Brasil llactamanda Agostinhoca ninmi: “Campopi, shuj hacienda cuendagupimi viñarcani. Ñucanchi familiaca pobre pobremi carca. Trabajashpa familiata ayudangapami escuelamanda llujshircani” ninmi. Agostinhoca, 33 huatacunata charishpami, liinata, escribinataca yachajurca. Paica ninbashmi: “Liinata, escribinata yachajushpami ali sintirircani” ninmi.

 Cai último 70 huatacunapica, Agostinhota y shuj 250 mil yali gentecunatapashmi testigo de Jehovacunaca liinata y escribinata yachachishca. ¿Imamandata testigo de Jehovacunaca alfabetizashpa ayudan? Liinata, escribinata yachajunaca ¿imashinata gentecunataca ayudashca?

 Año 1935​pica, testigo de Jehovacunaca 115 llactacunapimi predicanajurca. Shuj idiomacunata parlaj gentecunapash ali villaicunata uyachunga, traducishca grabashca discursocunatami misionerocunaca uyachin carca. Huaquinbillami chai gentecuna parlashca idiomapillata publicaciongunataca cun carca. Ashtaca gentecunami Bibliamanda yachajungapaj munan carca. Pero ashtacacunaca liinata, escribinataca na yachanllu carca. Chaimandami paicunaman Bibliamanda yachachinaca difícil carca.

 Bibliata na lii ushashpaca ¿imashinashi Bibliapi consejocunataca intindi ushanman carca? ¿Imashinashi imata yachajushcataca pactachi ushanman carca? (Josué 1:8; Salmo 1:2, 3). Cristianocuna pactachina obligaciongunata pactachinapash, paicunapaca dificilmi carca. Por ejemplo, taitamamacuna liinata na yachashpaca, paicunapa huahuacunaman Biblia imata nijujta yachachinaca dificilmi carca (Deuteronomio 6:6, 7). Shinallata, liita na ushaj mushuj Testigocunapaca, predicana y shujcunaman Bibliamanda yachachinaca shinllimi carca.

 Año 1940cunapi y 1950cunapica, Nathan H. Knorr y Milton G. Henschel shuti huauquicunami, testigo de Jehovacunapa organizaciondaca ñaupaman pushanajurca. Paicunaca predicacionda aliguta organizachun ayudangapami tauca llactacunata visitarca. Mayoría gentecuna liinata na yachaj llactacunapica, alfabetización clasecunata congregaciongunapi organizachunmi sucursalcunataca animarca.

 Chai clasecuna imashina canata yachachunmi, sucursalcunaca instrucciongunata congregaciongunaman cacharca. Huaquin llactacunapi huauquicunaca, gobiernocuna rurashca alfabetizaciongunatami aprovecharca. Por ejemplo, Brasil llactamanda sucursalca, gobierno cushca librocunatami congregaciongunamanga cacharca. Cutin shuj llactacunapi Testigocunaca, paicunallami alfabetización clasecunataca alistana tucurca.

 Jari cashpa, huarmi cashpa jovenllacuna cashpa o mayorllacuna cashpapash, tucui gentecunami alfabetización clasecunamanga rinalla carca. Aunque shujlla congregacionbi tauca idiomacunapi yachachinajujpipash, alfabetización clasecunaca, gentecuna paicunapa shimipillata lii ushachunmi ayudarca.

 ¿Imashinata alfabetización clasecunaca gentecunata ayudarca? México llactamanda shuj testigo de Jehová huarmiguca ninmi: “Biblia imata nijujtaca cunanmi lii ushapani. Cunanmi Bibliapi yachajushcacunaca ñuca shunguman chayan. Liinata yachajuimandami, ñucapa vecinocunahuanbash tranquila parlaita ushapani. Shuj gentecunamanbashmi Bibliapi ali villaicunataca predicanilla” ninmi.

 Bibliata intindichun ayudashca jahuapash ¿imashinata alfabetización clasecunaca gentecunata ayudashca? Burundi llactamanda Isaacca ninmi: “Liinata, escribinata yachanaca construccionbipashmi ayudahuashca. Cunanga construccionbi trabajashpami, jatun obracunata supervisajuni” ninmi.

 Perú llactaman Jesusa huarmiguca, 49 huatacunata charishpami alfabetización clasecunaman ri callarirca. Jesusaca ninmi: “Ñucaca huasi ruraicunahuanmi yalini. Chaimi mercadoman rishpaca, cosascuna ima shuti cajta, mashna valijta ricuna cani. Nara liinata yachashpaca, purimandami purin carcani. Pero alfabetizacionman rishpa yachajuimandaca, comprascunata randingapaj rishpaca tranquilami rini” ninmi.

 Chai tucui huatacunapica, tauca llactacunapimi autoridadcunaca alfabetizashcamanda testigo de Jehovacunataca felicitashca. Cunanbipash Testigocunaca alfabetizanajunrami. Shinallata, ashtahuan experienciata japishpami, alfabetización clasecunataca ashtahuan mejorashpa catishca. Liinata na yachaj o ashagutalla liinata yachaj gentecunata ayudangapaca, casi 224 millón folletocunatami, 720 idiomacunapi llujchishca. a