi mayoría gentecunami pobre can.

•   China llactapica budismo nishcata rurangapaj chuscu urcucunamandaca ishcai urcucunataca culquita ganangapami utilizan. Templo Shaolinbica shuj shuj cosascunata rurashpami culquitaca ganan. Chaimandami chai templopi mandajtaca “el monje empresario” nishpa rijsi.

•   Estados Unidos llactapa empresacunaca Bibliapa consejota cungapaj nishpami consultoriocunata churashca. Shuj revistapica ninmi: consejocunata cungapaj nijcunaca religionba costumbrecunataca catishpami consejocunataca cun nin. Shinallata empresapi trabajadorcuna imapash ama tucuchun nishpami paicunamanda Taita Diosta mañashpa shuj shuj cosascunata ruran.

 ¿Religionguna negociohuan chapurijtaca imata yuyapangui? ¿Religionda ñaupaman pushajcuna culquita ganangapajlla Diospi crij gentegucunamanda aprovecharijta Taita Dios caimanda imata yuyajta pensaripashcanguichu?

 Taita Diosca religionguna negociocunahuan chapurichunga na munanllu. Bibliapica punda tiempopi sacerdotecunaca Taita Diosmanda yachachishpapash culquimandalla yachachin cashcatami ricuchin. Chaita rurachunga Taita Diostaca nimamanda na gushtarcachu. (Miqueas 3:11). Taita Diosca paipa adorana huasita “shuhuacuna pacajuna” utucutashna rurashcacunataca nalicachircachu ( Jeremías 7:11). Taita Diospa huasipi negociocunata rurashpaca paicuna culquita ganangapaj munaimandallami shina ruran carca.

 Taita Dioshnallatami Jesuspash culquita ganangapaj religionda utilizaj gentecunataca na ricunayachin carca. Jesús cai alpapi cajpica religionda ñaupaman pushajcunaca culquita ganangapajllami negociantecunataca templo ucupi negociocunata rurachun saquin carca. Negociantecunaca valishcapaj jatushpami Taita Diosta adorangapaj ricunataca llaquichin carca. Jesús chaita ricushpaca ninandami culirarca chaimandami negociota rurajcunataca templomanda llujchishpa cacharca. Jesusca “ñuca Taitapaj huasitaca, jatushpa tiana huasitaca na ruranachu canguichi” nircami (Juan 2:14-16).

 Jesús cai alpapi villachijushpaca paipa Taita yuyan cashcashnallatami Jesuspash yuyashcata ricuchirca (Juan 8:28, 29). Jesusca gentecunaman Taita Diosmanda yachachishpa, micunacunata carashpa, huañushcacunata causachishpa, nanashcacunata jambishpaca nunca na culquitaca cobrarcachu. Jesús Taita Diosmanda yachachishpaca rico tucungapaca na yachachinllu carca. Propio huasitallapash na charircachu (Lucas 9:58).

 Jesusca paipa catijcunataca Taita Diosmanda yachachishpaca culquita ganana munaihuanga na purinachu canguichi nircami. Ashtahuangarin Jesusca cashnami nirca: “gratismi chasquircanguichi y gratismi cuna canguichi” nircami (Mateo 10:8). Jesusta punda cati discipulocunaca Jesús nishcashnallatami rurarca. Jesuspa catijcuna imatalla rurashcata ricupashun:

•   Apóstol Pedroca Jesuspa catimi carca, shuj punllaca Simón shuti runaca autoridadta paiman cuchunmi Pedromanga culquita pagasha nirca. Simón chashna nijpica Pedroca cashnami nirca: “Taita Dios juyailla ushaita caramujujtaca, culquihuan randingapajmi munashcangui. Shina cashcamanda cambaj culquica canhuan chingaita chingagrichunlla” (Hechos 8:18-20).

•   Apóstol Pabloca Taita Diospa shimimanda villachishpami purin carca. Ashtaca huatacunata congregaciongunapi ayudashpapash paiman culquita pagachunga nunca na munarcachu. Pablopash paipa cumbacunapash ashtaca gentecunashna “imatapash japingapajlla Diospa shimita huaglichishpa” villachicunashnaca na carcachu (2 Corintios 2:17). Pabloca, cashnami nirca: “Tutapash, punllapashmi, imagutapash rurashpa tiarcanchi. Imatapash mañashpa cangunata ama fiñachingapajmi cashna rurashpa, Taita Diosmanda ali villaita cangunaman villarcanchi” (1 Tesalonicenses 2:9).

 Punda Jesusta catijcunaca villachishpa puringapaj, gentecunata ayudangapaca culquitaca minishtircami. Shinapash paicuna Taita Diosmanda yachachishpaca culquitaca nunca na cobranllu carca. Bibliapi nishcataca cazushpami gentecunaca culquita caranata na caranataca paicunallata ricun carca:

•   2 Corintios 8:12: “Maijambash tucui shunguhuan carangapaj munashpa, imagutapash charishcata carajpica, Diosmi chasquijun. Ashtahuangarin imatapash na charishpata carachunga, na mañanllu”.

   Imatata ningapaj munan: Ashalaguta carashpapash tucui shunguhuan carana cashcatami ningapaj munan.

•   2 Corintios 9:7: “Tucuicunallata cangunapaj shungupi yarichishcatami, carana canguichi. Na llaquirishpami carana canguichi. Mandajpillapash na caranachu canguichi. Taita Diosca, cushijushpa carajtami juyan”.

   Imatata ningapaj munan: Taita Diosca pipash obligajpilla carachunga na munanllu. Gentecuna tucui shunguhuan carachunmi Taita Diosca munan.

 Bibliapica yachachinmi Taita Diosca na tucui religiongunapa rurashcataca alicachinllu (Mateo 7:21-23). Bibliapa shuj profeciapica panda religiongunataca huainayana huarmihuan chimbapurajtami yachachin. ¿Imamandata panda religiongunataca huainayana huarmihuan chimbapuran? Porque panda religiongunaca gobiernocunahuanga culquimandallami chapurin shinallata gentecunamandapashmi aprovecharin (Apocalipsis 17:1-3; 18:3). Shinallata Bibliapa profeciapica Taita Diosca ñalla panda religiongunata tucuchinatami yachachin (Apocalipsis 17:15-17; 18:7).

 Panda religionda tucuchina punlla chayamungacamanga gentecuna paiman quimirichunmi Taita Diosca munan (Mateo 24:11, 12). Taita Diosca panda religionmanda llujshishpa, paimanda yachajuchun, paiman quimirichunmi munan (2 Corintios 6:16, 17).