Ñucaca Honduras llactapimi nacirircani. Ñuca taitamamacunaca 5 huahuacunatami charirca, ñucaca ultimomi carcani. Ñuca cashcami sordo nacirishca carca. Ñucanchi causajuj puebloguca peligrosomi carca. Shinallata pobre pobremi carcanchi. Ñuca taita huañujpicarin ashtahuan nalimi carcanchi. Ñuca taita huañui punllaca ñucaca 4 huatagutallami charircani.

 Ñuca mamaca ñucanchita mantiningapaca usharishcagupi trabajashpami cuidan carca. Ropaguta randitacarin na ushanllu carcanchi. Chaimi tamia punllacunapica imaguhuanbash quilparingapaca na charin carcanchi.

 LESHO Honduras llactamanda señas shimitami asha asha yachajui callarircani. Chaimi ñucashnallata na parlaita ushaj gentecunahuan tandanajuita usharcani. Pero ñuca mamita, ñuca panicunapash señas shimitaca na yacharcachu. Huasipillata inventashca señas shimipimi paicunaca parlahuan carca. Ñuca na parlaita ushajpipash mamitaca juyaihuanmi cuidahuarca. Mamitaca masqui na señas shimita na yachashpapash pactara, tabacota fumanata, tragota ufianata yachajunguiman nishpami señas shimipi consejahuarca. Shina consejashcamandaca mamitataca ninandami agradicini.

 Ñuca uchilla cajpica mamitaca siempremi misaman pushahuan carca. Pero nimata na intindinllu carcani. Caitami yachachijun nishpapash pipash na intindichihuanllu carca. Na intindimandami aburrido yalin carcani. Ña 10 huatacunata charishpaca Católico iglesiamanga ñana rircanichu. Pero Taita Diosmanda yachajunataca munarcanimi.

 1999 huatapica ñami 23 huatacunata charircani. Chai huatapimi Estados Unidos llactamanda shuj huarmiguta rijsircani. Paica evangelicami cashcarca. Paimi Bibliamanda yachachishpa señas americano shimita yachachihuarca. Imata yachajushcata gushtaimandami mejor pastor tucungapaj munarcani. Chaimi Puerto Rico llactaman rircani. Chaipimi shuj iglesiapi señas shimita yachajungapaj munajcunataca yachachin cashcarca. 2002 huatapimi Honduras llactaman tigrarcani. Shina tigrashpaca señas shimipi parlaj gentecunapalla shuj iglesia evangelicota shayachingapami munarcani. Shina shayachichunga huaquin amigocunami ayudahuarca. Chai amigocunapurapica Patriciapashmi carca. Jipamanga paihuanmi cazararcani.

 Chai iglesiapica ñucami pastor carcani. LESHO Honduras llactamanda señas shimipi intindichingapaca Bibliamanda parlashca yuyaicunamandami dibujocunata rurashpa señaspi intindichin carcani. Honduras llactamanda shuj pueblocunapi sordo gentecuna problemacunata charijcunata ayudangapapashmi rin carcani. Shinallata misionero cuendami Estados Unidosman, Zambia llactamanbash rircani. Pero cabalta nishpaca Bibliamandaca casi nimata na yacharcani. Shujpa yachachishcata o dibujopi ricushcatallami yachachin carcani. Ciertota nishpaca ñucallatami ashtaca tapuicunata charircani. Pero respuestataca na yacharcanichu.

 Ñuca propio iglesiamandallata huaquin huarmicunaca Mario pastorca machandero, paipa huarmitapash saquishpa shuj huarmihuanmi japirishca nishpami llullacunata nishca carca. Chaita uyashpaca ninandami llaquirircanchi. Chaimi chai iglesiamanga ñana rircanchi.

 Testigo de Jehovacunaca tauca viajetami Patriciata, ñucatapash visitangapaj munarca. Shina shamujpipash nunca na chasquircanchichu. Ñucanchi iglesiamanga huaquin punllacunatami ñana rinajurcanchi. Chai jipallami ñuca huarmiguca Thomas, Liccy Testigo cusahuarmihuan Bibliamanda yachajui callarirca. Paicuna parlaita ushashpapash señas shimita yachajta ricushpaca ashataca manllarircanimi. Huaquin punllacuna jipallami ñucapash Bibliamanda paicunahuan yachajui callarircani.

 Huaquin quillacunatami señas americano shimipi shuj shuj videocunata utilizashpa Bibliamanda yachachin carca. Chai jipaca ñucanchipa huaquin amigocunami testigo de Jehovacunaca gentecunapa yuyaitami yachachishpa purin nijta uyashpaca, Bibliamanda yachajunataca chaipimi saquircanchi. Pero Thomasca Testigo de Jehovacunaca shuj líder nishcataca na charinchichu nishpami intindichihuarca. Shina nijpipash na crircanichu.

 Tauca quillacuna jipaca Patricia ñuca huarmiguca depresión o llaqui llaqui caimandami testigo de Jehovacuna cutin visitaj shamuchun nishpa Taita Diosta mañarca. Huaquin punlla jipallami shuj Testigo vecina Patriciata visitangapaj shamurca. Chaipimi Liccy cutin visitachun quidarca. Liccy huarmiguca alipacha amiga cuendami ñuca huarmigupa tucushpa cada semana parlangapaj shamun carca. Shinallata Bibliamandapash yachachin carca. Pero ñucaca Testigocunapica na crishcahuanmi yalircani.

 2012 huatapica testigo de Jehovacunaca señas hondureño shimipi ¿Cai tapuicunata yachangapaj munanguimanllu? videohuanmi shuj campañata rurashpa villachinajurca. Liccy chai videota churashpa ricuchijpica critapash na ushajurcanichu. Ñuca iglesiapica shuj infierno tiajta, huañujpica almaca causashpa catijtami yachachin carcani. Pero chai yachachishcacuna na Bibliapi tiajushcatami cuenta japircani.

 Shuj semana jipaca Tandanajui Huasiman rishpami Thomashuan parlarcani. Testigo tucungapaj na munanichu. Pero señasta parlaj gentecunaman Biblia cabalta yachachijtami yachachingapaj munani nircani. Ñucapa munaica señasta parlaj gentecunapa shuj mushuj iglesiata callarichingapami munajurcani. Chaita Thomas uyashpaca felicitahuarcami. Jipaca Efesios 4:5​tami señas shimipi intindichihuarca. Chaipica, ciertopacha Jesusta catijcunaca shujlla tandanajushcami cana canguichi nijujtami nihuarca.

 Shinallata Thomasca Los testigos de Jehová: una historia de fe viva. Parte 1: Salen de la oscuridad nishca señas americano videotami cuhuarca. Chai videopica tauca jaricuna Biblia imatapacha yachachijta ali intindingacaman cutin cutin yachajunajujtami ricuparcani. Chai videota ricujushpaca chai jaricunashna ñucapash Bibliamanda ali intindingapaj paicunashnallata mascajushcatami cuenta japircani. Chai videomi Testigocuna Bibliamanda cabalta yachachijta, paicunapa yachachishcacunapash siempre Taita Diospa Shimimanda japishcata cuenta japircani. Chaimi cutin Bibliamanda Testigocunahuan yachajui callarircani. 2014 huatapica Patriciapash, ñucapash bautizarishpami testigo de Jehová tucuparcanchi.

 Testigo de Jehovacunahuan canatami gushtani. Paicunaca Bibliapa mandashcacunatami pactachishpa causan. Shinallata paicunaca tucui gentecunatami respetohuan, ali tratan. Testigo de Jehovacunaca tranquilocuna, caishujmanda chaishujmandapashmi ayudarin. Paicunaca shujllashna tandanajushca, Bibliamanda imata yachajushcatapash chaitallatami tucuicunallata villachin. Shinapash ima idiomata parlajpi, maimanda cajpipash Testigocunaca tucui gentecunamanmi Bibliamandaca yachachin.

 Biblia imacunatalla yachachijtaca ninandami gushtani. Por ejemplo, Jehová Dios tucui poderta charijta, pailla mandana derecho charijtami yachajupashcani. Shinallata sordo gentegucunata, parlaita ushaj gentecunatapash juyaihuan tratajtami yachajuparcani. Jehová Dios ñucata juyajta yachanaca ninandami cushichihuashca. Cai alpa shuj juyailla Paraíso tucujpi tucuicuna cushilla causanatapashmi yachajupashcani. Paraisopica sano, para siempremi causashun. Chai punlla chayamuchunmi ña munapani.

 Chaimi ñuca, ñuca huarmiguhuanga sordo gentecunaman Jehová Diosmanda yachachinata gushtapanchi. Punda iglesiapi cashca huaquin gentecunamanbashmi Bibliamanda yachachipanchi. Pero pundapi pastor cashpa yachachishcashnaca na yachachipanichu. Cunanga Biblia imatapacha yachachijtami yachachipani. Shinallata ñuca ashtaca tapuicunapa respuestacunatapashmi tucuita yachajuparpani. Testigo de Jehovacunami Bibliahuan yachachihuarca.