Ñuca familiaca Tonga llactamandami. Chai llactapica 170 islacunami tian. Ñucanchica carrota, michatapash na charircanchichu. Ashalla cosasgucunahuanllami causan carcanchi. Ñucanchi causashca pushtupica yacuta huaquin atalpagucunatapashmi charircanchi. Vacaciongunapica ñuca ishcai huauquicunandimi ñuca taitataca pambapi trabajaita ayudan carcanchi. Chaipica platanosta, yucata, tarota, ñame nishcacunatami tarpun carcanchi. Ñuca taita ashagutalla ganajpimi chai tarpushcagucunahuan ayudarin carcanchi. Ñucanchi familiaca chai llactapi gentecunashnallatami Bibliataca ninanda respetan carca. Chaimandami shuj Iglesiaman rin carcanchi. Shinapash ali causaita charingapaca shuj llactamanmi causangapaj rina canchi yanmi carcanchi.

 16 huatacunata charijpimi ñuca tioca Estados Unidos llactapi causangapaj richun ñucanchicunataca ayudarca. Chai llactapi costumbrecunaca ñucanchicunapaca shinllimi carca. Tucui minishtirishcaguta charishpapash pobrella pushtugupimi causarcanchi. Chaipica nali gentecuna, drogacunata chupaj gentecunami tiarca. Chaimandami casi tucui tutacuna disparocunata uyan carcanchi. Vecinocunapash chai pandillacunataca manllaihuanmi causan carca. Pandillamanda gentecunaca casi tucuicunami pistolacunata apashpa purin carca. Ñucaca pechopi disparai tucushcamandami cunangaman balataca pechopi charini.

 Colegiopi cashpaca ñuca compañerocunashnami cangapaj munarcani. Chaimandami tucui fiestacunaman ri callarircani. Tragocunata, drogacunatapashmi ashtahuan chupai callarircani. Chaimandami ashtahuan millai tucurcani. Ñucaca cocaína nishca drogatami ashtahuan chupan carcani. Drogacunata randingapami shuhuai callarircani. Ñuca familiacuna shuj religionman purishpapash ñucataca nunca na consejashpa ayudahuarcachu. Ñucataca shujcunata llaquichishcamandami tauca viajecunata prezo apahuarca. Jipamangarin carcelpimi quedarcani. Nalicunatalla rurashpami causajurcani.

 Tonga llactamanda gentecunapaca Navidadca importantepachami can. Huata 1997​pi carcelpi cajpica shuj prezomi Bibliata charijujta ricuhuashcarca. Chai punllacunapica Navidadmi carca. Chaimi paica Jesús nacirishcamanda Bibliapi imata nijta yachanguichu nishpa tapuhuarca, Bibliapi chaicunamanda parlajushcataca na yacharcanichu. Chai prezoca Jesús nacirishcamandaca Bibliapimi ricuchihuarca. Chaimi Bibliapi Navidadmanda nimata na parlajushcata cuenta japircani (Mateo 2:1-12; Lucas 2:5-14). Chaita yachajushpaca Bibliapica imacunatallashi yachachin nishpami pensarircani. Chai prezoca, carcelpi Testigo de Jehovacunapa tandanajuicunamanmi cada semana rijushcarca. Chaimi ñucapash paita cumbashpa rircani. Chai tandanajuipica Apocalipsis librotami yachajunajushcarca. Nimata na intindishpapash chaipica tucuita Bibliamanda yachachijushcatami cuenta japircani.

 Testigo de Jehovacuna Bibliamanda yachachishunllami nijpica cushijushpami ari nircani. Cai alpapi shuj paraíso tianataca nunca na uyashcarcanichu (Isaías 35:5-8). Taita Diospa ñaupapi ali ricuringapaca ñuca causaipi cambiocunata rurana cashcatami cuenta japircani. Shinallata nali gentecunaca paraíso alpagupi na causai ushana cashcatami yachajurcani (1 Corintios 6:9, 10). Chaimandami tabacota chupanata, tragota ufianata, drogata chupanatapash saquinata decidircani. Ama millai millai cangapajpashmi esforzarircani.

 Nara carcelmanda llujshina pactajpillatami 1999 huatapica centro de detención para inmigrantes nishca pushtuman cachahuarca. Chaipi cashpaca shuj huata yalitami Testigo de Jehovacunahuanga na tuparircani. Shina cashpapash ñuca causaipica cambiocunata rurashpami catijurcani. Huata 2000​pica Estados Unidosmandami Tonga llactaman tigrachihuarca.

 Tonga llactaman chayashpaca Bibliamanda cutin yachajungapami Testigocunata mascai callarircani. Bibliapa yachachishcacunataca ninandami alicachircani. Tonga llactamanda Testigocunapash, Estados Unidosmanda Testigocunashnallata tucuita Bibliamanda yachachijta ricushpami ninanda alicachircani.

 Ñuca taitaca Tonga llactamanda iglesiapi purishcamandami ninan rijsishca carca. Chaimandami Testigocunahuan yachajujujta ricushpaca ñuca familiaca ninanda culirarca. Shinapash jipamanga Biblia ñucata ayudajushcata ricushpami ñuca taitacunaca ninanda cushijurca.

 Ñuca llactapi tiashca Kava nishcata ufianata saquinami ñucapaca shinllipacha carca. Tonga llactamanda jaricunaca cada semanami kava nishcataca ufiashpa yalin carca. Kava nishca ufianataca pimienta plantapa sapicunahuanmi ruran. Cai Kava nishca ufianaca asha ashami machachin. Tonga llactaman tigrashpaca casi tucui tutacunami Kava nishcata jatuj pushtucunaman ri callarircani. Chaitaca machangacamanmi amigocunahuanga ufian carcanchi. Paicunapaca Bibliapi yachachishcacunata cazunaca na importantechu carca. Jipamanga Testigocunami chai nali ruraicunata Jehová Dios nalicachijta intindichun ayudahuarca. Chaimandami Jehová Diospa ñaupapi ali ricuringapaj munaimanda chai nali ruraicunataca saquircani.

 Testigo de Jehovacunapa casi tucui tandanajuicunamanmi ri callarircani. Jehová Diosta ali sirvijcunahuan llevarinami satanaspa trampacunapi ama urmachun ayudahuarca. Huata 2002​pi bautizarishpami Testigo de Jehová tucurcani.

 Jehová Diospa punlla nara chayamushcamandami ñucaca paita rijsi ushapashcani. Bibliapica “Unayajunmi nishpa huaquin gentecuna rimanajujpipash, Jehová Diosca paipa nishcacunapica na unayanllu” ninmi. Jehová Diosca shujllapash tucuchi tucuchunga na munanllu. Ashtahuangarin arripintirichunmi munan. Chaimandami pacienciahuan shuyajun (2 Ped. 3:9). Jehová Diosca gentecuna paiman quimirichun munaimandami cai alpataca nara tucuchishca. Chaimandami ñucapash Jehová Diosta rijsishpa paipa amigo tucui ushapashcani. Gentecuna Jehová Diosta rijsichun ayudai ushashcamandaca ninandami cushijupani.

 Jehová Dios ayudajpillami nali ruraicunataca saqui ushashcani. Pundaca drogacunata randingapaj shuhuashpa purij cashpapash, cunanbica Jehová Diosmanda villachishpami purini. Ñuca huarmigutaca congregacionbimi rijsiparcani. Cushillapachami causapanchi, shuj churigutapashmi charipanchi. Ñucanchica paraíso alpagupi alipacha causaigu tianatami ñucanchi vecinocunamanga yachachipanchi.