Rachelca cunanbica República Dominicana llactapimi causan. Paica ninmi: “Ñuca nacirijpica ñuca taitamamaca testigo de Jehovacunami carca. Shinapash, ñuca 7 huatacunata charijpica, ñuca taitaca ñana testigo de Jehovacunahuan tandanajunllu carca. Jehová Diospa contrami tucurca. Millai millaimi carca. Chaimandami Jehovata sirvinaca ñucapaca shinlli carca. Huaquinbicarin Jehovata sirvinata saquichunmi ñuca taitaca shuj celularta, Disneylandiaman viajeta o tarjeta de creditota ñucamanga ofrecin carca. Cutin huaquinbica, Jehovata cungachunga ninandami macahuan carca. Ñuca taitaca na parlai ushashpa, na puri ushashpaca tandanajuicunamanga na rita ushangachu yashpami shina macan carca. Shina rurajpipash tandanajuicunaman rinataca nunca na saquircanichu.

 ”Ñuca taitaca ñuca mamita ama ricuchunga illashca horasmi macahuan carca. Villajpica mamitatapashmi macasha ninmi carca. Verdeyashcata ricujpica, ñuca mamitamanga munai na munai artes marcialescunata taita yachachijpimi shina cani ninmi carcani.

 ”Yapa huahua caimanda, ñuca taitatapash ninanda manllaimandami ima pasajushcataca ñuca mamitamanga na villai usharcani. Chaimi Jehovamanlla villan carcani. Ñuca huasi lado bosquepimi puringapaj rin carcani. Ñuca huasica Maryland (Estados Unidos) llactapimi carca. Chai bosquepica roble nishca shuj juyailla jatun quirumi tiarca. Chai quiruman rishpa, shuj ramapi tiarishpami Jehová Diostaca mañan carcani. Chaipica ñuca imashina sintirishcata, paipa ayudahuan causashpa catishpaca, jatunyashpa paita imashina sirvinatami Jehovamanga parlan carcani. Shinallata Paraisopi imata ruranata, ima laya familiata charinata, manllaitapash, nanaitapash ñana charishpa tranquilo, cushilla sintirinatami parlan carcani.

 ”Ñuca taita ninanda macashpa, imatapash carasha nishpa Jehovamanda caruyachingapaj munajpica, Jehová Dios tranquilo sintirichun, ñuca shinllichishpa ayudashcatami cuenta japircani. Jehová Diosca tucui fuerzahuan paitalla sirvishpa catichunmi ayudarca.

 ”10 huatacunata charishpami bautizarircani. Ishcai huatacuna jipaca precursora shinami sirvi callarircani. Ñuca taitaca chaitaca na yacharcachu. Shinapash yachaj chayashpaca ninanda macashpami quijadastapash ladoman churarca.

 ”Huaquingunaca precursora cangapaca yapa jovenmi cangui nihuanmi carca. Shinallata, chai responsabilidadtaca na pactachingachu yashpami preocuparin carca. Jipamanga chai llactapi ashtaca joven Testigocunaca Jehovata ashtahuan sirvingapaj na esforzarinajujtami ricurcani. Paicunaca fiestacunapilla, imapash diversiongunapillami ocupado yalinajurca. Chaimi paicunata ashata envidian carcani. Huaquinbicarin ñucapash shinallata rurangapami munan carcani. Chaimandami predicashpalla yalinapa randica, chaishuj jovengunahuan divirtirishpa yalinami ali can yashpa pensarin carcani. Shina sintirijushpaca siempremi Jehová Diosman villan carcani.

 ”15 huatacunata charijpica, shuj importante agencia de modelomi ñucahuan parlarca. Chai agenciahuan Milán, Italia llactapi trabajajpica ashtaca culquitami pagasha nirca. Modelo tucunata, revistacunapi llujshinata, caro ropacunata modelana cashcata uyashpaca ninandami cushijurcani. Ñami casi quimsa huatacunata precursora regular shina sirvijurcani. Chaimi cashna pensarcani: ‘Cai trabajohuanga suficientemi ñuca gastocunapa, ashtaca huatacunata precursora cashpa catingapaj charigrini yarcanimi’. Ñuca taitaca ñucanchitaca jichushpami ña rishca carca. Chaimi cai culquiguca ñuca mamitatapashmi ayudanga yarcani.

 ”Caimanda Jehová Diosta mañarcani. Ñuca mamitahuanbashmi parlarcani. Paica ashtaca huatacunatami precursora carca. Shinallata ñuca respetashca, juyashca ancianohuanbashmi parlarcani. Ashtahuanbash, ñuca alicachishca jatun quirupi Taita Diosta mañashpa catingapami rircani. Jehová Diosca Bibliamanda Eclesiastés 5:4​huanmi ñuca oraciondaca contestarca. Cai textotaca turi ancianomi liirca. Cai textopica, Taita Diosman imatapash ofrecishpaca pactachinapachami canchi nishpa yachachi. Chaipica nin: ‘Imagutapash rurashapachami nishpaca, ama unayashpa ucha pactachingui’ ninmi. Jehová Diostaca ñucaca tucui shungumanmi candaca sirvisha nishcami carcani. Chaipi trabajashpaca imata ofrecishcataca na pactachi ushanachu carcani. Chaimandami chai trabajotaca na chasquircani.

 ”Jehová Diospa ayudahuanga causashpami catishcani. Cushillapachami cani. Ñuca cusa Jaserhuan y ñuca churi Connorhuanmi causani. Paica ñami 9 huatacunata charin. Ñuca cusaguca ancianomi can. Cutin ñuca churiguca publicador no bautizadomi can. Casi 27 huatacunatami tiempo completo sirvijuni.

 ”Huasi lado bosquepi jatun quiru jahuapi Jehová Dioshuan unaita parlan cashcatami cutin cutin yarini. Ñucata ayudahuan nishpami Jehovata mañan carcani. Paica ninandami ayudahuashca. Fuerzata, consuelota cushpa, imata ruranata ricuchishpami ayudahuarca. Tucui ñuca causaipimi Jehová Diosca cutin cutin shuj juyaj taita cashcata ricuchishca. Paita tucui ñuca causaipi sirvishcataca na arripintirinichu. Shina rurashpaca shuj alipacha decisiondami japishcani”.