Ñucaca Uganda llactapi Gomba pueblopimi nacirircani. Chaipica casi tucui gentecunami pobrecuna carca. Ñucanchi llactapica michaca na tianllu carca. Chaimandami tutaca aceite lamparacunata utilizan carcanchi.

 Ñuca taitacunaca campopi trabajan carca. Chaimandami Ruanda llactamanda Uganda llactaman rirca. Paicunaca cafeta, platanocunatami tarpun carca. Platanocunahuanga waragi nishca tragotami ruran carca. Shinallata ñuca taitacunaca pollocunata, chivocunata, cuchicunata, huagracunatami viñachin carca. Ñuca llactapa costumbrecunamanda, ñucata imashina viñachishcamandami huarmicunaca cusataca tucuipimi cazuna can, imatapash paicunaca nunca na ninachu can yashpa viñarcani.

 23 huatacunata charishpaca Ruanda llactamanmi rircani. Chaipica ñuca edadta charij jovengunahuanmi bailangapaj rin cariani. Shuj discotecapicarin chaipilla paraimandami ñucataca gratis yaicuchun saquihuan carca. Shinallata peleacunamanda, yahuarsapa macanajuimanda peliculacunata ricunatami ninanda alicachin carcani. Tucui chai cosascunamandami millai millai tucurcani. Shinallata machashpalla, huainayashpallami causan carcani.

 Huata 2000​pica, Skolastique Kabagwira shuti jovenhuanmi causangapaj rircani. Paihuanga quimsa huahuagucunatami charircani. Ñuca imashina viñashcamandami ñuca huarmitaca ñucata saludangapaj, imaguta mañangapapash ñuca ñaupapi cungurichun munan carcani. Ashtahuanbash tucui ima charishcacunapash ñucapallami can yashpami, caicunahuanga ñuca munashcatami rurai ushani yan carcani. Cai siempremi tutacuna llujshin carca. Y 3 de la mañanata machashca tigramun carcani. Punguta huactachishcandi na pascajpica, ñuca huarmitaca macashpami saquin carcani.

 Chai tiempopica, shuj compañía de seguridad privadapi supervisor shina trabajan carcani. Alipachami ganan carcani. Ñuca huarmica ñuca cambiachun munashpami pai rijushca pentecostal inglesiaman richun convincingapaj munarca. Pero ñucaca na ringapaj munarcanichu. Chaipa randica shuj huarmihuan llujshi carcani. Ñucaca millai millai carcani. Huainayashpallami causan carcani. Chaimandami ñuca huarmi Skolastiqueca ñuca quimsa huahuagucunandi paipa taitacunapa huasipi causangapaj rirca.

 Ñucanchipa shuj mayorlla amigomi ñuca imashina causajushcamanda ñucahuan parlarca. Paica ñuca huarmi Skolastiquehuan tigrachunmi animahuarca. Canba juyailla huahuacunaca taita illaj viñanaca na alichu can nihuarcami. Chaimi 2005 huatapica machanata, chaishuj huarmitapash saquishpa Skolastiquehuan cutin tigrarcani. Y huata 2006​pimi cazararcanchi. Shinapash millai millai canata, ñuca huarmita maltratanataca na saquircanichu.

 Huata 2008​pica, Joël shuti testigo de Jehová predicajushpami ñuca punguta huactachirca. Chaimi paita uyarcani. Paica Bonaventure shuti shuj testigo de Jehovahuanmi ñucataca huaquin quillacunata visitarca. Paicunahuanga Bibliamandaca ashtacami parlarcanchi. Ashtaca tapuicunatami ruran carcani. Apocalipsis libromandami ashtahuanga tapun carcani. Testigo de Jehovacuna pandarishca cashcata ricuchingapami shina tapun carcani. Por ejemplo ñucaca caitami tapurcani: “¿Imamandata ninguichi, Apocalipsis 7:9​pi parlashca ‘na cuentai ushanalla ashtaca ashtaca gentecunaca’ cai alpapimi causanga nishpa? Chai versiculollapita ‘chai gentecunaca mandangapaj tiarina pushtu ñaupapi y Maltun Llamagupa ñaupapimi shayanajurca’ nin” nircanimi. Joëlca ashtaca pacienciahuanmi ñuca tapuicunata contestan carca. Por ejemplo, Isaías 66:1​pica Taita Diosca cai alpaca ‘ñuca chaqui sarunami” can nijunmi. Chaimandami na cuentai ushanalla ashtaca ashtaca gentecunaca Taita Diospa ñaupapi shayanajun nishpami yachachihuarca. Shinallata Salmo 37:29​tami liircani. Chaipica ali gentecunaca cai alpapimi para siempre causanga nijunmi.

 Jipamanga Bibliatami yachajui callarircani. Chaimi Bonaventure ñucaman, ñuca huarmimanbash yachachi callarirca. Bibliata yachajushpami ñuca causaipica asha asha cambiai callarircani. Ñuca huarmigutaca respetohuanmi tratai callarircani. Ñucata saludachun o imagutapash mañangapaj ñuca huarmi cungurichunga ña na shuyarcanichu. Tucui charishcacunapash ñucapallami can yaitapash ñana yarcanichu. Nali peliculacunata ricunatapashmi saquircani. Chaicunata saquina na facilchu carca. Humilde canata, controlarinatami yachajurcani.

 Huaquin huatacuna huashamanga ñuca punda churi Christiandaca Uganda llactapi shuj familiacunahuan causachunmi saquingapaj rishca carcani. Shinapash, Deuteronomio 6:4-7​ta liishca jipaca, ñucanchi huahuacunata cuidana, paicunaman Bibliamanda yachachina responsabilidadtaca Taita Diosca ñucanchiman cushcatami cuenta urmarcani. Ñuca churigu cutin huasipi cajpica ninandami cushijurcanchi. Paipash cushijushcami carca.

 Jehová Dios ninan llaquij cashcatami yachajurcani. Chaimi ñuca punda causaipi nalita rurashcacunata perdonashcataca seguro cani. Ñuca huarmigupash Bibliata yachajushcamandaca ninandami cushijuni. Ishcandimi Jehovaman mingarishpa 4 de diciembre de 2010​ta bautizarircanchi. Cunanga ishcandimi randimanda confianzata charinchi. Bibliapa consejocunata ñucanchi familiapi pactachinatapashmi alicachinchi. Ñuca huarmiguca trabajomanda huasiman directo shamujpi, paita respetohuan, ali tratajpi, ñuca ña na machajta ricushpaca ninandami alicachin. Shinallata, ñuca ñana millai millai cajpimi ñuca huarmiguca cushilla can. Huata 2015​pica congregacionda ayudachunmi anciano shina sirvina nombramientota chasquircani. Ñucanchi 5 huahuacunamandaca quimsaca ñami bautizarishca can.

 Testigo de Jehovacunahuan Bibliamanda yachajui callarishpa, na yangata paicunapa yachachishcacunataca chasquircanichu. Shinapash, ñuca tapuicunata Bibliahuan siempre contestajtami alicachircani. Ñucapash ñuca huarmigupash Taita Diosta sirvijcunaca pai mandashcashna causana cashcatami asha asha cuenta japircanchi. Jehová Diostaca paiman quimirichun, paipa familiapi cachun saquishcamandaca ninandami agradicini. Ñucallatami Taita Diosca paita sirvingapaj cambiocunata rurangapaj munajpica ciertopacha ayudajta ricushcani.