Ashtaca llactacunapica, micunaguta randingapaj, arriendota pagangapaca culquica na pactanllu. Testigo de Jehovacunaca culqui ninanda faltajujpipash, “nunca na candaca saquishachu” nishpa Jehová Dios prometishcata yarishpami na yapata preocuparipanchi (Hebreos 13:5). Jehová Diosca nunca na paipa sirvijcunataca saquinllu, siempremi ayudanata yachan. Por ejemplo, Filipinas llactapica pobre pobre gentecunami tian. Huata 1970cunapi y huata 1980cunapica, shuj jatun llaquimi chai llactapica tiarca.

 Vicky a shuti paniguca ninmi: “Huaquinbica micunaguta na charimandami huacan carcani. Huaquinbica solo arrozguta, cachiguta, yacugutallami charin carcani” ninmi. Florencio huauquiguca trabajota na tari ushashpami purin carca. Paica ninmi: “Ñucaca solo quimsa camisaguta y quimsa pantalongutallami charin carcani. Reuniongunaman, asambleacunaman ringapaca chaitallata chaitallatami tigrai tigrai churajun carcani” ninmi. Chashna llaquipi cashpaca ¿imatata testigo de Jehovacunaca rurarca? ¿Imashinata Jehová Diostaca aliguta sirvishpa catita usharca? Ñucanchi causai na yashcapi cambiajpica ¿imashinata paicunapa ejemplota catita ushapanchi?

 Filipinas llactamanda testigo de Jehovacunaca, chai llaqui punllacunapi Jehová Dios paicunata cuidanataca seguromi carca (Hebreos 13:6). Jehová Diosca cutin cutinmi paicunataca cuidarca. Por ejemplo, Cecille shuti paniguca ninmi: “Ñuca familiapica chuscupurami capanchi. Shuj punllaca, desayunangapami último taza arrozguta yanurcanchi. Micunataca nimata ñana charircanchichu. Chaimi Jehová Diostaca, cai punllagupash ñucanchi minishtishcaguta carahuangui nishpa mañarcanchi. Desayunanajujpillatami shuj turiguca 11 libra arrozta carangapaj shamurca. Jehová Diosmi chai micunagutaca cachamurca. Chaimandami Jehová Diosta agradicishpa cushijuimandaca huacarcanchi. Jehová Diosca chashnami ñucanchitaca cutin cutin cuidajurca” ninmi.

 Testigo de Jehovacunaca Bibliapi nijunshnami ali yachaita charishcata ricuchirca (Proverbios 2:6, 7). Aracelita shuti panigupa ejemplota ricupashun. Chai tiempopica soltera y chairalla bautizarishcami carca. Trabajashpa culquita facilllaguta taritaca na ushajurcachu. Paica Jehová Diosta tucui shungu mañashpami Proverbios 10:4pi pensarirca. Chai textopica ‘imata ruranatapash na munajcunapa maquica, imagutapash na charinllu. Ashtahuangarin imata cashpapash ucha rurajcunapa maquica charijyachinmi’ nijunmi. Chai textopi pensarishpami paica tarpuita callarirca. Shinami Jehová Diospa bendicionhuanga, tarpushcagu viñajpica cozecharca, micungapapash suficienteguta charirca y pasajecunapapash charirca.

 Huauquipanicunaca, alpaguta randishpa Salón del Reinocunata rurangapapash na culquigutaca charircachu. Shinapash, paicunaca Bibliapi mandashcashna tandanajushpa, caishuj chaishuj animaringapami munarca (Hebreos 10:24, 25). Chaimandami imasha modopash tandanajushpa catingapaj esforzarirca. Por ejemplo Deborah paniguca ninmi: “Ñuca cumba ñañaguhuanga shuj chozagutami ruraparcanchi. Chaipimi 6pura tandanajurcanchi. Chai chozagutaca coco palmeracunahuan rurashpami, manglar palmeracunahuan techotaca taparcanchi. Tiaringapaca, palmera troncocunatami asientocunata rurarcanchi” ninmi.

 Cutin shuj viajecunaca, paicunapa huasicunapimi huauquipanicunaca tandanajun carca. Panigu Virginiaca ninmi: “Ñucanchi huasica uchilagumi carca. Ujsha jihuacunahuan, bambú nishca sucuscunahuan rurashcami carca. Domingota tandanajungapami, cada sábado ñucanchi cosasgucunataca ladoman churan carcanchi” ninmi. Cutin huauquigu Noelca ninmi: “Shuj huasipica tamia yacupash shutujunmi carca. Chaimi tamia yacutaca baldecunapi japin carcanchi. Shinapash, ñucanchi huauquipanicunahuan tandanajushca caimandaca, nimata na chaicunataca sintinllu carcanchi” ninmi.

 Huauquipanicunaca, culqui faltajllagucuna cashpapash, predicanataca na saquircachu. Isla de Negros nishcapi causajuj Lindina shuti paniguca ninmi: “Ñuca familiapica ashtacacunami caparcanchi. Pero ñuca taitallami trabajotaca charirca. Chaimi predicacionman ringapaca pasajegutaca na charin carcanchi. Chaquillami territoriomanga rin carcanchi. Pero taucacuna caimandaca, asi asimi cushijushpa rin carcanchi. Ñucanchicuna esforzarinajujpi Jehová Dios cushilla cajtaca seguromi caparcanchi” ninmi.

 Predicana territoriocunaca caru carupimi carca, urcucunapimi carca. Chai territoriocunaman chayangapaca huaquinbillami buscunaca tian carca. Huaquinbicarin ni shuj bus na tianllu carca. Isla de Luzón nishcamanda panigu Estherca ninmi: “Caru territoriocunaman ringapaca, 6 a 12 turiñañagucunami ali horata jatarishpa tauca kilometrocunata chaquilla rin carcanchi” nin. “Punlla enteromi predicashpa quidan carcanchi. Almorzangapaca yanushpami micunataca apan carcanchi. Jatun yuracunapi llandurishpa, tucuicuna micushpa tianajun carcanchi” ninmi. “Huaquin turi ñañagucunaca micunaguta na charishpapashmi predicangapaj rin carca. Paicunataca ‘ama pinaripanguichichu, micunaca suficientemi tian’ nin carcanchi” ninmi.

 Predicangapaj tucui shunguhuan esforzarishcamandaca Jehová Diosca ashtacatami paicunataca bendiciarca. Por ejemplo, año 1970pica, 54 mil 789 publicadorcunallami Filipinas llactapica tiarca. Pero año 1989pica, dobleta mirashpami 102 mil 487 publicadorcuna tiarca. Año 2023picarin, 253 mil 876 testigo de Jehovacunami tiarca.

 Huauquipanicunaca pobregucuna cashpapash, espiritualmenteca charij charijcunami carca. Huauquigu Antonioca, “pobre cashpapashmi Jehová Diostaca juyarcanchi” ninmi. Fe Abad shuti paniguca “shuj tiempotaca ñuca cusahuanga nimata na culquitaca charircanchichu” ninmi. “Shinallata, chai tiempopica ashtahuanmi Jehová Diosmanga quimirircanchi. Minishtirishca cosascunahuanlla cushilla causanatami yachajuparcanchi. Ñucanchicunata ricushpami ñucanchi huahuacunapash Jehová Diospi confianata yachajurca” ninmi.

 Samar shuti islapi causajuj panigu Lucilaca ninmi: “Pobre cashpapashmi Jehová Diosta sirvitaca ushanchi. Jehová Diosta en primer churashpaca, cushillami caita ushapanchi. Ashtahuangarin, Bibliata ñucahuan yachajuj gentegucuna bautizarishpa, paicunapash precursorcuna tucujta ricuna bendiciondami charipashcani” ninmi.

 Jipacunaman shinlli tiempocuna chayamunataca alimi yachapanchi. Chaimandami Rodolfo shuti anciano huauquigu imata nishcataca yaipi charina capanchi. Paica nircami: “Huata 1970cunapi y 1980cunapica, jatun llaqui tiempocunapimi causaparcanchi. Pero Jehová Diosca siempremi ñucataca juyashpa ayudahuarca. Siempremi alipacha cuidahuarca. Chaimi culqui faltajllagu cashpaca, cashnapacha pobrechu causana cashcani nishpaca na llaquirijun carcani. Cunanbillatami ali causaita charipashcani. Shamuj punllacunapicarin, paraíso alpagupi causashpami ‘ciertopacha ali causaitaca’ charipasha” ninmi (1 Timoteo 6:19).