Yarjai tianamandaca Bibliaca ¿imatata nin?

Cai idiomapi uyangapaj o ricungapaj

“Yarjai na tiangachu”. Tucuilla gentecuna micunata charichun munashpami, mundo enteromanda presidentecuna cai shimicunata pactachingapaj munan. a Shinapash, mundo enteropi yarjaica ¿ima horapash tucuringacha? Bibliaca ¿imatata nin?

Bibliaca cunan punllacunapi yarjai tianatami nirca

Bibliapica cunan punllacunapi yarjai tianatami nirca. Chai punllacunatami Bibliapica ‘último punllacuna’ nin (2 Timoteo 3:1). Yarjaica na Taita Diospa culpachu can. Shinapash yarjai tianataca pundamandallatami ña villarca (Santiago 1:13). Bibliamanda ishcai profeciacunata ricupashun.

‘Ninan yarjaimi shuj shuj pushtucunapi tianga’ (Mateo 24:7). Bibliapi nishca shinaca ashtaca llactacunapimi yarjai tiana carca. Por ejemplo, micunamanda producción y distribucionda estudiajcunaca shuj informepica nircami: “Yarjaipash, desnutricionbash ama tiachun, micuna tiashpa catichun munashpapash mundo enteropi gentecunaca imatapash na rurai ushashcachu” nishpa. b Ashtaca millón millón gentecunami tauca llactacunapi micuna faltajlla causan. Chaimandami ashtacacunaca huañun.

“Chaipimi shuj yana caballota ricurcani. Yana caballopi tiajujca shuj balanzatami charijurca” (Apocalipsis 6:5). Cai profeciapi caballopash, caballopi tiajujpash último punllacunapi yarjai tianatami ricuchin. c Cutin balanzaca ashalla micunata pesangapami can. Cai caballopi rijujpica, micunaca valishcapachami canga, micunataca na yanga desperdicianachu canguichi nijmi uyarin (Apocalipsis 6:6). Mundo enteropi micuna illashcata ricushpa, ashtaca millón gentecuna micunata na charijta o na randi ushashcata ricushpami cai profecía pactarijujta cuenta urmanchi.

Yarjaitaca ¿pishi tucuchinga?

Estudiashcacunaca ñucanchi planetaca tucui gentecunapa suficiente micunatami fucuchin ninmi. Shinaca ¿imashpashi gentecunaca micunacuna faltajlla causan? Bibliapi nishcashnaca cai llaquicunata tucuchingapaca, ñucanchita ruraj Jehová d Diosca ¿imatashi ruranga?

Problema: Pobrezamanda, tucuicuna culquita igual na charimandami gentecunaca yarjaimanda huañun. Chai llaquicunataca gobiernocunaca na tucuchi ushashcachu.

Solución: Cai alpapi mandaj nali gobiernocunata tucuchishpami Taita Diospa jucha illaj gobierno mandanga (Daniel 2:44; Mateo 6:10). Cunan punllacunapica ashtaca gentecunami micunaguta randingapaj ninanda esforzarin. Shinapash Taita Diospa Gobiernopi chashna na pasangachu. Bibliapica Taita Diospa Gobiernopi Jesús mandanamandaca cashnami nin: ‘Imagupash illajcuna caparishpa mañajpica, paimi cacharichinga. Pi ayudajta na charishpa llaquilla causajcunatapashmi ayudanga. Pambapipash, jahua urcu umacunapipash, granocuna tiachunmi maqui jundata shitanajunga’ (Salmo 72:12, 16).

Problema: Guerracunamanda, culquipash na seguro tiaimandami ashtaca llaquicuna tian. Chaimandami micunacunaca na tucui gentecunaman chayai ushan.

Solución: “[Jehová Diosca], cai pacha tucui manñacunacaman jatun macanajuicuna tiajtapash saquichinllami. Arcota, lanzata faquishpa fitishpami, carretacunatapash ninapi rupachin” (Salmo 46:9). Taita Diosca armacunatapash guerrata rurajcunatapashmi tucuchinga. Chaimi tucui gentecunallata micunacunataca fácil chari ushanga. Bibliapica ninmi: ‘Imatapash cashcatapacha ruranaca sisanshnami canga. Luna tucuringacamanmi casilla ali causaica ashtacapacha tianga’ (Salmo 72:7).

Problema: Yapa indi, yapa tamia, acapanacuna o shuj shuj llaquicunapashmi tarpushcacunata tucuchin, animalcunatapash huañuchin.

Solución: Taita Diosca gushtu micunacuna fucuchunmi huairatapash, acapanacunatapash, climatapash controlanga. Bibliapica ninmi: ‘[Jehová Diosmi], ninanda huairajujtaca saquichishpa, caiman chaiman cuyurijuj yacutapash casilla cachun ruran. Jichushca pambapipash yacu cuchata ruranllami. Chaquishca pambapipash yacu llujshijujta ruranllami. Chaipimi, yarjachijcunata causachun churan. Pambacunapi tarpushpami uvascunata tarpunajun. Chaicunaca ashtaca granocunatami fucunajun’ (Salmo 107:29, 35-37).

Problema: Ambicioso, nali gentecunaca na sano micunacunatami tarpun o tucui gentecunapash micunata charichunga na saquinllu.

Solución: Taita Diospa Gobiernoca tucui nali, millai gentecunatami tucuchinga (Salmo 37:10, 11; Isaías 61:8). Bibliapica ninmi: Jehová Diosca ‘llaquichijpi causajcunamambash, imagutapash cashcatapacha rurajmi. Yarjachijcunamambash micunata carajmi’ can nishpa (Salmo 146:7).

Problema: Cada huatami mundo enteropi tercera parte micunacuna desperdiciarin o chingarin.

Solución: Taita Diospa gobiernopica micunacunaca nunca na desperdiciaringachu. Jesús cai alpapi cashpaca micunataca na desperdiciarcachu. Por ejemplo, shuj viajeca 5 mil yali gentecunamanmi shuj milagrota rurashpa micunata cararca. Jipamanga Jesusca paipa discipulocunataca cashnami mandarca: “Ama imapash desperdiciarichunga, puchushcataca tucuillata tandachipaichi” nishpa (Juan 6:5-13).

Taita Diospa gobiernoca yarjaitaca tucuchingami. Chaimi tucuilla gentecuna sano, ali ashtaca micunacunata charinga (Isaías 25:6). Taita Diospa Gobierno imacunatalla rurana cashcata yachangapaca, “Taita Diospa Gobiernoca ¿imahorata cai alpataca mandanga?” temata ricupangui

a La Agenda de 2030 para el Desarrollo Sostenible, adoptada por los Estados miembros de las Naciones Unidas en el 2015.

b Organización de las Naciones Unidas para la Alimentación y la Agricultura, Fondo Internacional de Desarrollo Agrícola, Fondo de las Naciones Unidas para la Infancia, Programa Mundial de Alimentos de las Naciones Unidas, Organización Mundial de la Saludpashmi cai informetaca rurarca.

c Apocalipsis libropi parlashca 4 caballocunamanda ashtahuan yachajungapaj munashpaca, “Apocalipsis libropi chuscu caballopi tiarishcacunaca ¿imatata ricuchin?” temata ricupangui.

d Taita Diospa shutica Jehovami can (Salmo 83:18, TNM). “¿Pita can Jehová?” nishca temata ricupai.