Segunda Guerra Mundial tucurishca jipaca, Europapi llactapi ashtaca llactacunaca tucuritapacha tucurishcami carca. Testigo de Jehovacunapash y shuj gentecunapashmi campo de concentraciongunapi preso causarca. Libre llujshishca jipaca paicunapa causaica dificilmi carca. Micunaguta, ropaguta o shuj minishtirishca cosascunatapash na charircachu. Faltajllagucunami causanajurca. Gentecunaca ni siquiera maipi causana pushtugutallapash na charircachu. Karin Hartung shuti paniguca ninmi: “Huaquin huasicunallami tiarca. Chaimandami, tucuicunallata familiacunataca huasipi mingachin carca o shuj cuartoguta arrendachin carca” ninmi. Gertrud Poetzinger paniguca, 7 huata y chaupitami diferente campo de concentraciongunapi preso causarca. Libre llujshishpaca herramientacunata alichina uchilla pushtugupimi causarca, puñuitapash sillapimi puñun carca.

 Guerra tucuchishca pushtucunapi causanajuj huauquipanicunata ayudangapaca ¿imatata Jehová Diospa organizacionga rurarca? Guerra jipa llaquinaita causanajushca huauquipanicunapa ejemplomandaca ¿imatata yachajupanchi?

 Europa llactacunapi huauquipanicunataca uchallami Jehová Diospa organizacionga ayudarca. Noviembre y diciembre de 1945​pica, central mundialmanda huauqui Nathan Knorr y Milton Henschelmi Inglaterra, Suiza, Francia, Bélgica, Países Bajos, Dinamarca, Suecia, Finlandia y Noruega llactacunata visitarca. Chai llactacunapi huauquipanicuna imata minishtinajujta yachangapami visitarca. Huauqui Knorrca nircami: “Por primera vezmi chai tucui llactacunata guerra imashina tucuchishcataca ricui usharcanchi” nirca.

 Chai viajeca, huauqui Nathan Knorrta Alemania llactaman yaicuchunga autoridadcunaca na saquircachu. Chaimi chai tiempopi Alemania sucursalta supervisajuj huauqui Erick Frostca, huauqui Knorrhuan tuparingapaj rirca. Huauqui Erickca nircami: “Huauqui Knorrca alipacha consejocunatami curca. Micunagutapash y ropagutapash cachamushunmi nishpami prometirca”. Shinallata huauqui Erickca nircami: “Asha tiempo jipallami Alemaniamanga harinahuan, mantecahuan, avenahuan y shuj shuj micunacunahuanbash jatun cargamentocuna chayamurca. Shuj llactacunamanda Testigocunaca, zapatocunahuan, interiorcunahuan y shuj shuj ropacunahuanmi jatun cajacunata cachamurca” nircami. Chai tucuilla cosascunata huauquicuna chasquishpaca, cushijuimandaca huacashpami chasquirca. Shinallata shuj informepica nijurcami: “Huauquicunaca na shuj viajellachu shina cachanajurca. Sino ishcai huata y chaupitami cosascunataca cachanajurca” ninmi. a

 Ña alillata causanajushpaca, huauquipanicunaca Jehová Diosta ashtahuan sirvingapami munarca. Shinaca ¿imatata rurai callarirca?

 Paicunaca Bibliata estudiashpa, reuniongunaman rishpa y predicashpami catirca (Efesios 5:15, 16). Guerra tiempopica, Bibliamanda publicaciongunata charina, Jehovata adorangapaj reuniongunaman rina y predicanaca dificilmi carca. Shinapash guerra jipaca, asha ashami normalmente predicaita y reuniongunaman ritapash usharcanchi. Austria llactapi causaj Jürgen Rundel huauquica ninmi: “Informador b hojapi información y superintendentecunami ñucanchitaca Bibliata estudiashpa, reuniongunaman rishpa y predicashpa catichun animarca. Ñucanchicunapaca Jehová Dios, Jesús, Bibliata estudiana y predicacionmi ashtahuan importante carca. Chai punllacunapica televisionda ricuna distracciongunataca na charircanchichu” ninmi.

 Ulrike Krolop shuti paniguca ninmi: “Bibliapi maijanbash temata ali ali estudiashpaca ninandami cushijun carcani. Ñuca cusaguca ali ejemplotami ricuchihuarca. Villajun revista cada chayamushcatami, paica imata rurajushcatapash saquishpa estudian carca” ninmi. Ñaupa parrafocunapi Karin paniguca ninmi: “Guerra tiempopica, ratomi cosascuna illa quidarcanchi. Pero espiritual cosascunataca siempremi charircanchi, chayamujunllami carca. Jehová Diosca siempremi paita ali sirvinajujcunataca cuidariajurca” ninmi.

 Cutinmi predicai callarirca (Mateo 28:19, 20). Guerra tiempopica, testigo de Jehovacunaca libremente predicaita, reuniongunaman ritapash na ushanllu carca. Friedhelm huauquica, guerra tucurishcamandami tucuilla huauquipanicunaca predicangapaj rirca nirca. Chai tiempomanda parlashpaca Ulrike paniguca ninmi: “Ñuca cusapa familiata predicashca primer Testigoca, campo de concentracionbi churajuna uniformetaca todaviami churajushcara cashcarca nin. Chai turiguca llujshishcandimi predicai callarishcarca” ninmi. Jürgen huauquica ninmi: “Guerra jipaca, tucuicunami predicangapaj munanajurca. Ashtaca jovengunaca a tiempo completomi Jehová Diostaca sirvi callarirca” ninmi.

 Ulrike panigupa familiaca guerra jipami Bibliataca estudiai callarirca. Panigu Ulrikeca, “bomba urmashca llactacunapica llaquinaitami causanajurca” ninmi. Ashtaca gentecunaca urmashca huasicunapimi causanajurca. Shinaca ¿imashinashi Testigocunaca gentecunataca tarin carca? Chai paniguca ninmi: “Lámpara prindiriajujta o cushnijujtami mascan carcanchi” ninmi.

 Caishuj chaishujmi animarin carca (1 Tesalonicenses 5:11). Guerra tiempopica, testigo de Jehovacunaca ninandami maltratai tucurca. Shinapash guerra tucurishca jipaca, imashina sufrishcata pensarinajunapa randica caishuj chaishuj animaringapami esforzarirca. Jehová Diosmanda nunca na caruyashcamandaca cushijushcacunapachami carca (Santiago 1:2, 3). Cunanbi Estado Unidospi causajuj Johannes huauquica ninmi: “Ñucanchipa superintendente de circuitoca campo de concentraciongunapimi cashcarca. Chaicunapi cajpi, huauquipanicunata Jehová Dios imashina ayudashcatami ashtaca experienciacunata parlan carca. Chai experienciacunata uyashpaca ninandami animarin carcanchi” ninmi.

 Johannesca ninmi, huauquicunaca, campo de concentraciongunapi Jehová Dios imashina paicunata ayudashcata, imashina paicunapa oraciongunata contestashcata yarishpami Jehová Diosmandaca na caruyarca ninmi. Shinallata imashinami ña niparcanchi, chai huauquipanicunaca Bibliata cada punlla liishpa, reunionguman rishpa y predicashpami Jehová Diosmandaca na caruyarca. Elisabeth paniguca, año 1946​pimi Núremberg llactapi asambleaman rirca. Paica ninmi: “Preso cashca huauquipanicunaca todaviami tsala tsala, debilllagucuna ricunajurca. Pero imacunalla pasashcata parlashpaca, cushijushca, contentocunami parlanajurca” ninmi (Romanos 12:11).

 Unidocunami carca (Romanos 1:11, 12). Guerra tiempopica, catiriashpa llaquichi tucunajushcamandami, huauquipanicunaca unaillaguta tandanajushpa igual caitaca na ushan carca. Karin paniguca ninmi: “Autoridadcuna ricujpi, turiñañacunata ama peligropi churangapami casi nunca na visitarin carca” ninmi. Guerra tucurijpica, ñana shinachu carca. Friedhelm huauquica ninmi: “Huauquipanicunaca tucuitami igual ruran carca. Reunionguna rina y predicanami paicunapaca ashtahuan importante carca” ninmi.

 Alemania llactamanda Dietrich shuti ancianoca, guerra jipaca huaquin Testigocunallami carrotaca charirca ninmi. Paica ninmi: “Reuniongunamanga en grupomi chaquilla rin carcanchi. Shinami ali amigocuna carcanchi, shuj familia cuendami carcanchi” ninmi.

 Cunan punllacunapica, imapash llaquicuna, terremotocuna, unguicuna, culqui faltajpimi llaquillacuna causanchi (2 Timoteo 3:1). Shina llaquicunapi cashpapash, na yapata preocuparinachu capanchi. Alemania llactapi dictadura tiashca tiempopi causashca huauquipanicunatami yarina capanchi. Paicunaca Jehová Dios ayudajushcamandami Jehová Diosmandaca nunca na caruyarca. Shinaca apóstol Pabloshnami cana capanchi. Paica nircami: “Tucui shunguhuan confiashpami nita ushapanguichi: ‘Jehová Diosmi ñucataca ayudahuanga. Ñucaca na manllashachu. Gentecunaca na imatapash rurai ushahuangachu’ nishpa” (Hebreos 13:6).